{{نهاية حبــك اعداميـــ }} - الصفحة 5

نبض روحي · 08-05-2008, 11:26 AM

" يظل الكون له اسرار .. مخفيه عن الانظار .. ولا ندري عن الاقدار .. رضينا بكل ما يجينا "
اعزائي المسافرين مكم كابتن الطائره على متن خطوط " طموح مجنون" تبقى على الوجهه 10 دقائق لذا نرجوا من مسافرينا البقاء في مقاعدهم وربط الاحزمه ... درجة الحراره في الخارج 29 درجه مئويه .... الخ
غمض عيونه وتنفس بعمق " آآآه واخيرا بشم ريحة بلادي .. من بعد هالغربه .. حسبي الله ونعم الوكيل.. الله لا يردها ايام " نزل من الطياره ومن فرحته وده لو يطير على البيت .. طلع من باب المطار و وقف يتأمل كل شي من حوله " تغيرت البلاد .. فديت البلاد والله " ركب التاكسي و وصف له البيت وصل عند البيت و وقف عند الباب نزل الشنطه من ايده وبكل قلق وخوف طق الباب اول مره محد رد عليه طق مره ثانيه انفتح الباب .. يوسف بطل عيونه مو مصدق اللي يشوفه جدامه
.......: والله وكبرت يا يوسف
يوسف بقلق: اهلا .. تفضل حياك .. ليش واقف عند الباب البيت بيتك .. دخلوا مع بعض وهنادي والجوهره كانوا في الصاله .. دخل يوسف واستغربوا خواته من اللي داخل مع يوسف .. الجوهره عرفته بس هنادي لا
هنادي بخوف: يوسف منو هاذي ؟ شلون ادخل علينا ريال غريب
الجوهره بعصبيه: هنادي .. هاذي الغريب يطلع خالج
هنادي: واحنا من متى عندنا اهل
يوسف بعصبيه: شو هالكلام .. ماتحشمون خالكم
خالهم: معليه يا يوسف مالومهم وبينه وبين نفسه انصدم من ردة فعل الجوهره
يوسف: السموحه خالي .. تفضل حياك
خالهم: دام فضلك يا يوسف .. والله وعرفتي تربين يا لولوه .. الا اختي وينها ؟ مو حزتها تقيل .. ولا يمكن طالعه مكان
في هاللحظه الجوهره ارتمت في احضان خالها سلمان وتمت تصيح بصوت عالي .. يوسف خنقته العبره وهنادي مستغربه
سلمان بخوف: الجوهره .. حبيبتي شفيج ؟
الجوهر: خالي انا اسفه .. سامحني
سلمان: ليش تتأسفين؟!؟
الجوهره: لاني ما كلمتك عدل ولا احترمتك
سلمان: حبيبتي لاتشيلين هم .. هاي اللي مزعلج؟
يوسف: خالي انت ماتدري وش صار لنا؟
سلمان رافع حاجب: هاا عسى خير .. شو صار لكم ؟ تكلم يا يوسف
يوسف: امي عطتك عمرها من 7 سنين
سلمان: يوسف هاي موضوع مايمزحون فيه .. شو تقول
الجوهره: من بعد وفاة ابوي بسنه امي توفت .. وسكتت الجوهره وتمت تصيح
سلمان: ليش محد قالي ...؟
يوسف: انت لما رحت امريكا انقطعت عنا وما عرفنا شي عنك .. حاولنا نكلم خالي سعد بس من بعد وفاة الوالده محد سأل فينا .. الكل تنكر وتبرى منا من صوب امي وابوي .. وعشنا على راتب الوالد واعمامي الله يسامحهم ماخلوا لنا شي اصلا ما كان عندنا شي زين بس ماحولوا راتب الوالد والوالد الله يرحمه ما كان عنده شي الا ذاك الدكان .. خذوه وعلى بالهم ان الوالد كان راعي حلال بس الحمدلله على كل حال .. الجوهره ماقصرت كانت لنا الام والابو كافحت عشانا وماقصرت بشي بيض الله ويهها .. وانا الحمدلله قدرت اوفق بين الشغل والدراسه .. ودلوعتنا هنادي في الجامعه ونشوف فيها طموحاتنا وآمالنا اللي ماقدرنا نحققها واللي هي بتحققها
غطى ويهه بإيدينه وقعد بتثاقل على الكرسي .. نزلت دموعه على كفوف ايده .. مسح دموعه ورفع راسه يطالع عيال اخته بحزن حس نفسه ولا شي جدامهم .. المفروض يكون معاهم لما توفت اخته .. لان اخته هي اللي مربيته وكان يعتبرها امه وكان قريب منها بس ظروفه منعته ..
يوسف بتردد: خالي ليش طولت في امريكا 7 سنين ؟
سلمان يتنهد: آآآه يا عيال اختي الغاليه .. في امريكا تبهدلت انذليت تحطمت كرامتي وانكسر كبريائي

الجوهره باستغراب: ليش شو اللي صار خالي؟
سلمان يتكلم وهو مخنوق: انا سافرت امريكا بعد ماشتغلت بكم سنه .. حمعت لي مبلغ وابوكم الله يرحمه ساعدني و ماقصر وعمري ما راح انسى له هالشي .. يوم سمعت بخبر وفاة الوالد رجعت من امريكا على طول
الجوهره: اذكر وقفتك معانا يا خالي
سلمان يكمل: حلفت علي المرحومه اني اروح اكمل .. رحت وانا مغصوب بس عشان خاطرها مع اني ماكنت ابي اترك المرحومه بروحها تعابلكم .. كنتوا محتاجين حد يوجهكم .. ورجعت امريكا وكنت اتطمن على اخباركم بين فتره وثانيه ومن بعد وصولي هناك بـ4 شهور اعتقلوني بدون سبب انا و2 من ربعي آآه تبهدلنا ماكانوا يخلونا نتصل بحد او حتى نوكل محامي .. ما كنا نعرف وش سبب الاعتقال .. كنا نقوم على ضرب ونرقد على ضرب .. ذقنا المر منهم حسبي الله ونعم الوكيل الله عليهم ... الله يزلزلهم انشالله

هنادي والجوهره صاحوا على خالهم .. وايد حزنوا عليه .. يوسف يسمعه بقهر ويدعي عليهم يكمل سلمان كلامه بحزن: بعدها بـ3 شهور قالوا لنا محكوم عليكم 6 سنين لترويجكم السموم في البلاد استغربنا نحن الثلاثه اي سموم واي بطيخ !! نبي ندافع عن نفسنا وماعطونا فرصه .. وعيونكم ماتشوف الا النور .. 6 سنين ضاعت من عمرنا في الغربه لا نوم ولا اكل والضحكه مانعرف طريقها وين .. بعد سنه في السجن واحد من اللي كانوا معانا توفى من الهم اللي فيه .. مات وهو نايم بس تصدقون اني حسدته ولا ادمعت عيني عليه الا فرحت له من خاطري .. موته كان احسن له .. ارتاح من الدنيا اللي عشناها ارتاح من الهم والعذاب والذل .. من بعد موته انا واللي معاي عشنا جحيم ... بس تعرفنا على بعض المساجين هناك واحد منهم كان اقشر محد يقدر يكلمه والكل يسوي له حساب .. مره انا وعبدالهادي كنا في ساحة السجن نتمرن مر صوبنا واحنا ماعطناه اهتمام كنا نتمرن وقف وكلم عبدالهادي
السجين: هي .. انت تسوي التمرين غلط .. Hey you are doing it working
وقف عبدالهدي: بس المدرب علمني.. كيف غلط؟ The coach taught me, how come it’s wrong?
مسك عبدالهادي وعلمه الطريقه الصحيحه .. انا وعبدالهادي بطلنا عيونا .. شكرناه وراح عنا ..
بعد كم يوم شفناه في ساحة السجن يتأمل السما مرينا من صوبه ولا سلمنا عليه .. وقفنا وقال
السجين: هاي يالربع .. Hi pals...
وقفنا نطالع بعض انا وعبدالهادي
تقرب منا وعرف بنفسه: انا سميث وانتوا؟ I am smith, how about you?
سلمان: انا سلمان وصديقي عبدالهادي I am Salman and my friend is Abdulhadi
سميث مبتسم: تشرفت بمعرفتكم It's a pleasure to meet you
سلمان: مشكور .. لازم نروح الحين Thank you, well we better be going now
عبدالهادي: نشوفك وقت ثاني See you some other times
سميث: اوكي مع السلامه Ok .. Bye
هني سكت سلمان وحط راسه على الكرسي وغمض عيونه ..
يوسف: خالي شفيك تعبان؟ روح ارتاح في غرفتي لين نجهز لك الغرفه الثانيه
سلمان قام من الكرسي بتثاقل: اوكي ببس لاتعلمون حد اني رجعت .. هنادي يمه تعالي طلعي لي ملابس ابي اخذ شور ..
هنادي: وراك خالي ..
راح سلمان غرفة يوسف وجهزت له هنادي الحمام وملابسه وبعدها ارتمى على السرير ونام بعمق __DEFINE_LIKE_SHARE__

نبض روحي · 08-05-2008, 11:26 AM

في بيت بوفارس بعد صلاة المغرب الكل متوتر ويحاتي خالد اتصل بوفارس على بيته عشان يطمن قلوبهم عليه
جاسم: السلام عليكم
بوفارس: فديت صوتك .. عليك السلام شلونكم يبه ؟
جاسم: بخير يبه .. طمنا على خالد
بوفارس: بخير الحمدلله .. من حولك؟
جاسم: مريم
بوفارس: عطها السماعه
جاسم: انشالله مريامي ابوي يبيج
مريم: هلا بابا .. طمنا
بوفارس: لا تنفعلين ولاتقولين شي جدام الجسمي زين
مريم بخوف: انشالله
بوفارس: حالته وايد صعبه .. مايتكلم واحتمال يسفرونه عند مطوع في مكه
مريم: الحمدلله على كل حال .. متى بترجعون البيت؟
بوفارس: مادري .. انا بعد شوي برجع مع امج واخوانج بيتمون
مريم سكرت من ابوها ومابينت شي لجاسم .. وراحت غرفتها على طول صاحت على خالد لين غمضت عيونها ونامت
رجع بوفارس وكان مرهق .. قعد على الارض وحط ايده على ويهه وتم يفكر دشت عليه فاطمه وباست راسه وقعدت جنبه
فاطمه: بابا طمنا على خالد ..
بوفارس رفع راسه: ما قالت لكم مريم شي

فاطمه: لا .. ماشفتها
قال بوفارس لفاطمه نفس الكلام اللي قاله لمريم انصدمت فاطمه وحزنت على ولد عمها
في بيت بومحمد الوضع مو احسن من بيت بوفارس .. هم ودموع وحزن
الريم: فاضل تعال معاي ابي اروح عند خالد
فاضل: بس لا تمين تصيحين جدامه سمعتي ...
الريم: آآآه .. بحاول
دخلوا غرفة خالد ولقوه قاعد على طرف السرير ومنزل راسه ..
الريم: خالد شلونك فديتك؟
خالد: بخير .. الريم استانست ان خالد رد عليها
الريم: تبي اجيب لك العشا ..
خالد تغير صوته: لالالالالالالالالالالا
الريم خافت وتمت تصيح .. فاضل راح عند خالد وتم يقرى عليه .. قام خالد ومسك الريم من ايدها وارتمى في احضانها وتم يصيح بصوت مسموع .. حضنته الريم وتمت تصيح معاه .. وخالد يقول في خاطره " يا ليت اقدر اقول وش فيني " بعد فتره سكت وغفت عينه في حضن اخته .. دخل عليهم الجد " سلطان "
سلطان: ها الريم يبه .. شو فيه اخوج
الريم: مافيه شي بس جى عندي وغطت عينه ..
سلطان: فاضل قعد اخوك و وده على سريره
فاضل: انشالله يدي ... مسك اخوه من كتوفه و وداه على سريره ولحفه عدل وطلعوا من غرفته
فاضل: الريم تعالي شوي غرفتي ابغيج
الريم: انشالله .. و راحت ورا فاضل غرفته
فاضل متوتر: ريامي . .. مممممممممممم والله ماعرف شو اقولج
الريم: فاضل تكلم .. شو فيك ارجوك لاتزيد همي ..
فاضل: فهد كان عندي امس فالليل .. بعد ما شاف حالة خالد .. تم يصيح وقالي شي عن خالد بس ابيج تساعديني ...
الريم مو فاهمه شي: خير وش قالك فهد .. وش فيه خالد المسكين هو ناقص
فاضل: خالد علاجه مع القرآن موجود بين ايدينه ..
الريم: هااا شو تقول؟ شلون ؟ تكفى قولي .. حيرتني فضوووول
فاضل: لا تحتارين ولا شي .. خالد يموت في .............. بنت عمي محمد ومحد يدري الا فهد لان خالد صارحه لما فهد لاحظ عليه ..
الريم مبطلعه عيونه وفمها على الآخر: خالد ... والله طلعت مو هين بو وليد .. زين شلون بنقنع بنت العم ويمكن ماتتقبل الفكره من الاساس وما اعتقد انها تكن له اي مشاعر ..
فاضل: ليش لا حبيبتي .. هي بتلقى احسن من خالد .. كفايه انه ولد عمها ويموت فيها و ......... قلبها كبير بتراعي هالشي ولما تعرف انه يموت فيها بيحن قلبها عليه..
الريم: زين كيف افاتحها بالموضوع؟؟
فاضل: كلميها على التلفون او نروح لها البيت
الريم: اوكي عيل حلو بكلمها بكره احسن عشان اجهز لها مقدمه
فاضل: بكره .. مستحيل الحين تتصلين فيها .. مابي يسفرون خالد .. انشالله علاجه هني
الريم: اتصلت الريم بيت عمها محمد وردت عليها فاطمه
الريم: السلام عليكم ...
فاطمه: عليكم السلام .. __DEFINE_LIKE_SHARE__

♕ وليد الجسمي ♕ · 08-05-2008, 05:47 PM

تسلمين اختي احبني على هالقصة بصراحة امبين عليها وااايد روعة

وانا في انتظاار القصة بس يا الله عاااد لا تتاخرين __DEFINE_LIKE_SHARE__

%كشخة% · 08-08-2008, 02:32 AM

[align=center]مشكوررررررررررررررة والله ...

يلة حبيبتي الله يخليج لاتتاخرين علينا...

*_^[/align] __DEFINE_LIKE_SHARE__

نبض روحي · 08-10-2008, 03:26 PM

فاضل: بكره .. مستحيل الحين تتصلين فيها .. مابي يسفرون خالد .. انشالله علاجه هني
الريم: اتصلت الريم بيت عمها محمد وردت عليها فاطمه
الريم: السلام عليكم ...
فاطمه: عليكم السلام .. هلا الريم شو اخباركم ؟
الريم: الحمدلله .. انتوا شو مسوين ؟
فاطمه: والله قلوبنا عندكم ..
الريم بحزن: انشالله خالد ماعليه شر . ..
فاطمه: الله يشفيه
الريم: فطامي حبيبتي .. وين مرايم ...
فاطمه: نايمه
الريم منصدمه" هاي وقته ": هااا ... نايمه زين ماتقدرين تقعدينها .. ابيها ضروري
فاطمه مستغربه: انشالله من عيوني .. باشوفها لج الحين
راحت فاطمه تقعد مريم عشان تكلم الريم .. كان فيها فضول تعرف شو تبي منها الريم .. بس استحت تسأل ..
فاطمه: مريامي ... قومي الريم بنت عمي حمد تبغيج ضروري على التلفون ..
مريم قامت من النوم متخرعه: هااا شو صاير .. شو فيهم بيت عمي ؟
فاطمه: مافيهم الا العافيه .. بس الريم متصله تبغيج ضروري ... قومي كلميها
في الوقت اللي كانت فيه الريم نتنظر على الخط ..
فاضل: ها شو فيج .. ليش سكتي ..
الريم: اصبر ... اصبر .. راحت فطامي تقعدها من النوم ...
فاضل: يا حرام كانت نايمه ..
الريم: هلا مريامي .. شو اخبارج ؟
مريم: الحمدلله .. شو فيج ريموه خوفتيني .. خالد فيه شي ... ؟؟
الريم " يا عيني ما سألتي الا عن خالد ": الحمدلله خالد ما عليه شر انشالله .. بس ابيج تاخذين التلفون بعيد عنهم . .. ابيج في موضوع ضروري ولا ابي حد يسمعج تتكلمين ممكن ..
مريم استغربت وطالعت فاطمه .. سحبت التلفون وراحت غرفتها وسكرت الباب عليها .. فاطمه تعجبت من مريم !!!
الريم: ها بروحج الحين ؟؟
مريم: اي بروحي .. قولي ريموه .. خوفتيني
الريم ما عرفت شلون تبدى: مرايم ... مممممممم وسكتت وفاضل يطالعها ينتظرها تتكلم
مريم رفعت ايدها وشافت يدها ترجف: ريووووم ... صادتني رجفه قولي شو عندي ..
الريم: زين .. زين .. لو قلت لج ابي اخطبج حق خالد اخوي .. شو بيكون ردج ؟؟

مريم باستغراب: هااا .. خالد ... وسكتت
الريم: اي خالد
مريم: ريوووم .. شو اللي تبين توصلين له .. لا تلفين وادورين .. هاتي من الاخر
الريم بتوتر: خالد اخوي يحبج يا مريم ..
مريم منصدمه وتمت ساكته فتره .........
الريم: انا ادري انج منصدمه ومو مصدقه اللي اقوله .. لاني انصدمت قبلج ..
مريم: خالد يحبني .. انتي شدراج ؟ ؟
الريم: فهد قالي .. بس خالد مايدري لان ابيج تتقربين من اخوي يا مرايم .. انتي علاج اخوي ..
مريم تتكلم وهي تصيح: يعني انا السبب باللي صار لخالد .. وتمت تصيح
الريم بخوف: لالالا حبيبتي .. مريامي حياتي مو هاي قصدي .. ومريم تصيح بصوت مسموع ..
مريامي ارجوج لاتصيحين انتي فاهمه الموضوع غلط .. خلاص انا جايه بيتكم بس لاتبينين شي لاحد في البيت ارجوج ... سكرت الريم وقالت لفاضل الكلام اللي دار بينها وبين مريم ... وبسرعه طلعوا من البيت طيران على بيت عمهم ... فاطمه استغربت دخولهم البيت ..
فاطمه: يا حي الله عيال العم ...
فاضل: هلا فطامي .. واشر بعيونه على الريم تروح عند مريم ويشغل فاطمه عنهم شوي ..
راحت الريم غرفة مريم ولقتها غرقانه بدموعها ..
الريم بخوف: مريامي حياتي
مريم حضنت الريم: لالالا الريم .. انا السبب
الريم: لا حبيبتي والله مو انتي السبب .. هدي شوي خليني افهمج السالفه
مريم تمسح دموعها: فهد شو عرفه بالسالفه ؟؟
الريم: اللي صار لخالد اخوي انتي مالج ذنب فيه .. هو كان رايح بروحه البر وصار اللي صار .. فهد كان ملاحظ نظرات خالد لج وفهمها .. وابوي ومحمد اخوي شاكين ان خالد يحب ودوم يلمحون له بس هو يكابر ويتهرب منهم .. حتى انا لاحظت على خلود اخوي انه يسرح لما نتجع بيت يدي .. ولاحظي انه دوم عندكم .. وكل مانسأله وين رايح يقول بيت عمي يتحجج بمشاريعه مع فارس .. وفهد لما شاف حالة خالد اقترح ان تقربكم من بعض مع انه كان واعد خالد انه ما يقول لاحد هالسر بس للضروره احكام .. واعتقد يا مريامي ما بتلقين احسن من خالد اخوي .. صح ولا انا غلطانه ..
مريم اطالع ريم بصدمه مو مستوعبه اللي سمعته: خالد يحبني.. تدرين عمري ما فكرت في هالشي وصح كلامج ان خالد دوم عندنا بس ولا مره حسسني بنظره او كلمه او انه معجب او يميل لي .. وحتى خالد ما يتكلم معاي كثر فطوم .. ياخذ ويعطي معاها فالسوالف .. خالد ... خالد .. وغطت ويها بيدينها وصاحت شوي وقالت في نفسها " ما راح القى احسن من خالد " ورفعت راسها: بس ريوم ما ينجبر قلب على قلب .. مادري مادري ... آآآآآه
الريم: انا ماجبرج على اخوي .. بس انتي فكري فيه .. كانت الريم تحنن قلب الريم على اخوها .. صدقيني تناسبون بعض مريم وخالد .. واااو وانتي جميله يا مريم وخالد اخوي سنافي يعني انتاجكم بيكون شي شي شي
مريم تضحك: هههههههههه ... ريوووم جب مع ويهج ...
ارتاحت الريم من ضحكة مريم وتموا يسولفون مع بعض لين وقت متأخر .. وفاضل مبتلش تحت مع فاطمه اللي كل شوي تسأله عن سبب الزياره المتأخره وعن خالد وعن احوال البيت ...
فاطمه: فضووووول
فاضل بملل: لو سمحت فاضل .. آمريني..
فاطمه بغلاسه: فضووول ... فضووول .. ما يامر عليك عدو .. بس قولي شو جايبك هالحزه انت والاخت ريم .. والشيخه ريم شو تسوي مندعسه مع مريم فوق لهم اكثر من ساعه ..
فاضل: يا بنت عمي .. اسمي فاضل .. فاضل .. وبعدين مادري شو عندهم هالسحر مادري
فاطمه: اخاف ماتدري بس .. زين بحاول اصدقك
فاضل ويحذف فاطمه بعلبة الكلينكس: ياللوتيه .. روحي نادي الريم .. تاخر الوقت
فاطمه تضحك وهي رايحه فوق: فضووووووووووول ههههه من عيوني يا فضووول
راحت فوق وطقت الباب عليهم دشت الغرفه وشافت دموع اختها وخافت
فاطمه: مريوم شو فيج ؟
مريم: تعالي فطامي .. لازم تعرفين اللي يصير ... خافت فاطمه من كلام مريم وتمت اطلعهم بعين حايره ...
الريم قالت السالفه كلها لفاطمه ...
فاطمه: انا مو منصدمه كنت متوقعه هالشي..
مريم والريم يطالعون بعض: هاااااااااااا
فاطمه: انا لاحظت نظرات خالد لمريم اختي .. و لاحظت شلون يرتبك لما تكون مريم موجوده معانا ولو مريم مو موجوده ما يطول عندنا بسرعه يطلع .. والله مو هين ولد العم .. خلود شي شي شي بس لايقين لبعض مريم واااااو
مريم منحرجه: عااااد وغطت ويها بيدينها ..
الريم وفاطمه: هههههههههههههههه
فاطمه: زيم مريوم انتي ليش زعلانه .. ما شوف سبب يزعل؟ بس اللي لازم تسوينه انج تفكرين عدل خالد ولد عمج ولا بتلقين احسن منه .. تفائلي خالد ينحب
مريم: هااا شلون يعني ..
الريم: انتي حبيه وبتعرفين شلون ..
وقعدوا البنات يسولفون والريم تذكر محاسن خالد وفاطمه تزيدها .. ومريم تفكر في كلامهم بس محتاجه وقت الحب ما جربته من قبل وتخاف تنصدم ... بس من كلام فاطمه والريم تفائلت ..
نزلوا فاطمه والريم وفاضل كان بيصيح من الملل لانهم طولوا ..
فاضل: فطيم .. اعتقد اني طلبتج تنادين الريم مو تقعدين معاها ..
فاطمه: حريم ولازم نسولف ونعطل الريايل خخخخخخخخخ
الريم: خخخخخخخخ حلوووووه
فاضل: ريموه يلا لا ارتكب جريمه في بيت عمي ...
فاطه: ما قعدتوا عيال العم .. بدري
الريم: لا حبيبتي بكره ورانا اشغال ..
فاطمه: الله يحفظكم ..
فاضل و الريم: مع السلامه
في السياره .. الريم وفاضل يسولفون
فاضل: ها بشري ..
الريم: والله يالفضلي .. مريم قالت كلمه ترن في اذني وهي صادقه فيها ..
فاضل: شو هالكلمه ؟؟
الريم: قالت لي خالد ولد عمي بس ما ينجبر قلب على قلب ..
فاضل: هااا ...
الريم: بس انا وفاطمه كلمناها وعاد على الله انها تقتنع ..
فاضل: يعني قصدج مافي امل
الريم: لا انشالله في امل .. مريم بتميل لخالد باذن الله ..
فاضل: شو اللي ماخليج متأكده جي ..
الريم: حبيبي احنا حريم ونفهم بعض ..
فاضل: بس محد فاهم الريم كثري انا ..
الريم: ههههه اقولك احنا حريم .. افهم ياخي ..
فاضل والريم: هههههههههههه

مريم ما نامت ذيك الليله وهي تفكر في الاحداث اللي صارت لها .. كانت تفكر في خالد .. مريم طول عمرها تحلم انها تعيش قصة حب مثل اللي بالقصص وبدت تتخيل نفسها مع خالد .. تتخيله جاي ياخذها وهو راكب الحصان الابيض .. ويركبها معاه ويوديها لكوخهم اللي على النهر وجنبهم مزرعه صغيرونه والعربه الصغيره اللبي تجرها الخيول يتقضون بها .. وتخيلت خالد الفلاح البسيط وهي زوجته تشوفه يقطع الخشب وهي تساعده في جمعه وترتيبه .. وهي تجهز له الغدا وتسنع له البيت وملابسه .. مثل رسوم " فلونه " واااو شي شي شي خخخخخخ نامت مريم ذيك الليله على احلامها مع خالد .. __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
(( أبي حبــك )) // راعـــ الــحــب ـــي : إهــداء خــآص لـ ( ........... )	راعـــ الــحــب ـــي	شعر و خواطر	23	07-22-2010 09:34 PM
ع بــالك أبنسى حبــك فـ ليلـة و \| أروحـ\|؛	نبض روحي	هواتف , مسجات , وسائط , برامج , ثيمات , نغمات , بلوتوث	12	04-01-2010 01:52 PM
و تـωـأإلنـي عــن مقــدأإر حبــك •●	aħωάн	الشعر المنقول	7	07-13-2009 02:17 AM
انهنت في حبــك وانا حــر ما أنهان	محروم.كوم	منتدى أخبار المواقع والمنتديات العربية والأجنبية	0	04-18-2009 03:30 PM
●•» تــدري حبــك بعثــر الدنيـــآآآ فـي عينــي ... { pics } ....! ]\|«•●	Moon_AlMuhairi	المسنجر وملحقاته , توبيكات , ماسنجر بلس , msn	19	01-17-2009 11:57 PM