乂آآه يا ويـــله .. قلــــبٍ صويــبٍ بانــت أقداره乂

عليا · 01-06-2008, 03:43 PM

(الجزء 21)

• وداد : هيييه ..شو اتحريى؟ أصلا امك ما تباني !! بس من متى وهي تمدح فهندوه السبالة !!

(ويقوم ويصفعها هذيجي الصفعة اللي عجتها عالارض كأنه افترت رقبتها ..)

• مانع : جلبة وحدة !! برع ظهري لابركتن فيج ..

• وداد : بتندم والله بتيني وانته اتروكع !!

• مانع : اتهبين يالجلبة !!

(وطلعت من الغرفة بدون عباتها وهو من عصبيته ما لاحظ شي .. وروح البيت اما فبيت فاضل ..)

• مي : تدرين يا عيوني ..اختج واعلية عليها غامضتني !!

• شمايل : اتصدقين على قد ما هي انضربت حسيت اانا اللي منضربة !!

• مي : هذي اخت هذي !!

• شمايل : توّج اتدافعين عنها ..

• مي : شمدريني يا عيوني ..شو رايج تباتين عندنا ؟

• شمايل : اليوم؟ لا خليها مرة ثانية !!

• غريبة : وشعنه ما تباتين عندنا هااه؟

• شمايل : لا اخاف اخلي هنوه روحها ..

(بس طبعا السبب الرئيسي بسبت ميود ..)

• غريبة : جيه ياهل هيييه؟ يالله عادة باتي واانا بكلم شموس ..

(وعند العيايز في الموتر )

• ميثاء : ميود بلاك؟

• نشبة : لايكون عاشق له وحدة؟

• مايد : هييه اميه معرس بالسر ماخذ روسية !!

• نشبة وشما منصدمات : ويييييييييييييييه !!

• ميثاء : شو تبابك الروسية يالحافي يالمنتف ..منو بيصرف عالثاني؟

• مايد : هع هع هع كشفتني يدوه !!

• نشبة : اصلا لو دوّر هالعالم دور داير دور ما بيحصل شرات شمايل ..

(ووقف فجأة ..ويصد ورا )

• مايد : هندوه انزلي سوقي ماروم ..

• ميثاء : عيل انا بدور ورا ..

(ونزلت هنود .. وهو ما يقدر يفكر الا بشمايل وهنوه ومنو يلعب براسه ؟؟ الله يهديه ما لقى يعطي غير هنود وهي روحها جايج القهر ضارب اعلاه ..)

(واتدوس عالبترول وكلهم اختضوا هذيجي الخضة وردوا على ورا)

• ميثاء : يالله يالله يالله !!

• شما : عجيتي فؤادنا ..شوي شوي ..

• نشبة : هيّدي .. يالله بسم الله ..

(وازداد غيظها يوم اتذكرت كلمة مشكوورة اللي قالها مانع ..)

• ميثاء : ميود ؟ ما تشوفها !! وقفي عن اتروحينا !! (وهي صاخة )

• مايد: هندوه بلاج؟

• هنود: ما بلاي شي انطم واسكت

(وشوية وبتاكله بعيونها ..كانت بسواقتها محطمة شوماخر يمكن بن سليّم بعد ..والأوادم اللي وياها عايشين رعب الا مايد اللي كان مب مهتم الا مرتاح ..)

• هنود فخاطرها : مشكورة هااااه؟ خايس واحد وحقير والله انك حقير !! الود ودي دايستنك بنعالي !! (وعيونها يغرغرن والجحال سال ..) والله انك هب ريال يالجلب .. وينك يا عواس اتطالع خويّك ونذالته !!

• شما : أشهد أن لا إله الا الله (وتتشاهد الحرمة صدق ) يالله نوصل بالسلامة ..يالله عمري ما طلبتك .. يالله بالعفو والعافية .. (وترفع ايدها وتدّعي ) بسم الله عليةّ !! بسم الله علية وعلى بشكارتي !!

(وميود يطالعهن ويضحك على خبالهن )

• نشبة : لا إله الا الله !! لا اله الا الله !! هيّدي يا امايا الله يهديج ..ميثوه اهزبيها !! (وتضربه ع راسه) وانته بو طبر شعنه ما تقول شي ..

• مايد : آآآخ اميييييييييييييييه !! يعوّر!!

• شما : أبووووووه !! بسم الله عليها هالزهور !! قايلتلها 100 مرة بطلي الليتات عن إيوونا السروق وانا المدحوبة نسيت !!

• ميثاء معصبة : طاعوا المتفيجة توّج اتذكرين ونحن في الطريج؟ الناس في حالة وانتي في حالة !!

(ومن وصلوا ليوا )

• نشبة وهي نازلة بتوّعد : التوبة ثم التوبة ثم التوبة أسير وياكن يالمدحّب !!

(وهم رادين البيت نزل ميود .. وهنود يلست في الموتر لكن تصيح ..وهو واصل عند الباب ..بعدين غيّر رايه وظهر قال بيروح ياخذ له رصيد .. وكانت الساعة 2 )

• مايد : هااااه؟ علومك مجيب؟ هات بطاقة 25 ..هيه وحدة ..(ويوم توة ظاهر يشوف وحدة بعباتها اتوايج من باب بيت شمسة واتبنده .. وموتر موّقف عند بيت شما ..) بس اميه شما محد اييها نصايف الليل شو السالفة؟ (وحس بالصدمة لأنه عرف منوه) هاي محد غيرها هالشملوه .. كنت متأكد !! مسوّدة الويه..(وطلعت من البيت وتمشي شوي شوي عسب محد يلاحظها ويوم توّها بتبطل الباب .. اتحس ب يد ماسكتنها من جتفها ..) واتحرين عمرج بتشردين؟

• هناء متغشية : هاااه؟ (وشرد راع الموتر) الله يخليك لا تفضحني !! الله يخليك (ومسكها من عباتها)

• ميود ويسحبها داخل بيت شمسة : خافي ربج اتخلين اختج الشريفة هنوه وتلوثين سمعتها وتنضرب بسبتج ياللوث؟

• هناء : انا .. انا .. انا .. الله يخليك استر علية !! (وتصيح)

• مايد دخل البيت وبعصبية : خالوه شمسة ..خالوه .. يا خالوه !!

(وبعد 5 دقايق طلعت شمسة بجلابيتها وزايغة منو يزجرها هالحزة ..)

• شمسة : بلاك؟ في شي؟

(وهي توايج صوب الدري ومستعجبة منو هاي اللي وياه ..يمكن طلابة ..)

• مايد: طاعي بنتج اللي اتدافعين عنها ..واللي انضربت هنوه بسبتها !! واقف لها موتر ..وواحد من الرغيد بيشردها ..الله وأعلم كم من مرة طالعة وياه !!ياماحذرتني هنوه منها !! وتبيني بعد آخذها !! (ويتفل عليها ) اتفي عليج من بنت شوارع !!

(ونزلت شمسة مب مصدقة شمايل بنتها حبيبتها هي اللي تسوي جذيه .. اول شي مسكتها وضربتها بالنعال )

• هناء: لا اميه خلاص التوبة !!

• مايد : ضربي وعلميها الادب ام الشباب ..

• شمسة : انا اللي ربيت وعلمت وآخر شي بناتي يطلعن صايعات قوم بو الرياييل؟ جلبة وحدة والله لأراويج .. (وترقعها بالنعال)

• هناء تصيح : التوبة ما عيدها ارحميني !!

(وسارت بتسحبها من شيلتها واتبطلت الغشوة وطاحت هنوه عالارض وانكشف عن ويهها حزتها ميود كأنه صاعقة نزلت عليه ..وشمسة أخسين )

• مايد : هن هن (وبصعوبة) هنوه؟

و جــآن .. Cut !
__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
乂°•..•°乂 جــراجــتي أتـجـرج فونـكم بدون كهـرباء ((مع فيديو للشرح)) 乂°•..•°乂	كوين فاشن	بيع و شراء و عروض التجارية	9	11-27-2012 10:24 AM
乂★乂☆乂(( عروس مسوية الكيكة على شكلهــــــــــــــــــا )) 乂★乂☆乂	♕ وليد الجسمي ♕	فن المطبخ والطبخ	25	08-09-2010 06:13 PM