قلبي يطق بمقدمات المحاني=مثل طقيق الفرخ بيضن خفابه
اليا فقس يلقى من امه حناني=والقلب ما يلقى سوى اللي سعابه
ان كان زرعه شوك ذاق المهاني=وان كان مودع ورد جوري رعابه
كان الهماج لبعض الاكباد زاني=شراب قلبي من قراح ارتوابه
ربيع نفسي ما غطاه الشناني=ما غير نوار الخلا قد نمابه
شدق الجمل ما يغلب الديدحاني=والديك ما يسكن عوالي هضابه
دعيت من بالي زهر قحوياني=ودليت اطورق حاليات الدعابه
يا شايفين الحال شوف العياني=ما يحجب الشفاف خط الكتابه
ما يبغث خلاصن مع المرزباني=والباخص الفلاح شاف الجلابه

يا فاهم الدنيا على اول وثاني=خذ لك على درب الزمان الاجابه
تواسا واعرف مقبلات المعاني=ترا اللحد للحي حان اقترابه
حافظ على خمس الفروض السماني=اللي لهن باجباه الاحيا مهابه
من قبلها التوحيد ساس المباني=ينجيك من نارن تواقد لهابه
عليك بالانفاق والعمر فاني=من مستطيب المال ينمي ذهابه
يطفي غضب ربي ورد بالبياني=منجاة من سو الحساب وعذابه
واحرص على البسمه لو الوقت شاني=تكسب وداد الخلق والله ثوابه
والضيف والجيران طول الزماني=على الحلا والمر تلقا الهنا به