صورة فرخ الشياهين اللي طرحها ذراع الذيب هيضت الخليفه اهداء للصقاقير

محروم.كوم · #1 02-03-2010, 12:40 PM

السلام عليكم ورحمة الله وبركاته
اهديكم هذا الموضوع اللي وجدته في خيمة القصايد المكشاتيه
واعتذر من الشاعر يوسف الخليفه لنقل القصيده
وهذي صورة فرخ الشيهانه اللي طرحه ذراع الذيب
والله يرزقه بالنادر

الطير والصقار واسهـول الاقفـار
والعافيه معهـا الـدلال المباهيـر
تسوا قناطير الذهب داخـل الـدار
حتى ولو تبر الذهـب بالمقاصيـر
يا ناقل الطير الوحش راعي الكـار
تطريك بالبيـدا طـوال الحناجيـر
يروون من فعلك على كل مشـوار
اليا جنيت غذاك باقصى المشاويـر
ممشاك من دارك اليا روس الاوكار
اللي بها العنقـور دونـه معاسيـر
ما همك لفوح السمايـم بالاسفـار
ولا همك البـرد الشديـد بعثاميـر
جبينك استملس على ثايـر النـار
دخانهـا عنـدك نسيـم النواويـر
اليا مشيت بخاليه مـا بهـا القـار
ما حولك الا الذيب فـوق العناقيـر
جتها الهماليل الضحى ما بها غبار
ما غير عودان الطـلاح المكاسيـر
تدير باللايذ هوادي علـى اوجـار
فيه الرماد سـواة منثالـن بكيـر
عليه رسلانن بهـا البـن وابهـار
وابريق شاهي مستطيبـن بتخديـر
وتلقى المواطي للحبارى بالاوعـار
يبرا لها الخرب بعـزاز المشاجيـر
واتلوبد بعرفج نبت بين الاحجـار
والاخر برمث الدعـوب المقاطيـر
والطير يكفخ يلوي الخيـط محتـار
واقصيت له خرب الدعوب المزاهير
وارخى سبوقه وانتهض يمه وطار
ودلا يمومي فوق الاشجار ويطيـر
ويكوبر الخرب بمقاديـم الاخطـار
هيهات يابرق ريش جتك المثابيـر
جاك العديم اللـي للارقـاب مـزّار
تقول باكفوفه صلـوف السواطيـر
هفا عليه من السمـا تقـل جـزّار
والخرب صار سواة بعض العصافير
ما فاده التمريش وانحاس محتـار
ودلا ينوشه بالكفـوف الشواطيـر
قضى عليه سواة من يطلب الثـار
وامسى ثبير القاع ما له دواغيـر
هذي حلاة الصيـد والوقـت دوّار
واختلفت رسوم المقانيص بالطيـر
ما من شرايـد والكراويـن نـدّار
والطير ما له غير سمانه عصيـر
يا ليت يومن طاف يرجع لو امتـار
فيه الصحاري بالمواسم بها الخيـر
نشوف قرناس البحر فوق الاشجار
يحوم ويهفي ما يشوف المداهيـر
__DEFINE_LIKE_SHARE__

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري