இஇ يـــــــــــــــــــــــــــا عذابــــــــــــــــــــــــــــــــــــي இஇ - الصفحة 110

{,.בرايّـر.,» · 11-03-2008, 09:52 PM

..
.. في السيارة..
حارب للحينة ساكت.. وسارة زايغة ما تعرف شو ناطرنها..؟؟؟؟ على أساس يوديها بيت أمها بس كيف بتقوله وهو شكله معصب منها ؟؟؟
وبعد ما طاف بيتهم.. سارة ما رامت تسكت أكثر.. كانت ولهانة حق أمها وخاطرها تشوفها عسب جذه تجرأت ورمست...
سارة: أبي أسير بيت أبويه
حارب مركز عالطريج.... ومارد عليها
سارة: ودني بيت أبويه..
حارب طالعها بنظرات عقبها صد عنها: هب ماخذنج
سارة: شــــــو؟ ليش إن شاء الله؟؟ أنا ولهانة حق أمي.. صار لي فترة هب شايفتنها..
حارب وبنبرة حادة: قلت لج لأ يعني لأ
سارة ما رامت ترد عليه.. حست أن الشرار كان بيظهر من عيونه.. عسب جذه زاغت.. وامتزرن عيونها بالدموع
شوي ورن موبايل سارة.. كانت أمها المتصلة.. طبعا سارة قاعدة تصيح ومستحيل ترد على أمها في هاللحظة.. عسب جذه أغلقت موبايلها..
أم سهيل زاغت على بنتها وقامت ودقت لحارب..
حارب وهو يرد: هلا.. هلا عمتي
أم سهيل: هلا يما حارب.. شحالك؟
حارب: بخير..يعلج الخير
أم سهيل: أقول يما.. سارة وينها؟؟ أدق عليها ما ترد عليه
حارب صد صوب سارة ولقى عيونها ممتزرات دموع فما حب أنه يضغط عليها زيادة.. فاضطر أنه يجذب على عمته
حارب: هي سارة راقدة.. وأنا كنت في الصالة سمعت الموبايل يرن وأغلقته الموبايل عسب ما يزعجها.. السموحة عموه ما شفت رقمج
انقهرت سارة منه.. طالعته بنظرات.. كان ودها تير الموبايل من عنده وتقعد تكفخه.. جـــــــــــــــــــــــــــذاب
أم سهيل: لا ما عليك يما..ياحليلها بنيتي.. بس هي قالت لي أنها بتييني اليوم؟
حارب: والله ما ادري عنها.. يوم بتنش.. بخبرها
أم سهيل: على خير يما.. دير بالك على نفسك
حارب: إن شاء الله... سلمي سلمي
أم سهيل: يبلغ إن شاء الله.. مع السلامة
وسكرت عنه
.................................................. ....
أول ما وصلوا الفيلا
نزلت سارة من السيارة وحارب كان بمنعها بس ما رام لأنه كان مشغول يرمس في التلفون.. عسب جذه استغلت سارة الفرصة وعلى طول ربعت صوب جناحهم ودموعها شلال على خدها..كان ودها تشوف أمها.. بس حارب من زود ما كان معصب منها ما سمح لها..
شوي ويدخل حارب الجناح اللي أول ما خلص المكالمة ربع صوب الجناح والشرار يطاير من عيونه من زود ما كان معصب
أول ما شاف حارب سارة اللي كانت توها فاصخة العباة.. ربع صوبها ومسك ذراعها بقو وصرخ بويهها: ممكن تخبريني ليش صكيتي التليفون بويهي؟
سارة ماتت من الزيغة.. تحس أنه عادي يرتكب فيها جريمة ويذبحها..
سارة قعدت تصارخ من زود ما كانت متألمة من رصة ايده على ذراعها: هدني.. هدني
حارب: ردي عليه بالأول
سارة: كيفي.. مابي أرمسك.. عسب جذه صكيته ارتحت الحينة
حارب: لا والله.. تقومين تصكينه في ويهي.. جيه ترمسين أصغر عيالج شو؟
سارة: يا أخي هدني.. هدني.. يالخام
حارب صرخ: جب.. وارمسي عدل
سارة: والله أنا هذا أسلوبي في الكلام.. هب عايبنك.. طلقني.. وشوف لك وحدة تعرف ترمس
حارب: لا والله.. تتحرين على كيفيج شو؟؟
سارة خلاص تحس أنها بتموت وحارب هب حاس أنه ضاغط بكل قوته عليها.. قعدت تصارخ وتضرب على ايده بس حارب ما يحس.. وكان متجاهلنها
سارة وبأعلى صوت عندها: هــــــــــــــــــــدني.. أكرهك والله أكرهك ما أحبك
حارب: جيه الشيخة؟؟؟ في أحد غيري؟ أكيد أنا ما تحبيني.. ما ادري منو هذا اللي ملك قلبج
انصدمت سارة؟؟؟؟؟!!!!! هذا شو قاعد يقول؟؟ حتى أن حارب من زود عصبيته ما عرف ليش قال هالرمسة؟؟
بس سارة ومن زود ما كانت متألمة منه ..صرخت: هي في أحد غيرك.. واحد هب شراتك.. واحد يعرف كيف يتعامل ويا حرمته.. واحد عنده قلب هب شراتك قلبك صخروقعدت تشهق بالصياح
حارب فول من طريقة رمستها وردها .. حس أن الدنيا تدور فيه.. حتى أن رصة ايده خفت على سارة.. اللي حست فيها.. مع أن سارة كانت تجذب عليه..بس ما قدر يمنع نفسه.. وقام وصفعها صفعة من قوتها طاحت سارة ع الأرض
سارة بهتت.. ما رامت تتحرك.. حطت ايدها على خدها.. حست بحرارة خدها من زود قوة الصفعة.. ودموعها لا إراديا قاعدة تنزل شلال على خدها.. حتى حارب نفسه ما عرف شو يقول؟؟ حس أنه غلط ووايد تمادى.. بس سارة قهرته.. وحارب إذا عصب ما يروم يتحكم بأعصابه..
سارة رفعت عيونها وقعدت تطالعه وصارخت: يالحثـــــــــــــــــالة
جرب منها حارب ورفعها من ع الأرض.. كان مثل المينون هب عارف شو اللي قاعد يسويه..
حارب وعيونه في عيونها وبنبرة حادة: منو هو؟
سارة قلبها يدق طبول من زود ما كانت زايغة من حارب.. كانت عيونها فعيونه.. هب عارفة شو تسوي؟؟؟
حارب عصب منها يوم ما ردت عليه.. كان مثل المينون شرات الحيوان المفترس.. جرب منها ودزها بكل قوته صوب اليدار.. سارة في هالوقت حست أنها خلاص منتهية.. حتى أن ظهرها نقع

حارب في هاللحظة صرخ عليها صرخة رجعتها للواقع: ردي عليــــــــــــــــه.. منو هو؟
سارة: هذا منــــــــــــــو؟؟
حارب: حبيبج.. بعد منو؟
سارة: أنت تخبلت..؟؟
حارب: يالحيوانة.. ردي على سؤالي
سارة وكل شوي يزيد صياحها: كنت أقص عليك.. أنت ما تفهم
حارب: لا والله
سارة: الله يخليك لا تعور قلبي خلاص كفاية.. أنا خلاص ما عدت أتحمل.. أفهم يا أخي.. أنت ليش هاوي تعذبني؟؟ ليـــــــــــش؟ أنا شو ذنبي؟؟
بعد ما سمع حارب رمسة سارة.. ابتعد عنها.. وقال فخاطره..الحينة أنا اللي أعذبج وألا أنتي؟؟ بعد ما خليتي قلبي يتعلق بج.. تخبريني انج تحبين غيري.. آااااااااااه آاااااااااااااااااه يا سارة.. والله حرام عليج.. والله حرام..
عقبها ظهر من الحجرة بعد ما ترك سارة التي تحس وكأن ظهرها انجسم لجسمتين..صرخت صرخة ألم وعذاب..حركت ايدها اليمين اللي كان حارب ضاغط عليها بس خانتها.. عقبها حطت ايدها اليسار.. يلست تصيح بصوت عالي.. أول مرة تجوف حارب قاسي ما عنده قلب ولا رحمه..
.................................................. .
حارب في هالوقت كان في الزرعة قاعد يدخن.. والحين هذي السيجارة الرابعة اللي يدخنها.. من زود ما كان معصب وهب حاس بعمره..
وبين ما كان سرحان وصله مسج..

من سألني قلت احبه
ليلي في قربه نهار
انا كل المحبه شفت
في عيونه بإختصار

ومسج ثاني..

جيتني للجرح سبه
فيك جنه فيك نار
العمر والشوق قربه
وكل مافيني اغار

وثالث..

ما أذكر انه قال كذبه
اوتعذر بإعتذار
لي طلبته فز قلبه
طار لي بالشوق طار

ورابع..

كمله بالزين ربه
مالي من حبه خيار
كل مافيني يحبه
كلمتينٍ بإختصار

بعد ما قرى حارب هالمسجات..فكر فيها.. لا إراديا قام ودق عالرقم..
طبعا سعاد كانت هب مصدقة.. معقولة!!!
وأخيرا حارب رد عليه
وعلى طول ردت عليه..
سعاد وبلهفة: هلا .. هلا حبيبي..

ابتسم حارب.. هذي سعاد.. ما تتغير أبد..
حارب: تعتقدين أنه يجوز تزقريني بحبيبج؟
سعاد: حبيبي وقلبي وعمري وعيوني.. و..و..و..و.. وكل شي بحياتي
حارب: وسارة؟
صخت سعاد.. ما عرفت بشو ترد عليه..؟؟؟
حارب: هي نعم سارة.. لا تنسين اني متزوج بها الحينة
سعاد: جذب
حارب وهو عاقد حياته: جذب؟ وشو هو اللي جذب؟
سعاد: أنت ما تحبها..
حارب: لا والله.. ومنو قص عليج؟
سعاد: انزين خل رمستي أنا.. أنتوا من عرستوا كم صار لكم؟ سنة تقريبا.. وللحينة ما عندكم عيال.. شو تفسر هذا؟؟
حارب: ربج ما كتب للحينة
سعاد: لأ يا حارب لأ.. أنت تقص على روحك والا عليه؟ حارب أرجوك انت تحبني.. ليش تتهرب ليش؟ هذا الواقع
حارب: لأ يا سعاد غلطانة أنا ما أحب غير وحدة.. وحدة خلاص صارقلبي ملكها.. وأعتقد انج تعرفين منو أقصد..
قاطعته سعاد اللي امتزرن عيونها دموع بسبة كلامه: ودام أنك ما تحبني..داق عليه شحقه؟ عسب تقولي أنك تحبها..
وسكرت عنه..
تمنت لو أنها ما ردت عليه.. ما كانت تعرف أنه بسمعها هالرمسة اللي غثتها..
أما حارب فظل متلوم ليش دق عليها.؟؟؟ يمكن كانت لحظة ضعف منه ..
الله وأعلم؟؟
.................................................. .
بعيد عن أجواء العنف والكآبة اللي عاشها كل من حارب وسارة وسعاد.. في مكان هادىء ورومانسي.. بعيد عن الناس.. وتحديدا في أحد المطاعم الراقية.. كانوا في اثنين قاعدين ...
ثاني وميسون
طبعا هم للحينة ما عرسوا يعني مجرد مخطوبين.. وفي هاليوم ثاني عازم ميسون ع العشى.. لأنه كان طيلة هالأيام مناوب عنده شغل.. فما كانت عندهم فرصة أنهم يشوفون بعض
كانوا قاعدين على طاولة كلها ورد أحمر.. ومجابلين البحر.. مع أغنية كلاسيكية هادية.. يعني ولا أروع..
ثاني: ولهت عليج
ميسون كانت ميته من المستحى وخاصة أن هذا أول موعد بينهم بعد الخطوبة..
ثاني: ليش ساكتة؟
ميسون: لا... ولا شي
ثاني: انزين ارمسي.. شو بقولون عني؟ مينون يرمس لحاله
ابتسمت ميسون ابتسامة رقيقة ذوبت ثاني
ثاني: شو أخبار الجامعة؟
ميسون: الحمد الله.. كل شي تمام.. أنت قولي .. أخبار الشغل؟
ثاني: آاااه لا تذكريني.. زفت.. وأكره شي عندي نشة الصبح
ميسون: صدقك والله..
ثاني: انتي كم كورس باجي لج؟
ميسون: كورس واحد وببجالي التدريب
ثاني: الله يوفقج إن شاء الله
ميسون وبكل عفوية: ويوفجك حبيبي
ثاني: هـــــــــــــــا؟
ميسون توها تنتبه للكلمة اللي قالتها.. قفطت لأنها ظهرت منها وهي هب قاصدة أصلا..
ثاني: شششو..شو؟ شو قلتي؟
ميسون: أنا؟ ما قلت شي
ثاني: توج قلتي شي.. ابي اسمعه مرة ثانية.. دخيلج
ميسون وهي تبتسم: ما شي قلت الله يوفقك..
ثاني: انزين.. كملي
ميسون: أوهو ثاني.. يعني سمعت شو قلت.. شحقة أعيد؟
ثاني: قلت لج أبي أسمعها مرة ثانية
ميسون جربت منه وهمست: أحــ...بــــ.....ــــك
ثاني جرب منها أكثر حتى أن ميسون استحت وكان ودها تبتعد بس زخها ثاني: وأنا أمــــــــــــــــــــــوت عليج
ميسون ماتت من المستحى وابتعدت بسرعة عنه..
ثاني: فديت اللي يستحون والله
شوي وطلع عقد شكله وايد حلو عبارة عن قلب صغير من اللولو
وقف ثاني وسار صوب ميسون ولبسها العقد..
ميسون وهي تطالع العقد وهي منبهرة: مشكور حياتي..
ثاني بعد ما قعد مكانه رفع ايده يدعي: يالله عساك توفقني وأقدر أسعد هالانسانة اللي ملكت قلبي
فهاللحظة ميسون استغربت من الريال اللي مقبل عليهم ....وكان يسير صوبهم .. كان واضح على ميسون علامات الاستفهام وكانت تطالع ثاني جنها تطلب منه تفسير؟؟؟؟ بس ثاني كان ساكت وما رد عليها..
يا الريال وكان يسحب عربة كبيرة فيها كيكة كبيرة .....من ثلاث طوابق ....شكلها كان وااااايد حلو ويشهي ..
الطابق الاول كان شكله وااااايد حلو وفيها ريال و حرمة ...ويلبسون خواتم ....ومكتوب فيها
(((((ميسون أحبج ...تتزوجيني..؟؟؟؟؟. ))))
ميسون من شافت الكيكة تخبلت ومن زود الفرحة تمت تصيح....
ثاني كان بيطير من الفرحة وفي نفس الوقت خايف من رد ميسون من أنها ما توافق عسب يمكن تبي تكمل الجامعة بالأول.......
ثاني :هاه ميسون.. حلوة المفأجاة ؟؟؟
ميسون واللي تمسح دموعها: فوووووق ما تتصور ....أحلى مفأجاة وهديه تلقيتها في حياتي ...مشكور ثاني ...
ثاني :ميسون...
ميسون:شو ؟؟
ثاني بصوت كله دفئ :أحـــــــــــــــــــــــــبـــــــــــــــــــــ ـــج
ميسون وهي منزله رأسها :حتى أنا أحبك ........
ثاني:هاه شو قلتي؟؟ ...اذا خطبتج راح تتزوجيني أو لا
...........................................

شو تتوقعون رد ميسون..؟؟

و سعاد بتقدر اترجع حارب لها بالمسجات..؟؟

و حارب بيقدر يستحمل ساره اكثر عن جي ولا...؟؟

شو رايكم في البارت..؟؟

( ســامحوني اذا البارت قصير لان عندي امتحانات و مذاكره بس البارت الياي بينزل يوم الاربعاء و اوعدكم انه يكون طويل) __DEFINE_LIKE_SHARE__

‏جرؤح آنسآنـِہَ · 11-03-2008, 10:55 PM

شو تتوقعون رد ميسون..؟؟

امم ماعرف << بس اكيد بتوافق ..

و سعاد بتقدر اترجع حارب لها بالمسجات..؟؟

لا ما ظنتيه ..

و حارب بيقدر يستحمل ساره اكثر عن جي ولا...؟؟

بيستحملها << لانه يحبها ..

شو رايكم في البارت..؟؟

غاوي والله .. بس قصير ..

مسموحه فديتج ..
خذي راحتج ..
نتريج يوم الاربعاء ... __DEFINE_LIKE_SHARE__

» βỊη άℓ đόόŁα « · 11-03-2008, 11:27 PM

يسلمووووو ع القصه __DEFINE_LIKE_SHARE__

فروشة الملاك · 11-04-2008, 07:30 PM

ثاااااااااااااااااااااااااااااااااانكس فديتج

الله يوفقج __DEFINE_LIKE_SHARE__

~~" ما ينحنيـ راسيـ "~~ · 11-05-2008, 08:29 PM

شو تتوقعون رد ميسون..؟؟
اعتقد توافق
و سعاد بتقدر اترجع حارب لها بالمسجات..؟؟
لا ما اعتقد بس يمكن في لحظة ضعف يكلمها
و حارب بيقدر يستحمل ساره اكثر عن جي ولا...؟؟
اذا كان يحبها وايد بيستحمل

شو رايكم في البارت..؟؟
روووووووووووووووووووووووعة ونتريا الياي مشكورة ع البارت __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
இ♥♥♥இ صيفنا حافل بالمفاجآت .. بكل الحب مبروووووووووك يا طلطميس இ♥♥♥இ ‏	محروم.كوم	منتدى أخبار المواقع والمنتديات العربية والأجنبية	0	07-23-2010 08:30 PM
இ♥♥♥இ بكل الحب مبروووووووووك .. متعني و متصرف இ♥♥♥இ ‏	محروم.كوم	منتدى أخبار المواقع والمنتديات العربية والأجنبية	0	07-21-2010 04:30 AM
இ☜♥☞இ مجموعة الحمام المغربي لتببيض البشرة இ☜♥☞இ	محروم.كوم	منتدى أخبار المواقع والمنتديات العربية والأجنبية	0	06-29-2010 12:20 AM
mahmoud இ☜♥☞இ بكل الحب مبرووك இ☜♥☞இ ‏	محروم.كوم	منتدى أخبار المواقع والمنتديات العربية والأجنبية	0	06-03-2010 03:00 AM
இღஇإنـَـقــَـِشَ الَـَقـَـرآنَ فــ صَـدَرَِ طَفِـَـلِكَ இღஇ	Дјறàl Диsǎήһ	الإسلام والشريعة	10	07-07-2009 02:45 AM