( البدو - البلوش- العيم - اليمينين ) ... لمتى بنظل على هالحالة

عِيمْيّ مَآرْڪـﮧّ ™ · #1 04-07-2010, 06:24 AM

اخواني واخواتي الكرام هذا موضوع ابآآ رايكم فيه بصراحة "وراح يكون هناك احسن رد"...

كوني ( امــاراتـي ) اتكلـم عن مجتمع الأمارات الغريب والعجيب بخصوص أمور ( الأصل ) !!!

الحين إذا سألك واحد شو أصلك ؟؟؟ تقوله إماراتي .. يقول لا لا أصلك يقصد يا ( بدوي أو بلوشي أو عيمي أو يمني ) !!

يعني تقريبا هالأربع ( جنسيات ) أكثريتهم صاروا ؟؟ مواطنين أماراتيين ..

بعد ما صاروا هالفئات كلهم ( إماراتيين ) بس لين الحين تشوف ( العنصريه ) بينهم .. ولين الحين تشوف الحقد ما بينهم ..

يعني لو تقدم حق الزواج ( إماراتي من أصل بلوشي حق إماراتيه من أصل بدوي) ؟؟؟ أهلها ما يوافقون عشان أصله بلوشي !!! ( والعكس صحيح ) ..
.
وتشوف العرب البدو حاقدين على ( العيم والبلوش ) ويعتبرونهم أقل منهم وما يكون في ( ألفه بينهم ) ..

وتشوف ( البيض ما يحبون الخوال ) ويستصغرونهم ؟؟ ( مجتمع غريب ) !!

وتشوف ( المواطنين البلوش ) يحطون دوم على ( المواطنين اليمنين ) أنتوا يمنيين وأنتوا ...؟؟؟

يعني ما تشوفون موده بين ( أهل الأمارات ) خاصه بين البلوش والعيم والبدو يعني الكل نفسه نفسه ويشوفون الطرف الأخر أقل منهم !!! ( ليش ) ؟؟؟ ما تعرف ؟؟؟

في الأخير ترى كلكم إماراتيين وماشيء فرق خلاص أن هذا بلوشي وهذا عيمي وهذا يمني لين متى بيتم هذا التفكير القديم عندنا في المجتمع ..

متى بتكبرون عقولكم وتشلون عنكم هذا التفكير ( العنصري ) !!!

ترى البدو والبلوش والعيم الكل مكمل الثاني في مجتمع الأمارات والكل له دور في بروز دوله الأمارات ..

وكلنا مسلمين وربنا يوم خلقنا مافرق بيننا الا بالايمان والتقوى والعمل الصالح..وكلنا مخلوقين من طين..

بس للأسف ( مجتمعنا ) غريب وعجيب والكل عايش على نظرية ( العنصريه ) !!!
(غريب أمركم يا ( أهل الأمارات ) !!!

يعني برايكم..شو الحل فهذا الموضوع,,وشو رايكم باللي صاير...؟؟

آآخـوكـم ~ْ

صاحبـ الذوق ~ْ __DEFINE_LIKE_SHARE__

عذبتني دنيتي · 04-07-2010, 07:09 AM

أول شئ (البدو) << هــذا الشئ يعتبر عند بعض الناس مسبه ع أساس انهم غجر او موب أتكيت وه السوالف

بنسبه لي من حد يطري البدو أو يحط يده ع راسه لأنهم صدق معني وكرم وشيمه وحشيمه بعدي

ثاني شئ يـــــــــــاكثرهم الي أصلهم موب أيمــاراتي ولااااهو قبيلي بس انخرطوو بمجتمعــاتنا ولاا أزيد من اشعر بيت صارو يشوفون عمــارهم بعد يعني حتــا يخذون اسم قبلتك وشوفون نفسهم عليك يعني شئ قمه القهر يسوي مصيبه ولا بلاوى تلحق قبيلتك ولا بغى يطلع عمره غير اسم قبيلته وتنتهي السالفه ليه به البساطه

صارت سالفه أن اشخــاص مايسون وعلومهم كلهــا بطاليه أن شخص له نفوذ < ماقلت اسم حد
عطاهم جواز ظبياني وحط اسم القبيله عليه ليت ع القبيله بس كان بيضيعون بطوشه !! عطاهم اسم العائله الأخير بعد يعني اسالفه تضيع اصول العرب وأنسابهم بعد

وأنساب العرب مسجله بكتب ولهــا هيبتهــا ومأرخه من قبل كتاب يعني موب من هب ودب خذا الجنسيه قال ابا استوي قبيلي ؟؟!

ناس أستغفر الله يعني واحد ياي من الشارع لا له اصل ولا حسب ولانسب ويصير شيخ قومه؟؟؟؟؟ هذا هو العجيب

يخر بيت الي يكتب نــاس ماتسوى ويحطه من قبيله موب قبيلته << أنقهرت

وفيه نـــاس مادخلو الدوله ألي من 15 سنــه وصار خير الدوله لهم قبل ليكون لنــا كل شئ موفر لهم
الفلل + الوضيفه+ السيارت الي ماتعد ولا تحصى وشركــات ألخ ... << هذا رزقهم منبا نقول فيه شئ
بس المواطنين الاصل لهم الحق أكثرمنهم .....

بنسبه لي ماشوف اي فرق العيمي والبلوشي والقبيلي كلهم نفس الشئ اما لزواج كلن حر ان عطا بنته قبيلي وان عطاها عيمي ماحد به الزمن يدخل بحد أذا البنت لهــا عيال عم ويبونهــا وتباهم وين يبا العيمي ولا بلوشي ولا اليمني ؟؟ ولد عمهــا أحق فيهــا من تقول لحد منهم ماعندنا بنات للعرس يقول هــيه اعرف عسب اني بلوشي او عيمي ولا ولا ألخ ... شدخل هذا نصيب ماحد ياخذ غير نصيبه ويتحسسون من ه النـــاحيه

والحل العيمي يتزوج عيميه والبلوشئ يتزوج بلوشيه واليمني يتزوج يمنيه كذالك وكل يكفي خيره وشره

أصلا احسن عسب هو مايعايرهــا وهي ماتعــايره بأصله ....

وموضوع البيض والخــــوال أعتقد حل الموضوع أوبــاما كــان من خوال أفريقيــا والحين يحكم اكبر دوله في العالم

ودوله كانت كلهــا عنصريه وكلهــا بيض يعني انحلت القضيه محبة البض لأوبرا وأوبامــا بينت ان النزاع بين السود والبض اختفى ههههههههههههههه

يسلمو ع الطرح .... وسموحه ع الأطــاله

__DEFINE_LIKE_SHARE__

همس العشق · 04-07-2010, 12:36 PM

بصراحه هذا ف كل مجتمع يستوي هب بس ف مجتمع الأمارات

وكل واحد يحب يفتخر بأصله وجبيلته

ولازم يعايرونك ف جبيلتك بعد

لو عساها تكون أحسن جبيله ف العالم

وف النهايه بس بغيت أقول شي واحد

كلكم من آدم وآدم من تراب

ولا فرق بين عربي ولا أعجمي الا بالتقووى

تسلم أخويه ع هيك مووضووع __DEFINE_LIKE_SHARE__

ღ][ḿş hᾶḿᾶơơȘ ...! · 04-07-2010, 12:49 PM

لا تعليق لانه في رد من الردود ماكان في محله واحسه تافهه ..يوم بينحذف بفكر اني ارد واناقش في الموضوع ...##

مشكوور اخوووويه ع الموضوع لاعدمنااك يالشيخ ...@@

تقبل مروري الاقل من متواضع اختك مس همس __DEFINE_LIKE_SHARE__

وسن الحلوة · 04-07-2010, 06:39 PM

بصراحة موضوع مهم وكنت أفكر فيه ..

هذي النظرة موجودة هني وبكثرة ..

وكل واحد يحسب عمره الأحسن ..

كلكم لآدم وآدم من تراب ..

تعرفوا .. أنا كنت سايرة دولة حتى لفظ الوافدين ما يقولونها .. وينسبون كل صاحب بلد لبلده ..

أما هني فهذولا وافدين وهذولا زلمات وهذيلا وهذيلا..

الله يرحم الحال __DEFINE_LIKE_SHARE__