السلام عليكم ورحمة الله وبركاته,,
مساكم\وصبحكم الله بالخير مشرفين واعضاء وزوار منتديات مكشات اسعد الله اوقاتكم بالخير والمسرات,,
كيف حالكم عساكم طيبين ان شالله في بداية شهر سبعه هذا الشهر ضربني الشوق للساحل الغربي مثل,,
شوق البل لديارها لاشعتها بروقها وانا بهالديره مثل اللي قصدبها الشاعر حمد السعيد
وجودي وجود اللي حداها الذرى والشبك

شعتها البروق وذكـــــرتها مرابعـــــها
ايه والله مثل البل اللي حداها الذرى والشبك والله لايجعل هالبيت الثاني من القصيده ينطبق علي ويردنا,,
لاهلنا وحنا بخير وماترك هالديره اللي انا فيها بالغصيبه ويقول حمد في البيت الثاني,,
تكسر عبايرها وتـرزم رزيـم ودبـك

عطت عمرها لامقدم الشبـك جابعهـا
واخذت لي عشره ايام ومالي غير ديارنا اقضي الرخصه فيها اللي تسوى باريس وتسوى اوربا كلها,,
وصكيتها حوووم على الشعيبه وصلا ومجيرمه اشوفها واتذكر حراوي مقانيصها الله يعجل بأكتوبر,,
وتواجهت مع خويانا بالشعيبه في عزبة الشريف ابوعون وخويانا هم المعتزل وابوعون وبن رشدان,,
وابو عراده ويازين ذيك الليله اللي ماتعوض عزالله ماتعوض لكن عسا الله يعوضها ومااقصر ابوعون,,
اطربنا بقصايده الطيبه ,,

يمين الصوره خوينا اسامه الحربي(بن رشدان)والثاني الظاهر غني عن التعريف الشريف ابوماجد(المعتزل) والثالث شاعرنا الشريف ابوعون والرابع عبدالرحمن الحربي (ابوعراده),,
,
,
,

واللي في النص الطراد غنام هههه ماشالله تبارك الله طراد ابوعون من يوم شفته دخلت جو اكتوبر,,
اول طراد يستعد للمقناص بالساحل الغربي ماشالله تبارك الله صكت مواسيه مع دخول شهر سبعه,,
والله يطرحبه البركه ان شالله,,,
,
,
,

يازين طلعه ماشالله فزيت الفزه اللي مابعدها يوم انه طلع حسيت نفسي بأكتوبر,,
والطير ذك الصباح حسيت انه مبسوط لاخر درجه له كم شهر بالربطه مثلي انا الحال من حاله ههه ايووالله,,
,
,
,

الله لايحرمنا ولايحرمك ياغنام من هالديار الطيبه ,,
وهذا المقطع فيه طرح فرخ شياهين من نصيب الشاعر ابوعون,,
وسالفتها ان ابوعون كان بالشعيبه
وكان فيه طير يحاولونه عيال هاشم الشريف,,
وتوجه لهم يبي يفزع لهم وقال مادام اني متوجه لهم خلني امر جبل ابوشداد مرور الكرام,,
وجيت من تحته وناظرت لراس الضلع ويقول ماكنت ابي
اطالع فيه ويوم ناظرت له ولا الطير,,
اللي اندرق وزحف عني شافني والاهي فرخ شياهين وحاولتها ومالله راد انها تنطرح واضلم علي الليل
وجيت للعزبه وطلبت من ربعنا الفزعه وماقصرو حاولناها الصبح والمقطع يكمل لكم السالفه
اهداء من الشاعر ابوعون

وهذي ابيات للشاعر ابوعون ,,

يالله تجعل دربنا دوم مخضور
................................................ وتكتب لنا في كل مبتال خيره
ياواحدً من عندك الخير مخبور
.................................................. . وإلا يدينا عن مناها قصيره
ياصالح الدنيا صواديف وقصور
............................................... وحظوظ مابين العرب مستديره
العام زانتلك على طقت النور
.................................................. ... والــدايره لعل فيها بـشـيره
وأبو خليل اللي على النجم دكتور
..................................................لا أوشك الموسم يقع نستشيره
ولا بشر المقناص جاني على الفور
.................................................. .. نزهب العزبة وقود المسيره
شلنا المخيم والمواني وماطور
................................................. وذلت محاميل النشامى قطيره
وياء رياجيل شغاميم وصقور
.................................................. ... والكل منهم ما يهون مسيره
منزالنا ما بين اجبر ومسمور
.................................................. ويردنا شط البحر والجزيرة
في مدهلن عالي وللضيف معمور
.............................................. وسوالفً لن كان دارت عطيره
وخوينا محشوم ما يجيله قصور
..................................................مخشور بالنية ونفسه قريره
وجدي على اللي كم تولع به النور
............................................... وحامت على سقفه طيور كثيره
يومي وهو سارح مع فجت النور
.................................................. .. ثم التويبه لشواطي ظهيره
ضاري على الأسفار صابر على الجور
..............................................يوم ادعس البنزين تسمع صفيرة
والى على الطبلون شبكٍ وناظور
.............................................. وإلا القراشع بالزراقي جريره
وفراش مطوينه على جنب مزرور
.................................................ومزاهبً للدرب ما هي كثيره
وإلى صبر يلقى نصيبه وماجور
.................................................. .. والرزق له ربً كريم يديره
وإلى على الشبه مدرب وغندور
............................................... ومصفي الجنحان ساقه قصيره
غنام ياطير السعد تسعة أشهور
.............................................. من صكت المربط مصفي نجيره
بيني وبينه عشرة أسنيين ودهور
................................................مثل العشير اللي ملازم عشيره
إليا سمع صوتي يحول عن الكور
................................................وان شافني بانت عليه السريره
في ما قفن ما بين شابر ومشبور
.................................................. مــن واحــدٍ قلـبـه تولع بطيره
وراع الولع كم قال أبو عون معذور
.................................................من لامني فالصيد ماني خشيره
أنا غرامي نزلت الطير للخور
.................................................. . إلـيـا تقـدمـت المـواتر أديره
النور والع و الجماهير طابور
.................................................. . وان لوح النفاح جات النفيره
اتزارقوه أعيال لاكز مذعور
.................................................. يحن منها القلب لا جات سيره
هذا يبارك لي وهذاك مخشور
.................................................. . وهذاك بمهاده ويسعد نظيره
وهذه على المعلاق مبتورة الزور
.............................................. وهذاك من تحت القدِر شب نيره
وهذا بمقهاته يباشر ومسرور
.................................................. ..ويصبها لأهل الوجيه السفيره
والوحش من زَر المرابيط مطيور
.................................................. .. يبرم كما برم الخزم من فريره
في ديرتن ساحاتها ماقع طيور
................................................ما طاب لي عن غيرها اليوم ديره
الله يسقيها من المزن منشور
.................................................. . زوابعه ترمي الهمول الغزيره
يأخذ ثمان أوجاب والخير مزبور
.................................................. .عن لاهبن وقعه سوات السعيره
يحيي الهشيم اللي من العام مدهور
..................................................من لفحت السافي وصلو الظهيره
ويطيب حال إلي من الهم مشطور
.................................................. لا طالع الديره وذا هي خضيره
صار القراء كله بساتين وزهور
.................................................. . وارتاح من بني القصايد ضميره
وصلاة ربي عد ما شعشع النور
.................................................. . وإعداد ما هبت رياح مطيره
على نبي وضح الحق مسطور
.................................................. ..... محمد المختار سيد البريره