السلام عليكم ورحمة الله وبركاته

طبع شفتوا العنوان ومعظكم يعرف الجريرة وبالذات أهل القصبات

وناس يقولولها كدابة
واللي هي قطعة معدنية على شكل سمكة وملونة بألوان زي ألوان السمك عشان تلفت نظر
الأسماك المفترسة اللي تدور على الطرائد الحية
يعني في أسماك نسبة اصطيادها باللعف جدا ضعيفة بينما تكون نسبة اصطيادها بالجريرة عالية
(طبعا الرزق بيد الله)
لأن الأسماك هذي تحسبها سمكة حية صغيرة
ومعروف انها تستخدم نهارا وأفضل أوقاتها الفجرية والمغرب
عشان نور الشمس ينعكس عليها ويلفت نظر الاسماك الكبيرة ويبان شكلها كمان
واللي شفتوا ان اللي يستخدموا الجريرة ما يستخدموها في الليل
عشان مافي نور

طيب

اذا قلتلكم اني استخدمتها الساعة 2 في الليل وكمان ضرب عليها (شي مرة طيب )وفلت بسبب حركة غلط عملتها :good2: مية مية يا حريف

طبعا مو في اي وقت تستخدمها
تستخدمها لما يكون القمر نورو ساطع
يعني في الليلة القمرية

والسبب انه ينعكس عليها نور القمر وهي قريبة من السطح نشوف اللي صار معاية

قبل أسبوعين كنت في البحر طبعا في خليج سلمان موقع ابوفي
والصيد يا عزيزي تيتي تيتي زي ما رحتي ما جيتي

وليلتها كان القمر ساااااااااااااااااااطع من شدة نوره كان معكوس الموية
قلت يا واد أطلع لي جريرة فيها ألمنيوم تنعكس مع النور يمكن تجبلنا عقامون صغير
لأنه العقام يضرب على الانعكاس

والله واسويها وارمي مرة واتنين وتلاتة اخليها ترسي واسحبها
بعد كم رمية قلت خليني اخفف الوتيرة شوية وما ارسيها
رميت وخليتها تغطس مسافة شوية عشان مسافة لما اسحبها ما تطلع على طول
يعني اعطيها فرصة تقعد وقت اكثر بعيد عن الكسارة وتزيد فرصة السمك يشوفها

تركتها نزلت شويتين في وبعدين سحبتها كأني بانتشها ولا هذي مصخرة
يا رجل !! أما مصخرة في العمق هذا ؟ معقولة في شعب مرتفع للدرجة هذي ؟
مرة معقول
خليت القصبة شادة متنية من فوق وراقبتها شوية والا هي بدئت تطلع :good2: قلت بس هذي مضروب عليها
واسحب سحب كأني بأسحب صخرة
شوية والا هذي ترد عكس سحبت الخيط
واسحب الين حسيت انها قربت من السطح فقلت انزل القصبة والم الخيط واسحبهااطلعها مرة وحدة من الموية
وكانت هي الحركة الغلط
سويتها من هنا وهذي فكت من هنا وطارت علينا الصيدة وقالول العارفين بعدين
هذي الحركة غلط تشق السمكة وتخليها تفك المفروض تسحبها الين فوق وبعدين بالخطاف ولا بالطريقة المناسبة

المهم اعتمادا عاللي فوق اتوقع اللي صار
اولا

احتمال كبير انها صدفة مكان ما سحبتها بقوة اول شي كانت سمكة معدية وشكتها في بطنها وهذا اللي سبب
القوة الكبيرة اللي وجدتها في السحب

ثانيا احتمال ان فكرتي نجحت وبالفعل جاتها سمكة بس كانت بتحوم حولها وانا سحبتها وهي جنبها قبل ما تضرب عليها وشكتها

انا ارجح السببين هذولا لأنه السمكة ما حسيت بيها الا لما شديت
ماجات ضربت وسحبت وبعدين شديت

الاحتمال الثالث
انه ضرب عليها بس عشان المكينة مفكوكة والجلب بيمد ما بانت الضربة عليها أو انه لما ضربت السمكة عليها ما سحبتها بقوة

طبعا النهاية انه رجعت بدون سمكة و500 ريال تصليح السيارة (فار عبدالله اكل لي من ليات الرديتر)
شكلي بصيد واحد واسويه جريرة

واستفدت اني اتعلمت ان الحركة اللي سويتها ايش خطأها وايش سلبياتها

اتمنى اني ما اكون طولت عليكم

واستنى ارائكم وانتقاداتكم لأني زي ما تعرفوا لسة جديد في الصنعة وماشاءالله عليكم انتوا اهل الخبرة والمعرفة
واتمنى استفيد من خبرتكم

ويعطيك العافية

سلام