~» .. غريبه وســط أوطــاني .. «~ - الصفحة 29

راعي استاندر · #1 03-29-2010, 10:22 PM

كشخه الباااااااااارت

كملي كملي __DEFINE_LIKE_SHARE__

%العيوز% · 03-30-2010, 03:45 PM

كملي بسرعه ابغي اعرف شوة بيصير __DEFINE_LIKE_SHARE__

بنوتة من العين · 03-31-2010, 11:22 AM

سعيد: قلتلج مب مهم ..!! انتي ليش مهتمه هالكثـر ؟

حموده: سعيـد انا من عرفتك وانته دوم سوالــف وضحـك وانته اللي عاطـي هالبيـت حياه .. وأكيد اذا شفتـك مهموم وتعبان جذيـه بهتـم .. انا أعتبـرك خويه يا سعيـد !

سعيد: والله مـادري شقــولـج .. انا مبتلي بـ بليّه وأكبر بليّــه ..

حموده: كـل شي لـه حـل بس انتـه قـول ..

سعيـد:تبين الرمـسه من الآخــر .. أنـــا معرّس بالســر ومـاخذ أجنبيــه !

حموده: شووووووووووووووه ؟؟؟؟؟؟؟؟؟

سعيد: شسوي حبيـتها .. لكـنهــا سـافــرت وشلـت عيالـي فيـاها ..

حموده: السـالفه فيـها عيـال بـعد ؟ جيه انته من متى ماخـذنها ؟

سعيد: من ثلاث سنيـن ..

انصــدمــت .. معقـــوله سعيــد يسوي جذيــه ؟ شو هالكثـر متأثر من أبـويه الله يرحمه؟ بس عيالـه .. لازم اييبـهم .. لازم مايستوي فيـهم شـراتيه !

حموده: عيــالـــك .. من بــاجـر تسـافـر صوبــها وين ملتعـنه وتيـب عيـالـك ..

سعيد: ويـن بحـطهم ؟

حموده: ماعليـك انا بدبــر الســالفـه .. بس لازم عيـالك مايتمـون بعيديــن عنـك .. لازم مايستوي فيـهم شراتيـه .. من متى هي شالتـنهم ؟

سعيد: من شهريـن الحيـن ..

حموده: خيــــــــبه عيل لازم تلحـقها بســـرعه .. من وين هي ؟

سعيد: ألمـانيـه ..

حموده: أشوا يوم هي مب امريكيه .. ع الاقل تروم توصل لهــا .. يالله من بــاجر لازم تســافـر ..

سعيد : انزين وشو أقــولـــهم هاللي هنيـه ؟

حموده: قولـهم مسـافر حق الشغـل عندك دوره .. ولا واحد من ربعـك مرقـد برا .. ولا أي شـي ..

تنهد وقال : انزيـــن ..

حموده: يالله انقفض قوم زهب قشـارك ..

سعيـد: يعنــي أعتــمد عليـج عشـان العيـال ؟ ..

حموده: أفــا عليــك .. خـلاص لا تشـل هـم بس انته قوم زهب قشـارك ..

وقام ورقــا صوب حجــرته .. وانا احتــرت شسوي .. أخبــر خــالد ؟ هـذا روحــه يبـا سبب عشـان يعصــب .. بــس لام أخبــره ماعنــدي غيـره .. وخـلاف بنخـبر باقـي العايـله بـهدوووووء ..

بعــد ســاعه وشـوي .. نزل سعيـد بشنطتـه .. وقف جداميـه ووطّا شنطته فالدعنه ..

سعيد: مشكووره مشكووره وايد مادري لـولاج شو كنت بسـوي ..

حموده: افـا مابيـنّا مشكووره ومعفووفـه ترانيـه بزعــل .. نحنـا اخواااان !!

سعيد: أكيــد .. شي في خـاطرج عيل انــا مروّح ..

حموده: ســلامتـك الله يردك انتـه وعيـالك بالسـلامــه ...

سعيد: ادعيلـي اني أحصــلهم انشـالله ...

حموده: انشالله بتحصلــهم انته توكل على ربك اللي يتوكل على ربه مايخيب ..

سعيد: والنـعم بالله ..

شل شنطته وقال: فداعة الله ..

حموده: الله يحفــظـــك ..

شـل شنطـته وظهـر من البيـت ..

فلّيـــل انتشـــر خبـر عند كـل العايــله انـه سعيـد ســافــر .. والعـذر كـان انه واحـد من ربـعه كان تعبـان ومرقـد برا .. في حجرتنـا انا وخـالد استجمعت شجـاعتيه وقررت أخبـر خـالد .. كان منسدح على ريـوليـه وكنا نطـالع التلــفزوون ..

حمـوده: حبيــبي ..

خالد: عيــونـه ..

حموده: تسلــم عيـوونــك .. الا بغيت اسألـك .. انتـه شو رايـك في ابويـه الله يرحمـه .؟

طالعنيه خالد وجنه مستغرب من سؤاليـه : الله يرحمه .. بس شو قصـدج يعني ؟

حموده: يعني في تصـرفاته .. يوم خذ اميـه وهي اجنبيه واهله مايدرون .. يعني شو رايـك فيه في تصرفه وفي موقفــه ..

خالد: أكيـــد حبــها كثـر ما أنـا حبيـتج عشـان جذيـه خــذهـا من ورا هلـه ..

حموده: يعني انته ماحقدت عليه ولا طاح من عيـنك ؟

خالد: يوم جـربت الحـب عذرتـه ..

حموده: واذا سعيـد سوا نفـس الشي بعد بتعـذره .. ؟؟

قام عن ريليه ووقف ..

خالد: سعّوود شو خصه ؟

حموده: أول شي لاتعــصـب ..

وربعت صوب باب الحجره وقفلتـه وخشيت المفتـاح عنديـه ..

خالد :قولـي شو مسوي سعّوود ؟

حموده: تراه هو مسـافر اليـوم عشان اييب عيالـه ..

خالد: عيـاله !!!!!!!!!

حموده: هو معـرس من ثلاث سنيـن بـ ألمـانيـه بس هي سافرت عنه وشلت عيـاله ..

خالد: وانتي شدراااج ؟

حموده: هو اليوم خبرنيـه وانا اللي قلت له يسافر واييب عيالـه ..

خالد: وشقــايـل نحــن مانــدري ؟ ليـش ماخبــرنا ؟

حموده: اكيد خــاف منكــم !!

خالد: الحين انتـي صدق ترمسيـن ؟

حموده: هيه عيل اجذب عليــك ..

يلـــس ع الكـرسي وهـو منصــدم وجنه سمـع أكــبر صدمـه في حياتـه ..

خالد: مــاصـدّق ! أخويـه أنــا يسـوي جذيـه ؟

حمـوده: استهدي بالله و صـل ع النبـي .. هــد اعصــابك ..

خالد: اللهم صلي عليه وسلـم .. بس سعّود عاد ..!! ماتوقعتـها منـه !! متى خذهـا ؟ وشقايل خشها ؟ ومتى ياب منهـا عيـال ؟

حموده: خـالد اذا رد سعيـد لا تتضـارب وياه ولا تطـرده حاول تتفهم موقفه .. لا تسوي في عياله شـرات ما سوى عمي سيف فيّه ! ما سأل فيّه وخلا اميه تشلنيه أمريكا .. دخيـلك حكّم عقلـك قبل لاتسـوي أي شي ..

خالد: انزيـن باقي العايله شالصـرفه فياهم ؟

حموده: تتوقـع يعنـي بيعصبـوون ؟

خالد: شـي أكيــــد خاصةً أبـوويـه ..

حموده: يعنـي شو بنسـوي الحيـن ؟

خالد : مـادري .. انا اروحيـه مب متقبـل السـالفه ..

حموده: انــا بظهـر وانتـه فكـر ع راحــتك ..

خالد: انزيـن ..

شليت مي وظهـرت .. كانــت السـاعه 11:30 فلّيـل .. سـرت صوب حجـرة فطوم اللي ظهرت من كمن يوم من المستشفى وخالد حابسـنها فالحجره وحارمـنها من الجامعه و النت واللابتوب والتيلفون وأكيد الطلعه من البيت بعد ..

هبطـت عليـها حصلتـها منسدحه ويالسه اطّالـع مسلسل تـركي ..

حموده: زيـن يوم انـج مب راقــده بيلـس عندج شـوي ..

فطوم: حيّــاج .. زين يوم حد افتـكر فيّه ! هــاتي هالمفعوووصه تولــهت عليـها ..

عطيتها اياها .. ألتهت بهـا وانا تميـت أجلب القنوات فالتلفزون بما انه المسلسل خلص ..

خلاف قلت فجأه وانا اطالع التلفزون : تدرين انه سعيد ماخذ أجنبيه عشان جذيه هو مسـافـر ..

فطووم: شووووووووووووووووووووووووووووووووووووووه ؟؟؟؟؟؟؟؟؟؟؟؟؟ لـحظه شسالفه شو اللي سمعته توني .. ؟؟؟

خبــرتهـا بكـل السـالفه ..

فطوم: الله يعني بتزيـد نسبـة الشقــــر فالعـايلـه !

حموده: يــــــــــــــــــــــالله هذا اللي هامـنج انتي الحيــن ؟

فطوم: انزيـن ليـش سعّوود ماخبــرنيـه ؟؟؟ ليش يعني بالذات خبرج انتي ؟

حموده: لأني انا اللي تخبـرته يوم شفته تعبــااان .. امـا انتوا ما اهتميـتوا .. أصلاً منو يهتم بـ حد في هالبيـت .. انتوا كل واحد فيكم اللهم نفسي .. الحمدلله والشكـر !

فطوم: مب متفيجين نهتـم فـ بعـض .. وأظـني شفتي نتيـجة هالشـي فينا انا وسعّود والله يستر من الياي !

حموده: الله يستــــر بــس أخــاف خويـلد بعد تظهـر فيـه علّـه !

فطوم: علتـه انه شيــبه وتفكيـره تفكيـر شوّاااااب ..

حموده: فديــت رووحه انا والله ..

فطوم: هيه تـراج هب انتي اللي دابغـنج لين قلتي بـس .. !

حموده: بسم الله عليّه .. بعدين هذا اخووج عيــب !

فطوم: مالــت عليــه !

هبــطت علينا ريموه بعيـالها فجأه ..

الريم: منو هـذا اللي مالت عليـه ؟

فطوم: بسم الله انتي شو مهضلـنج هنيه ؟

الريم: علاوي متوذي من اليـهال وصيـاحهم قلت ايي احشركم انتوا هنيه !

فطوم: منـو عــــلاوي ؟؟

الريم: علّووووووووووه أخوووج ..

حموده: الحين علّوه استوا علاوي ؟؟ يالله بالســتر .. ريال طول بعرض تسمينه علاوي ؟ لو بعده ياهــل !

الريم: فديــته ريلي وادلعه كيـفي !

فطوم: مالـت عليـج ! ( وسوت لها مـالت ) ..

و كمــلنـا ســوااالــفـنا (وأكيد مانسينا نخبرها بسالفة سعيد) وأذن الفيـر وكـل وحده سـارت صـوب حجـرتها ..

أول ماهبطـت الحجره حصلت خالد توه ظـاهر متوضـي ..

خالد: أنـا بسيـر أصلــي ..

حموده: الله يحفظك ..

وظهر عنيـه .. وانا رقـّدت مي وحطيـتها فالمـنز .. وصليت ورقـدت ..

بالبــاجـر وعيـت على حد يهزنيه .. فتحت عيونيه شفت فطوم وهي توعينيه بدفااشـه ..

حموده: يــووووه شعــندج انتـي من صبـاح الله خيـر ..؟؟

فطوم: بنـتج تصيـح تعالـي لهـا ..

قمت وفركت عيونـيه .. مابتصـدقون فـ منو حلــمت .. حلمـت المــاضـي المــر .. حمد واميـه !

طالعت الساعه ع اليـدار شفتها 8:30 .. قمت من ع الشبـريه ووقفـت صـوب منـز مي .. شفتهـا راقـده ..

طالعت فطوم وقلـت : يالجذوووووووووووووووووووب ..

فطوم: شسوي .. بس مب ملاحظه شـي غريـب ؟

حموده: شو ؟ هيـــه صــح خلّووود أفـرج عنــج ..

فطوم: هيــه .. باركيـلي ..

حموده: مبرووووك ..

فطوم: بــس شـرط عليّه شـرط ..

حموده: شو ؟

فطوم: اني اوافق آخذ سيف ولد خالـيه ..

حموده: وافقتـي ؟

فطوم: هيه .. أبــا الفكـه يبـوج .. لو تميـت هنيه بتخبـل من الحكـره لأنه أكيد خالد مابيفرج عنيه بسهوولـه ..

حموده: بس بعـدج صغيـره وخريــش مب مال عرس ..

فطوم: عادي بخترش أكثــر .. ع قولة يدوه .. امبونه خريش وقرقعوا له شنّه !

حموده: أمــا يدوه عليـها أمثـال !

فطوم: انزين انتي شو رايج فـ سيف ؟

حموده: من أي ناحيه ؟

فطوم: من كل النواحـي .. انا ماعـرفه عـدل .. ماعرف اطباعه ..

حموده: شوفي هو مـب عصــبي وما فيـه هالعقـد اللي فهالعايــله .. وخريــش وخبــله أكثــر عنــج اذا هو بعده مثل ما أحيده .. و اذا حبج مستحيــل انه يـزعلــج .. و ع فكره اذا ماتدريـن هو صوتـه حلـو يوم يغنـي ..

فطوم: أوكيـــه زيــن عيل .. الحمدلله بفــتك من هالبــيت !!

حموده: واايد فـرحانه الاخـت !

فطوم: واااااااااااااايــد !

حموده: الله يهنــيج ..

فطوم: آميــن ..

حموده: انزيـن شو تبيـن انـتي موعيتنيـه من صباح الله خيـر ؟

فطـوم: أبــا تيلـفوونـج ..

حموده: شو تبيـنه ؟

فطوم: أبــا أرمـس فهـد وأخبـره باللي استـوا ..

حموده: شوووووووووه ؟؟

فطوم: دخيـــلج ..

حموده: لا لا لا لا .. بيذبحنيـه خالد ..

فطوم: انزيـن وهو شـدراه ؟

حموده: تراه هو اللي يدفع فاتورة تيلفونيـه وأكيــد بيشوف فالكشف كـل الارقـام الصـادره !

فطوم: يووووه انزين قولي انها وحده من ربايعـج ..

حموده: لا فديـتج اخوج هب هيّن ما اطّوف عليـه هالسـوااالــف .. هـذا أكثـر انسـان شكّــاك فالـدنيـا .. وأصلاً هو أروحـه يدوّر عليّه الزلــه !

فطوم: انزيـن أنـا شو اسـوي الحيـن ؟

حموده: ماشـي .. صكي الدعنه ويلـسي !

فطوم: يوووووووووووووووووووووووووووووووه منــج !

وظهـرت من الحجـره .. وانا قفلت الباب وراها .. هاللي قاصـر بعد أخرب بيتيه عشـان خبالـها ! عقيت بعمريه ع الشبريه ورقـدت ..

وعيــت ع صيـاح مي .. الظـاهر اليوم ماليه نصيـب أرقد عــدل .. رقـدتها وطالعت السـاعه .. كانت 10:30 الضـحى .. تسبـحت وبدلت ثيابيـه وظهـرت من الحجره .. ويلست فالصاله رويحاتيه .. ام خالد سياره صوب عزبتها .. وعلي وريموه عند قوم يدوه .. وفطوم أكيد في حجرتها وانا مالي بارض عليها الصراحه .. وخالد فالدوام طبعاً .. دقيت له استأذنه عشان اطلـع ..

حموده: ألوووه ..

قال بنبره جامده : هلا ..

حموده: حــد عدالـك ؟

خالد: المديـر عندنا فالمكتب ..

حموده: أهــا ... الا بغيـت أقولـك ترانيه بظهـر اتحوّط شوي مليت من اليلسه رويحاتيه

خالد: بـرايج بس لا اتأخريـن ..

استغربت موافقته المباشره بس قلت: انشالله من عيوونـــي .. شي فخاطرك ؟

خالد: سلامتج يالله مع السلامه ..

حموده: مع السلامه ..

بندت عنه وربعت صوب حجرتيه .. لبست عباتيـه وشليت بنتيه .. زقرت خدامتيه "كاستي" عشان تي عنديه .. ركبنا السياره وروحنا ..

كاستي : ماما انته وين في روه ؟

حموده: مــادري يمكـن أسير السووق ..

كاستي: انا في يريد ودي فلوس مشان بلاد مشان ماما مال أنا .. انته يقدر ودي ؟

حموده: عنبووج يالرمسه المخبقه ! حتى سليـنووه العنز ماترمس جذيـه .. أسميـكم خربتوا العـربي ..

تمت كاستي اطالعنيه جنها بقره شايفه حريجه .. ضحكت عليها وقلت ..

حموده: بوديــج اطّرشيـن فلووس لا تخــافيـن ..

ابتسمت كاستي وقالت : مشكوور ماما ..

كملت انا على نفس النغمه : معفوف كـاستي ..

وضحكـنا على بــعض ..

وسـرنا صوب واحـد من الصرّافات .. ونزلت كاسـتي عشان اطرش فلووس .. وعقـب ماخلصـت سـرنا صوب العيـن مووول .. ماخليـت محل يهال ماهبطته ولمّيت لمة لبووس حق مي .. تصدقون نسيت أشري حق عمريه شي !

تعبـنا ويلـسنا عند ستار بكس بما انه كان المكان فاضي .. أنا طبعاً ماكنت متغشيه .. خالد رام يغصبنيه ع كل شي الا هالشي .. لأنـي أقنعتـه انه هالشـي مب حراام .. وأنا ما أحط أصبااغ ومكيااج في ويهيه عشان يكون فتنه !

قمت وطلبت هوت جوكلت .. من ايام امريكا ماشربته .. وقف واحد عداليه وطلب نفس الشي .. وعقب ماخذت الهوت جوكلت ورديت أيلس يلس هو ع الطاوله اللي مجابلتنيه .. وتم يطالعنيه بكـل قواة عين مع انه يشوف انه عنديه بنت ! والله لو يدريبه خالد جان حصلتوه الحين مدفون فقبره !

شليت كوبيه وقمـت وورايه كاستي وهي ادّز عربانة مي .. وجان يلحقنا .. بس طنشتـه .. صاح تيلفونيه ورديت ..

حموده: ألووه ..

خالد: يـــاحــــي ذا الصــووووووت يعنّـــي مــاخـــلا ...

حموده: لا خليــت منـك الغــالي .. شحالك حبيـبي ..

خالد: فــرحـــااان ..

حموده: دوووم انشــالله بس شالطاري عليـك ؟

خالد: اليوم حصلـت ترقيـه .. وزادوا معاشيه 10 آلاف زياده ..

حموده: صـدق ؟ مبروووووووووووووووووووووووووووووك حبيبي .. يالله مابغوا يزيدون معاشك اللي مادري من كم سنه وهو ثــابت لا زاد و لا نقـص ..

خالد: الله يبارك فيـج غناتي .. الا وين انتي الحين ؟

حموده: انا فالعين مول شاله فيايه ميّوه وكاسـتي ..

خالد: حاطه شي فويـهج ؟

حموده: لا والله العظـيم .. حتى جحال هب حاطـه ..

خالد: هيه زيـن والله لو دريـت انج حاطه شي من هالاصبــاغ في ويهج لا اييج الحيـن واغسـل ويـهج ..

حموده: ياخي والله ذكرتنيه بالاخصائيات فالمدرسه يوم يقولن ان شفناكن متجحلات بنغسل عيونكن ! غادي الا جنك أبله رويه !

خالد: انا أشــد .. أنا ريــلج ..

حموده: فديـتك والله ..

خالد: فديت رووحج .. أقووولــج المديــر هبـط مكـتبـنا يالله مع السـلامه ..

حموده: مع السـلامه الغالي الله يحفظك ..

بندت عنه وهبـطت مكياجـي .. وهذا "المزعج" بعده يتبعنيه .. طنشـته ووقفت عند مال البودره .. وتميت أجـرب أنواع البودره على ايديه .. بس الظـاهر بودرتهم ماتـنفع .. سرت عند مال الشـدو والجحال .. وتميت أجرب على ايديه ..

قال ذاك المـزعـج : ما زهت بأثمـد ولا سايل في نواعسـها مذابـحهـا ..

طـالعتـه بنظــره حـاده وانا ماودي اغلـط عليه واكدر مزاجيــه ..

.....: آآخ لو بس ماكنتي معرسه .. ياحظه وياحظ امن يابـته اللي خــذج أسميـها أمه داعيتله ..

طنشـته وقلت حق كاسـتي : كاستي أي واحد أحلى ؟ هذا ولا هذا ؟ (وأشرت على قوارير الشـدو ) ..

.....: صدقيـني التركوازي أحلى عليـج .. قريب على لون عيـووونـج ..

حموده: انته صدق واحـد ماتستحي على ويـهك ولا فيك مذهب تلاحق وحده معرسه !

......: عســـل عســل على قلبـي يالله مابغيـتي ترمسينيه !

أنـا غلـطت يوم خليـته يستفزنيه المفروض أحقـره .. بس لازم أكمل اللي بديـته وخلاف يزقر له السكيوريتي ..

حموده: يعـل قلـبك السـم قول آميـن ..

....: جـانه الا منـج راضــبه ..!

لا هـذا شكـله يبا يطولـها .. أحس شي اتكافا الشـر وازقـر له السكيوريتي ..

ظهرت من المحل .. وخليت كاستي تسير تزقر السكيوريتي .. يو السكيوريتي صوبيه وأشرت عليه وقلت ..

حموده: هذا يلاحقـنيه من نص ساعه تقريباً ويعق رمسه مــاصخـه ..

ساروا صوبه السكيوريتي وشلوه .. طالعته بنظرة انتـصار .. عقب ما افتكيت منه نزلت تحت صوب ميغامارت لأنـه الصـراحه خاطريه فـ جلـكســــي ..

تشريت كل اللي خاطريـه فيـه وظهرت من المول بكبره .. بس فالباركـنات ضـعت ! خاصةً اني موقفه فالباركنات الداخليه بما انه اللي برا كانن متروسـات .. تميت أحوط وأحوط بس ما قدرت أعرف مكان سيارتيه ..

شفـت ذاك المـزعج مره ثانيـه ..

....: اهليــن الشيــخه ..

حموده: أبــا أعـرف شو تبا فيّه انته ؟

.....: ويـاج زايـــد الــ .....

حموده: فذمتيه انك ماتستاهل تشل اسـم هالجبيـله ..

.....: أوب أوب لايكون جبــيلتج !

حموده: وانته شخـاصـنك اذلــف ذلفـك الله ..

وخطفت عنه بس ماكنت عارفه وين أسـير ..

زايد: ضايـعه الشيـخه ؟ انزين شو سيارتـج ؟

طنشته وتميت أمـشي ..

زايد: انزين بس بسـاعدج مع انج بهدليتينيه و خليـتيهم يوقعونيه تعهد بس ماعليه ..

زايد: بحصل لج سيارتج وخلاف بذلف ذلفني الله مابتشوفين رقعة ويهيه ..

حموده: يووووه .. سيارتيه بورش ذهبيه انزيـن ..

ع فكره ترانيه بدلت سيارتيه ..

تم يحاوط بين المواقف وانا يلست على الرصيف بما انه ريوليه كانن يعورنيه .. خلاف أشر ليه من بعيد على انه حصـل السيـاره .. سـرت صوبه ووقفت جدام السيـاره وتأكدت انها هي .. فجيت الباب وركبت

بس قبل لا أسكر الباب قال : ســلام يا راعية البووورش ..

رقعت بالباب وحركت سيارتيه وروحت عنه ..

كاستي: ماما مين هادا ؟

حموده: هذا واحد مافي تمام .. > حافظ ع الرمسه المكسره !

كاستي: هادا زياده مافي تمام هو يقول مشان انتي كلام مافي جين !

حموده: هيه والله ..

وكملـنا دربنا صوب البيت .. بس قبل لا ألف صوب لفة البيت .. وصلنيه مسج من خالد ..

" لا تردين البيت اليوم كلــنا بنتغـدا عند يدوووه وبنتـم ليـن فلّيـل لني بخبرهم بسالفة سعيد .. أوكي غناتي ؟ "

غيرت دربيه صوب زاخـر .. أول ما وصلـت البيـت شفـت سيايير العايـله كلـها عنـد البيـت .. الله يسـتر من اللي بيستوي اليوم ..

نزلت من السياره وهبطت البيت .. حصلت الكل دون استثناء حتى مريم وعيالـها .. ماعدا خالد اللي أظني بيوصـل عقب شوي .. سلمت عليهم كلهم .. وخليت كاستي تشل ميّوه فوق بما انها راقده .. فديتها بنتيه مب مغثـه .. يلسـت عدال يدووه .. أصلاً المكان اللي عدالها دوم محجوز حقيه ..

سولـفنا شوي وخلاف هبـط علينا خالد .. سلم ع الكل ويلس عداليه ..

خالد: يدووه متى بتحطون الغـدا تراني ميت يوووع ..

يدوه: أفــا عليك الحين بزقر البشكارات بخلـيهن يحطنه .. عاااايـده .. يا عااايــده .. عاايده وصمخ يداااتــج ..

عايده: نأم ماما ..

يدوه: حطي الغدا .. غدا الرياييل حطيه فالمبرز (الميلس) ونحن الحريم حطي غدانا هنيه فالصاله ..

عايده: جين ماما ..

يدوه: مره ثانيه ان ماتوايبتي بسـرعه بتــيج هالعصـا على مقفاج ..

عايده: جين ماما ..

يدوه: شفيـها جين ماما وجين ماما .. شو تطنّز عليّه .. ؟ انا بنت أبوويـه !! (ورفعت عصاها بتضرب عايده ) ..

عايده: لا ماما مافي سوي تنّز (اطّنز ) انتي جياده جين (زياده زين ) ..

يدوه: أدري بعمريه الزين الا من عقبيه يالله ذلفي ..

وظهرت عنا عايده ونحن نضحك ع يدوووه .. أسميها واليتنهن ولاه هالبشكارات !

عقب عشر دقايق انحط الغدا بـ سرعه خوفاً من العيوز وعصاها اللي ماترحم حد .. ظهروا الرياييل عنا ونحن يلسنا فالدعنه حول الصوانـي .. وتغديــنا ..

عقب سـاعه وشوي تقريباً .. كنا مخلصين الغدا ويالسين نسولف .. وانا قلبي يرقع خايفه من اللي بيستوي ..

فجأه هبط علينا عميه قصدي ابويه .. وويهه معتفـس .. اكيد خالد خبـره .. زقر حرمته وعموه ويدوه .. اكيد بيخبرهن .. الحين لازم نستعد لجميع انواع المصايب !

بعد شوي سمعنا يدوه تهازب .. ووايقنا عليهم هي وابويه كانوا وقفين فالليوان اللي بين الحجر اللي تحت ..

يدوه: خلـه برايه على كيـفه أهم شي انه اييب عياله من عند هالجافره (الكافره) .. وانته هب ابوه عشان تحاسبـه شعليـك منه ؟

ابويه قال وهو يصارخ فويه يدوه : اميه انتي ما تفهميـن ؟..

يدوه: انا ما افهم يالعايب يالقاصر يا مضيّع الطبـع يا خسارة التربيـه فيـك يا خساره .. !

ابويه: أنا العايب ولا ولد ولدج اللي سار وخذ لـه وحـ .....

قاطعته يدوه: صـــه قطعـها الرمــسه مابا أسمع صوتـك ..

وروحت يدوه عنه صوب حجرتـها ..

هذا بالضبط اللي أنا كنت خايفه منه !

وايقت من الدريـشه شفت خالد وعميه اللي هو ابوه .. وشكلهم هاديين .. يعني عميه متقبل السالفه .. الحمدلله .. دقيت حق خالد ..

حموده: ألووه ..

خالد: هاه شو مستوي عندكم داخل ؟

حموده: يدوه وابويه تهادّوا ..

خالد: ييييه ابا افهم انا عميه شخاصنه يوم ابويه راضي ؟ احتشر علـينا فالميـلس .. ابويه متقبل السالفه .. بس عميه مادري شو مشكلته ..

حموده: حتى يدوه تضاربت فياه عسبة هالشي .. هي تقول انته مالك خص فيه وهو يقولها انتي ماتفهميـن .. وعاد بدت الشتايم يالعايب يالقاصر وابويه عاد ماقصر قالها انا العايب ولا ولد ولدج ..

خالد: خيبــه شكلها ولعت ..

حموده: الا ولعت من الخاطـر ..

خالد: والباقيـن ؟ اميه انا خبرتها ..

حموده: وفطوم وريموه انا خبرتهن وهن خبرن سلامه ومريوم والرياييل فالميلس كلهم يدرون يعني محد باقي .. الا اقول حد اعترض غير عميـه ؟

خالد: أميه أول ماخبرتها اليوم الصبح احتشـرت .. وخلاف هديـتها وهدت .. لا و رمسته فالتيلفون بعد

حموده: الحمدلله .. عدت على خير ماعدا ابويه ويدوه ..

خالد: ماعليه مسألة وقت وبيرضى عميه ويدوه بترضى عليه ماتصبر عنه تراها ..

حموده: انشالله الله يسمع منك ..

خالد: أشوف سيارتج ممزوره قراطـيس شو هذا هالكثر ؟

حموده: لبووس وألعاب حق بنـتك ..

خالد: يــالله كــل هذا عاد ! هذا يسد جيــش حرام عليـج ..

حموده: بنتـيه وكيفيه أدلــعها ..

خالد: يعني يوم دريتي انه المعاش زاد قلتي بتخسرينيه أكثر ؟

حموده: ماعاش من يخسرك بو مي .. خلاص جان تبا الحين بردهن عليهم بعدهن الفواتير عنديه ..

خالد: لالا خلاص صـدقتـي انتـي ؟ انا فلـوسيه هاي كلـها حـق منو ؟ الا لكـم تراهـا .. خسـري ع كيــفج غنـاتي ويـخسي اللي يقول لج لا ..

حموده: شو اعتبـرها هاي طنـازه ولا صـدق ؟

خالد: وأنــا أروم اطنّز ؟ .. الا اقولـج حد فالصـاله أبـا أهبط انا ..

حموده: عادي اهبط الا البـنات ..

خالد: والعلـه مريووم ؟؟ > ..

حموده: لا محد ..

خالد: هيه زيـن ..

وهبط علينا وبندت التيلفون .. وسيده سار صوب حجرة ابويـه وأنــا لحقـته ..

عند الباب قبل لايهبط قبضته وطالعته بستغراب وقلت ..

حموده: شو بتسوي ؟

خالد: فديـت هالعيـون يـاربي .. حرام عليج اطالعينيه جذيه والله مب وقته انا الحين متزهب عشان اضارب وانتي تبينيه اغيّب ذهنيه ؟

ابتسمت وسحبته من ايده وقلت: طب عنك ابويه ماعليك منه خلاف بيرضى بس انته لاتعصب وتتعب اعصابك ..

خالد: من عيوني يا عيوني ..

وظهرنا من باب المطبخ التحضيري مافينا ع الحشــره اللي فالصـاله خاصةً انه عموه وام خالد يلسن عندهـم .. ركبنا سيارتيـه بس خالد كان اللي يسوق .. كنا سايرين نودي القشار اللي اشتريته صوب البيـت ..

خالد: يـاربي انا كم مره أقولـج لا تعلقـين هالسلاسل فالسـويـج ..

حموده: أبا اعرف انا هو سويج سيارتيه ولا سيارتـك ؟

خالد: انا ريـلج ولازم كلاميه هو اللي يمـشي ..

حموده: يا متخـلف .. انتـه أصلاً امّشـي كلامـك عليّه من قبل لاتاخذنيـه !

خالد: تصدقيـن أحلى شي عنديه يوم تقولين متخلـف جنـج تقوليـن فديت روحك ..

حموده: ماتدري انك أغلى متخلف فالدنيـا .. ؟

خالد: أدري مايحتاي تقوليـن ..

فهاللحظه وصلنا البيت ونزلنا .. وزقرنا الخدامات عشان ينزلن القراطيس و سرنا صوب حجرتـنا ..

وقفت عند التواليت وقلت : تـدري .. هالحجـره ضاقـت عليـنا ..

خالد وهو يالس ع الشبريه : ويـن نسيـر عاد .. انا عنديه قرض الشيخ خليفه للاسكان بس ماعنديه ارض .. ولا حد من أهلنا هنيه عنده أرض ..

حموده: شرايك نبني لنا في طرف الحوش .. ؟

خالد: بس مابيكون صغير ؟ أرض الفله كلها على بعضها صغيرونه .. شو تبيـنا نبني صندقه ؟

حموده: انزيـن ماشي حل يعني ؟ اخافهم خلاف يلغون القرض لنك ما سويت به شي ..

خالد: تراني يالس أدور أرض بس ماحصلت غير صوب المسعودي والبدع واليحر .. وين نبا هناك آخـر الدنيـا ؟ خليـنا في نص المديـنه ابرك ..

حموده: انزيـن شرايك نسكن في بيت عموه ؟ فاااااضي وماله حد ..

خالد: لا والله ؟ انا مستحيل اسكن فيه ببلاش ..

حموده: ومنو قالك بلاش ؟ بنشتريه ترانا ..

خالد: ومن وين لي انا بالله ؟

حموده: تراك تقول عندك قرض ..

خالد: هالقرض حق البنا مب عشان اشتري به بيت .. انا مابستلمه لكنه بيندفع حق شركة البنا اللي بتبني البيت .. وبعدين بيت مساحته 250×300 متر شرات بيت عموه كم تتوقعين سعره ؟ أكيد فوق الخمس ملايين وخاصةً انه في فلي هزاع وهالمنطقه حتى الاراضي فيها غالية ..

حموده: يعنـي امره ماشي أمل ؟ انته ليش تكسر مياديفيه ؟

خالد: ليش راكبين فـ سفينه نحن ؟ انا بس اخبرج بالواقـع ..

يلست عداله وقلت : خلاص انا راضيه دامنيه فياك حتى لو أعيـش فـ صندقه !

خالد: متأكده ؟

حموده: أكيـــد أنا أحبــك أكثر عن أكبــر بيت ..

ضحك خالد عليّه وقال : فديــت رووحـج حتى أنــا حـبي لج أكبر عن كل قصـور الشيوخ فهالبلاد عاد ماعرف منو قصره أكبر عن الثاني ..

ضحكـنا على بعـض ولوا عليّه خالد وقال : لو بيديه اييب لج كل اللي تتمنيـنه بس انتي أدرا بالحال ..

حموده: أنـا كل اللي أتمـناه انـي اتم وياك طول عمريه .. ما ابا شي من الدنيا غير هالشي ..

خالد : أوعدج ماشي بيفرق امبيـنا غير المـ ....

حطيت ايديه على ثمه ومنعته يكمل هالكلمه : بس لاتكمل .. هالجمله انا اتشائم منها ..

خالد: ليش ؟

حموده: لأنه كل حد قالها مات عنيـه .. وانا اروم استحمل كل شي الا انك تفارقنيه .. حتى مب رايمه اقول الكلمه .. (دمعت عينيه يوم تخيلت للحظه انه هالشي ممكن يستوي ) ..

خالد: كل شي مقـدر ومكتوب وماحد بيموت قبل يومه انتي بس خليج مومنه بهالشي ..

حموده: المهم خلنا من هالطاري العوف .. باقي شهر عن عيد الاضحى أبـا أسير أشتري قطع ..

خالد: انزين سيري ..

حموده: لا أباك تي فيايه ما اعرف أكاسر الهنود أنـا ..

خالد: ماتحيدين السنه اللي طافت يوم طردتينيه من محل القطع ؟ ترانيه مب ناسنها السالفه ..

ضحكت يوم تذكرت السالفه ..

خالد: تدرين ليش مارديت عليـج ؟ كنت حاط في باليه اني يوم باخذج بأدبج وهذا انا أدبـتج وخلـيتج تعقليـن ..

حموده: ليـش قالولك مينووونه ؟

خالد: لا ياهــل ..

حموده: جب يالشيـبه .. عمرك 31 .....

خالد: وانتي عمرج 24 لا اتحسبين عمرج واايد صغيره ..

حموده: ع الاقل انا اصغر عنك .. ضروسك بيطيحن قبل ضروسيه !

خالد: انزين بنشوف عقب 50 سنه شو بيستوي ..

دعيـت دعوه من كل خاطريه : الله يعطينا طولة العمر ويخلينــا لبعـض انشالله ..

خالد: آميـن ..

فهاللحظه صاح تيلفون خالد ورد عليه ..

خالد: ألـوووه .. \ أهلــين بو عسكوور هاه بشّـر علومـك ؟

طالعت خالد عدل يوم قال هالجمله ..

خالد: وصلت برليـن ؟ \ خيـبه وايد بعيــد .. \ يعنـي باجر انشالله نسـمع اخبار ؟ \ الله يوفجك انشالله واذا على الاحوال هنيه لا تخاف كلهم دروا ومحد طاح علينا فالمستشفى \ هيه والله العظيم \ ههههههههههه أدري أدري مايحتاي تقول \ حشا كيف يبا الفكه أدري بك خايف ع الفاتوووره \ يالله مع السلامه وسلم لي على المزايين اللي عندك هناك \ جاد ربك بعد \ هههههههه هيه \ يالله اجلب ويهك فداعة الله ..

قلت وانا قابضه خالد من رقبـته: شو قلــــت ؟؟؟؟؟؟؟؟؟؟؟؟؟؟

خالد: بسم الله شفيـج شو قلـت انا ؟

حموده: بــــذبـــحك !

خالد: بسم الله ماحيدنيه قايل شي غلط ..

ابتعدت عنه وكنت بظهر من الحجره بس قبضنيه من ايديه ووقفنيه ووقف جداميه ..

حموده: شو تبا ؟ ســر عند الشقر والحمر شو تبا فيّه انا ؟

خالد: يعلـهن فـداج الشقر والحمر والسمر والله انهن مايسون الثرى اللي توطاه ريولـج ..

حموده: سير قص على وحده غيـريه ..

خالد: وشو أبـا في غيـرج دامنـج انتي عنديـه .. ؟ الدنيـا هاي كلها ماتعوضنيه فيـج ..

حبيت اغايضبه وقلت : والله انك متفيــج خلنيه بسيـر عند بنتيه اللي فريتها عندهم ولا ادري عنها أبرك لي منك انته آخرتك الا عند غيريه ..

فج خالد ايديه وقال بجديه : طبي هالسالفه و تعالي بنسيـر صوب بنتـنا ..

وخطف جداميه .. انا خفت و حسيت قلبيه عورنيـه .. يــالله لايكون زعل ؟ ياويلي شو سويت انا ؟

تبعته لين السياره وركبنا .. وتمينا طول الدرب ساكتيـن .. وصلنيه لين بيت ابويه ونزلت وهو روّح عنيه .. يالله شكله صدق زعلااااان ..

هبطت البيت وسرت صوب حجرتيه .. حصلت مي محطوطه على شبريتيه وتلـعب .. يالله منو حاطنها هنيه ؟ منو هاللي مافيه عقل ؟ ربعت صوبها وشليتها ولويت عليها .. خفتها اطّيح من فوق الشبريه .. وين كاستي الحيوانه عنها ؟ أكيد سايره تهذرب فيا الخدامات !

شغلت التلفزون ويلست مجابلتنه وفرشت بطانيه صغيرونه جداميه و سدحت مي عليها وتميت اطالع التلفزون .. كانت مي يالسه تبتسم واطّلع اصوات فكرت أدق حق خالد واسمعه صوتها يمكن يرضا ..

دقيت له بـس مارد عليّه يـاربي كيف يقهــر ! طبيته ورديت حق المسلسل اللي كنت اطالعه .. أنا ليش ذاله عمريه ؟

عقب نص ساعه خلـص المسلسل ومي لعبت لين رقدت .. فديتها هاديه ماتزعجنيه .. حطيتها في منزها وانسدحت على شبريتيه ورقدت ..

وعيت على صيــاح مي .. رضعتها ورقدت بس انا مارديت أرقد .. صحصحت شوي ونزلت تحت عند يدوه حصلتها رويـحاتها فالصاله .. حبيتها على راسها ويلست عدالها ..

يدوه: زيـن زيـن يوم حد منكم هضل عليّه عنبو كلكم خاشين في حجركم ..!

حموده: ولا يهمـج يدوه انا ييت عندج ..

فهاللحظه سمعنا حد يدق الباب .. ظهرت انا من الصاله وسرت صوب الباب .. شفت شيـبه يدق الباب بعصاه .. ووراه واحد شباب عرفت من ملامـح ويهه انه سهيل ولد ييرانا ! ويـنج يا سلّوم تين وتشوفيـن .. !

هبط الشيـبه وروّح سهيـل ..

حموده: أقــرب عمي أقـــرب ..

الشيبه: سلمـتي يا بنـتيه الا موّاز ويـن ؟

موّاز يعني يدوه .. يدوه تراها اسمها موزه ..

حموده: يـدوه هنيه اقرب فالميـلس ..

وقربت به فالميلس وزقرت الخدامات اييبن القهوه والفواله .. وزقرت يدوه وخبرتها انه يباها ..

هبطنا انا ويدوه الميلس .. يدوه ويلسـت وانا صبيت قهوه حق الشيبه وقربت له الفواله .. وتميت أسمع الحوار المثير اللي دار بين يدتيه والشيبه ..

الشيـبه: انتي موّاز ؟

يدوه: هيه نعم انا موّاز انته منو ؟

خيبه يالدفاشه يا يدوه !

الشيـبه: ني سويدان خو طميشـان ..

يدوه: سويدان خو طميـشان ؟ ولد بن ......... ؟

الشيبه: هيه نعم بن ............ الا بغيـت اتخبـرش ..

يدوه: والنعم وسبعة أنـعام في ذمتيه .. الا عن شو اتّخبر ؟

الشيبه: ني عرف عذّوب بغيت اتخبر عنها ..

يدوه: عذّوب ختيه ..

الشـيبه: هيه عّذوب .. وينـها عذّوب .؟؟

يدوه بحزن : عذّوب غابــت ..

الشيـبه: يا حزنـي غابت ولا ماتت ؟

يدوه: ماتت ..

الشيبه: يا حــزني حـزناه علــيش يا عذّوب يــاحــزني حزناااه ..

وحـط الشيبه راسه بين ايديه وانا مب فاهمه السالـفه ..

وعاد يوم كملوا سوالفهم عرفت انه عذّوب هي (عذيبه) اخت يدوه وهي ميته من 4 سنين .. و هالشيبه كان يحبها يوم هم صغار بس بسبب العداوه بين القبايل مارام ياخذها .. والحين ياي يتخبر عنها يوم عرف انه يدوه اختها بس للأسف بعد فوات الاوان .. وحليــله كسـر خاطريــه !

ظهرت عنهم عشان اسير اطالع مي اذا وعت .. ما أأمن أخليها روحها .. وانا ظاهره الا اشوف لكم سهيل واقف عند الباب ويوايق .. صــدق انه جليـل حيا ومايستحي على ويهه ..

حموده: نعم اخويه بغيت شي ؟

سهيل: هاه لا .. بس اتريا شيبتيه ..

حموده: انزين ليش ماتقرب داخل ؟

سهيل: وليش لا ؟

تجدم وهبط داخل وتعدل ع المنظره اللي ع اليدار .. وايد ماخذ راحته الاخ .. تجدمته صوب الميلس وهبّطتَه وروحت عنهم ..

في دربيه صوب حجرتيه قابلتنيه سلّووم ..

قلتلها : لحححححححـــــــــقي محبووبج العامري فالميـلس ..

سلامه: حلـــفي !

حموده: والله العظيـم يالله تلاحقيـه شوفيه ع الطبيعه عن يروّح عنــج ..

سلامه: هيـه والله يالله برااايج انا سايره ..

ونزلت ربعاااان تحت .. وانا سرت صوب بنتيه ..

أول ماهبطت الحجره صاح التيلفون .. ربعت صوبه وطالعت الرقم .. كان مكتوب "نظر عيني " رديــت بسررعه ..

حموده: حي من سلم من الهاتف .. فز له قلبي بترحيبه .. لي بوصله سعدي يصادف .. واتمنى الحظ يلفي به ..

خالد: لفابيه الحظ تراه ..

حموده: زعلان ؟

خالد: مادري ..

حموده: انت يالزعلان لو تعرف غلاك .. جان عفت الدنيا ولشوفي عنيت ..

خالد: عيل شعنه قلتي الرمسه اللي قلتيها ؟

حموده: كنت ابا اغايض بـك تدريبيه أحب أرفع ضغطك ..

خالد: والله ماحد بيطيحنيه فالمستشفى غيـــرج ..

حموده: بســـم الله عليـك .. لا تفاول على عمرك انته ماتدري انه مرضـك قبل لايعورك يعورنيه .. ؟

خالد بضعف : عيل لا تقولين هالرمسه اللي قلتيها اليوم تراها تتعبنيـه !

حموده: ماعاش من يتعبك حبيبي .. خلاص يعل لسانيه القص جان عدتها الرمسه ..

خالد: لا تدعين على عمرج دخيلـج .. انا مب زعلان ..

حموده: أدريبك تتغلى .. إلا مابتي تشلنا انا وبنتيه ؟ ترا اشتقنالـك ..

خالد: الحين امره واصلنكم الا عند اللفه .. يالله تزهبوا وتريونيه ..

حموده: من عيووونـــي ..

بعـد نص سـاعه يا خالد وردينا بيتنا ..

\

مـا هزنـي مكرهـم مـا جابلـي الـريبه .. أحلامـهم بـايره والبـّر فـأحلامـي ..
اللي يحـب الغـدر والـكذب والغيـبه.. لا مـرني عامهـم ولا مـروا أعـوامـي ..

وتوالـــت الايـام والشهور على وتيـرتهـا المعتــاده .. رد سعيد البلاد وفياه عياله "أحمد وآمنه" .. و خطب سهيل سلامه .. وتمت خطوبة فطوم لـ سيف واليـوم العـرس .. كل شي صار بسـررعه لأنه سيف على قولتهم كان مستعيل !

في حجرتنا كان خالد واقف عند المنظره .. كنت واقفه وراه وهو من نص ساعه واقف وماعرف شو يالس يعدل ..

حموده: أبــا أفهم انا انته شو يالس تسوي ؟ لو انته حرمه بعد بنقول تتمكيج .. بس المشكله انه ماعندك غير هالكندوره والسفره تعدل فيهن .. !

خالد: لا أنـا اليوم أبا اطلع أحلى عن المعرس ..

حموده: امبونك احلى عنه مايحتاي ..

التفت خالد صوبيه وقال : صدق ؟

حموده: هيه صدق ليش عندك شك في هالشي ؟ انته أحلى واحد فعيونيه ..

خالد: فعيونج انتي بس ..

حموده: و ليش . تهمك عيون غير عيونيه ؟

خالد: أكيد لا .. يالله انا خلصــت .. هاه زيــن ؟

حموده: شيـــــــــــــــــــــــــخ ..

خالد: فديـت رووحج .. بس انتي ماتعدلتي ..

حموده: الحيـن بسيــر كنت اتريـاك تخلـص .. ماروم أخليـك ..

طالع خالد ساعته وقال : يييييه بياكلونيه علّوه وسعّووود .. يالله اترخص ..

حموده: مرخوووص ..

وظهر عنيه وانا سيده ربعت صوب الكبت وظهرت فستانيـه الفوشــي وشيلتيه وعباتيه و فريتهن ع الشبريه .. وسرت صوب حجرة فطوم اللي كانت عندها راعية الصالون تعدلـها .. يلست على كرسي ثاني ويتني المزينه الثانيه عشان تعدلنيه ..

أول ماشافتنيه قالت : ولـك تؤبريـني من وين جايبه كل هالجمال ؟ مشالله عليكي ولك يخز العيـن ..

حموده: أحم أحم مشكوووره .. بس منو أحلى انا ولا العرووس ؟

طالعتنيه فطوم بنظره ..

قالت المزينه الثانيه اللي تعدل فطوم : ايه العروس أحلا ماهاي ليلتا .. مابدنا نحبـطها ..

المزينه اللي تعدلنيه : ولك تؤبرني هالعيون الزرئ أكيـد انتي أحلا ..

فطوم: أدري أدري انها أحلا خلاص عاااااد ..

حموده: أيــه فطووم لاتزعليــن ..

فطوم: أفا عليـج اليوم بالذات مابزعل لأنيه بفتـك من خلّوووود ..

حموده: اسميـج الا ماتعرفيـن الزيـن يوم تبين تفتكين منه .. فديـت رووحه والله انج ماتسويـنه ..

فطوم: معذوووره براااايــج انشالله ايي اليوم اللي ادافع فيه عن سوّاف واتفداه جدامج ..

حموده: أشوفه استوا سوّااف من يومين كان سيف !

فطوم: لازم بعد أدلعه جيه مب ريليه ؟

حموده: أسميــج مستقطعه !

فطوم: يبوج حد تيه الحريه من عقب الحبس ومايستقطع عليها ؟

حموده: أسميــج خبلــه ويــاهل ..

فطوم: هههههههههه أدري !

وكملنا تعديــل .. وعقب ساعه ونص خلصت انا .. وسرت حجرتيه ألبـس فستـانيه .. لبست الفستان والنعــال ووقفت جدام المنظره .. فديــتنيه والله اني حلــوه !

أذن المغرب .. ربعت صوب فطوم حصلتها واقفه بفستـانها جدام المنظره ..

حموده: ياويـــلي ع العرووووووس والله انج تجننيــن مايحتاي اطالعين عمرج ..

فطوم: صدق ؟

حموده: هيه صدق عيل اجذب عليــج .. والله انــج عســـــل ياحـظ سيف بـج ..

فطوم: أحم أحم ثـــانكــس عويـناتج العسل ..

حموده: أدق حق خالد ايي يشلنا ؟

فطوم: هيــه خلينا نعرس ونفتـك ..!

دقيت حق خالد ..

حموده: ألوووه ..

خالد: أهليــن هاه خلصتوا ؟

حموده: هيه انته وين ؟

خالد: قرب البيت الحين بوصلـكم ..

حموده: هيه عيل نترياك ..

خالد: مع السلامه ..

حموده: مع السلامه ..

سرت صوب حجرتيه ولبست عباتيه وشيلتيه وفطوم بعد لبسناها عباتـها وشيلتها .. وأول مانزلنا تحت هبط علينا خالد وانا كنت حاطه غشوتيه على ويهيه من كثر المكياج اللي كنت حاطتنه ..

بحلق خالد فينا شوي وقال : يالله ..

لحقناه انا وفطوم .. وفطوم يالله يالله تسحب فستانها .. ساعدتها ع ركوب السياره .. هي ركبت جــدام وانا ورا .. صـح انه خالد ماكان عايبنه الوضع وكان هالشي مبين في ويهه لكنه مارام يعترض ..

عقب عشر دقايق وصلـنا القاعـه .. ساعـدنا فطوم عشان تحوّل من السياره .. هبطناها داخل وهبطن عندها ريموه وسلّوووم اللي كانن كاشخات بزياده اليوم أول مره اشوفهن جيه ..

عقب ماهبّطنا فطوم سحبنيه خالد من ايديه وركبنيه السياره ..

خالد: عقي غشوتج ..

قلت بعبط : ليــــــــش ؟

خالد: لا والله ؟ شو تبين تخبليبيه انتي ؟

عقيت غشوتيه وقلت : بسم الله عليـك ..

ابتسمت وتم مبحلق فيّه .. طوّل وايد وهو يتأملنيه ..

حموده: ماشبعت ؟

خالد: وانتي ينشبع منج أصلاً ؟

ذبت من رمسته بس قلت : يالله ورايه عــرس انا وانته بتأخرنيه ..

خالد: ترانيه عادي أحلـف انج ماتهبطين القــاعه ..

حموده: لالالالا دخيـــلك ..

خالد: هالكثر يعني شفقانه ع هالعرس ؟

حموده: لا بس من زمان ماســرت عــرس .. من يوم عرسنا !

خالد: هذاك اليوم كان أحلى يوم فحياتيه .. ياليــته ينعاد مره ثانيه ..

حموده: لا والله ؟ شو الفرق يعني ترانيه عندك وجدامك شو تبا زود ؟ ولا ناوي تعرس عليّه ؟ بزواااااالـــــــــك .....!!!! قبرك أقرب لك من غيريه ..

خالد: فديـــــــــــــــــــــت اللي يغاروون واللـــــــــــــه .. في شي واحــد بس أبــاج تعرفيــنه .. انتــي آخـــر انســان أحبـه في هالدنيا ولاتظنين اني بحب حد غيـرج ..

حموده: انتـه تقول انا آخر انسان تغليـه وانا أقول انت أول انسـان أحبــه ..

خالد: متأكده انج ماحبيتي قبليه ؟

حموده: أكيــــــــــد .. الحب لك انته بــــس .. ماحد يستاهلــه غيــرك .. الا اذا كنت تشوف شي ثانـي ..

خالد: لا ماشوف لا ثاني وثالث انا ماشوف حد غيـــرج انتي وبس ..

حموده: اممممم حبيبي أبـــا انـــزل انزيــن .. امك بنتقد عليّــه ..

خالد: لا كله ولا اميه عاد ..

شل ايديه وحبها وقال: مع الســلامه بس لنا حساب ثاني فالبيــت ..

حموده: ههههههههه انشـــالله ..

نزلت من عنده وهبطت القــاعـه .. سلمت على حريم عايلتنا كلهن اللي واقفــات فالاستقبــال .. وخلاف هبطت عند فطوم و البنات كانن يتصورن وتصورت فياهن .. وخلاف ظهرت وحصلت مي ربيعتيـــه ..

حموده: ميّووووووووووووووه ..

مي: حمدوووووووووووووووه ..

حموده: شحـــالج ؟؟

مي: بخيـــر الحمدلله ..

سحبتها صوب وحده من الطاولات ويلســنا ..

مي: وعلووم سميتيه ؟

حموده: بخيـــر راقـده فالبيــت .. وعلوم سميتيه أنا ؟

مي: والله هي بعد راقده فالبيت ..

حموده: ويــنج محد يشووفــج ؟ من كمن شهر حتى تيلفون مادقيتي !

مي: والله شسوي مشغوووله ما أفضى .. من الدوام لين البيت وحشرة سلطان وبنته .. زين اني رمت ايي اليوم ..

حموده: وين تشتغليــن ؟

مي: فالبلــديه ..

حموده: خالد يشتــغل هناك بــعد ..

تغيّر ويه مي ..

حموده: شفيــج ؟

مي: هاه لا ماشي ..

حموده: لا بتقوليـــن هب عليّه هالحــركــات ..

مي: بعديـن بخبـــرج ..

حموده: لا الحيــن ..

مي: يووووه لازم تخربين هالليله يعني خليها تعدي على خير وانا أوعدج أول مايخلص العرس بخبرج ..

حموده: انزيـن بنشووف ..

وتمينا نسولـف فأشياء ثانيــه ونــاكل انا عني كنت ميــته يووع .. عقب ماخلصنا أكل سرنا صوب الحمامات عشان نضبط مكياجنا ..

حصلــنا وحـده طويــــــله واقفه عند باب الحمامات وترمــس فالتيلــفوون وكنا با نخطف بس هي ولا معبرتنا ..

.....: لا حبيبـــي لا تقووول .. \ لا أنــا أحلى منهــا \ انته أصلاً ماشفتنيه ولا شفت كشختيه مالك حق ترمــس \ وانا شو لي خص فيها ؟ انا ماعرفها أصلاً \ انزين ام بنتك وشو يعني ؟ انا بعد ام عيالـــك مب الا بنتــك \ أيـــه خلّووودي بــس عاد ترانــي والله بزعــل \ لاوالله ؟ بتردها هي البيت وانا شو مالي رب ؟ جيه انا بعد حرمتك ولا مب معترف فيّه ؟ \ ماعليه ماعليه ياخويــلد هيّــن أدريبك ماتبانيه يالس فيايه الا عشان عيالك ولا انته نصــخك ورووحـك عند هاي ملعونة الصيـر \ لا بســبها وبشـتمها وبعلن خيــرها شو بتسوي يعني ؟ \ ماتروم اطلّقنيه والله ان طلقتنيه مابتشوف عيالك مره ثانيه ..

شكله اللي كانت ترمسه رقع في ويهها .. تمت تسب وهي اطالع التيلفون ..

......: انا التعن انا وعياليه ؟ ماعليه ماعليه ياخويلد والله لراويـــك ..

التفتت صوبــنا وطــارت عيونهــا يوم شــافتـنا ..

قالت مي أول ماشافتـها : شمــــا ؟

شما: مي ؟ أأأأ شـ شـ شـحالـج ؟

مي: بخيـر الحمدلله ..

شما: عن أذنــكم ..

وروّحت عنا .. ونحن هبـطنا صوب المغاسل ..

قلت حق مي: تعرفيـنها ؟

مي بارتباك واضح في رمستها : هيه هاي عندنا فالدواااام ..

حموده: شعندها شو مشكلتها ؟ ريلها معرس عليـها ؟

مي: هـ هيــه ..

حموده: مسكيـــنه والله هالرياييل مايستحون ع ويوههم مايترس عينهم غير التراب !

سكتنا وتمينا نعدل مكياجــنا ..

عقب نــص ســاعه كان موعــد زفــة العرووس اللي هي فطوم .. كـــانت رووووووعــه .. وخلاف يا دور سيــف .. انا كنت أحوط حول الكوشه وقابضه عصا واهازب اليهال اللي يالسين يلعبون بالورد ع الكوشـه .. مادريت الا وسيف يمشي ع الكوشه وانا واقفه تحته بالضبـط .. تم يطالعنيه .. ماكنت متغشيه أو حتى لابسه شيله .. كانت شيلتيه ع جتوفيه وكنت بس لابسه العباه .. الحمدلله انسترت شوي .. شفت نظرة ألم فعيوونه وجنه مايبا هالعرس .. شردت بسرعه عن يشوفنيه خالد ويسوي سالفه ..

الظاهر انه هالسيــف لين الحين يحبنيـه .. لا اله الا الله شو هالنشبه الحيـن ؟

من علمه يهجر اذا غطا الفرح كل الزوايا ..
من علمه يغدر اذا صار الوفا نبض وحنايا ..
من علمه يتلاعب بروحي ..
من علمه يمشي على جروحي ..
من علمه يقتل في أيامي الأمل ..؟؟

يلــست ..
على الرصيف ..
بــكل صدمه ..
وضعف ..
ويأس ..
وخيبه ..
ألعن حظي العاثـر ..
وألعنـك ..
ياحبيبي .. !

\\

استرجعت كل كلمه قالتها مي ..

" شما هاذيج حرمتـه "
"حرمته"
"حرمته"
"حرمته"

وانا شو أطلــع ؟

معقوله ؟

شفتهم بعيوني ..
تركب وياه السياره ..
وانا واقفه اتريــاه !
الله يلعـنه ..
الله لا يوفقـه ..
الله لا يســامحـه ..

قمـت في هالبــرد أمشي على الأرصــفه ..
على أمـل حد يعطف عليّه ..
الحين الساعه 3:30 الفير ..
كلهم روحوا عنيه وانا كنت اتريا خالد ..
لا هذا مب خالد ..
هذا خاين ..
خاين ..
خاين ..

كل وقت وله أذآن ..
وكل جرح ٍ له دوآ
ألا جرح اللي تحبه ..
لاغزر بك وش دواه ؟
يازمان المر ذقتك يـوم خلي بي نوآ
يجرح القلب المعنّا / ..
ثم يـشكي من هواه ..
ياجراح القلب طيبي
ولا زيدي ..
هي سوآ ..
عاد ماتفرق جراح ٍ جات منه او سواه
الـ/ـكذب جاني بكلامه
والـ/ـغدر ذيبه عوآ ..
والـ/ـوفا اصبح حروف ٍ
في كتاب ٍ قد طوآآآه ..

يحـلف انه لي حبيب ٍ
ثم يذبح لا قوآ ..
والذي يعـشق حبيبه
يذبحه لامن قواه ؟

[ويل حالي]
منه حالي ذاااااب
من طعنه ذوآ
والجروح اللي بقـلبي
عد من مد ٍ نواه ..
يازمان المر قله :
نجم حبه قد هوآ
والمحبه قدرة الله
ماهي بذراع ٍ لواه ..!!!

أذن الفيــر .. خطفــت سياره من جداميــه .. ووقفت .. رفعت راسيه .. شفت واحد منزل الجامه ويطالعنيه ..

....: راعيــة البوووورش ؟؟؟

عقدت حيّاتيه .. منو هذا المتفيــج ؟ يوم دققت في شكله اكتشفت انه هو هذا نفسـه "زايد" اللي شفته فالمول ذاك اليوم ..

زايد: شو ميلسنج هنيه ؟

حموده: شو خاصنــك ؟

زايد: أول مره أشوف وحده يالسه ع الرصيــف وفهالبــرد وبهالحــلاه ..

انقهــرت فوق القهر اللي فيّه .. وقفت مشيت مبتعده عنه بكل عصبيه ! بس ماخلانيه تم يلحقنيه بسيارته .. تذكرت حمد الله يرحمه والموقف اللي استوا فأمريكا .. تقريباً نفس الموقف .. بس المكان يفرق .. انا الحين في بلاديه .. بس فهاللحظه بالذات أحس بالضياع وبالغـربه !!!!!!

آآآآخ لو كنت حي ياحمد ولو كنت من نصيبيه ماكان استوا فيّه كل هذا .. وماكنت حبيت هالنذل وعشقته لدرجة اني مستعدة أغفر له هاللي اكتشفته اليووم ! ..

بس هذا قضا ربي وماروم أعترض .. !

زايد: يابـــنت الحلال شعنــدج وقفي برمسج ..

وقفت وقلت بعصبيه : شو تبـــا فيّه مالك خــص فيّه ..

وقف السياره ونزل بسرعه ويرنيه من ذراعيه وركبنيه السياره غصباً عليّه وانا كنت أحس بتعب فظيع في جسميه لدرجة اني مارمت أقاوم ..

زايد: وين بيــتج ؟

قلت بضعف وبصوت واطي : انا ماعاد لي بيت ولا بيكون لي بيت انا انولدت غريبه وبتـم غريــبه طول عمريه ..

ماقدرت أفتح عيونيه عقب هالجمله .. التعب اليوم مارحمنيه .. ولا الصدمات رحمتنيه .. ولا حياتيه طاعت ترحمنيه وتنتهي !

حسيت بـ حد يدخل إبـره في ايديه .. فتحت عيونيه .. شفت النيرس واقفه فوق راسيه ويالسه تحط ابرة المغذي في ايديه .. لفيت بعيونيه ع المكان .. شفت خالد يالس في على كرسي في زاوية الغرفه .. أول مالمح اني فتحت عيونيه يا صوبيه ومسك أيديه وتم يحبها ويتحمد لي بالسلامه .. سحبت ايديه منه بقوه ..

حموده: أطلع برا مابا اشوف رقعة ويهك .. خل اللي بديتها عليّه تنفعك ..

خالد: حموده افهمينيـه دخيـلج أنــ ...

حموده: اطلــع بــــــــرا ..

وطلع برا .. !

وانا استسلمت للنوم ورقدت مره ثانيه ..

\\

الماضــي يعيد نفسـه ..
الخيانه للأسف صارت جزء لا يتجزأ من حياتيه !

إذا كانوا كل أهل الأرض خوَنـه فأنــا من وين يايه ..؟

بعد مايبالها سؤال !
أنـا غريبه ..
غريبه عن كل شي ..
حتى عن هالدنيا ..

\\

تبـون تعرفون شو استوا عقـب ؟

بعد أسبوع طلعت من المستشفى ورديت عند قوم يدوه .. الكل درا عن اللي سواه خالد .. وقالوا كلامهم المعتاد في مثل هالمواقف .. انتوا بينكم بنـت ولازم تفكرون فيـها .. خالد يا عندنا فالبيـت عشان يراضيـنيه بس ويــن .. نيوم السما اقرب له .. !

يلسـنا فالميـلس رواحـنا .. بس كل واحد في صوب ..

خالد: صدقينيه أنا كنت ماخذنـها قبلـج .. قبل ما أعرفـج .. بس الحيـن انتي اللي احتليتي قلبيـه .. انا أحبج انتي .. انتي وبس ..

حموده: ليش ماخبرتنيه من قبــل ؟ ليــش جذبـت عليّه ؟ يعني كنت كل ليله تسيـر لها وانا وحليليه على نياتيه أتحراك عند ربعـك .. انته استغليتنيه .. استغليت حبي لك .. انته خنت ثقتيه العميا فيك !

خالد: أنـا آسف صدقينيه .. انا متندم وااايد أنـ ...

قاطعته: طلقنيــه ..

خالد: شووووووووه ؟ شو تقوليــن انتي ؟ مستحيـــل اطلقــج .. حد يطلق روحه ؟

حموده: مب انا اللي أيلس على عديــله .. مستحيـــل أرد لك .. تعرف شو يعنــي مستحيـــل مستحيــــــــــــــــــــــــــــــــــــل !

خالد: بس أنا مابخليــج ..

حموده: كيــفك .......... بس أنــا اللي بخليــك ..

وظهــرت عنــه ..

,‘؛’ .. رزيت نفسي واتظاهر ][ قويهـ ][
يعني كأني ماتأثرت بـ/ فراق
وانا عذاب الكــ‘ــون صوّت عليّــه
أضحك ولكن اختم الضحك ][ بشهآق ][ .. ‘؛’,

بعد هاليوم استقريت عند قوم يدوه .. و قطعت كل اتصال بيني وبين خالد .. ورفضت كل محاولاتهم في انهم يخلونيه ارد له .. ما أرد حق شخص خاننيه وجذب عليّه ..! حتى لو كانت روحي معلّقه بـ روحه .. حتى لو كنت كل ليله أصيــحه واتمنى شوفـته .. حتى لو كانت تتقطع شرايين قلبيه يوم اقول جدامهم اني "عايفتنه" و "ماباه" .. كنت في داخليه أقول "أعشقه" و "أباه" لكن كرامتيه فوق كل شي ..

مــرت الايــام مملـه .. وكئيبه .. ومتشابهه .. كنت مرات اطالعه من البلكونه يوم ايي عندنا عشان يشل مي .. كانت أحلى الايام عنديه .. كنت أتأمله لكن لا عيوني ولا قلبي قدروا يشبعون منه .. كنت أضعف لدرجة اني مره كنت نازله تحت عنده عشان اقوله خلاص سامحتك .. بس خلاف تذكرت كل شي سواه .. وتذكرت غبائيه وطيبتيه .. فـ رديت بسررررعه صوب حجرتيه ودموعيـه سيول على خديه ..

في يــوم من الايــام .. بعد شهريـن من الفـراق الطويـــل بيني وبين خالد .. وبعد ماغدت مي "تحبي" و "تيلس" .. كنا انا وعميه وحرمته وعمتيه ويدوه وسلامه سايرين البـر ..

كانوا كلهم سيارين فسياره وحده بس انا انفصلــت عنهم وسرت فسيارتيه اروحيه ..

فالدرب وصلني مسج .. فجيته وقريــته ..

مع كل صفقة باب .. كنت أحسبك .. / جيـت
ومع كل شرقَه .. كنـت أدّور ../ جبينـك .!
مقـدر خـلاص وفـاض فيـنـي وملـيـت
يااااهووه كانك تسمع الصوووت . / وينك ..؟؟
لابـو جميـع الشعـر - بيـتٍ ورا بـيـت
ولابـوو حيااتـي كلهـا .../ دون عينـك..!
بسـك قسـم بـالله { أزريـت .. أزريــت
ياللـي آحـس الكـون " بيـنـي و بيـنـك !!

"خالد"

طاحت دموعيه بصمت .. آآآآآآخ يا عذااااااابي ..

بعد تقريباً ربع ساعه .. صاح تيلفونيه .. كان خالد .. من اسبوعيـن مايا بيتنا عشان يشل مي .. مع انه كان كل يمعه ايي ويشلها .. هالمره من كثر شوقي له بالغلط ضربت ايديه ع الفص الاخضـر بدال الاحمر ورديت عليه .. وغصبن عني رفعت التيلفون عند اذنيه عشان أسمـع صوت ياكثـــر مااشتقت لـه ..

خالد: ألوووه حموده ؟ رديتي ما صدق انج رديتي دخيلــج لاتبندين في ويهيه دخيلج ..

وقفت ع طرف الشــارع .. خليـت وديان الدموع المتيمعه فعيونيه تنساب على خدوديه بكل حراره .. صحت بصمت .. بـ شهقات مكتومه ..

خالد: حموده دخيلج سامحينيه حياتيه مالها معنى بدووونج انا اشتقــت لج وايــد واااااايد ..

ارتفعت شهقاتيه .. ماقــدرت أكــابر أكثــر ..

حموده: حتى انا اشتقت لك انته ويــنك ؟ بسامحك خلاص بس تعال رد .. ليش ليش من اسبوعين ماييت شو فيـك شو ياك ؟

خالد: انا بخيــر بخيــــر من سمــعت صوووتــج .. انتي سامحتينيه ؟ قولي انج سامحتينيه ..

قلت وانا صوتي متقطع من الصياح : سامحتك سامحتك انا أقدر أتحمل كل شي الا فراقـك ..

خالد: الفراق انتي اللي اخترتيه مب انا .. يعلم الله شو حبج وشو غلاج في قلبيه ماتدرين كيف كان عذابيه في بعدج ..

حموده: انا أحبــك قسم بالله أحبــك .. بس اللي سويــته حطمنيـه وكسر شي في داخليه من صووبــك .. لكن الحين ما أقدر أستحمـل فرااااقـك ..

خالد: انتي وين الحين بييج أبا أشووفـج حرام عليـج شهرين ماشفتـج ..

حموده: نحن سايرين البـر ماتدري ؟

خالد: الحين ياي صووبــكم امره ..

حركت سيارتيه اللي كانت واقفه وكملت دربيه ..

حموده: يييييه شكلهم سبقونيه وااايد انشالله أروم ألحقهم وأدل البقعه !

خالد: ليش انتي وين ؟

\\ __DEFINE_LIKE_SHARE__