حان الرحيل وواهج القيظ لفاح=والبل ترعى معها بالذود سرسوح

تلحق مباعيد الخلا باقصى الابطاح=والراعي حلقه بالمساريح مبحوح
والهرش الاصفر يبرا للوضح سراح=ما له سوا الجثجاث في واسع الصوح
وانا على الموتر مع البيدا سواح=رزقي على الله مطلبي بالخلا فسوح
وان كان به صيدن تعشيت مرتاح=والا الرضا يجعل مواليفه فلوح
ما نيب لا راعي ولا نيب فلاح=مير اني اهوا ضلع الاقفار والدوح
على المسا مريت بالصحرا لولاح=فيه الجعد يوم اظلم العالم يفوح
جيت بذرا الحاجر عن صدوف الارياح=وشبيت ناري بين شغيه وسالوح
دليت اطورق وابقى بالقاف مياح=غفيت بالاشعار مع زهرة الروح
بقيت صاحي لين تفلاج الاصباح=قدامي الرسلان تبلج مع الضوح
اخذت لي فنجال والبال منساح=حولي جبالن كنها بالخلا شبوح
اسامر نجوم الفضا والمسا راح=واخاطب اصوات الحمامه على النوح
ترا الفتى الواعي جنا ريع الارباح=والغافل اللي كسبه اليوم مذبوح