حول البريكه يوم الاقفار زينه=دون الهضاب الحمر يمة مداخيل
نروح بالمسرا شمال المدينه=بعد العلا نضرب ثمانين بالكيل
عشرين وابحرة بلي حاسبينه=نمشي مع السودا ثلاثين وانقيل
حين يتبادا القاع ما فيه طينه=لين الضلوع الخاليات المطاويل
مسارح صغار الضبا خابرينه=وابدون باللي ما وطوها الجماميل
ذيك الشطاب المونسات الحسينه=ما نوحي غير الطير فوق الجناديل
يومين واشعلنا حصان المكينه=نبي الجنوب من العلا حزة الليل
بين عنزه واطراف وادي جهينه=نريد اشيجع قالوا ارهى به السيل
عصرن توجهنا برفق وسكينه=سبعين باحساب المسافات بالميل
لين المسا بضاعا قبل داهلينه=والا المعشا بالطلاح المشاميل
نبي الحطب ما هوب طرفا وكينه=عود السمر يصهر لحام المناقيل
في نصف ساعه والحطب واصلينه=وانزلنا فرش جلوسنا والمعاميل
والجيب واجيوب الربع صافطينه=والدلة الصفرا بها البن والهيل
ايدامنا صيد الخلا حاكرينه=بالليل نبقى بالونس والتعاليل
صيد الخلا بامر الولي ضامنينه=ما ننقل من ديارنا شلقة الحيل
واليوم راح الوقت مثل السفينه=اللي على موج البحر تمضي تطويل
ايام كانت ما لها اليوم بينه=هفيت خطاها وابتدا بعدها جيل
وين ارنب النقره وحبشي ولينه=والفارعه ما باقي الا المثاعيل
وين الجرابيع الكثار السمينه=حتى القميري بالسواحل مقاليل
الله يعيد ايام صارت دفينه=باقصى نهر دجله اليا جاري النيل
نلقا الشرايد والفروق بعدينه=وانشوف وطي الجول فوق الغراميل
والا منانا حاجتن راغبينه=هي كنز الاحيا بالبعاد المداهيل
طيب الخوي والعافيه طالبينه=وانعيش بامن الدار والعز ما نيل
ترا الرفيق الزين طلقن جبينه=والعافيه تاج الاصحا كما قيل
ناظر خليلك قبل تلقى الغبينه=المفسد العاصي حذاري له تشيل
يجيك بالنمه وكسب المشينه=عسانا ما نبلا بغدر المحابيل
عليك باللي عيلته راسمينه=ابوه واعمامه زحول الحلاحيل
واليا بغا يخاويك برق بدينه=ترا تقي الدين ما يلوي الذيل
اليا حكا لك حجته مستبينه=ما يجفي اصحابه بالاقفار ويميل
يفوح طيبه باسطنلك يمينه=يرفد خويه بالعسار المثاقيل
اليا لقيته فانت حزت الثمينه=كالتايه اللي حصل الما شهاليل
عطشان بالبيدا لحس موق عينه=ما شاف حوله بالمضامي رحاحيل
لقى الغدير اهل الغنم شاربينه=واشرف على القلته نسوها الدواليل
حكيت لك بعض الكنوز الدفينه=واهديت لك يا هيه بعض التماثيل
لا تلتف للمقفي قد فات حينه=راقب بشوفك للبعاد المقابيل