وجهة نظر جماهير الــــز عيم في ادارتهم...!!!

~~ولـد الـمـرفـأ~~ · #1 04-06-2010, 02:00 AM

ضيّعوك وعذّبوك حسبي الله عليهم حسبي الله ..

ولّعوك وارحلو وعن شعورك ماسألوا ما يخافون من الله ..

حسبي الله

دمّروك يالعـين والله دمّروك ..

نعم دمّروك واللي دمرّك هي الإدارة الفاشلة اللي ماتستحق انها تكون ضمن نادي كبير مثل نادي العين ..

قبل سنتين تخلّت الإدارة الموقّرة عن أهم ركائز الفريق .. وقالو أنهم راح يجددون دماء الفريق .. صحيح تجديد الدّماء مطلب أساسي لكل فريق يطمح للبطولات .. لكن المفروض ان البدلاء يكونون بمستوى او افضل من اللي تخلّو عنهـم .. !

هالموسم بدينا بداية جيّدة .. وكنّا متصدرين الدوري لـ أربع او خمس جولات .. وفقدنا الصّدارة ولكن كنّا مصرّين على استعادتها .. بس فـ النهاية ماقدرنالها لأن بـ إختصار فريقنا " عــــــــــــادي " .. نعم فريقنا عادي وانا اعترف بهالشّي .. خصوصاً ان مانملك مواطنين على مستوى عالي .. لكن كنّا نقص على عمارنا ونقول العين بيسوّي وبيسوّي وبيسوّي .. لكن للأسف كله خرطي .. !

يتنا أكثر من فرصة للإقتراب من الصّدارة لكن كالعاده مانستغلها .. والسبب طبعاً معـروف .. وكلكم تعرفونه .. وهو أن لعّيبتنا عاديين .. وماعندهم مسؤولية وإحساس بالفريق والجمهور اللي قاعد تحترق أعصابه من اجل الزّعيم وأسم الزّعيم وسمعة الزّعيم وهيبة الزّعيـم ..

المهم .. عقب الفشل والخساير المتتالية سواء فـ الدوري ولا الكاس .. قررت الإدارة الموقّرة بـ إقالة شايفر وتعيين المدرب سيريزيو .. فـ البداية كنت متفائل بسيريزيو .. وتوقّعته بيغيّر شكل الفريق للأفضل .. لكن للأسف العيب مش من الدّريول .. العيب من السيّاره نفسها يا إدارتنا الموقّرة ..

هل يُعقل فريق كبير وعريق وزعيم اندية الإمارات لايملك مواطنين على مستوى عالي .. او حتى لا يملك مواطن " سوبر " .. بكل صراحة عيييييب والله عييييب نادي مثل العين مايملك لعّيبه مواطنين قادرين على إعادة الزّعيـم إلى زعامته وقوّته وهيبته امام الأندية الباجية ..

الله يرحم أيّام قبل .. والله يرحم أيام 2003 يوم كان العين له هيبته وقوّته وأسلوبه فـ الملعب ..لأن ذاك الوقت كان عندنا رجال في أرضية الملعب .. رجال يحافظون على سمعة العين .. لأنهم أصلاً من أبناء العين والنّادي .. وهمهم الأوّل والأخير هو حصول الزّعيم على البطولات حتى لو كانت فـ الصّين .. امّا الحين فـ تغيّر الوضع .. والإدارة الموقّرة يابتلنا لعّيبه من هني وهناك وحطّتهم فـ النادي .. وياليت لو انهم لعّيبة شرات باجي اللعيبة .. للأسف مايملكون مقوّمات اللاعب المحترف !!

اللاعب الوحيد المُقنع هو سيف محمّد .. امّا البّاجي فـ وجودهم من عدمهم .. ماضافو شي يديد للفريق .. بل زادو الطّين بلّه وعفسو الفريق ودمّرووووووووووه ..

أمّا المحترفين فـ هم حاجة ثانيه .. أنا اعترف بـ أنهم قدّمو الكثير للعين وكانو مساهمين بشكل كبير فـ إنتصاراتنا .. لكن غياباتهم زادت عن الحد .. والأسباب غير معروفه .. !

وطبعاً المسؤول عن كل هذي الأشياء هي الإدارة .. وعلى مدار الفترة الماضية أوهمتنا الإدارة بـ أنها راح تتعاقد مع لاعبين مواطنين سوبر .. لكن لين يومنا هذا ماشفنا شي .. وفريقنا قاعد ينهار جدّام عيونّا لكن ما بيدنا شي !

هالسّنة عيمان والظّفره دخلو التّاريخ بفوزهم على العين لأول مرّه .. تخيّلـو .. عيمان والظّفره العين مش قادر عليهم .. صحيح ان عيمان والظّفره فريقين جيدين ..لكن مع احترامي لهم هم وين والعين وين ..

العين .. العين .. العين .. أرجوج يا إدارة .. أرجوكم يا لاعبين .. حافظو على سمعة هذا الفريق .. حافظو على فريق ونادي ينتمي له ويعشقه رئيس الدّولة وولي عهده .. العين مش حقل للتجارب .. !

عـ العموم الدّوري انتهى بـ النّسبة لنا .. وبننضم لـ باجي الأندية بننتظر وبنشاهد من هو بطل الدوّري المحصور بين الجزيرة والوحده ..

والله كريم .. __DEFINE_LIKE_SHARE__