رديات الظفران

محروم.كوم · #1 06-04-2010, 02:40 PM

انشـد (( الطرقي بن خريف بن سـويط )) انشوده غزليه في محبوبته واصفا مضارب

ديار اهلها في منطقه (( الثنادي )) في ديرة الظفير شمال حفر الباطن..

قال :

ياعشيري منزله بأرض الثنادي
في قطاط الحمض مع ايسر هديه
كل يوم يدفع المظهـور غـادي
راحته بالخور وفيـاض عَذِيـه
حش ِ قلبي حش عيدان همادي
مخيطات الوسم بأراض ٍ رديـه

• _ وعرضه (( عقاب أباذراع )) قائلا ً

كان خلك منزله بارض ( الثنادي )
وانا شف بالي حمـرا صيعريـه
يما حلا فوقهـا مـس الشـدادي
تقطع الهوجاس بـسهـال خليـه
مشعل النومـاس رجـال نـوادي
نشامـا كلهـم ربــع ودنـيـه
عند شيب النوق زينات التـوادي
ننقص العدوان في شـل الرعيـه
وكم هنوف ٍ شوقها جا بالسوادي
وكم هنوف ٍ شوقها يردف خويـه

• _ وعارضه (( عبدالله بن مطني الحلاف )) قائلا ًَ

كان خلك منزله بارض الثنـادي
وانا خلي منزله باطـراف ليـه
ما اخذت العانـي لديـار بعـادي
ولاتعدى صاحبـي ديـار حيـه
منزله بالشتا ( صفي العـرادي )
وبالربيع من الشعيب ليا الحنيـه
عنز ريم ٍ ربعـت بفـروع وادي
من لقف لها رد خاليـات ايديـه
يعلم الله لو تشوفها يالصمادي(1)
ماتهـوى غيرهـا كـل بدويـه

الصمادي: المقصود به هنا أنه ينتمي إلى جذم الصمدة من الظفيـر ..

• _ وعارضه (( عوض الشبلي الحسيني )) قائلا ً

كان خلـك منزلـه بـارض الثنـادي
وانا خلـي بـ( القلايـب ) يذكرونـه
كـل يـوم يدقـع المضهـور غـادي
عقب خشيم الغضا و ( الجرع ) دونـه
يتبع (( العوجان ))(1) سقمين المعادي
ليا زما عشب الخطر لابتـي ينزلونـه
عنـز ريـم ربعـت بـفـروع وادي
يالصمـادي ماعندكـم منهـا نمونـه

العوجان : هي عزوة بني حسين من قبيلة الظفير

• _ وعارضه (( رخيص العصلب )) قائلا ً

كان خلك منزله بـارض الثنـادي
وانا خلي منزله بأرض الررديفـه
كل يوم يدفـع المظهـور غـادي
ناحرت ( باكور ) وسهال نظيفـه
حش قلبي حـش حبـل الـردادي
انقطع بها الغرب وراحت له وحيفه

• _وعارضه (( حمد بن شويش بن سويط )) قائلا ً

كان خلك منزله بـأرض الثنـادي
ياعشيري فوق ( بصوه ) يذكرونه
كل يوم ِ يدفع المظهـور غـادي
( البنيه ) و ( العضامي ) يدهلونه
جيت رجم الطير بالنايـف ينـادي
هيض رجم الخـلا علـه تخونـه
حالي اللي ناحلـه مثـل العيـادي
من عشير حالـوا العيـان دونـه
__DEFINE_LIKE_SHARE__