وش حالكم يا مقتفين الصقاره=في واهج الرمضا والاقفار غبرا
الفرخ والقرناس حان انثباره=والراس من حدر المكيف تمذرا
تسعين ليله وارمضان بحراره=والعيد واسبوعين فيها انتحرا
لين النعايم والبراد بنهاره=تزين نوهات القوانيص برا
على وقيد الرمث دون الزباره=والطير في وكره والانجاد خضرا
اليا اصدر التصريح قسم الوزاره=على الجرايد رخصة الصيد نقرا
صارت على الصقار حسن البشاره=ودلا يدهل طيره بكل قفرا

يبيت من بين السهل والسماره=يغيب حول اسبوع في كل مسرا
اليا استبان النور واقفا حماره=واشفا الندا الصافي على كل صحرا
تناثر النوار باين صفاره=والمقتفي مع جرة الخرب يبرا
والحر الاشقر واثقن باقتداره=يلوح صيده بالخلا لوح عجرا
اليا انطلق كنه حذيف الشراره=يشيل باكفوفه خصيمه ويفرا
يهيج مرقاب الخطر بالغماره=كنه على راعيه باللوم يزرا
يفدى بروحه مستحين انتحاره=لاشاف خربن بالبياحه تعرا
يهوي عليه سواة صاروخ غاره=في ملتقى الجيشين كرن وفرا
تقول طالع من سلاح الاشاره=حقيقه انه ساطي الحال يجرا
بارضن خليه ما عليها العماره=ولا بها قرشع من الصلب حجرا
تحلا بها الجلسه ولا هي خساره=وارهت على المنشا من المزن سمرا
تنثر ودايقها على كل قاره=يمشي جذيب السيل في جرف مجرا
الماضي مقفي ما تجيه استداره=لكن عسانا لانعم الله شكرا
انشا النبي اسحاق في رحم ساره=وانشا الحوير في بطن كل عفرا
اللي نهى الانسان ياطا دماره=يشرك معه خلقه يغوثن ونسرا
عليك بالتوحيد حبل الشطاره=تفوز باللي فيها حورن ونهرا