وما افة الاخبار الا رواتها

محروم.كوم · #1 03-17-2010, 05:10 PM

بسم الله الرحمن الرحيم

اسعد الله مساء الجميع

بالبداية اكرر طلب مشرفنا ابومحمد البعد عن نقل القصص الشعبيه من المنتديات و الكتب الشعبيه والبحث عنها لدى الشيبان او نقل ماتذكره من قصص الجيل الماضي خاصه من عمره27وتحت لتتميز خيمة السوالف كما تميزت خيمة الالغاز .لان وللاسف ان بعض الكتاب هداهم الله لم يحرص على القصه فمنهم من كان هدفه مادي ومنهم من بهر القصه واختلف مضمونها ومنهم من جيرها لغير صاحبها ومنهم من خلط الحابل بالنابل

واستشهد بقصة السنام والغارب التى نسبها صاحب الكتاب الى العقيلات واتسائل كيف يستوي الحر بالعبد المملوك
وللاسف فصاحب الكتاب دمج قصتين مع بعض وخرج بقصة جديده اختلفت عن القصص الاصليه

القصه الاولي
وهي ان رجل من العقيلات استاجر له رجال بعضهم جماميل وبعضهم عمال وجهز له قافله 0 وكاغلب العقيلات كانت الاموال شراكه مع ناس من اهل الديره فلان له بعير وفلان له تمر وفلان فلوس المهم بعد ما ابعدوا عن القصيم وهم باتجاه الشام تعرض لهم قطاع طرق وسرقوا المال والحلال 0وكان اغلب الجماميل والعمال يسمون صاحب القافله او كفيلهم ب عم . العقيلي ضاق صدره صعبه يرجع واهل الديره يبون فلوسهم والارباح وهو مابقى معه شي قال لحدى الجماميل فلان احطب لنا قاله الجمال انتهت زمن العموميه احطب بنفسك يقصد انت ماعندك شي وحالتك مثل حالتنا فلاتامر علينا قاله العقيلي العموميه باقيه واجرتكم علي لمى ترجعون لهلكم وواصلوا المسير للشام واول ماوصلو الشام استاجر للجماميل بيت بالاجل ولبس ثلاثه شيلان شال لبسه زي الشماغ وشال تعقل به وشال تحزم به وراح لم قهوة الميدان بالشام وهي المكان التي يجتمع فيها اهل العقيلات بالشام وجلس فيها وفي هذه الاثناء كان المندوب التركي يبحث له عن ناقلين ينقلون له اغراض قيل انها لسكة الحديد وقالوا له تلقى مطلوبك لدى العقيلات ونشد عنهم واخبروه عن القهوه وذهب ونشد عن كبير العقيلات واشرو الناس على صاحب الثلاثة شيلان جلس المندوب مع العقيلي واخبره بحاجته بالف حموله وقال العقيلي كم تدفعون قال المندوب تقريباً200 قال العقيلي انا اشيلهن ب150 بس عندي شرط قال المندوب موافق وش شرطك قال نص القيمه الان ونص القيمه بعد الانتهاء قال المندوب تم وعطاه نص المبلغ وراح العقيلي وشرى بالمبلغ بعارين والجماميل بالدار وبداء بالردود وما تمت كم شهر الاوالرجال راجع لديرته ومعه تجاره واموال وارباح لمن ساهم معه وفرجها الله عليه

القصة الثانيه

رجل انعم الله عليه من اهل الشقة العليا قريه تقع شمال مدينه بريده على طريق حائل وهذا الرجل له عادة سنويه ( صدقه) وكان يوجد عبد من سكان الصباخ كان يذهب كل سنه ويستلم عادتهم السنويه ويقول ابي اروح لم العمومه في سنه من السنوات اول ما وصل وجد رجال من رجال ابن رشيد ماخذين حلال ومال وحتى العشاء الخاص براعي الشقة وقعد العبد يرقص ويقول استوى السنام والغارب ( ماادري هو قل عقل اومن هول الصدمه) قاله راعي الشقه الغارب غارب والسنام ان جاء له خير صار سنام وان شاء الله الزمن الجاي تجي وتستلم عادتك وكان هذا الرجل كريم وله ديون لدى ناس من الحاضره والباديه ومادار الحول الا والرجل رجع على حالته الماضيه

حصريه لمكشات

واتمنى ذكر المصدر في حالة النقل

ولكم تحيتي __DEFINE_LIKE_SHARE__