تقرير خاص عن شاليهات كادي بالقنفذة ...

محروم.كوم · #1 06-06-2010, 12:20 PM

السلام عليكم ورحمة الله وبركاته ..
وأسعد الله أوقات الجميع بكل خير ..

هذا أول تقرير لي في هذا المنتدى الشامخ وأرجو أن يحقق الهدف المنشود منه ..
وهدفي من هذا التقرير نقل تجربة شخصية لكم .. وإن كانت وللأسف تجربة ( سيئة ) ..
ألحين اسمحوا أسفّط اللغة الفصحى على جنب .. وأتكلم معكم بالبلدي ..

قرأت موضوع تفضّل به الأخ AL-MOHAREB عن شاليهات الكادي بالقنفذة .. واللي ودّه يلقي نظره على الموضوع فهو موجود على الرابط التالي :
رحلة الى القنفذه وصيد سمك + ؟؟؟؟؟ اكثر من 15 صوره + فيديو
ومن قراءتي للموضوع .. الحقيقة تحمست .. وقلت ما يبي لها .. أول زيارة للغربية إن شاء الله لازم أزور القنفذة .. ونتعرّف على معلم جديد من معالم بلادي ..

وقبل أسابيع أخذت إجازة من العمل .. وتوجهت مع العائلة الكريمة إلى الغربية .. لأداء العمرة .. وتغيير جو ..

وقلنا يالله عالقنفذة ..

بشكل عام .. المدينة بكر .. وجميلة .. وتخطيطها جميل .. وقبل هذا وذلك .. طيبة أهلها وأخلاقهم الحميدة ما تخفى عليك بمجرد مرورك حتى في الشارع ..
ولي أصدقاء من القنفذة .. أعتبرهم من خيرة من عرفت من الرجال .. :good2:

لكن .. السلبية الطاغية على معظم الإيجابيات .. واللي خلتنا حتى نختصر رحلتنا للقنفذة في يوم واحد بدل ثلاثة أيام .. هي عدم توفر سكن مناسب ..
صحيح فيه شقق مفروشة كثير .. وفيه بعض فنادق .. لكن مريت على أكثر من 10 شقق وكلها متقاربة في تدني مستوى النظافة .. والاهتمام بالترميمات ..
بالنسبة للفنادق ما جربتها لأني أشوف إن الفندق غير مناسب للعائلة ..

في النهاية ( رجعنا ) للشاليهات .. ولا حظوا إني قلت رجعنا لأني مريت على الشاليهات في البداية واستخسرت أدفع فيها أي مبلغ .. وخرجت منها وقلت بألاقي أفضل منها ..
رجعنا للشاليهات .. وأنا أردد في نفسي ( مكره أخاك لا بطل ) .. بس أحرقتنا الشموس .. وعيالي تعبوا من الـ ( فرفرة ) ..

واستأجرت في الشاليهات .. يوم بـ 350 ريال .. أنا أشوف إنها ما تستاهل حتى نصف المبلغ ..
طبعاً بتقولون ليه ؟! .. وأنا بأقول لكم ليه ..
موقع الشاليهات جميل جداً .. لكن طريقة تنفيذها كانت سيئة للغاية ..
لأن صاحب هذي الشاليهات ما يخرج عن أحد أمرين :
إما مدّ رجوله على قدّ لحافه ..
أو كان يضرب ألف حساب للـ ( هللة ) ..
وسواءاً كان كذا أو كذا .. اللوم ما يقع عليه .. اللوم يقع على الجهة اللي رخصت له .. وخلته يفرض أجور على خدمات أقل ما يقال عنها رديئة ..
وهذي مشكلة عامة وللأسف عندنا بالسعودية .. دائماً ندفع أكثر مما نأخذ .. والأسعار – خصوصاً السياحية – مبالغ فيها بدرجة كبيرة ..

وفيما يلي ملاحظاتي على الشاليهات .. مع الصور :
مستوى النظافة كان أقل من عادي .. وأدوات دورات المياه باليه .. واستخدامها يخليك تحس إن أمراض الدنيا انتقلت لك ..
وأعتقد إن مالك الشاليهات كان بإمكانه بـ 40 ريال ( من الـ 350 ) يوفّر أبسط الأساسيات .. مثل أحذية لدورات المياه .. علب كلينكس .. صابون .. وغيرها ..
وهنا نصيحة أوجهها للأخوة .. كل ما أستأجرت في فندق أو شقق مفروشة .. خذ لك غيار كرسي افرنجي ( بلاستيك ) بـ 15 ريال .. والله ما هي شي في حمايتك – بعد الله – من انتقال الأمراض والعدوى .. وحاول دائما يكون معك مفارشك الخاصة للأسرّة .. ما تدري من نام عليها قبلك ..

نرجع لمحور حديثنا ..
من الأشياء الغريبة واللي أو مرة تصادفني .. إن الشاليه بعد ما تم بنيانه .. قاموا بدهانه مباشرة على البلك .. بدون ( تلييس ) .. لأن التلييس بيكلف أكثر ..
وليه التلييس .. ما دام العملاء مضمونين .. وراح يدفعون غصب عنهم .. إن شاء الله يسكنون في خرابه ..
وهذي صورة توضّح إلى أي مدى مستخسر مالك هذا الشاليهات كم كيس اسمنت على عملاءه .. وأعتقد تقاسيم البلك واضحة ..

نجي لنقطة ثانية .. طبعاً لو قام بعمل تمديدات كهربائية في الجدران .. راح يكسّر .. وإذا كسّر بيضطر للتلييس ..
لهذا .. عمل كل التمديدات الكهربائية خارجية .. والصور تغني على الوصف ....

نجي للشيء اللي ما يترقع مهما حاولت ترقعه ..
الشاليه الكبير عبارة عن صالة ودورة مياه .. وفوقها غرفتين نوم ودورة مياه ..
شوفوا الإطلالة من غرفة النوم اللي فوق كيف ...

بس السؤال .. كيف توصل للغرفة هذي ؟!..
والجواب .. عن طريق سلّم طواريء ..

أنا يوم شفته .. أفكر فيه درج ثاني .. وإن البنقالي اللي كان معي ( يفرجني ) على الشاليه يستعبط ..
بس طلع هو الطريق الأساسي والوحيد للدور الثاني ..
قلت يمكن المساحة ما تكفي يسوي درج .. يمكن أحد مضيق عليه .. الله لا يضيّق على مسلم ..
طلعت برى .. وشفت الجهة الخارجية لسلّم الطواريء .. واتضح وجود مساحة كافيه .. بس الطمع أو البخل .. يعمي البصيرة ..
لا حظوا الجزء الأخضر من المبنى هو الجهة الخارجية لسلّم الطواريء .. وتظهر المساحة اللي تركها من غير ما يستفيد منها ..
بس ما قصّر عمل لها على الأقل تشجير ..

هذا وصف تفصيلي لانطباعي عن شاليهات الكادي في القنفذة ..
وما أقدر أقيّم الرحلة بشكل عام لأني بأكون مجحف في التقييم بسبب السكن السيء ..
لكن أقدر أقول إن القنفذة حقت زيارة عابرة فقط .. من غير إقامة ..
وبالنسبة للشاليهات .. توووووووووووبة ما أرجع لها ..
وسلامتكم ..

__DEFINE_LIKE_SHARE__