. [ امثـال هـل قطـر ] . - الصفحة 3

™ AlReem · #1 06-26-2008, 04:41 PM

1- اللي مـــا يـطـيع يـــضــيع

يقولون هذا المثل حق اللي مايسمع النصيحه
وبعدين يندم ويقولن له الناس(اللي مايطع يضيع)

2- الحصاة مـا تـــكــسرهـــا إلا أختها

الحصاة يقصدون فيها :القوه: بمعنى القوي مايقدر
إلا على القوي مثله ويقولون له(الحصاة مات**رها الااختها)

3- اللي مــأيـظهرعلى هــله مــبـيـوق

مبيوق معناتها:مخطوف أو مسروق أو شيئا موخوذ
بالحرام: إما كلمة هله مقصود فيها:الأهل أو الأصل: فكل شيء مايطلع على أصله وجنسه يعتبر متطفل اودخيلا ويقولون هذا المثل في الخير والشر إذا كان الأصل طيب مثل إلام والأب إذا كانت ذريتهم طيبه وخيره فيقولون لهم هذا المثل يعبرون فيه عن الامتنان
لكن إذا كان الأصل غير طيب والأبناء نفسهم يقولون هذا المثل تحقير وتشميت فيهم ويقولون(اللي مايظهر على هله مبيوق)

4- الــنــاس أجـنــاس

الأجناس:جمع جنس: ومعروف في أجناس طيبه
وفي اجناس خبيثه وبنقال هذا المثل دليلا على طيبة إنسان في شيء عمل فيه أو ينقال دليل للإنسان الخبيث على شيء بعد عمل فيه ويقولون(الناس أجناس)

5- الــزيــن مــا يــكمــل

الزين:هو الشيء الحلو الغاوي أو الجميل: واللي نعرفه ان الحلو مايكتمل والكامل الله ويقولون هذا المثل إذا تتحسن الظروف للانسان بدون ماتكتمل أو تشوف إنسان حلو وجميل في شكله ولكنه خبيث في طبعه ويقولون(الزين مايكمل)

6- الــزيــن غــالــي

الزين: هو الشيء الحلو القوي المتين المصنوع بجوده عاليه اللي يجذب الناس:والمعروف ان الزين غالي يعنى سعره غالي ومثل إذا راح واحد يتقدم حق وحده ويطلبون مهر وأيد فيقولون للمعرس(الزين غالي)

7- الخـــال خــلي والــعم ولـــي

الخال:هواخو إلام: والعم:هو اخو الأب :والمعروف ان الخال دايما في المرتبة الثانية بعد العم طبعا وأكيد هو مايقدر يفرض راية على عائلة أخته وبماانه الأب هو الأمر الناهي في البيت فأخوه يكون مكانه في غيابه ويكون مثل الوصي أو الولي على عائلة أخوه ومثل ماقالو(الخال خلي والعم ولي)

8- الــعنــز مـا تـــشــوف ذيـــلهــا

هذا المثل ينقال للانسان اللي مايشوف عيوبه ولايصدق فيها ولكنه يشوف عيوب الناس ولايكتمها وهو كالعنز أو الحيوان كرمكم الله اللي مايشوف ذيله أو خلفه وصدق من قال(العنز ماتشوف ذيلها)

9-أيـــقــط خــيــط وخــيـــط

ينقال هذا المثل للانسان اللي مب في وعيه ومعنى يقط خيط وخيط يعنى يقول كلام مو مرتب مثل السكران بضبط ويقولون(يقط خيط وخيط)

10-أقـــول لـه تـــيـــس يــقــول أحـــلــبــه

التيس: هو من ذكور الحيوانات والمعروف إنا الذكور ماتحلب وينقال هذا المثل للانسان اللي يطالع الشيء بنظره غلط يعنى يشوف الخير شر والشرخير وإذا نصحته ماياخذ بالنصيحة وإذا قتله(تيس يقول احلبه)

11- إذا طــريــت الــكــلب بــرز الــعــصــا

طريت: يعنى ذكرت:وبرز:تعنى جهزا لعصا: لان الكلب كرمكم الله يخاف من العصا وينقال هذا المثل إذا ذكرت شخص ماتحبه وفي نفس اللحضه دخل عليك تقول له (اذا طريت الكلب برز العصا)

12- الطيــب عــند ذكـــــره

هذا المثل شوي يشابه اللي قبله في المعنى ينقال هذا المثل لما تذكر شخص تحبه وتموت فيه وفي نفس الوقت يدخل عليك تقول له (الطيب عند ذكره)

13- أبــونــا في الــبــــيــت ولحــيــته في الــســكــه

ينقال هذا المثل على الإنسان اللي يهمل بيته واهله ويروح بخيره وفلوسه على الغريب والسكه:هي الشارع الضيق الفاصل بين البيوت ويعنى ان أفلوس أبونا اوحنانه وعطفه أو حبه مب لنا لغيرنا فيقولون(أبونا في البيت ولحيته في السكة)

14- أقـــرب مــا لـك عـــقرب مــا لــك

اقرب مالك:تعنى اقرب الناس لك : وعقرب مالك:تعنى العقرب اللي بيلسعك او بيضرك :وينقال هذا المثل لما تصير للانسان مصيبه بسب اغلى واقرب الناس له بدون مايعرف ولما يعرف يقولون له(اقرب مالك عقرب مالك)

15- اللي يســتـحـي يـــلــبــس بــطــولــه

البطوله:هي البرقع او الغشوه اللي تحطه المراءه على وجها:وينقال هذا المثل للانسان اللي يتنازل عن حقوقه ويتركها للناس بحجة انه مايقدر على المواجهة فيكون نفس المراءه اللي تستحي من الرجال ان يشوفون وجها فيقولون له(اللي يستحي يلبس بطوله)

16- الــزيــن زيــن لــوقــعد من الــنــوم

الزين:هو الحلو او الجميل :وينقال هذا المثل على سبيل المجاملة من انسان لانسان سواء كان رجل او امرأه فيقولون له(الزين زين لوقعد من النوم)

17- الــشــيـن شــيـن لـوغــســل عــيــنـه

الشين:بمعنى القبيح والانسان اللي شكله قبيح بتم قبيح حتى لوحط كحل او مكياج او أي شى وصج لقال المثل(الشين شين لوغسل عينه)

18- الكــلـب مــا يـنـبــح إلا عــنــد بــيـت صــاحــبـه

بعض الناس يستخدمون لكلاب كرمكم الله للحراسة في بيوتهم واذا حس الكلب ان في شيء غريب صاير ينبح عشان يعلم أهل البيت بان في شخص غريب وينقال هذا المثل حق الإنسان اللي مايطلع حسه وصوته إلا عند بيته او الناس اللي يفزعون له وينقال له(الكلب ماينبح الاعند بيت صاحبه)

19- اللي يـــرشــنـي بـالــمـأي ارشـــه بــالـــدم

لوانصب الماي على الانسان ماراح يضره او ياذيه بشىء اما الدم فهوشىء فضيع ودايم يكون ناتج من جرح اوضرب قوي اوحرب وينقال هذا المثل لتحدي والقوه من انسان لنسان اومن قبيله الى قبيله وبعد يعنى هذا المثل ان مافي تفاهم اوهدوء او واحد اثنين مثل مايقولون هل الايام بينا يعنى أي اشاره منك تجرحني راح اقوم الار ض عليك يعنى(اللي يرشني بالماي ارشه بالدم)

20- اللي فـي الـقـلــب عـلى الــلــســـان

الصراحه هذا المثل يركب علي لاني وحده اللي في قلبي على لساني يعنى ماعرف اخش شىء وماعندي لف ودوران وماعرف اكذب ولاازور الكلام وابد ابد مااجامل واعتقد ان فهمتو المعنى ومايحتاج افسر اكثر ويقولون(اللي في القلب على اللسان)

21- بــرنــثــى لاهــو ذكــــر ولاهــو انـثـــى

برنثى:معناتها الجنس الثالث: وفي زمان اول كان في ناس شكلهم ريايل من برع بس ولكن حركاتهم حركات حريم فينقال لهم(برنثى لاهو ذكر ولاهو انثى)

22- حــل الــســانـك تــلقــى الــنــاس خــلانـك

حل السانك:بمعنى خل كلامك حلو خفيف يحبون الناس يسمعونه والخل:هو الحبيب او الرفيج:فكل ماكان كلامك حلو كل مازادو احبابك وربعك وخلانك فا(حل السانك تلقى الناس خلانك)

22- لاادخــــل عـــصــك فــي شـىء مـــا أيــخــصك

عاد هاي المثل للملاقيف واكيد انكم سمعتو العباره اللي تقول:من تدخل فيما لايعنيه لقيه مالايرضيه: وينقال هذا المثل للانسان اللي يتدخل في خصوصيات غيره والمعروف والاكيد ان الناس مااتحب حد يتدخل في خصوصياتها حتى لوكان الشخص قريب من القلب واذالاسمح ربي وتدخلت في شؤون غيرك راح تلاقي كلام يزعلك ويجرحك عشان جي قالوا(لاادخل عصك في شىء مايخصك)

23- لااتـــبــــوق ولااتـــــخـــــاف

سبحان الله الحرامي اذا مشى في الشارع يحس ان كل الناس اطالعه فيخاف ويهتز ويبتدي يتلفت يمين ويسار ويسار ويمين وينقال هذا المثل للانسان اللي يخاف يسوي أي شىء حتى لوكان الشىء حلال فيقولون له ليش انت خايف ياخي(لااتبوق لااتخاف)

24- لا اتــكــثـر الــدوس ياخلي ليملوونك لا انت بولدهم ايحبوونك ولا طفل ايدللووونك

الصراحه في ناس ماينعطون وجه ابد واذا عطيتهم مصخوها هذا المثل ينقال للانسان اللي بتسمتله مره يكرر الشىء سبعين الف مره يعنى مايصدق ان انت تقوله حياك الله فينقال له(لااتكثر الدوس ترى الخلان يملونك)

25- لا احــــــــم ولادســـــتــــــور

من باب الاتيكيت انك تستاذن قبل ماتسوي أي شىء حتى اذا بتزور الدكتور لازم تاخذ موعد واذا بتدخل على حد الغرفه تدق الباب لين مايسمح لك بالدخول لكن اذا ماسمع مثل مايقولون اتحنحن او تطلع صوت او تصفق عشان الدرب ولكن في بعض من الناس اللي عندهم فقر في الاداب ومايعرفون الاصول يدرعمون على طول بدون(لااحم ولادستور)

26- ويـن رايـحـه يـاطـنـازه قـالـت رايـحـه اتـطـنز

لطنازه:معناتها الاستهزاء او مثل مايقولون اهل قطر انعيب عليها:وينقال هذا المثل للانسان اللي فيه صفه خايسه وسمعه مب حلوه وفوق كل هذا يتهم انسان احسن منه واشرف منه فيقولون عنه(وين رايحه يطنازه قالت رايحه اتطنز)

27- يــقــشــرهــا عــبــدالله وياكــلهــا ســلـمـان

يقشرها:معناها يشل عنها القشراو يجهزها للاكل:وينقال هذا المثل للانسان اللي يتعب في تجهيز شىء او تصليحه وبعدين يروح الشىء لشخص ثاني بدون مايتعب عليه اما عن عبدالله وسلمان مجرد اسماء توضح المعنى للمثل وصج لقالوا(يقشرها عبدالله وياكلها سلمان)

28- مـــكــســوره واتــبـــرد

في زمان اول كان الناس يبردون الماي في شىء يسمونه[البق] وهوعباره عن غرشه مصنوعه من الفخار يلفون عليها بعض الخيش ويحطونها في الظل لين مايبرد الماي اللي فيها واذا كان هذي البق او الغرشه م**وره فمستحيل انها تبرد الا اذا كانت معجزه وينقال هذا المثل عن الانسان اللي فيه عيب خلقي او اعاقه ولكنه يسوي شىء يمكن يكون منفعه ويمكن يكون مضره ومايقدر يسوها الانسان السليم فيقولون والله حصوه(م**وره واتبرد)

29- لا اتــحــط عـلى خـــشــمــه الــذبــانــه

في ناس لهم اسلوب وطبع غريب وعجيب يعصبون من أي شىء ويبون الامر امرهم والشور شورهم ورافيعن خشومهم فوق وهاي النوع من الناس دايم يقولون لاتحطون الذبان على خشومهم لان الذبانه تعرف طبعهم وعصبيتهم فعشان جي تبتعد عنهم وتتلاشاهم واجدادنا قالو عن هاالاشكال(لااتحط على خشمه الذبانه)

30- لــيــن صـار ريــجــك عــسل لاتــبـلـعـه كـلـه

ريجك:لعابك:يعني اذا كان لعابك عسل لاتبلعه كله عشان ماتختنق وتموت وينقال هذا المثل للانسان اللي تعود على ان يلاقي مساعدات ومعاونات من الناس بدون مايتعب او يبذل مجهود ودايم يبي اكثر فيقولون له(لين صار ريجك عسل لاتبلعه كله)

. [ منقـول ] .

__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
توقيعـ حياتـ قطـر ـي .. ~	C R A Z Y ~	تصاميم الاعضاء	29	02-17-2009 07:59 AM
@،، فنـدق شعبـي فـي قطـر ،،@	سحـر الكـلام..	المواضيع المكرره	2	02-01-2009 07:51 PM
جيتي . . . على البـال يا [ عمـري ] ولـك وحشـه قلت [ أتّصل بك ]	» [ ™S a s a ] ~	هواتف , مسجات , وسائط , برامج , ثيمات , نغمات , بلوتوث	14	08-20-2008 09:59 AM
هــوى البـال .. [جاسم محمد]	• ™ мαяỉαмч «\|	كلمات الاغاني	28	07-09-2008 07:15 PM
. [ بـدو قطـر 1959 ] .	™ AlReem	التراث والحضارة	11	06-26-2008 04:49 PM