..<أشتــــاق لكـ وأحـــــن لكـ وأنتهـ عمري وأدريبــــك أنكـ مثلـــي تشتـــاق وتــ ح ــن >...

راعية الكروزر2007 · #1 08-25-2008, 12:08 AM

مرحب

السلام عليكم

شحالكم شخباركم يا اعضاء منتدانا الغالي

بصراحه فيه ناس شجعوني اني انزل القصه فالمنتدى

اقولهم مشكورين وهم عارفين عمارهم

هالقصه اسمها

أشتاق لك وأحن لك وأنته عمري وأدريبك أنك مثلي تشتاق وتحن

لوول

القصه من تاليفي وهي اول قصه اكتبها ^_^

واتمنى انها تنال على رضاكم واعجابكم

القصه 12 جزء

وبنبدى بالجزء الاول

الجزء الاول

اول شي خلنا نقول شخصيات القصه

اولا: عايله حمد العامري

حمد الاب طبعا وعمره 42 وحرمته اللي هيه فاطمه متوفيه من 4 سنوات
سلامه حرمت حمد تزوجها قريب بعد اصرار بنته عليه وهيه مطلقه ولا عندها عيال
شيخه بنت حمد عمرها 20 سنه ثانيه جامعه الامارات وطبعا هيه بطلتنا لهذي القصه
سيف عمره 22 سنة يشتغل في شركه ابوه مب متزوج
محمد عمره 24 متزوج وعنده توام وحرمته اسمها شمه عياله احمد وحمد

ثانيا: عايله علي العامري

علي يصير ولد عم حمد العامري وهوه متوفي من سنتين
عايشه حرمه علي
سالم وهو كبر محمد حمد ومتزوج بعد ( متزوجين بنفس الليله) وحرمته حصه وعندهم شوق وميثا
سعيد كبر سيف عمره 22 سنه ويشغل ويا سيف بعد فشركه حمد وهو بطلنا في هالقصه
شهد كبر شيخه وهن يدرسن بالجامعه نفس الكليه لكن التخصص غير شيخه تخصصها رياضيات وشهد كيمياء

غالبا ياخذن المساقات اللي نفس الشي مع بعض ودايم يكون بريكهم نفس الشي وشهد وشيخه روحين بجسد يعني ابد ما يفترقن عن بعض

وطبعا سعيد بعد دايم ويا سيف بس علاقتهم مو نفس علاقه شيخه وشهد يعني بس سوالف ومصخره وحواطه مع بعض

ثالثا: محمد الشامسي

محمد اخو سلامه حرمت حمد
نوره حرمت محمد
حميد ولد محمد وعمره 23 سنه يشتغل فالشرطه
وهوه ولدهم الوحيد وما يابو حد غيره

طبعا فيه عوايل غير هذيلا بس دورهم مب رئيسي عسب جيه ماذكرتهم ويوم بذكرهم بقولكم هم منو
وطبعا كل الادوار اغلبها بتكون فالعين لاني من العين واعرف مناطقها عدل

يالله نبدى القصه

في يوم 21 مارس اللي هوه عيد الام كان فيه احتفال في الجامعه وفي
الحفله بتحظر صاحبه السمو الشيخه فاطمه بنت مبارك حرم الشيخ زايد بن
سلطان رحمه الله وطبعا شيخه وشهد قرروا انهم يحضروا الحفله وباصرار كبير

فهن دوامن دوام عادي وقالن انهن بيلسن الين الحفله طبعا هن ومعاهن
شله كبيره وتموا سوالف وضحك وجيه طبعا يمضن الوقت الين الحفل
والحفل كان راح يبدى الساعه سبع بالليل ومر الوقت بسرعه وما حسن فيه الين الساعه سبع

وراحن صوب مكان الحفل ويلسن طبعا جدام اول شي حضر محمد الكثيري
وغنى الهم حلاة التلاقي وطبعا الكل ربشه وحشره ورد غناها مره ثانيه
وباخر الاغنيه حضرت الشيخه فاطمه الله يحفظها طبعا حاضرات حريم شيوخ
الامارات السبع كلهم وشي اكيد الشيخ نهيان بن مبارك رئيس التعليم العالي

وطبعا الحفل كان ولا اروع خاصه الالعاب الناريه احلى ما فالحفل كانت
روووووووووووعه والكل مستنانس بها. خلاف الساعه 9:10 اتصل ابو شيخه
وقاللها هاه شو خلصتي قالت هيه يعني الحين يختمون قال انا عقب نص
ساعه بكون عند الباب قالتله اوكيك وطبعا شهد اتصلت على سالم وهوه
اللي ردها للبيت طبعا شهد وشيخه كانن تعبانات لدرجه فضيعه

فسارت شيخه ركبت السيارة) طبعا شيخه اقرب شخص لابوها ودايم
تسولف معاه ويوم تروح وياه بالسياره تركب جدام معاه وهيه كانت تشبه
المرحومه امها وابوها يحبها كثير وحتى يغليها اكثر من خوانها كلهم ) ويلست طبعا فالسياره جدام وهيه تعبانه حيل

والابو مسكين رحمها كان يسولف معاها بس هيه من التعب ما تقدر تسولف بس ترد عليه هيه ولا لا وبعين مغمضه بعد. وتوه بيوصل البيت كان سعيد توه طالع من بيتهم وتلاقى وياه طبعا هوه شافه وشاف شيخه ( كان اول مره يشوفها ) وانصدم من اللي شافه طبعا شيخه مش انها وايد حلوة يعني كانت حلاتها عاديه كاي بنت بس سعيد حس بشي غريب لما شافها

شكلها بريء كانت راقده وحاطه ايدها على خدها من التعب طبعا وهوه من نزل من سيارته يسلم على ابوها وهوه ماخاز عينه عنها طبعا شيخه ماهي داريه بشي والابو ماهانت عليه بنته يويعيها المهم اول ما وصل البيت وعاها قالها يالله قومي وصلنا البيت هيه نزلت ونزلت تلفونها معاها بس على شان تحطه عالمنبه وقالت حق ابوها انه باجر عندها دوام الساعه 10 الصبح قالها ابوها خلاص بوديج.

وسعيد من شافها انقلب حاله ما يعرف شو اللي صار له بس صورتها ماطاعت تخوز من باله ابد وطول الليل والحبيب مب راقد كل ماايي يرقد يتهيء له صورة شواخ ما عارف شو صار له وقلب حاله جذا حاول يرقد بس ابد ماياه رقاد.

شيخه من نزلت من السياره على طول سارت ورقدت ومادرت بعمرها غير الساعه 9:30 ابوها داق عليها نشت عاد وهيه بعده التعب ماثر عليها
شيخه: اووووووووف الساعه جم ياويل حالي ماشي بقى عن الساعه 10
وطبعا نشت بسرعه وتغسلت وبسرعه صاروخ عالسياره سلمت على ابوها وركبت السياره وتموا يسولفون الين ما وصلت الجامعه

الابو: هاه الغاليه متى تخلصين عشان امر عليج
شيخة: ابوي الله يهديك بس الحين من كم شهر نحن نداوم وبعدك كل يوم تنسى
الابو: اسمحيلي والله اشغال الدنيا تنسيي الواحد وانا يبوج تراني كبرت وصرت شيبه
شيخة: اسمع انت منو يقول انك شيبه انت شباب بعدك ابويه وانت اغلى ما عندنا فهالدنيا فديتك والله ولا شي انا اصلا كنت اتغشمر معاك ادري الشغل هاد حيلك ابويه انا اخلص 12
الابو: خلاص يالغاليه امرج 12 والحين يالله بسرعه تراج كنج تاخرتي على كلاسج
شيخة: هيه والله اوف تاخرت يالله ابويه حياك اشوفك خلاف مع السلامه
الابو: ههههه مادري اللي الحين وين عقله الله يحفظج بنيتي

راحت شيخه على كلاسها تركض طبعا لانها تاخرت على الكلاس بس يعني خمس دقايق والاستاذ ما هزبها ولما خلصت الساعه 12 طبعا راحت عند البوابه ولاقت شهد هناك وسلمت عليها

شهد: شحالج يالغلا
شيخة: بخير وعافيه انتي شخبارج وكيف يومج
شهد: والله تبين الصدق بعدني تعبانه من البارحه
شيخة: عيل سكتي عني انا ناشه 9:30 وابوي اللي موعني بعد
شهد: هههههههه الحمدالله والشكر لايبوي انا الحين من ارد سيده عالفراش
شيخة: انزين عيل لما تنشين دقي علي

ويرن تليفون شهد

شهد: هلا ملايين ولا يسدن
سعيد: هلا والله شهوده
شهد: هاه اشوف الحبيب اليوم داق خير ان شاء الله
سعيد: بسم الله شفيج يعني اختي حرام ادق عليج
شهد: لا بس استغربت مو من عوايدك يعني المفروض الحين انت بالدوام
سعيد: لا يبوي اترخصت سالم ترى قالي مر على اختك عندي شغل ما خلصته
شهد: اها زين والله وانت الحين وين
سعيد: قرب البوابه
شهد: خلاص عيل انا اترياك اول ماتدش ناداني وبطلع
سعيد: تمام عيل برايج مع السلامه
شهد: الله وياك
شيخة: منو تكلمين
شهد: ريلي
شيخة: هههههههه بايخه بس لا تعيدينها لا صدق منو اللي غريبه انه داق لج

شهد: هذا سعود يقول سلوم عنده شغل وهوه اللي بيردني اليوم
شيخة: اها جيه السالفه ووينه هوه الحين
شهد: عند البوابه
شيخة: تمام وانا الوالد يترياني خلا نطلع مع بعض

وطلعن مع بعض وشهد راحت صوب اخوها وشيخة صوب ابوها

شهد: السلام عليكم والرحمه
سعيد: وعليكم السلام والرحمه هلا بشهوده هلا
شهد: هلا بابو عسكور ملايين بسم الله شو فيك عيونك متورمات جنك مب راقد البارحه
سعيد: تبين الصدق ابد ماياني رقاد
شهد: افا يالغالي لا يكون تحب من ورانا
سعيد: ههههههه والله انج عليج سوالف لا يبوي ماشي انسي السالفه الا بسالج منو هالبنت اللي طالعة معاج
شهد: هاي بنت عمي شيخة ( طبعا بوعسكور من سمع اسمها فز قلبه بس ماحب يبين هالشي لاخته (
سعيد: جيه يحليلها انا البارحه شايفها راقده فالسياره من زود التعب
شهد: هيه والله من التعب هلكانين بس عاد شو نسوي ترى اليوم دوام وغصبا عنا نداوم
سعيد: جيه هيه وياج بعد
شهد: سعيد الله يهداك هاي روحي الثاني كل شي مع بعض بس عاد الا التخصص انا غير وهيه غير الباقي كل شي معاها حتى البريكات
سعيد: اها الله يوفقكم جميع
شهد: امين للجميع

سعيد شو سالفته

وليش يتخبر عن شويخ

وشو اللي بيستوي

كل هذا بالجزء اللي عقبه ^_^ __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
لوكـ ف دبي.~	محروم.كوم	منتدى أخبار المواقع والمنتديات العربية والأجنبية	0	06-06-2010 01:40 PM
{حــــد مثلـــي ...... يــــــلا كملووووو البـــاقــــي ..}	رااعـــي الفـــزعــهـ	العاب , فكاهه , مسابقات	30	10-25-2009 09:26 PM
بحبك قد عمرى بعد عمرى حبى ليك فوق المشاعر والحدود.. اقوى نغمات الجوال واروعها..mp3	محروم.كوم	منتدى أخبار المواقع والمنتديات العربية والأجنبية	0	06-03-2009 05:20 PM
بحبك قد عمرى بعد عمرى حبى ليك فوق المشاعر والحدود.. اقوى نغمات الجوال واروعها..mp3	محروم.كوم	منتدى أخبار المواقع والمنتديات العربية والأجنبية	0	06-03-2009 03:20 PM
يعل عمرج..يعل عمرج تصميمي الـnew ^^	غبي ويستهبل	تصاميم الاعضاء	16	07-02-2008 12:01 AM