هزّني هالهرج؟؟ماش!!

محروم.كوم · #1 04-22-2010, 10:40 PM

لعنة الله ياحروفٍ كلها شعرٍ فشوش,,,ورحمة الله ياديارٍ دقها الكافر وشاش

كلنا نكتب قصايد مثلها مثل الدشوش,,,شد هاذي مد هاذي ممتلي فيه الغباش

آآه ياغزة ترانا مانبي الجنة عروش,,,آآه ياغزة ترانا خايفين عيال لاش

آآه ياغزة ترانا للعدو وجهٍ بشوش,,,سامحينا بس حنا أمةٍ مثل الخشاش

مااجتمعنا فغير فرقى وافترقنى لعين بوش,,,وان نوينا ان نوينا مابها الا الطشاش

كنّها هاذي القصيدة طشطشة ضمن الطشوش,,,حرف وافي حب صافي بس قلبٍ من هشاش

اتركينا من ظروفك انسي احوال العشوش,,,وانسي الدرّة مدامه قد قضى التربة فراش

وانسي الاقصى وهمّه وان طغى فيه الطروش,,,وانسي الزيتون وانّه قد نوى ضم الفَراش

وانسي ان العْرب كله تنحى لاجل بوش,,,وانسي انّا في حجاهم نرتجي بعض العراش

وانسي انّا الله الله ويعلم الله أوش أوش؟!,,,هاذي امريكا ياغزة تزعل وبعدين آآش؟!

وانسي ان الدمع ناهل من ورى حدب الرموش,,,وانسي اطفال الحجارة لاحتموا خلف القراش

وانسي ان الموت صاير لك قلادة وزود غوش,,,وانسي ان الدم لونك كحّله ليلٍ غواش

وانسي ان الآآه تدوي وماسمع الا الطروش,,,وانسي ان العلج ينهش وان فزعنا لك؟بشاش!!

انسي ياغزة وخلّي لحني الشادي يدوش,,,انسي واصرف لك حروفي شيكها الغالي بكاش

لحظة؟؟وش فيها عيونك شمعها صاير يروش,,,اثري ولّعت الفتيلة واحترق قلبك وجاش

سامحيني بس ما اقصد انبش آثار الخدوش,,,سامحيني يالابيّة منيتي الك البشاش

ادري الصدمة قوية!!أعرف العلم ولااشوش,,,بس أعرف كيف انطق الحكي كلّه بلاش؟؟

سيفنا يابنت روّح عرضة طبول الحبوش,,,عزّنا يابنت ماضي حاضرة اصبح دشاش

وش يفيد العز اليا رامته بدن الكبوش,,,وش يفيد الحر مخلب مابغى صيده وداش

وش تفيد النفس دامه حبّها صار القروش,,,وش يفيد الحق صوتٍ صيحته للظلم عاش؟!

وش تفيد انقاض أمّة كلها صار مغشوش,,,وش تفيد أشباه شارب ما بغى للمجد ناش

شفتي كيف اني اطشطش بس ما أقدر أطوش,,,شفتي وش آخر حدودي معترك فن الهواش

شفتي اني كيف امشي بالخطى مد مخروش,,,شفتي اني كيف احاذر وان توجّهت لهلاش

شوفي ياغزة ومدّي آهتك اليا تنوش,,,اعلى جدرانك وثمٍّ ياتي الصوت انكماش

قلت لك هاذي القصايد كلها هرجٍ فشوش,,,شفتي القائي امامك هزّني هالهرج؟؟ ماش!!

وسلامتكمـ

بقلميـ/ يزيد آل ثنيان

__DEFINE_LIKE_SHARE__