مريت برخوص بعثاعث وطنّا=ولقيت به نبت الكحيل متدنّي
مدري ضما والا الزهور ارتخنّا=والحمرجيح امسا بالاقفار بنّي
قد فاحت الرمضا حصاها احتمنّا=باول حميم القيظ ما به تمنّي
هذي هي الصحرا معالم سكنّا=والبال بافجوج الخلا يرجهنّي
وان ضاقت الدنيا بربي زبنّا=اللي كفل قوت الاوادم وجنّي
سرنا نجاجيع ورضينا بزمنّا=رزقي على الله ما حنا الرزق عنّي
معالم اطلال النجود اهتونّا=واخشوم الامزان الضحى يرزمنّي
نمضي على السجات منا ومنّا=معنا المواتر بالخلا يرتكنّي
جتنا الذواري بالرمل واندفنّا=واصدوف عسرات الوطا يرثعنّي
حتى الضواري بالعوالي عونّا=والريم واضبي السهل يرتعنّي
جوز السلايق بالمكون استونّا=ولفايح الرمضا الضحى يلهبنّي
هذا هوانا ما على الناس منّا=والبال يفصح باللي جوفه يكنّي
اليا ضوانا الليل حنا استعنّا=باللي له خشوم الملا يسجدنّي
مخاطر النوهات ما ينذرنّا=دون الذرا داب الحنيش متثنّي
والا العقارب بالشجر يرقبنّا=عوج المذايل بالسموم ارتونّي
واليا قست روس النجاجيع لنّا=لاطالت الهجره رفدنا المسنّي
وادلال من شان الضيوف ارتكنّا=كف الكريم بعود طيب متحنّي

دلايل المعنى المسا درهمنّا=وان صكت مزون الشعر يرعدنّي
ما بالحيا غير العشوب ارتونّا=وازهور نبت سهول من كل فنّي
نضا القوافي بالعمايق رغنّا=وان سارن بقاع الضما يبركنّي
القاف نوباتن عويدي وبنّا=واحيان عجفات الهوا يعطبنّي
والعاقل حسوسه ترا يرتقنّا=ما خاب فيه من المذاكير ظنّي
اليا زما باجراس حسه يرنّا=ما هوب صرّاخ الدجى يصرخنّي