~» .. غريبه وســط أوطــاني .. «~ - الصفحة 20

بنوتة من العين · 03-14-2010, 03:27 PM

حموده: يــب !!

فطوم: يا حافظ .. انا اقول اخويه شبلاه هالايام وايد مهتم من عمره ومحلــو وغادي طيب ثره كلـه عشااانج .. بس تبيـن الصـدق هو خبرنيـه مايحتاي أسوي عمريه متفاجئــه !! بس ماخبرنيـه عن الساعه ..

قلت بفضول: شو خبــرج ؟؟

فطوم: قال الله ايّازي ام عيون زرق شو سوّت فيّه ..

حموده: هههههه شدراج يمكن ما أكون انا .. يمكن يحب له وحده انجليزيــه !!

فطوم: لا أكيــد انتي .. أعرفه اخويه صدقينيــه ..

انا كنت شاكه بس الحيـن تأكدت .. يعني هو يحبنيــه .. مادري ليش استانســت يوم دريت انه يحبنيـه !!

غيّرت السالفه وقلت : الا علوم فهـــد ؟؟

فطوم: هيـه صـح خطفينيه حوطيـنيه صوب المقام .. هو هناك بيـته يمكن اشوفه مني ولا مناك ..

حموده: بتبطيـــن !!

فطوم: لا والله ؟؟ انتي تشوفيـن حبيبج و"تهازبيــنه" وانا حارمتنيه حتى الشوف ؟؟

حموده: استحــي على ويــهج سودا الويــه !!

فطوم: انا ويهيه أسود ؟؟ ماتشوفيـن كل هالبودره يعني ؟؟

حموده: هههه .. انزين ماعندنا أهل مني مناك نسير نسلـم عليــهم .. ؟؟

فطوم: من صوب ابويه لا ..

حموده: يوووه يعني ويـن نسيــر الحيـن ؟؟ الناس وين يسيرون فالعيـد ؟؟

فطوم: شرايـج نسيـر بوظبــي ونطبهم !!

حموده: لاعاد مب لهالدرجه .. والله مابيخلونيـه أسوق مره ثانيـه ان سـرت ..

فطوم: انزين انتي خبريـهم وشوفي ..

حموده: انزيـن ..

دقيت ع تيلفون البيـت ورد عليّه البيق بوس .. عميه أو "ابويه" ..

حموده: ألووه ..

ابويه: حموده ؟ وين انتي الحيـن ؟

حموده: ابويه ابا اقولك شي ..

ابويه: قولي...

حموده: أبا أسيـر بوظبي ..

ابويه: بوظبي ؟؟ ليـش ؟؟

حموده: أبويه الله يرحمـه كان يوم يرد صوبكم العيـن يخلينيه عند يراننا وانا كنت اعتبرهم شرات أهليــه ومن كمن سنه ماشفتهم وابا اسير اسلم عليهم دامنيـه اروم أوصلـهم ..

ابويه: ومنو بيسير فياج ؟؟

حموده: مادري يابويـه الحين انا وفطوم فالسياره ..

ابويه: بطرش لكـن خالد وين انتن الحيـن ؟؟

حموده: عند دوّار حديقة الحيوانات ..

ابويه: انزين تمن هناك بطرش لكن خالد ..

حموده: انشالله ..

ابويه: فداعة الله بنتيـه ..

حموده: فداعة الله ..

فرحت من الخاطر يوم وافق انيه أسيـر .. اشتقت حق "مي" و "محمد" هاذيلا كانوا عيال يراننا .. مي أكبر عنيه بـ سنه ومحمد أصغر عني بـ سنتيـن .. أبوهـم مطلق امهم من زمان .. عشان جذيه كنت أسير عندهم .. بس فالعيد كانوا دوم يسيرون عند ابوهم .. عشان جذيه كان العيد أشيــن وأحزن أيام حياتيـه بما انهم ما يكونون موجودين واضطر اتم عند امهم اللي كانت طيبه بس تقضية العيد وياها بروحها ابداً ماكانت تسلّي !!..

عقب عشر دقايق وصل خالد وحركت سيارتيه وراه .. دق ليه ورديت عليـه ..

خالد: ألووه ..

حموده: هلا ..

خالد: أهليــن .. مباركن عيـدج قبل كل شي ..

حموده: ههههه عساك من العايدين والسالميـن ..

خالد: مشكوره ع الساعه .. وايد حلوه ..

حموده: العفو .. من ذوقـك ..

طالعتنيـه فطوم بـ نص عيـن ..

خالد: وين سايره انتي الحيـن ؟

حموده: سايره صوب بوظبي وين سايره بعد ؟؟

خالد: لا قصدي أي بقعه أي منطقه ؟؟

حموده: فالوثبـــه ..

خالد: أهــا .. انزيــن عيل ورايـه ..

حموده: ترانيـه وراك وين بسير بعد ؟؟

خالد: من سبع سنين أول مره يخطف عليّه عيد جذيـه ..

حموده: كيف يعني ؟؟

خالد: خلاف بخبرج .. يالله مع السلامه ..

حموده: مع السـلامه ..

&* الجــزء الســـابـع عشـــر *&

تبعــت الدرب الطويــل ورا سيارة خالد .. عقب ساعه ونص وصلنـا .. هالمره انا تجدمت على سيارته لنّي أدل المكـان .. تميت أطالع البيوت بيت بيت .. آخــر شي وقفت جدام بيــت أبويـه الله يرحمــه .. ماظـن انه حد ساكننه الحيـن .. شكله فاضي ودروازته مبنده .. نزلت من السياره وفطوم نزلت بعد .. وخالد نزل من سيارته بعد ..

وقفت جدام البيت وقلت : هذا بيتنا .. واللي ع اليمين بيت يرانّا مادري اذا بعدهم ساكنين فيه ..

خالد: لحظه انا بسير صوبهـم وبشوف .. شو اسم راعي البيت ؟؟

تميت اتذكر خلاف قلت : سعيد راشد الـ.....

خالد: انزين لحـظه .. بسير اشوف ..

روّح عنا اما انا تميت أطالع بيتنا .. مادري اذا بعده بيتنا ولا لا .. تذكرت ذيــج الايام اللي راحت ولا بترد مره ثانيـه ..

قلت حق فطوم : تصدقيـن مره تسببنا في قطع الكهربه عن الحاره كلها انا ومي ومحمد .. كنا نلعب عدال مجمع الكهربه ورشينا عليه ماي وبندت الكهربه عن كل الحاره زين يوم ما مسكتنا الكهربه !!

فطوم: أسميــكم مجرميـــن !!

حموده: الا سفاحين مب مجرمين الله يرحم ذيج الايام !!

يا صوبنا خالد بابتسامه وقال: قربوا ..

فرحت من الخاطر يوم دريت انهم ما انتقلوا .. ومشيت بسرعه و سبقتهم هبطت البيت وأول شي شفته كانت مي .. كان بطنها منتفـخ شكلها عرست الاخــت وحملـت افا ماخبرتنيه !!!!

قلت بصوت عالي : ميّوووه ..

طالعتنيه باستغراب وخلاف شقت الحلج وقالت: حمووووووده .. !!!!!!

ربعت ولويت عليها .. بسم ارمت ألوي عليها عدل بسبة كرشـتها .. !!!

من عقب التحايا والمعايدات قالت مي ..

مي: ويــنج يا حمووده حرام عليــج 7 سنيــن الحيــن وين سرتي وين دارج ؟؟

حموده: آآآآآآهـ انا سالفتيـه سالفه يا ميّووه .. اذا حصلـت وقـت بخبـرج ..

عقدت مي حيّاتها وقالت : ومنو هاذيلا اللي فياج ؟؟

حموده: فطوم وخالد عيال عميه ..

مي: يعني طول هالسنين كنتي عند أهلج ؟؟

حموده: لا للأسف ياليتنيه كنت عندهم .. قلت لج اذا حصلت وقت بخبرج بالسالفه كلـها .. وانتي ماشالله عرستي و pregnant !!

مي: هيه والله السنه اللي طافت عرسـت .. خذت سلطان ولد عميـه تحيدينه هذاك الدفش اللي كان يكفخج مرات ؟؟

حموده: هيــــه وشو اللي عقج عليــه ؟

مي: فديـت روحه لاتغلطيـن عليـه ..

حموده: اوب أوب مانروم نحن .. خلاص آسـفه بس احترمي مشاعريــه انا اللي هنيه عاانــس !!

مي: وين عانس بعدج ياهل يبوج .. !!

التفت ورايه وشفت فطوم واقفه روحها .. زقرتها .. وسلمت على مي ..

مي: قربـن داخــل والله اني من الفرحه نسيـت أقرب بكـن ..!!

ضحكت عليها وهبطنا البيت .. شفت امها وسلمت عليها و صاحت ولوت عليّه .. يلسنا وتقهوينا .. تعودت ع القهوه كله من يدوه !! أتصوّع لها الحين يوم ما أشربـها .. أدمنت الله يعين !!

خبــرتهم بسالفتيـه وكل اللي استواليـه بالتفصيــل .. وخلاف سارت عنا فطوم عند خالد لأنه دق لها عشان يسيرون يحوطون شوي .. وخلاف بيردون عليّه ..

ودتنيه مي صوب حجرتها وانا أخيراً حسيت اني لقيت حد أثق فيـه عشان أخبره كـل شي .. هاي مي توأم روحيـه .. مادري كيف سليت عنها طول هالسنين !! بس الظروف تنسي الواحد نفسه فـ كيف بربعه ؟؟

مي: انزيـن وهالطويــــل شسالفتــه ؟؟

حموده: هذا شي ثانــي .. كنت أكرهه بشكل فظيــع .. بس خلاف اكتشفت انه مظلوم .. وكان يعاملنيـه بـ طيب .. وتم فيايه شهرين في امريكا لين خلصت دراستيه .. صح انه دوم نتعاند انا وهو ودوم نجره ونجير بس هو زيـن فيّه وتشمين هالعطر اللي فيّه هو اللي يايلبي اياه .. وانا يبت له ساعه .. اخته قالت لي اني مخبلتبه ويحبنيه وانا متأكده من هالشـي .. بس انا مادري اذا كنت أحبه ولا لا ..

مي: انتي الدنيا كلها تحبج ابا اعرف شو سويتي بالشباب انتي ؟

حموده:لا اله الا الله . ليش منو يحبنيه بعد ؟

مي: اخويه محمد مب في حاله من غبتي عنّا ..

حموده: هاللي كان قاصــر .. ليش كل واحد اعتبره اخويه يحبنيه آخر شي .. كان شي واحد في امريكا اسمه سيف كان مواطن وكنت اعتبره شرات اخويه بس آخر شي قال انه يحبنيه .. !!

مي: الله يحبج عشان جذيه كل الناس تحبـج ..

حموده: عاد مب لهالدرجه ..!! انزين انتي خبرينيه عن عمرج .. شو استوابج فهالسنين ..

مي: ماشي بس سلطان خطبنيه وعرسنا وانا الحين حامل ماشي غير هذا ..

حموده: أي شهر ؟؟ بنت ولا ولد ؟

مي: انا فالشهر السابع .. وهاي (أشرت على بطنها ) بنت ..

حموده: عيل ورفجة الغالين يا تسميـنها عليّه ..

مي: خــلاص تــم .. أصلاً من زمان كنت مقرره أسميها عليـج .. بس انتي يوم بتاخذيـن هالطويـل وتيبين بنت غصباً عليـج تسميـنها مي ..

حموده: وشدراج اني باخذ هالطويــل على قولـتج ؟؟

مي: أحــس وانتي تحيدينه احساسيه مايخيب ..

حموده: انشهــد انه مايخيب .. قبل لا أسافر قلتيليه بتستوي مصيبه وبنتفارق و استوت هالمصيــبه .. وما التقينا الا الحين عقب 7 سنين ..

مي : الحمدلله على كل حال ..

حموده: الا بيتنا حد سكنه ؟؟

مي: لا ..

حموده: هيه زيـن .. عيل أكيد ابويه الله يرحمه كان مسجلنه بإسميه بعد قبل لايموت ..

مي: الله يرحمه ..

فهاللحظه صاح تيلفونيه ورديت ..

حموده: ألووه ..

خالد: هــلا والله .. أقول نزلي تحت لازم نروّح ..

حموده: ليــش ؟؟

خالد: انزين انتي تعالي الحين خلاف بردج عليـهم أوعـدج ..

حموده: أنزيـن .. بنزل الحيـن .. بس انته شدراك انيه فوق ؟؟

خالد: أشوف زولج من البلكونه ..

التفت صوب الدريشه اللي كانت مفتوحه .. سرت صوب البلكونه ووايقت منها شفت خالد واقف تحت .. سوّاليه باي باي وابتسمت .. وبندت عنه ..

حموده: الطويل على قولتج يبانيـه أنزل تحت ..

مي: انتوا الحياه عندكم فري تسيرين وتردين فيا ولد عمج !!

حموده: عشت 6 سنين في أمريكا والحين الكل محترم حريتيه الحمدلله .. و اللي يمشي عليّه ما يمشي ع الكل تراه ..!!!

مي: أدري أدري .. انزين قبل لاتسيرين عطينيه رقم تيلفوونج اخاف ما اشوفج مره ثانيه ..

حموده: لادخيـلج لاتقوليليه انج بعد تحسين بهالشي !!

مي: لا بس خايفه .. ما اضمنج الصراحه !!

عطيتها الرقم ووادعتها وروّحت عنها .. يوم نزلت تحت وادعت ام مي وظهرت .. أول ماظهرت من ويه الباب طلع ليه محمد في ويهيه .. فالبدايه ماعرفته بس يوم دققت فـ ملامحه عرفت انه هو ..

حموده: محمد ؟؟

محمد: هيـه انا محمد .. (قال وهو متشكك) انتي منو ؟

حموده: محسوبتك الشيخه حمده ..

محمد: حمده !!!! صــدق انتي حمده ؟؟؟

حموده: هيه عيل ؟؟ ماتشوف شكليه بالله عليك ماحيدنيه وايد تغيرت يعني !!

محمد: ما اصدق اني عقب كل هالسنين أشوفج .. شحالج ؟

حموده: بخيـــــر الحمدلله يسرك الحال .. أقول انا مستعيله لازم أروّح مي وامك بيخبرونك السالفه ..

شفت حد أطول عنه واقف وراه .. كان خالد يطالعنيه بـ نظرة تــحررررق !!

خالد :شو تسوين حضرتج ؟

قلت بخوف: أسلم عليـه ..

خالد: سلام هالكــثر ؟؟

مطنيه من ايديه وسحبنيـه .. حسيت ايديه بتنفج من مسكته .. حاولت افج ايديه بس مارمت .. يوم ظهرنا من البيت قلت ..

حموده: ايه عورتنيــــــه .. فج ايديه ..

خالد: مابفجها شو بتسويــن ؟؟

قلت وانا فيّه الصيحه : يالمتوحش فج ايديه !!

فج ايديه وجنه انصـدم من كلمتيـه .. وانا طاحت دمعتيه حسيت ايديه بتتقطّع من كثر الويـع.. حشا ايده واايد قوّيه !!

مسك ايديه هالمره بس ع الخفيف وسحبنيه صوب بيتنا .. كانت الدروازه مفتوحه .. وهبطنا .. انا نسيت ويع ايديه من شفت هالبيت اللي غبت عنه 7 سنين .. بس زاد ويع قلبيه يوم تذكرت ابويه .. عطيت لدموعيه الحريه انهن ينزلن على كيــفهن .. تذكرت ابويه يوم كان يلعب فيايه هنيـه .. حتى يوم كانت اميه ساكنه عندنا هنيه .. كانت طيـبه وخاليه من الحالات النفسيـه .. كنت أحبها مثل أي طفل يحب امه .. بس فجأه اختفت .. وتغيرت .. وتغيرت حياتيه من يومها ..

خالد: لاتصيـحين دخيــلج ..

حموده: مب بيديه .. السنين اللي عشتها هنيه مب شويه ..

خالد: انزين ممكن تنسـين المـاضـي ولو شوّيه أبا أقولـج شي ..

مسحت دموعيـه وقلت وانا أحاول أهدى شوي : جحاليـه سايح ؟

خالد: شوي ..

ظهرت كلينكس و منظره من الشنطه .. تميت أمش الجحال اللي كان سايـح .. عيونيه كانن حمــر .. اليوم صحت وانا المفروض افرح !!

دخلت المنظره فالشنطه ورفعت راسيه صوب خالد اللي كان وايـد قريب على غيـر العاده .. رديت خطوتيـن على ورا يوم شفته قريـب ..

خالد: انتي تخافين منيـه ؟؟

حموده: يوم تعصب هيه ..

خالد: ويوم انا عادي ؟

حموده: لا ..

خالد: انتي بعدج تحبيـن حمد ؟

رفعت راسي صوبه عدل وركزت في عيونه .. حسّيـت انه بيعترف وبيقول انه يحبنيـه اذا قلت له لا ... بس أكيد اذا قلت له هيه بيتراجع .. أعرفه زيــن .. ماتحق له نفسه يحبنيه وانا أحـب غيره .. اللي انا اعرفه الحين اني ما احب حمد .. يمكن كان هو أول واحد يعترف ليه بحبه وأحلى واحد شفته فحياتيـه .. بس ماظـني انه اللي كان امبيـنا اسمـه حــب .. كان شخص مهم في حياتيه .. بس ماظني اني حبيته كل ذاك الحب اللي ما يخليني أنساه عقب موته !!

تجرأت وقلت: لا ..

ابتسـم .. وتنهد بـ راحه ..

خالد: تدريـن انج خبلتيبيه !!

ابتسمت وقلت: ليش شو سويت ؟؟

خالد: مادري .. انا كنت عصبـي وما اتحمل شي .. وكنت صدق أحس عمري متوحش .. ماحد يسلم من هزابيـه وتكفيخيه المسكينه فطوم كانت أكثر وحده متأذيه .. بس الحيـن انتي ذللتيني لــج .. خليتينيه ما أفكر في اللي اسويـه ان كان صح ولا غلـط .. ولا أهـتم فالدنيا ان سارت شرق ولا غرب ولا انشالله انجلبت فوق تحت .. عشان خاطـرج انا مستعـد أسوي أي شـي .. حمـده .. أنــا أحبـــج ..

..] أربــع .. أربــع حروف ويزيد حبي .. أربع حروف ويفز قـلبي .. انت الغـلا ميـزك ربـي .. قلبـي انا منـك صويبــي [ ..

..] حلوه احبك من شفاتك .. انزع غرورك من صفاتك .. كلمه تغيّر كل حياتك .. واسقيك من حبي وطيبي [ ..

تميــت واقفه في مكانيــه ماعرفت شو أسوي .. كان أحساس غريب هاللي أحسـه في داخليـه .. بس كنت فرحانه وياليتنيه اعرف سبب هالفرحـه .. معقوله قدرت تملك قلبي بهالكــلمه ؟؟ هالست شهور اللي عشتهن وياه ماكانن شويه .. من أيام أمريكا لين هاللحظه .. اعترف انه غالي عنديه بس مادري أي نوع من الغلاه .. ياليـتني أقدر أعرف شو هاللي داخليـه الحيـن .. انا أحبه ولا لا ؟؟ يا قلبي خبرنيـه ترانيـه ماروم أستحمـل أكثر !!

خالد: شو ردج ؟

قلت بصوت واطي : ماعـرف ..

خالد: كيف ماتعرفيـن ؟

حموده: انا مادري اذا كنت أحبـك ولا لا .. اخاف اني أتسرع واندفع وخلاف أخســرك وانا اللي بتم أتحسـر آخـر شـي .. خلنيـه دامنيـه ماتعلقت فيـك وايـد .. اخاف اني انــدم و......

قاطعنيه خالد: لا تكابريـن .. انتي تحبينيـه كثر ما انا احبج .. تونـا في البدايـه .. مابنتسرع .. كلنا مجربيـن في هالحياه .. حتى انا أخاف اني أنـدم .. __DEFINE_LIKE_SHARE__

بنوتة من العين · 03-14-2010, 03:28 PM

عقب كل اللي استوا انا ماعدت أثق في حد .. لكن خلينا نبني كل شي شوي شوي ..

عيبـنيه كـلامه .. عـرف يفهم اللي انا مافهمتـه ..

قلت له: انزيــن .. والحيـن ؟؟

خالد: الحين شو ؟؟

حموده: الحين شو بنسوي بنتم واقفين فالحوش ؟؟

خالد: فطوم وفريـتها عند بيت خالي اللي هنيـه .. انتي وين تبين تسيرين ؟؟

حموده: مادري على كيفك ..

خالد: دامنه على كيفيه عيل تعالي ..

وسحبنيه من ايديه وخلاف وقف ..

خالد: بعدها تعورج ؟؟

مديت بوزيـه وقلت : هيــه ..

تم يطالع ايديه وخلاف حبـها انا عاد ماعرفت ويـن أودي ويهيه ..

خالد: والحيـن ؟؟

حموده: لاوالله ؟؟ انته ماتستحي على ويهك ؟؟

خالد: تبين الصدق .. لا ..

حموده: هيه زين يوم خبرتنيـه ..

وخطفت عنــه وانا مب حاسه بوجود ايديه أصلاً .. ياناس ماحد عنده دكتور حق القلب هنيه ؟؟ قلبيه مب طايع يهدا !!..

يا ووقف عداليه ..

خالد: شو بتمين وواقفه عند الدروازه يعني ؟؟

حموده: لا بس وين بنسير .؟؟

خالد: تعالي ركبي في سيارتيـه وبخبرج ..

سار وركب سيارتـه وركبت انا بعد ..

حموده: يالله وين بنسيـر ؟؟

خالد: أول شي بسيـر المسيـد أصلي الظهـر وخلاف بتشوفين وين بوديـج ..

حموده: وفطوم ؟؟

خالد: هاي لو الود ودها ما تظهر من بيت خاليه ..

حموده: ليش ؟؟

خالد: البنات هناك كلهن مخبّل شراتها ..

حموده: ههههه .. انته شو مشكلتك فيا البنات ؟؟

خالد: مشكلتيـه انج احلاهـن ..

ياناس قلبيه بيستوي فيه شي اليوم .. طريـقته فالرمــسه تذوّب ياناس .. حتى صوته الخشن غدا رقيــق .. ياليته يتم دوم جذيه !!

وصلـنا عند المسيد .. نزلنا هو سار صوب مسيد الرياييل وانا صوب مصلى الحريم ..

من عقب الصلاه رديت السياره وتميت أترياه .. من الملل تميت أفتش .. فجيت السده اللي جداميه بما انها ماكانت مقفوله .. حصلت العطر اللي عنديه شراته .. رشيته على طرف عباتيـه .. تميت أشــمه .. ما اشبع من ريحة هالعـطر ياناس !! تعطرت به ورديته فالسـده عقب ما مزرت ريحته السياره ..

يا خالد من عقب ما خلص من الصلاه .. أول ماركب تم يشم الريحه ..

خالد: هالكثر عايبنج العطر ؟؟

حموده: ما اشبع منه !! ريحتــه واايد حلوه ..

خالد: يعني عيبج ذوقيـه ؟؟

حموده: هيـه ..

تحركنا من عند المسيد ..

خالد: تدريـن ليش ذاك اليوم لزّمت اني أدخل البيت ومريم موجوده ..

حموده: ليـش ؟؟

خالد: عشان أشوفكن عدال بعض .. كنت ابا اقارن بينكن الصراحه ..

حموده: لا والله ؟؟ وشو ظهرت النتيجه ؟؟

خالد : النتيـجه عرفتيـها اليوم !!

سكت انا ..

شغّل خالد المسجل وخلاف قال : اهداااء ..

هالاغنيـه انا من غير شي اموت فيـها .. فـ كيف لو قال خالد انها .. اهداااء ؟

وش فيـك تسألني اذا كنت غالي .. غالي وتسوى من غلاتك عيوني
كل ماتمر أيامنا والليالي .. يزداد حبك بي ويكثر جنوني
ودي أحطك مـ الوله يا غزالي .. في داخل عيوني واغمض جفوني
واسرح واسافر بك في دنيا خيالي .. واقطف لك ازهار الفرح من غصوني
انته الغلا كله في أول وتالي .. وانته حياتي وانته عمري وكوني
والناس ماتسواك ياراس مالي .. لو بينك وبين البشر خيروني
قدرك كبير ومنزلك دوم عالي .. كل يوم يكبر ياغلاي وفتوني
وان كنت تسأل عن ودادك يا غالي .. تعال وانظر منزلك في عيوني

تميـنا طول الدرب ساكتيـن لين وصلـنا عنـد مطعـم .. وقف خالـد وقال ..

خالد: نزلـــي ..

حموده: نحن ليـش يايين هنيـه ؟؟

خالد: شو بعد بالله عليـج يايين نتغـدا !! يالله نزلـي ولا لازم أفج لج الباب ؟؟

حموده: لا مب لازم ..

نزلت ونزل هو .. ودخلنـا المطـعم .. يلسـنا على طاوله منعزله .. وطلبـنا أكــل .. تميـت ساكتـه ومب عارفه شو أقول .. مب متجرأه أرمس أصلاً ..

خالد: شفيج ساكتـه ؟؟

حموده: ماشي ..

خالد: من نرد العيـن انا برمس عميه وبخطبـج ..

ارتبكت أكثر مما كنت مرتبـكه .. عادي كنت أشرد عنه من كثر القفطـه !!

خالد: ياويلي ع المستحى شو قلت انا ؟؟

اللي انقذنيه وصول الاكــل .. أو السلطه بالاحرى .. تميت آكل بهدوء ..

خالد: شفيـج والله ابا أسمع صوتــج ..

حموده: مافيّه شي ..

خالد: خلك قريب ارجوك مقوا تجافيك .. يكفيني وصلك لو بهمس الشفايا
آمر تدلل يا حياتي وبعطيك .. راضي انا بحبك وهاذي الحكايه !!!

حموده: بـس عاد بتغني فالمطعم !!

خالد: شسويبج ماطعتي ترمسيـن !!..

حموده: انزيـن برمـس بس شو أقول ؟؟

خالد: اللي تبيـنه ..

حموده: امممممم هيه صح .. يوم فالبر كنت تغني لايكون انته فنان ونحن ماندري بس ؟!

خالد: ههههههه لا .. بـس من كمن سنه ماغنيت وسيرة البر ربشتنيه وخلتنيه أغني .

حموده: لو عندك ربابه أحســن ..

خالد: و شرايج بعد بسير أسكن في بيت شعر وبحط طير على جتفيـه وبسير أقدم برنامـج "عشق البداوه" ..

حموده: هههههههه ..

خالد: شرايـج خلاف نسـكن فالبر ونطب المديـنه والله هناك أهـدى وأحلى واشرح !!

حموده: وخلاف بتلبسنيه برقـع وبتخلينيه اخض السقا لا يبوك ..

خالد:ههههه بس هذا اللي هامنـج ؟؟ خلاص مابنلبـسج بـرقع ولا بتخضين السقا .. شرايـج ؟؟

حموده: اذا جذيـه زين وبشل يدوه فيانا ..

خالد: لا فديـتج مانبا عذّال ..

سكت وخلاف قلت :عيل انا بلا يدوه هب سايره ..

خالد: وانا ما أسد يعني ؟

سكت انا و يا القرسون وشل السلطه وحط الـ main course .. كنت أحس عمريه في فلم ولا مسلسل خاصةً انه أجواء المطعم كانت تساعد ع هالشي .. !!

خالد: ما جاوبتي ؟

حموده: شو أقول ؟

خالد: تعرفين شو تقوليـن .. أسد انا ولا ما أسد ..

حموده: دخيــلك مب وقتـه .. والله اني مب عارفه وين أودي ويهيه .. عادي أشرد الحين !!

خالد: لا يبوج كله ولا هـذا .. تدرين يوم شردتي ذيـج المره كنت عادي أسير صوبـج دبي واذبـحج !!

حموده: أفــــا .. هنت عليــك ؟؟

خالد: أحبــك الا يابري حالي يعوق .. من كثر ما أحبك أخاف اني أقتلـك !!

حموده: ما جذبت يوم قلت انك متوحــش !!

خالد: افا جاني عدلت فعمريه لين قلت بـس بعدني لين الحين متوحش ؟؟

حموده: الشكل الخارجي لا .. بس مايندرا عنك عاد من داخل ..

خالد: خيبه امره طايـح من عينج ثرنيه ..!!

ابتسمت وقلت : أسووولــــف ويـــاك لا تاخذ على خاطـرك ..

كملــنا غدانا بس انا ماسلمت من خالد .. ماصدقت متى خلصنا وقال انه بيمر صوب بيت خاله عشان اييب فطوم .. وقفنـا عند بيـت خاله .. ونزل هو اما انا تميت فالسياره ..

وانا أتريـا شفت واحد يظهر من البيت .. انتبهت لـشكلـه .. انصدمــت !! هذا كــان سيــف !!! معقوولــه ؟؟ معقوله يكون هو ؟؟ يشبهه .. هو أكيد هو ..!!

يعني سيف ولد خال خالد ؟؟ ياربي كيف الدنيا صغيره !!!

عقب ما ركب سيارته وظهر من البيت .. حوّلت من السياره وركبت مره ثانيه بس فالكرسي اللي ورا .. عشان فطوم يوم بتي تركب فالكرسي اللي جدام ..

عقب عشر دقايق يو خالد وفطوم .. ركبوا السياره .. صد خالد صوبيه وابتسم لأنه انتبه ع اللي سويــته .. ردينا صوب البيت وين كانت سيارتيه موقـفه .. بس أول شي سرت وسلمت على قوم مي آخـر مره وركبت سيارتيه وردينا صوب العيـن ..

طول الدرب وانا افكر فاللي استوا اليوم .. كان شي غريب وحلـــو !! بس تضايقت يوم تذكرت انه سيف ولد خال خالد .. مادري ليش بس حسيت بـ ضيق ....

&* الجـــزء الثــامــن عشــر *&

وصلنــا العيـن عقب أذان العصر بـ شوي .. أول مادخلت البيـت سيـده ربعـت صوب حجرتيه وبدلت ثيابيـه ورقــدت .. ماهمنيـه أي شي ثاني ..

مـــرت أيام العيـد من أحلى مايكون.. قضينا يوم كامل فـ دبي وردينا نـص الليل ونحن هلكانيــن .. من عقب العيـد بأسبوع .. قررت أدوّر شغــل .. بس اللي فاجئنيــه يوم يا ابويه ويبانيـه فـ "كلمة راس" ..

ابويه: بنتيـه ولد عمج خالد خطبـج منيـه ..

نزلــت راسيــه .. كنت متأكده انه هذا هو السبب ..

ابويه: هاه شرايـج ؟؟

سكت خلاف قلت : مادري يابويه الشور شورك ..

ابويه: انا اشوف انج تفكريـن وخلاف ترديـن اليواب .. ولا شراايـج انتي ؟

حموده: انشالله ..

ابتسم ابويه وقال: الله يجدم اللي فيـه الخيـر انشالله ..

ابتسمت انا وقمت ورديت حجرتـيه .. امممم السالفه مايبالها تفكيـر .. دامنه هالكثر مستعيل ع العرس معناته انه يبانيـه صــدق .. وانا الصراحه مب مستعده أفرط فيه لو شو يصير .. صح اني ماحبيـته ذاك الحـب .. بس انا أحترمــه وهو وايد كبيـر في عينيـه .. وأهم شي انه يحبنيـه .. هذا هو أهـم شي .. اما حبي له بيكبر مع الايام ..

قررت اني اعذبــه وما أرد عليه الا عقب اسبوعيــن .. بشوف شو بيستوي عليـه !!

بالبــاجر .. علي تشجّع وخطــب الريـم .. بما انهم كانوا محيرين حق بعـض بس هم تحسبوا انه مايباها .. لكنه خطبها وهي بعدها تفكّر .. هي صدق تفكر مب شراتيـه انا بس ابا اعذبــه !!

ما استوت أحداث واايد هالاسبوعين غير مكالماتيه لـ مي اللي ماوقفت .. وهي ذلت ابو عاري على "قلتلج انه بيخطبج" و "يالله وافقي لاتعذبين الريال" .. لين هزبتها وقلت لها لاعاد ترمسيـن فالسالفه .. وكان خالد يتصـل وما ارد عليـه .. لين يانا ذاك اليوم وبكل خبال الدنيا وقف سيارتـه تحت بلكونة حجرتيـه .. وحط هالاغنيـه ..

انا يابعد عمري كم اعدلكم مدى الايام
واداري شرهة الغالي ولانرضى زعل الاحشام
وليعن في هواك ابغي وصالك ياعجيد اريام
لأنه وصلكم راحي محبي ع الوصل تنلام
احبك حب مـ الخاطر عزيزي وانت لي ظلاّم
وانا مخلص لك بحبي وحبك فالجدا جدام
اعيش بحاظر الماضي وتاخذني به الايام
وكل مامرت الذكرى تجدد لي جروح جدام
عسا دارك من الوسمي ركودن من مزون غمام
وتـــازم لظــة بـــروقه تـــنوّر لـــيله العــتّام

خيــبه بيفضـحنا هذا روميو زمــانه !! زعقت عليه من عند البلكونه ..

حموده: انته تخبــلت ؟؟!!

خالد: منو مخبلبيـه ومعذبنيـه غيــرج ..؟؟ شو مب ناويه توافقيــن ؟؟

حموده: انا من زمان موافقــه بس مب كل شي ايي بالساهل فهالدنيا يا خلّوود ..

خالد: انا خلّوود ؟؟ محلاتـها من ثــمج ياربــي .. رديتينيه 15 سنه ورا !!

حموده: يـــالـــــشـــــيـــــــــبـــــــــه !!

تم خالد يغني : وعينه عين حرن وحش شامي .. صغير السـن قدره مايهوني .. ياليت الناس ما تاخذ كلامي .. يحول الواش من دونه ودوني .. انا بنوي على وصله صيامي .. يلي حقق بعد ياسي ضنوني ...

حمدت ربي مليون مره انه محد كان فالبيـت .. ولا كانت بتستوي فضيــحه !!

خالد: أول مايرد عميـه البيـت تقوليله انــج موافقـه ولا والله العظيـم يا المره اليايه أهبط عندج داخل مابتسدنيه البلكونه .. !!

حموده: انشـــالله شيـبتيـه !!

خالد: انا شــيبه ؟؟

حموده: تراك أكبــر عنيـه بـ 8 سنيــن !!

خالد: بديـنا بالمعايــر ؟؟

طالعته بـ نص عيـن وهبـطت داخل .. يعيبنيه يوم أسويــبه جذيــه .. مادري ليش !! بس آخــر شي مايهون عليّه هذا شيبتيــه !!

..] أستفز الشوق من خافق مودي .. وازعلـه وارضيـه وابدا بالخـصام ..
.. والصدى من حـس أشواقي يردي .. ترجـم احساس المحبه والهيـام [..

عقــب نص ساعه سمعـت حد يدق ع الباب .. أول ما فجّيـت طلع ليـه عميـه قصدي ابويه سمحوليه بعدنيه ماتعودت !! ..

ابويه: هاه بنتيـه شو ردج تراه ولد عمج حشـرنا !!

حموده: مممممـ موافقــه ..

ابويه: صدق ؟ مبرووك يا بنتيـه مبرووك ..

ولوا عليّه .. تونيه استوعبت السالفه الحين .. يعني خالد خطيبيه ؟؟ يالللله بالستــر !! هبطت عمته وحرمة عميه ويدتيه اللي ظاهر كانن يتسمعن من عند الباب .. ووراهن الريم وسلامه .. وعاد كلهم باركوليــه ..

الريـم: ابويــه ..

ابويه: عوونج ..

الريم: انا بعد موافقــه ..

ابويه: صدق ؟؟مبرووك ..

ولوا عليها ..

ابويه: الحمدلله ربي يتمم على خيــر ..

لويــت على ريموووه بالقــووو .. حسيت انه مشاعرنا انا وياها نفس الشي فهاللحـظه ..

عقب ماظهروا من عندنا دقّيت حق ميّووه الحشـره عشان أخبـرها ..

حموده: ألووه ..

مي: هلا والله بالطـش والرش ..

حموده: شحاالـج ؟

مي: الحمدلله بس حموده الصغيرونه ملعوزتنيـه كل شوي اتّم ترافـس ..

حموده: خليـها السمّيه مالج خـص فيها برايها ترافـسج على كيفها انا سامحتلها ..

مي: لا والله ؟؟ تراج مب انتي اللي تنرفسين فـ بطنج !!..

حموده: المهم باركيليـــه ..

مي: وافقتي ؟؟!!!!!!

حموده: هيـــه ..

مي: مبروووووووووووووووووووووووووووووووك فديـــتج ..

حموده: الله يبارك فيــج ..

مي: زين مابغيــتي يبوج ..

حموده: مابتصدقين شو سوّا خااالد ..

مي: شو سوّا ؟؟

حموده: وقف عند بلكونة حجرتيه وحط اغنيـة ميـحد .. وعاد انا رحمته ووافقت ..

مي: لا والله ؟؟ أدريــبج تموتين فالثرا اللي توطـاه ريولــه بس انتي مب حاقتلج نفسج تعترفين انج تحبينه ..

حموده: خليــنا من هالسالفه الحين .. حتى بنت عميه وافقـت على علي اخو خالد ..

مي: مبرووك ماشالله شكلكن بتعرسن فـ ليله وحـده ..

حموده: هيـه والله مع اني احس عمريه ياهل ع العرس انا مب ويه مسؤوليه الصراحه بس بنتعلم مع الايام !!

مي: يالعنــز تذكرت شــي ..!!

حموده: شووه ؟؟

مي: باجـر عيـد ميلادج !!

حموده: هيــه والله صــح .. انا كيف نســيته ؟؟

مي: عاد مشكــله يوم انتــي عيوز مخرفه وتنسين حتى عيد ميلادج !!

حموده: والله شكليه بعيّز قبل وقتيه ان خذت هالشيــبه !!

مي: عاد انتي شو عقج عليـه هالشيــبه ما حصلتـي غيره أظني .. عندج عيال عم غيره شعنه ماخذتي واحد منهم ؟ ولا حلالج يعني لنه شيبه وماحد بغاه فهالدنيــا ..

حموده: أيــه عاد كله ولا شيبتيه يعنّي فدااه وفدا عيونه السوود ..

مي: أسميني أعرف شقايل استفزج !!

حموده: حيواانه !!

مي: المهم مبرووك ع الموافقه ومبروك على عيــدميلادج وعقباال ما اشوفج عيوز وكشـتج بيضا وعداالج عيال عيال عيالــج ..

حموده: ههههههه حشا .. الله يبارك فيـج ..

مي: أقولــج سلطان يزقــرنيـه لازم أبند ..

حموده: مانروم ع حبيب القلب نحن يالله مع السلامه ..

مي: ماعليه بتجربين خلاف مع السلامه ..

ضحكت وبندت عنها .. انسدحت ع الشبريــه وتميت أطالع الصقف .. غمضت عيونيـه وشفـت خالد .. هالايام الا أحلم به ولا اشوفه يوم أغمض عيونيه مادري شو استوا فيّه .. تذكرت شكله يوم هو عند السياره وحاط الاغنيـه ضحكت وانا مغمضه عيونيه .. وماوعيـت الا برنة تيلفونيـه .. رديت عليه وانسدحت مره ثانيه وغمضت عيونيه ..

خالد: ألووه ..

حموده: هلا والله .. شحاالك ؟

خالد: بخيــر من سمعت صوتج ودريت بموافقتج ..

حموده: ماشالله الاخبار تنتقل بسررعه !!

خالد: مبرووك علينا ..

حموده: الله يبارك فيك .. على فكره .. باجر عيد ميلاديه ..

خالد: حلفــي انتي بــس !! جان قلتـي من قبــل !!

حموده: انا اروحيه نسيت ..!!

خالد: غنّوا لحبيبي وقدموا له التهانـي .. في عيد ميلاده عساها مية عام .. افرح حبيبي واطلب اغلى الاماني .. الليله ياعمري تناديك الاحلام .. اطلبي واتمني شو تبين .. ؟؟

قلت من خاطريه : سلامتك وبقاك فالدنيــا ..

خالد: الله يخليني انشالله واسعدج ..

حموده: آميـن .. الا انته متى عيد ميلادك ؟؟

خالد: 3-11 ..

يلست واعتدلت فيلستيه وقلت : أها يعني مب بعيد ..

خالد: هيـه .. شو بتيبيلي هديه ؟؟

حموده: اللي تباه ..

خالد: أباج عيل توافقيــن انه الملـجه تكون عقب شهــر ..

حموده: ستوب ستوب شووووه ؟؟ what the hell are you saying ??!!

خالد: خيـــبه حشــا ماقلنا شي يبوج .. يا كلمه ردي مكانج .. دامنه اشتغل الامريكي مانروم نقول شي نحن .. انشالله يارب تيبيلي عيال عيونهم زرق وخضــر ونعدّل السلاله !!

نقــعت انا من الضحــك ومارمت أسكــت ..

عقب ماسكت شوي قلت : أسميــك صدق ماتستحي على ويــهك ..!!

خالد: تو الناس توج تدريـن ؟!!

حموده: مادريت بك من قبل ولا جان ماوافقت !!

خالد: الحمدلله .. انزين يعني انتـي رافــضه ؟؟

حموده: ياخي يبالها استعداد نفسي السالفه مب منيه والدرب !!

خالد: عندج شهر استعدي على كيــفج !!

حموده: انته صدق تبا هالشي ؟!!

خالد: هيــه والله .. ولو تكون عقب اسبوع منى عيونيه بس مستحيــل انتي شهر واحتشرتي !!

حموده: انا موافقه بس بشرط ..

خالد: امره موافق على كل شروطج ..

حموده: ماباك ترمسنيه ولا تشووفنيه طول هالشهــر .. !!

خالد: حــراام عليـج !!

حموده: غير جذيه ماشي ..

تنهد خلاف قال: انشالله أوامـر ثانيه ؟؟

قلت بصوت واطي: زعلت ؟

خالد: آآآآخ فديت رووحج لا والله ماروم أزعل منج ..

حموده: هيه عيل برايـك لازم أبند الحين .. مع السلامه ..

سكت خلاف قال : مع السلامه ..

بندت عنه وانا ماودي أبند .. بس لازم أثــقل شوي .. غيّرت أسمه فالتيــلفون .. كنت حاطتنه "خالد" .. بس الحين بما اني بكون حرمته عقب شهر وعشان خاطر هالاحساس اللي أحسه فـ قلبيـه .. بغيّر الاسم وبخليـه "نظر عيني" ..

شليت التيلفون فيايه ونزلت تحت .. حصلت ريموه وسلامه يالسات فالحوش .. يلست عندهن ..

سلامه: شحالج العرووس ؟

حموده: بخيــر ربي يعافيـج .. الا انتي ماودج تعرسين الشيخه ؟؟

الريم: تقولج هاي تبا واحد يقولها ني حبش وني عيَبش وني موت فيش ..

حموده: لا يكون مطيحتلها واحد من عوامـر زاخـر ؟؟ تراهم يرانّا هاه قولي اعترفي ..

سلامه: ويلي على سهيــل أسمــيه غرمبيـه غراام ..

الريم: ع فكره هذا ولد يراننا تراه .. بلكونته مجابله بلكونتــها بس من بعيد عاد .. وتقول كمن مره شافته وهو يالس عالبلكونه وعيبت به ..

حموده: يا عيني على حب البلكونات أسميهن يلعبن دور الصراحه .. نصيحه جان تبينه يحبج يوم تشوفينه ظاهر ويالس فالبلكونه ظهري انتي بعد ويلسي فبلكونتج خليه يشوفج يكون يغرمبج هو بعد !!

سلامه: ظنج ؟

حموده: هيه اذا ما سويتي جذيه مابيدريبج .. بس سوي عمرج ما انتبهتي له ..

الريم: أسميــج انتي سوووووسه تعلمين البنت ع الخراب !!

حموده: خليها بنيمعها ويا فارس احلامها ما سوينا شي .. الا هو كيف شكلـه ؟؟

سلامه: أسمراني وطويـل وشعره لين فوق جتوفه بـ شوي .. مره صادفته بس كنت متغشيـه .. عيونه سود ووساع وهدبهن طويــل .. يا ويــل حااالي ..

حموده: لا البنت رايحه فيها .. شكلها غارت منّا يوم انخطبنا وخاطرها فالعرس هي بعد !

الريم: هيه والله تصدقيـن ..

سلامه: غيــر سهيــل انا مابغـي لو تصفونـهم صـف هالشباب جداميـه ..

الريم: من بغااااج مالت ع هالنعـفه !!

حموده: لا تحبــطين البنت مالت عليــج ..

الريم: اخافها خلاف تاخذه وتندري لنا عامريـه بتم الا ياحــزني و يا حزني ..

حموده: رمســتهم حلوه الصـراحه ..

سلامه: انشهد انج صادقه رمستــهم تذووووّب .. ذاك اليوم سمعت سهيل يرمس فالتيلفون وبغيت اطيح مسلقاايه ..

الكل: ههههههههههههههههه ..

حموده: ترانيه عادي الحين أسير صوبه واقوله سلّوم تحبــك !!

سلامه: فديـت عويـناته ياربي ليــته يحس فيّه ..

حموده: ان سويتي اللي قلتلج اياه بيحس فيـج انتي بس طيعينيه !!

تميـنا نهذرب ونهذرب لين وصلـت الساعه 12 .. من زلت من الـ 12 بشوي شفت سميـره الخدامه يايه صوبـنا وفي ايدها باقة ورد ..

سميره: هازا ورد مشان انتي ..

حموده: منو يابه .؟؟

سميره: بابا كالد يجيب ..

وروحت ..

الريم: أوووه مانروووم نحن ع الحب ..

حموده: هبي قولي ماشالله ..

الريم: ماشالله ..

تميت أشـم الورد اللي كان أحمر وأبيض .. وظهرت الكـرت اللي كان محطوط بين الورد .. كان مكتوب فيــه ..

يــاعيــد قلبي .. صاحبي عيد ميلادك ..
"العمـــركله" لــك .. فرحه وشرحه ..
عساني حي .. وأحضر كـــل أعيادك ..
واهديك وردات الـــغلا فوق صرحه ..
ازداد عمــــرك .. صح!.. لكنه ازدادك ..
في خافقي لك بالـــغلا ألف صفحــــه ..

"كل عام وانتي بخيــر "

"خالد"

ابتسمت ورديت الكرت فالباقه .. رومنــسي هالانسان بشكل فظيـع .. وايه فديته ..

شلت سلامه الكرت وتمت تقرا .. وخلاف شهقت وقالت . .

سلامه: حلفـــي انه عيد ميلادج اليوم ..!!!

حموده: هو من كمن دقيقه بدا .. يعني هو باجر ..

الريم : ليش ماخبرتيـنا ؟؟

حموده: انا اروحيه نسيــت ..

سلامه: بس والله انه رومنسي هالخالد وانا اللي كنت اتحراه وحــش !!

حموده: احم احم ..

سلامه: ياربي متى سهيل بيسويليه جذيه ؟؟

الريم: خليه يدري عنج انتي أول شي !!

سلامه: أفففف انتي ليش تكسرين مياديفيه .. ؟؟

حموده: ماحيدنا راكبين في سفيـنه نحن الحين .. ولا أحيدج من هل البحـر عشان تكسّر مياديفج !! دوريلــج تعبير بدوي مره ثانيـه !!

سلامه: من عيوني الشيـخه حمـده .. بس انتي شو مشكلتج فيا البحر ؟؟

حموده: انا مادااني البحــر .. موتيــه ع العراقيـب البحر ماوراه غير الرطوبـه .. !!

الريم: في هاي صدقتي عاد أكثر شي أكرهه رطوبة البحــر .. ياحلات الهبوب يوم تهب من صوب البـر .. مافيـها رطوبه ياغيـر نسيـم بارد يسلي ع الفواد ..

سلامه: الا قولي لاهوب هب نسيـم بارد ..

حموده: فعيونيه أشوفه نسيم بارد دامنه ياي من صوب البـر .. عفت البـحر عشـت 16 سنه فبوظبي فالرطوبه أصلاً كنت أحس انه انتمائيه بدوي وذيج الاماكن ماتناسبنيـه !!

سلامه: ياويلي ع الانتماء البـدوي أنا .. هب جنج عايشه في أمريكا 6 سنين !!

حموده: ذليتوا عاريه ع هالست سنين خلاص انسوهن امسحوهن من التاريـخ مابا أذكرهن !!

وكملنا سوالفنا الفاضيـه ليـن الساعه 2:30 وخلاف هبطنا داخل وكل وحده صوب حجرتـها .. أما أنا فـ رتبت لي مزهريـه فـ حجرتيـه وحطيت فيها الورد عشان أتصبـح فيه الصبـح .. ورقدت .. اليوم كان أحلى يوم مر عليّه فحياتيه ليـن الحيـن .. الحمدلله ياربـي ..

&* الجــزء التــاســع عشـــر *&

بالبــاجــر وعيـت على صوت دق قوي ع الباب زغت وقمت افج بسررعه .. طلعت ريموه فويهيه ..

الريـم : مصيـــــبه يا حمموووده مصيـبه ..

قلتلها وانا زايغه : شووه شوو مستوي ؟؟!!

الريـم : الملجه عقب شهر وحفلة الخطوبه عقب اسبووع بتخبل انا بتخبــل ..

حموده : كل هالحشره على هذا ؟؟ انا قلت قامت القيامه وانا مادري !! زيغتينيه حسبي الله عليـــــج ..!!

الريم: يابرووودج مافكرتي نحن شقايل بنتزهب للحفله فهالاسبوع .. ؟؟

حموده: ريــلاكس تايكت ايزي .. بنسيـر دبي بناخذ قشارنـا وبنرد .. بــس هدي اعصاابــج .. دونت بي سكــيرد ..

الريم: أسميــه صدق دمج بااارد !!

حموده: ربي خلقنيه جذيه شسوي عاد !!

الريـم: انزيـن متى بنسيــر ؟؟

حموده: متى تبيـن ؟

الريم: الحيـن ..

حموده: انشالله بس لازم نتم كمن يوم هناك يعني لازم نشل ويانا محرم ع قولتـهم ..

الريم: مابتلقين أحسن عن عمووه ..

حموده: absolutely .. يالله سيري خبري عموه انا بصحصح عقب هالزيغه اللي زيغتيني اياها ..

الريم: ههههه سوري والله سوري ..

حموده: خلاص بلا سوري بلا مصري سيري رمسي عموه وانا يايتنكم عقب شوي ..

الريم: انزيـن ..

وظهرت عني ريمووه وانا سيده سرت أتسبــح .. وخلاف نزلت صوبــهم تحت وسلمت ع الكل ويلست عدال ريمووه اللي كان شكلها متوتره ..

حموده: لا حول شو مستوي بعد ؟؟

الريم: عموه مادلهـا وين طاسّـه لين الحين ماهضلــت ..

حموده: أيــه عيــب هاي عمتــج !!

الريم: يوووه انا في وادي وانتي في وادي !! والله أحس هالخطوبه بتكون مصيــبه !!

حموده: انزيـن انتي ليش ماكله قرصـج ني ؟؟ هدي أعصابــج عنبوو فلفــــل !! ماجذبت سلّوم يوم قالت انه دمج حاار !! ..

فهاللحظه هبطت عموه البيـت .. فضخت النقاب عن ويهها ويلست عدالنـا ..

عليا: هاه شفيـكن كل وحده فيكن منتفخه أكثر عن الثانيـه عن تنقعن عليـنا بـس !!

حموده: هاي ريمووه مادري شو فيـها معصصبه انه الخطوبه الاسبوع الياي ..

الريم: انزين خبرينيه شقايل بنتزهب ؟؟

عليا: أفا لاتحاتن وعمتكن فياكــن ..

الريم: بس الحفله بتكون عوده ووووو ....

قاطعتها عموه: ماعليـج انتي بس هدي اعصابـج .. انتن عزمن اللي تبن تعزمه وخلن الباقي عليّه ..

حموده: بسيــر أعــزم ميّووووه ..

وقمت من مكانيـه بسررعه بما اني نسيت التيلفون فحجرتيه .. يلست ع الكرسي اللي عدال البلكونه ودقيت حق ميّووه ..

حموده: ألوووه ..

مي: يا مرحبا يا ناعم الصوت والعود ..

حموده: أحيا بصوتـك يوم هاتفـك ياني .. يابو عيونن مدعجه والهدب سود .. لاحظ عيانك بالمحبه رمانــي ..

مي: ماشالله تغنيــن من ع القايــله !! شسالفه ؟؟

حموده: انتي واهلــج معزوومين اليمعه الياي على حفلة خطوبتنا انا والريــم ..

مي: الاسبوع الياي ؟؟ مســـرع !!

حموده: هاي شروط الاخ عنتر بن شداد ..

مي:هههههههههههههههههههههههههههههههههه .. ماحصلتي غير عنتــر !!

حموده: هذا اللي يا في باليه الحيـن .. الا اقولــج تذكرت حد واباج تعزميـنه ..

مي: منو ؟؟

حموده: تحيدين ظبيوه وحصيــص ؟؟

مي: أوووووه عوااانــس الوثــبه !!

حموده: شو بعدهن ماعرسـن ؟؟ هاذيلا مب فالحات في شي فالدنيا ؟؟ اللهم لاشماته ..

مي: تفااقدن بهنتيـاهن .. فيــهن لقافه مب طبيعيه ..

حموده: حراام عليــج واللهن على نياتهن ..

مي: اسميــهن مغرّرررم .. ماتحيدين فالمدرسه .. بالله عليـج شي وحده عمرها 19 سنه في صف ثاني اعدادي ؟؟

حموده: عاد أهلهن ماهبطوهن المدرسه فـ وقتهن !!

مي: بس اشتقت لأيام الشله من روحتي عنا ماتم شي على حاله !!

حموده: كنا شله سبشل الصراحه !! وتحيدين ذيج اليمنيـه صفاء ؟؟ هاذيج كانت اروحها تحفه !! ترومين تعزيمـنها هي بعد ؟؟

مي: لا أبشــرج ردت اليمن !!

حموده: وحليـــلها بيحطون "البازووكه" في راســها وبينقعون فيــها ..!!!

مي:ههههههههههههههههههههههههههههههههههههههههههههههه هههههههههههه .. لا انتي اليوم مب طبيعيه !! أسميـه تأثير هالطويل فيج غير شكل !!

حموده: البارحه الساعه 12 طرش ليه باقة ورد ..

وقريت لها شو مكتوب فالكرت ..

مي: ياحافــظ مانرووم نحن .. هيه صح كل عام وانتي بخيــر ..

حموده: تو النااس !!

مي: شسوي نسيــت .. مايسدج اني انا اللي ذكرتج في عيد ميلادج وانتي ناسيتنه ؟؟

حموده: يسد علني فدااج مامنج قصور بنت سعيــد .. بس لاتنسـين تعزميـن ظبيوه وحصيص نبا نتخبل شوي ونتذكر أيام زمان ..

مي: افا عليـج خلاص تم ..

حموده: بس انتي ترومين ع الدرب ؟؟ أخاف عليـج و ع سميتيه !!

مي: لاتخافيـن علينا قوّيات انا وبنتيـه ..

حموده: فديـتكن والله ..

فهاللحظه سمعت حد يدق ع الباب ..

حموده: أقوول ميّوه أنا لازم أبند سلمــي ع اللي عندج وخصي لي بالسـلام امج فديت روحها ..

مي: يبلغ انشالله .. مع السلامه ..

حموده: مع السلامه ..

بندت عن مي وسرت أفـج الباب .. كانت سلّوم .. متشققه ومستااااانســه .. بندت الباب وراها وقالت ..

سلامه: شفــته شفــته !!

حموده: محبوبج العامري ؟!

سلامه: هيــه ..

حموده: شافـج ؟؟

سلامه: ما تجرأت !!

حموده: يالعنـز لين متى بتميـن جذيـه تشجعي والله ان تميتي جذيه طول عمره مابيدري عنج !!

سلامه: هو الحين ع البلكونه ..

حموده: صدق ؟؟ يالله عيــل !!

ماواحيت لها سحبتها من أيـدها وسرنا صوب حجرتها .. تميت أوايق من البلـكونه بس بدون ما أظهر .. كان يالس ويرمـس فالتيلـفون ..

حموده: ظني الا يغازل !!

سلامه: لادخيــلج لا تحطميــن فواديــه ..

حموده: انزين ظهري انتي ..!!

سلامه: شقايل ؟؟

حموده: اممم لحظه بفكــر .. هيه.. بكل هدووء شلي لابتوبج ويلسي ع الكرسي اللي فالبلكونه !!

سلامه: انزين ..

شلت لابتوبها ويلست ع الكرسي ووطت اللابتوب ع الطاوله وانا اطالعها من داخـل .. كانت صدق مسويه عمرها مندمجه فاللابتوب .. وخلاف انتبهت انا انه بند عن اللي كان يرمسه فالتيلفون والتفت صوب بلكونتنا .. اما سلامه كانت صاده عنه ماكان يشوف الا نص ويهها .. تم واايد يطااالع صوبـها وماكان بيخوز .. فـ انا قررت انهي الموقف وزقرت سلامه ..

حموده: سلّوم هبـطي الله يبحصج الريال بياكلج بعيوونه ..

شلّت سلامه لابتوبها بسررعه وهبطت داخل ..

حموده: خلاص الحيـن استوا اللي تبغيـنه .. الباقي بنخليـه للصدفه .. يسد اني كسبت فيـكم اثم اليوم !!

سلامه: انا مب مصدقــه !!

حموده: بظهر عنج عشان تصدقيــن !!

وظهرت عنها وأذن الظهـر .. ومن عقب الصلاه يا الغدا وخلاف والتهيت بـ سوالف يدوه لين اذان العصــر .. وتستمــر الحيااااه ..

بالباجــر ويّهنا انا وعموه وريموه سلّوم وفطوم صوب دبي .. تميــنا أربــع أيــام من مول لين مول وما خليـنا بقعه ..

اليوم اليوم الرابـع لـنا في دبي .. تونا رادين من "فستيفال " أو فسفيتل على قولة سلّوم .. عقب مالفينا على سوق التنين قبله عشان أونها فطّوم تبانا تختار عشان جناحنا انا وخالد وجناح علي وريموه .. بس ماظهرنا بـ شي واايد .. بس اكسسوارات وابجوارات !! نحن الحيـن في دبي مول وجهتنا الاخيــره قبل لانرد باجــر .. كنا قد خذنا لنا فساتيـن وكــل مايتبعهن من خربطااان .. وزهبنا عمارنا في واحد من الصالونات اللي استصعبت اسمه .. كنت أبا أسير صالون "جويــل" هاللي يظهرون عنه فالبرنامـج .. بس طبعاً محد خلانيــه !! حجزنا لنا وحده من هالصالون عشان تي تعدلـنا فالعيـن يوم الحفله بما انه حفلة الخطوبه في عايلتنا يسوونها عوده على عكس الملجه !!

رديـنا العيـن عقب المراكـض فالمولات طول 4 أيــام .. تبون تعرفـون إحساسيــه ؟؟ أحــس انه الدنيا ردت تضحك ليـه .. أحـس بسعادة و فرحة تفوق هالكون كـله هب لأني بعرس ومستقطعه ع العرس .. لا .. لأني أخيراً حسيت بالامان والاستقرار .. الحين أحـس انه عندي حياه ألتزم بـها .. مب ضايعه من مكان لين مكان .. ومب عارفه وين داريه ووين أهليه .. عرفت أني ماحبيت حمد الله يرحمه لـ شي فيـه .. بس لأنه حسسنيـه بالامـان واني محبوبه وفي حد يهتم فيّه .. والحيـن بما انه الكل يحسسنيه بهالشي ماعدت أذكر اني أصلاً حبيته في يوم من الايام !!

اما خالد هذا سالفه ثانيـه .. يمكن يكون هو هذا اللي حبيـته صدق .. لأني مشتاقتلــه .. مشتاقه حق صوته "الخشن" و "الحنون" .. حق ابتسامته اللي كانت أكرهها .. حق "طوله" اللي أحس مرات انه يحميـنيه .. حق عناده .. وطيبته .. وريحة عطــره .. حق روحه الحلوه وقلبه الصافي .. حق جده ومزحه .. حق رومانسيته .. وأهـم شي حق عصبيته ! .. بصبـر وبتحمل هالشــهر لأنـي انا اللي طلبـت هالشي ولازم ألتزم به مهما يكون !

.
.
.

اليـــوم "اليمـعه" .. اليــوم الموعووود .. من أصبحنـا والبيـت كلــه مرتبــش .. من أذن الظهـر والمزيـنه عندنا من تخلـص من وحده تبدا فالثـانيه .. على ما أذن المغرب الا نحن مخلصيـن .. انا كنت لابسه فستان تركواز .. والريم فستانها عنّابي .. وسلامه فستانها ذهبـي .. وفطوم فستانها عيناوي .. انا كنت فاجه شعريه وفرحانه فيـه أما الباقيات كلهن رافعات شعورهن .. تمينا يالسيـن فحجرة سلامه بما انها أوسـع حجره فالبيـت وأقرب وحده للسلـم ..

الحيـن الساعه 7:15 المغرب .. فهاللحظـه اندق الباب .. قمت أفـج ..

حموده: ظبيووووه .. حصيــــــــــــــــــــــص !!

ولويـت عليــهن ..

ظبيـه: لو اني مب متجحله جان فركت عيونيـه .. انتي متأكده انج حمووده ؟؟

حموده: هيه عيل شرايج انتي ؟؟ المهم شحاااالكــن ؟؟

حصه:الحمدلله طايحات في جبود عمارنا ..

حمووده: لهالدرجه ؟ ماعليه بييكن النصيـب انشالله .. الا ميّوه ويـنها ؟؟

ظبيـه: فالدرب لنه نحن ظهرنا قبلـها ..

حموده: هيه عيل قربــن داخـل ..

حصه: شو اتحسبينا بنترياج ؟ أسمينا الا بنقرب ..

وهبطـن داخل وسلمن ع ريموه وفطوم وسلّوم .. وخلاف يت مي واكتملت اليلـسه و ين ربايع ريموه بعد وبنات خالها وبنات خالتها وانترس المكان .. وايقت ع الحوش من البلكونه .. كانوا مسويين بوفيـه طويل عريض والطاولات ترس الحووش .. هذا حق الحريم طبعاً .. أما الرياييل مسويين بينهم وبين مكان الحريم حاجز عشان جذيه مارمت أشوف شقايل المكان عندهم ..

خـلاف ع الساعه 9 .. زفّونـا تحــت عند الحريـم .. تميت أقرا على عمريه يوم شفت عيون الحريم والعيايز معلّقه فيّه .. يلسـنا ع الكراسي اللي كانت محطوطه حقـنا .. اشتغلت الاغاني وبما انه كان عندنا "منقود" بالقوو انه البنات يرقصـن فالبنات اكتفن بحركات بسيطه وهن يالسات مكانهن .. عقب ساعه بدن الحريـم يظهرن من عندنا ويتوجهن صوب البوفيـه أو يسيرن بيوتهن ..

بعد نص ساعه الكل روّح وما تم حد غريـب .. ظهرنا انا وريموه صوب البوفيـه وغرفـنا أكــل ويلسنا ع وحده من الطاولات فالحوش بـ فساتينا وبكامل كشـختنا .. ونحن يالسيـن ناكــل سمعنا ضحكه "رجوليـه" قريبه منا .. أول مارفـعنا روسـنا والتفنا .. شفنـا خالد وعلـي ظاهريـن من ورا الحاجز اللي يفصـل الحريم عن الرياييل .. ونحن من قرادة حظـنا كـنا يالسات على أقرب طاوله لـ مكان وقوفـهم .. بما انها كانت الاقرب لنهاية البوفيه ونحن مافينا نمشي واايد !!

كنــا في موقف لانحسـد عليـه .. هم واقفين جدامنا ومبحلقين فينا وانا وريموه يالسات نطالع بعض مب عارفات وين نصد بويوهنـا .. خلاف قررنا انه "الشرده نص المرجله" .. وقمنا بسررعه وهبطنا داخــل ونحن فاطسات من الضحك على عمارنــا .. خبرنا سلّوم وفطوم ..

فطوم: ههههههههههههههههههههههههههههههههههههههههههه بذمــتكن هاللي سويـتنه ؟؟

الريم: عيل شو تبنا نيـلـس جدامـهم جذيــه يــــــــــــــــــــالله بالســتر !!

سلامه: الصــراحه الموقـف تووحفــــــــــــه .. !!!

حموده: أقوولكم انا ريليه ورمت من هالكعب .. بسيـر أبدل ثيابيـه وبنخمـد .. تصبحوون على خيــر ..

ورقيت عنهن فووق وسيده ع حجرتيه .. تسبحت ولبست بجامتيـه ورقــدت .. بس وعّانيه مسـج .. طالعت الساعه كانت 2:30 .. منو هاللي ماعنده سالفه .. كان خالد .. آم سوري هذا الوحيد اللي عنده سالفه من بد الخلق .. المهم فجيت المسـج ..

"أسميـج بتحرمينيه النوم الليله .. بتم أهويس بـج .. تصدقين كلما تغمض عينيه أشووفج وانتي يالسه جداميـه .. شكلـج بتحرميـنيه النوم ليـن اتهنى بشوفج مره ثانيه !"

ابتسمت وفريت التيلفون ع الكمدينه وغمضت عيونيه .. وكملت احلاميه الورديه !!

.
.
. __DEFINE_LIKE_SHARE__

بنوتة من العين · 03-14-2010, 03:29 PM

اتريااااااااااااااااااكم

شو رايكم

سووووووري عالتاخير

منورييييين __DEFINE_LIKE_SHARE__

هيام القلب · 03-14-2010, 04:04 PM

ياااااااااااااااااااااااااااااااي ..

اسمييييييه عذاااااااب هالبارتات ^^

وايد كان فيه اكشن ..

كشخة ..

تريا البارت الياي فديتج |^^

لا تطولين علينا ..

سؤال :- نهاية القصة جريبة ولا لا؟

شووووووووووووووووووووووووكرن __DEFINE_LIKE_SHARE__