يا راكب النيسان يا سابق الريح=تلقا رفيقي كاشتن حول ملحا
بعطيك له مرسول يابن المفاليح=حذرا توانا يرتحل حين يصحا
قله تراني بالفروص التسانيح=ابمرح بعبلان واسري لصبحا
لا يشمل وياتي قبل ليلها يطيح=بافلنتوه يلقاني لامنه اضحا
والا المغدا بين ذيك اللواليح=الارض ممطوره والاشجار شرحا
ابنصب بنابي ثلاثة مواضيح=دون العلم يلقا مطامين بطحا
يشوف دخان السمر كالملاويح=والدلة الصفرا على النار دبحا
في دوحتن صبت عليها الملاقيح=خضارها يشدي من الذود ملحا
تكيت فيها بالفجوج المشاريح=وابطا رفيقي لكن النفس دمحا
خوينا ما شاف دمع التماسيح=يا ما من الزلات للناس نمحا
يا صاح ما خسران زين التساميح=ناسن توالي حشم الاصحاب ربحا
عقب المسا استرخيت نومي شلافيح=والفكر في سور المغاليق يلحا
مدري رفيقي جاه علمي بتصريح=والا سرا بالليل لاحدود رفحا
ابصرت نورن مثل صفر المصابيح=بين الجبال ولجت كلاب نبحا
قادم ليمي ما هقيته مشابيح=واثره رفيقي صافي النفس فلحا
جاني وعانقني عناق المفاريح=اللي نهار العيد بانفوس سمحا
جلسنا حول النار قول وتمازيح=يا مرحبا بالصاحب اليوم مرحا
سمرنا ليله بالبرود الملافيح=والبرد عن نار المداغيش ينحا
ترا الرفيق الذرب للبال ترويح=مثل الاجابات المفاضيل نقحا
والا بعضهم مثل فهر الدراميح=قش الغثاوى فوق الامواه طفحا
يحتاج له في بعض الاطباع تنقيح=والا بعضها فطرة النفس لفحا
ولا بد ما ننهج دروب المداميح=والا غدينا بين الانياب جرحا
ولا فيه اخير من الذكر والتسابيح=واعيوننا من خشية الله سبحا
اليا استضاق الحال لاهمومنا يزيح=قضاه يسبق شوفة العين لمحا
نرجيه جنات الخلود المباريح=وارضاه يوم وجيه بالنار كلحا