مشيت للفرشه قبل يمسي الليل=والبال عاش بنوهتن مستقله
مكانها واضح بليا دواليل=بين العدانه والمليسا محله
مواعد ربوعي قروم الحلاحيل=ما فيهم اللي في مباديه خله
قالوا علينا من المشاتي مقابيل=والخل لابده بغا شوف خله
ما ينفع الصاحب صدود وتماهيل=ترا الرفيق امسا لنا خير طله
واحسافة الدنيا بليا تعاليل=مع الخوي اللي فلا قيل عله

من ينشر اصحابه على القال والقيل=يصير فاهه كنه السيف سله
يذكرهم بكل المجالس بتفصيل=يعرض معايبهم على كل شله
يصير باير في عيون الرجاجيل=حذرا الفتى تاطا سبوته مزله
والمارد اليا صار عدّه شهاليل=حذرا هماج الما بحوضه تزله
واليا ضواك من الرفاقا مزاليل=لا بدها تدمح ولو هي جبله
على الحقايق ما على الهقوه نحيل=ترا الظنون التايهه خطوتله
ما بالتمني تستنيل المحاصيل=واللي يحير بكيل فعله يقله
واليا لجاك شكوك لو هي مقاليل=صارح رفيقك بالخوافي وقله
ترا الصراحه طب الارواح والميل=حلالة عقود المشاكل تحله
ولا يفيد الشور في لوية الذيل=ينعاف نبتن داخل فروث جله
هذي هي العدلات جيلن باثر جيل=والعاقل اللي ياخذ الشور كله