تذكرون ،،،،

السرمدي · #1 07-16-2008, 03:09 AM

السلام عليكم ورحمة الله وبركات

تذكرون ،،،،

تذكرون.. يوم إيّيك واحد ماصخ من العايلة أكبر منك ويقول لك: تبا أرسم لك ساعة وانته تمد له إيدك ويعضّك هذيك العضة اللي تصارخ منها .

‏تذكرون.. يوم كنا نصوّر فوري عند مصوّر الجمعية وطبعاً غصباً عليك الخلفية زرقاء مب بكيفك ولازم تمشط شعرك بالمشط اللي عنده.. كله شعر.. وبعدين يغسل لك الصورة بالآلة اللي عنده أم ذراع والأطراف مشرشرة ‏ويعطيك الصور بعد أسبوع.

تذكرون.. أول يوم دوام بالمدرسة كانوا يسلمونا الكتب كلهم مع بعض وصافينهم من الكبير إلى الصغير وطبعاً الكبير كتاب العلوم وكانوا يربطونهم بحبل عشان ما يطيحون مع 6 ‏دفاتر مجاناً.

‏تذكرون.. المعجون الصغير اللي ريحته تعوّر الراس ووياه عود لونه احمر وكنا نبطله بالمجلوب ونعصره ونلف العود عليه وننفخ عشان نسوي نفافيخ وطبعا ما تطلع النفاخة لين تطلع بلاعيمك وياها.

تذكرون.. يوم كنّا نشوف افتح يا سمسم ونتأثر بكعكي اللي ياكل بسكوت ونشتري بسكوت كاكاو ونتم ناكل مثله

ويا البسكوت المالح.

تذكرون.. يوم الجمعة ... ‏نقوم من الصبح على شان نسمع أغنية في قصص الشعوب قصائص لا تنتهي

وعالم حلو بهي يسكن في القلوب في قصص الشعوب .

تذكرون.. تيلفون بوقرص اللي يتعب صبوعك وانته تتصل ويا ويلك يطلع الرقم مشغول لأنه ما فيه ريدايل.

‏تذكرون.. يوم كنا نربط الشرشف على رقابنا مثل سوبرمان ونصعد فوق الكبت وانط على الدواشق وآخر شي ناقز غلط ومنكسرة إيدك.

‏تذكرون.. يوم كنا نحط بالفريزر العصير الطويل بونصين أو لبن أب عشان يثلج وكل ما تسير تبغي تاخذه تلقى الوالدة منزلتنه تحت وما ثلّج.. يا حسرة راحت الفرحة.

تذكرون.. يوم كانوا الأولاد يغسلون الحوش بالبروش والصابون قمة الوناسة.. يمسك البروش أونّه بيساعد وآخر شي طايح له سكيتنج على الكاشي والزولية وفي الليل وارمة ريله.

تذكرون.. يوم كنا نستقبل الحجاج من زود الفرحة واللهفة على الصوغة وآخر شي كم: مسواك وقحفيتين والكاميرا الحمراء وسيادة وللبنات قطعة خام مال الهنود وساعة.

تذكرون.. يوم كنا نشوف مسرحيات الأطفال مثل السندباد والزرزور وألف باء تاء اللي فيها عبدالرحمن العقل ويوم الحرامي يكون وراه.. نصرخ من قمة راسنا: ورااااااك وراااااااك وهو يقول وينه وينه يميييييين يميييييين....

‏ياعيني على الاستهبال .

تذكرون.. عزايم قبل والسفرة المفروشة على كبر الصالة اللي على صورة ميوه (‏فواكه) ‏وريحتها لازم مثل ريحة المطبخ وجالسين على الزولية اللي يوم تقوم تلقى ريلك كلها شخوط من الزولية.

تذكرون.. أيام الدراسة قبل يعني يكون بنشد حيلنا بالدراسة ونشتري قلم فسفوري أصفر وإلاّ برتقالي عشان نظلل على الشي المهم وآخر شي مظللين على كل الكتاب.. وين الشي المهم؟؟ ما أدري!!!!

تذكرون.. أول ما يسرقون الأولاد سيارة أبوهم كانت الريل اليمين على البترول والريل اليسار على البريك من الثوارة .... ‏ولازم طبعاً يمر على الربع في الفريج يصيّح ويلات عليهم....‏ويعطيه بريك وبترول

تذكرون.. يوم كانت جائزة البيبسي سيارة في غطاة الغرشة كنا الظهر نسير وراء الدكان ونبطل الغراش كلها وبعدين نرد نسكرهم أي كلام تشوف الغازات كلها طايرة ومتبخرة ومستوي البيبسي ماي .

‏تذكرون.. يوم يقول الأستاذ أو المعلمة ان هذي الصفحات ملغية
تعال شوف الشخابيط اللي على الصفحة من فوق لين تحت وإلاّ نطرها من الكتاب.....‏ليش هالحقد عاد؟

تذكرون.. يوم نتضارب مع ولد اليران وتقول له: خوز عن بيتنا وعن رصيفنا..

يقول لك: مب رصيفكم هذا رصيف الحكومة
كلام منطقي, ‏ويتم يحوس جدام البيت ويمر جدام ويقول لك ما جستك ما جستك.

تذكرون.. يوم يسيرون الأولاد السوق ويّا أبوهم يشتري لهم قطع كنادير للعيد ..وآخر شي شاري طاقة كاملة نفس اللون وتشوفهم بأول يوم العيد من الوالد لين الأخو الصغير نفس لون لابسينه كلهم ‏تقول فرقة عيالة.

تذكرون.. يوم يبغون الشباب يشلون حديد قبل يترسون قواطي النيدو اسمنت ويحطون بينهم بيب حديد وهووووووووب وآخر شي منكسرة ظهورهم.

تذكرون...يوم نكسف الدواشق ونسويهم خيم...أو ناخذ التكي ونسويهم بيوت.

واللي ما سوى شي من المذكور فوق بيكون من عيال وجيل ماكدونالدز و هارديز و ايد هاردي.. فاتتكم هاذيك الأيام

عيال هالأيام تلقاه عايش مرحلة وحده بس ألا وهي مرحة الكبار سيارة وموبايل و حواطه في المولات. ماشاف لا رسوم ولا لعب واهوه صغير..

أول ما يفتح التلفزيون تلقاه يطالع هيفا ونانسي وروبي

وعلى أيامنا قصص عالمية و برامج دينية ومحمد عبدو يغني ليلة خميس

وجابر جاسم يغني غزيل فله

وبالخير يغني يا علاية لووووووول

والظهر مراكيض الهجن والله أيام

وألحين الصغار يطالعون ويسمعون دقنيييييييييييي هههههههه

للأسف صار الجيل الجديد بلا هوية

منقوول من الايميل __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
Spiro تذكرون هذه اللعبة من أيام الطفولة !!!	محروم.كوم	منتدى أخبار المواقع والمنتديات العربية والأجنبية	0	02-23-2010 12:20 AM
iMoo تذكرون هذه اللعبة !!!	محروم.كوم	منتدى أخبار المواقع والمنتديات العربية والأجنبية	0	01-25-2010 06:50 PM
هل تذكرون هذه القصة ؟	محروم.كوم	منتدى أخبار المواقع والمنتديات العربية والأجنبية	0	11-13-2009 11:20 AM
هل تذكرون 3300 ساعدوني	محروم.كوم	منتدى أخبار المواقع والمنتديات العربية والأجنبية	0	10-25-2009 03:00 AM
{ تذكرون...~	5rbo0osh	التراث والحضارة	20	04-30-2008 07:47 PM