وقت الساعه حسب توقيت الاحباب المحلي

0oبركان الغلاo0 · 08-01-2008, 03:05 AM

البارت السادس

سالم عقب ماخبر روضه بالسالفه ,, طبعا هي استانست بس مابينت لاخوها ,, وسار عنها يرقد ..
واليوم الثاني طبعا راشد حصل له هزبه محترمه من امه عالموقف اللي حط ابوه وعمه فيه جدام الناس بس طبعا راشد اكبر طاااااااااف .. وروح عنها الدوام ..
اتصل بروضه بس ما ردت عليه لان فونها ع السايلنت اصلا .. عند الدوار ,,شاف راشد سياره روضه ..ودعس ولحقها ولف عليها وصيحت له هرررن
روضه: استغفر الله ,,بلااااااه هااا من الصبح جان نفدنا
وخذ تفونها وشافت مسدكول منه وهي اصلا كانت بتتصله تهزبه ..
اول ما رد راشد هزبته روضه
روضه: شو بتستفيد عاد لو نفدتنيه ع الدوار ونفدت انته بعد
راشد: لاا ادري انه ما بستوي عليج شر ,, بسبعه ارواح
روضه: الله واكبر منك يا الساحر ,, كلني
راشد: ليش ما رديتي عليه
روضه: فوني مان سايلنت ,, شو تبا
راشد: سولفي عليه لين ما اوصل الدوام
روضه: متفييج انته ,, محد له بارض الصبح للسوالف .. ويلا برايك انا بخطف الشيشه
راشد: عووذ بالله ,, بلااج اليوم
روضه: رشود مب متفيجه ,, ناشه مصدعه ..ما رقدت الا عقب الصلاه يعني ما رقدت الا ساعتين
راشد: مب مشكلتي ,, انا ابا اسولف
روضه: رشووووود
راشد: انزين انزين .. خلاص برايج (اونه يعني زعل) انا ماعندي سالفه متصللج
روضه: اووونه يعني زعل,, تراا عاادي
راشد:ادري انه عادي وما تفرق عندج .. منو هو راشد اصلا!!
روضه: هذي هي .. منو هو راشد ؟!!
راشد: اقووول
روضه: امر
راشد: يلا مع السلامه
روضه: هههههه مع السلامه
سكر راشد وشوي ووصل الشركه وروضه بعد وصلت الجامعه ... والكل سرح للدوام الا ميره طبعا عندها اجازه اسبوع قبل الامتحانات ..
وع الساعه 10 خطف بوسلطان على اخوه محمد فالعزبه .. ويلس وياه وسولف وعقب استسمح منه على حركه راشد البارحيه واونه يعني خطب روضه من ابوها وطبعا بوخلفان البارحه عطا راشد كلمه وما بيردبها وقال لاخوه انه مطمن على بنته جيه اكثر لانه حس ان راشد وايد يحبها عشان جيه ما هموه الناس .. يعني خطب رسمي وبوخلفان وعد اخوه انه يشاور روضه اليوم ويرد عليه خبر قريب ا نشا الله .. وعقب قامو لعزبه بوسلطان لانه قريبه من عزبه اخوه وكان يبا يراوي اخوه بكره تعبانه عنده وبيشاوره فيها ..
مرت الساعات وردوا من دواماتهم ..
روضه سيده سارت ترقد لانه مدووخه عالااااخر لانها ما رقدت بسب تفكيرها بسالفه راشد واللي قالها اياها سالم ..
وعالمغرب نشت واتسبحت ولبست ونزلت تحت .. ما حد كان فالبيت كلهم قاعدين فالخيمه اللي فالحوي وطلعت لهم
سالم: صح النوووووم
روضه تبتسم بتعب (بعده فيها رقاد): يصح بدنك
سالم يفتحلها ذراعه عشان تي تلوي عليه وهي ما صدقت (دلوعه العايله) : شوو هالرقااد !! خستي
روضه: تعباااانه (وتبوس اخوها بالقووو)
خلفان: ياسلااام الحب كله لسالم وانا حليلي من متى ما لويتي عليه وحبيتيني
نشت روضه بتسير تيلس عدال خلفان وتلوي عليه بس يودها سالم ..
سالم: انته عندك حرمه ,, انا حليلي ماعندي حد
شما لبقت من المستحى وخلفان وروضه يضحكون وام خلفان فرت سالم بالكلينكس
ام خلفان: اييه .. حشم شوي
سالم: قلت شي غلط
وقطعهم صوت تيلفون روضه ( يافتان طال البعد وانا عليك اون ..ونين بدوي طايح من ظهر ناقه )

روضه: هلاااااا والله
ميره وخانقتنها العبره: اهليين
حست روضه ان ميره فيها شي وقامت عنهم : ميروه عيوني بلاج
طبعا سالم سمعها وطلع اونه بيروح .. ولحق روضه
ميره: رووويض بمووت والله .. اول مره اخااف جيه من امتحان
روضه: ههه حسبي الله على بليسج ,, تحريت شي فيج
ميره: رويض لا تستويلي لطوف الثانيه ..مول ما تحس فيه
روضه: ماعليه حبيبتي ها شعور عادي صدقيني ,,كلنا مرينا بنفس الشعور وخصوصا العلمي
ميره: انزين ,, انا متاكده اني فاهم الدرس واعرفه بس يوم ايي بحل ما اعرف تتيبس يديه .. واتخربط
روضه: الرياضيات ؟!
ميره: هيه ,, ها هو الكابوس العود
روضه: خلاص ولا يهمج ,, انا بساعدج ..والا نسيتي اني كنت علمي واحب الرياضيات
ميره: صدق !!
روضه:طبعا .. متى ما تبين
ميره: اللحين
روضه: يلا انزين تعالي اللحين
ميره: اوكي ,, ببدل وبقول لفاروق يشل السياره
سالم كسر روضه وهو ياشر عشان تقول انها هي بتسير تيبها وقالتلها وميره قالت لا عادي بيبني الدريول بس روضه اصرت عليها ,,مافيها على حلج سالم ..وافقت ميره وسارت تلبس وسالم خذ سويج روضه وسار بيب روضه وروضه ردت الخيمه ..
طبعا سالتها شما شو فيها ميره وقالتلها انها مب فاهم شي فالرياضيات وتباها تفهمها ..وكملو سوالفهم ..
سالم وصل بيت عمه وصيح هرن وطلعت ميره وهي على ويها تتحرا روضه اللي يايه لانها شافت سيارتها ..يوم ركبت انتبهت انه سالم ويتب تنزل وقفل الباب ,,لفت ميره اتطالعه وهي رافعه حاجبها
ميره: اونك يعني تقفل عليه ,,ماعرف افتحه يعني
ابتسم وريوس بسرعه عن لا تفتح الباب : وعليكم السلاام والرحمه
ميره: ليش طرشتك !! هي قالت انا باي اشلج
سالم: بخير الحمدلله
ميره:ههههههه تستعبط .. انا ماسلمت ولا سالت شحالك
سالم: ش اسويبج يوم انتي ما تعرفين السنع ..
ميره: ههه انزين سوري ,,السلاام عليك ,,شحالك ,واخبارك
سالم(يستعبط وياها) بخييييييير انتي شحاااالج
ميره: ههههههه اييه لا ترمس جيه
سالم: انشا الله عمتيه
سوالف وضحك ووصلوا البيت ..روضه يوم سمعت صوت السياره طلعت من الخيمه بتتلقى لميره ..نزلت ميره وهي تضحك
روضه: اللللللللله ع المستانسين ..يعله دووم ,,بس مب جنهم توهم كانو يصيحون
نزل سالم وهو شاق الحلج بعد : ويايه وتبينها اتم زعلانه
لفت ميره وحطت يدها في خاصرتها : ليش منو انت؟!
تقرب سالم منها وطالعها بنظره خربطتها : منو انا ؟!
تجدمت بسرعه صوب روضه وروضه تطالعهم وتضحك (وهي توايه روضه تهمس فاذنها) اخوج ها يجننننن
روضه: ههههه شو تقولين ميره ما سمعت
كفختها ميره على جتفها ودخلت الخيمه تسلم عليهم وروضه تترياها عند باب الخيمه عشان يسيرون داخل وسالم واقف عدال روضه يعني ماشي مجال تخطف ميره .. ضكت روضه بس يوده سالم وروضه تضحك وتهمس لسالم(والله بينتبهون)
وطالعها بنظره تعني (عاادي) رفعت ميره حاجبها وهي تطال سالم ما رام يتم واقف ضك على ورا وهلك ضحك ..
ابتبهو اللي فالخيمه انه في شي وروضه حاولت تدارك الموقف بسرعه
ام خلفان: بلاكم
روضه: تخرطفت وهو ضك عني لاني بتيود فيه
ام خلفان: الله يهديكم
خطفت ميره وروضه وسارن داخل البيت وسالم رد ييلس وياهم ..وعقب شوي يا بوخلفان وبوسلطان وياه .. سالم اتصل براشد وتواعدوا عند المقهى ويا الشباب وسارو .. وشما شلت ولدها وسارت بتحطه فالحجره لانه رقد وخلفان وامه وابوه وعمه يسولفون عن العزبه والمزارع والحلاال (ٍسوالف الشواب اللي ما تخلص) .. عقب ما حطت شما ولدها شغلت الجهاز عداله (عشان تسمعه اذا صاح) وخذت الجهاز الثاني وياها وخطفت عالبنات تشوفهم قبل ما تنزل ..
شما: ها بنات ,,اخباركن
ميره: فديتها والله رواضي بسطتلي الامور وايد ,, احسن عن المس
روضه: لا تبالغين عاد ,, صح بسطت الحل ,, بس مب احسن من المس
ميره: لااوالله احسن ,, جيه عرفت احل
شما: زين الله يوفقج انشا الله
ميره: انشا الله,, يلا نحن باقلنا شوي ونخلص
شما: بهالسرعه ,,ها رياضيات ما يباله تجليب صفحات

روضه: هههه لا بس هي جزئيه بسيطه مب فاهمتنها واللحين تحل عليها تمارين وخلاص
شما: اهاا ..زين عيل ,, اخليكم تخلصون
وروحت عنهم شما وميره كملت حل تمارين وروضه وياها وعقب ساعه نزلن وكان بوسلطان يركب سيارته بيروح وشافت ميره وزقرته ..لف يطالعها لانه تحراها شما ما يدري ان ميره هنيه
بوسلطان: انتي هنيه؟
ميره: هيه رويض كانت تدرسني
وتجدمت روضه توايه عمها
بوسلطان: وخلصتي؟!
ميره: هيه
بوسلطان: يلا انزين .. دخلي الخيمه وايهي عمج ويلا بنسير
روضه: برايك عمي انا بوصلها عقب ما تتعشى
ميره تغمزلها : نفس ما يبتيني!!
ضحكت روضه وفهمت شو تقصد ميره ,, ودخلت ميره الخيمه وايهت عمها وترخصت وهي طالعه حبت روضه وتشكرتها وركبت عند ابوها وروحت البيت .. ورضه دخلت تيلس ويا ابوها شوي
محمد الصير صاح ونشت شما تركض داخل عنده ونش وراها خلفان ,,بيتسبح قبل الصلاه لان ماشي باقي عن الاذان ومحد تم الا روضه وامها وابوها .. غمز بوخلفان لحرمته وطلعت عنهم .. حست روضه انه ابوها عنده شي من كثر ما يتحنحن بس تمت ساكته واونها تبدل القنوات ..
بوخلفان: بنتي
فز قلب روضه: امر فديتك
بوخلفان: بنتي ,,انتي اللحين ماشي باقلج وان شا الله تتخرجين ..والسنوات تطوف .زامس كنتي ياهل واليوم ما شا الله عليج كبرتي واستويتي عروس ......الخ(من المقدمات اللي تضيع وقت وتربك البنت اكثر ) .. يا بنتي عمج رمسني اليوم ويباج لولده راشد
روضه طبعا لا تعليق ..
بوخلفان: انا مابا رد اللحين خذي وقتج وعلى راحتج ومتى ما قررتي خبري امج
روضه هزت راسها بس بدون تعليق __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
وقت الساعــة حسب توقيت الاحباب المحلي	reemoooh95	قصص و روايات	9	11-20-2011 12:42 PM
وقت الساعــة حسب توقيت الاحباب المحلي	reemoooh95	قصص و روايات	3	01-23-2010 02:11 PM
طلب امر لضبط توقيت الساعه بالنود	محروم.كوم	منتدى أخبار المواقع والمنتديات العربية والأجنبية	0	10-03-2009 03:20 PM
وقت الساعه حسب توقيت الاحباب المحلي] ~	!!ـنونه	عدسة الاعضاء , كاميرا الاعضاء	22	10-23-2008 04:45 PM
وقت الساعهـ حسب توقيت الاحباب ] ~ CuteClocks	sєdυcтivє ғoosнєүa	اثاث و ديكور المنازل والمطابخ والصالات	5	08-30-2008 01:52 AM