مشيت يم جراب واشملت وامسيت=لعلي القى في خلا جراب ونسات
على الفجر مديتها يوم صليت=من فوق الاملح يضرب بكل وجهات
اليوكن اللي في مسيره تهنيت=ما عاقه خطوط الدروب العسيرات
باحويمضه ممشى وبرزان مريت=كذلك رميثان واطرق مسافات
لين اقبل حنيدر تياسرت واقصيت=بين القراشع والغراميل سجات
فيها الرعي ما داره الشبك والبيت=صحارين ترعى بها طروش عيرات
خمسه ربوعي بالفيافي هل الصيت=اللي لهم في زهرة البال قطرات
نويت ادورج بين ذيك المكاشيت=رزقي على الرحمن رب السماوات
بغيت ضبانن عليها تغديت=ثروبها حول العقنقل عريضات
اليا تواسا بالنثيله تواسيت=ثم انشلع كنه عن ترابه انشات
مشيت يمه بالطمانه وذكيت=فريت بطنه واجتذبت العفينات
وابطلحتن في ظلها الوافي تكيت=فيها غدير السيل من ماطرن فات
مع القروم اللي بهواهم تسليت=ومن عاشر الاجواد شاف المسرات

مشيت عنها حزة الليل واقفيت=يا ليت من عاد المسرات حزات
هذي هي الدنيا ملايم وتفليت=فالموت ما يترك مهايل ونفهات
ياتي على غفله ولو عنه عييت=لكن عسا الاسباب فيها الكفايات
ما لي سوا عفو الولي باعث الميت=عسانا يا رب الخلايق بجنات