يا ما حلا اليوكون طير المداهيل=ما زان غيره بالخطوط الطويله
من وارد امريكا بخشمه دواليل=عليه جي ام سي حمرا هطيله
طبلونه اللي فيه ستة زنابيل=على المكينه والتوابع دليله
بالاكترون خطاه لاجل التخاليل=يديره الحاسب كثير وقليله
اليا مشى النيزك تقابس به الذيل=واليا ارتخى بالسيد يدوي صهيله
بساتمه ذيك الثمان المقابيل=يمين الاربع واربع اخرى قبيله
اليا تنازت يرفع المقدم الحيل=واليا استوا بالقاع ما فيه حيله
ما حاص دون الطين لو رده النيل=يمضي لجاه العوق ما يستحيله
شيخ المواتر في بيوت القناصيل=حتى للانتر بول صار الوسيله
ما عافه الباخص اليا قيل ما قيل=ولا خبرنا بالمواتر بديله
في داخل البودي على حالك الليل=تلالا بالنيره سواة المخيله
تقول بالطبلون عشرة قناديل=والا كما نجم الثريا شعيله
موتر ذيابه ما يبي زود تحليل=واللي بغا التوكيد يلقى الصميله
يمشي على عرق الدسم دون تمهيل=باقصى الطعوس الحمر ثاير شليله
على الخفيف يروس طعس المهاييل=يشمر على سيف النفود ونثيله
فيه الشراسه لابتدا العج والسيل=يرسي مع الارياح ما ينثني له
ياخذ مجاله في دروب العراقيل=بالاربع الوجهات يرسم سبيله