乂آآه يا ويـــله .. قلــــبٍ صويــبٍ بانــت أقداره乂 - الصفحة 6

عليا · 01-06-2008, 03:47 PM

(الجزء ال 26 )

( اما في استراحة البنات .. مانع يجيس نبضها ..بس هو اللي انتفض من لمسها ..)

• مانع : ابويه ؟ خلنا نتساعد نشلها المستشفى.. حالتها والله انها !!!

• اليد حمد : ولا حد يزخها !!

(قام اليد وشلاها مع انه ما يروم .. لكن عشان محد يزخها ريال غريب .. شلاها واليدة ميثاء تحط ايدها على راسها وتولول من الصدمة )

• ميثاء : واعلية عليج يا بنتي !! راحت بنيتي !!

• مانع : امايا ما فيها الا العافية !!

(وركبوها موتر مال شرطة المكافحة )

• عبيد : سيدي خذت اقوال البنات ..

• مانع: اركب يالله بنوديها المستشفى ..

• عبيد : بس يا سيدي !!

• مانع : بسرعة اركب !!

(ويركبون الموتر وكانت هند على حضن يدها اللي عمره ما ذرف دمعة بس هالمرة من الصدمة ما استحمل وصاح لأنه بنتين من بناته اغتصبن ..وكان ملحف راسها عشان ما تبيّن.)

• اليد حمد : وغلاتج يا غناتي بحصلهم !!

• مانع يتكلم في التيلفون : رقيب عبدالرحمن ..نريد 3 دوريات صوب ليوا في منطقة ................ ..هيه نعم البلاغ عن 3 افراد اغتصبوا بنتين ..ادري انه نحن مكافحة ..بس اكيد السالفة فيها انتقام بسبت الضابط السابق عيسى ..

(وكان يسوق والغصة جايستنه)

• مانع فخاطره : معقولة؟ هنود؟ يالله يا الدنيا !! يابتج لين عندي ؟ (ويطالع في المنظرة النصفانية بس مب مبيّن شي) آآآخ ..بنت بهالجمال... يالله اتخفف على اهلها ..يالله اتخفف من مصيبتهم ..

(ومن وصلوا على طول ودوها العناية المركزة .. ويشوفون واحد مكشش راسه ويالس عالكرسي ومنزل راسه لين ركبه ..)

• اليد حمد : مايد ؟ ( رفع راسه يطالع يده ) شمايل؟ شو حالتها؟ (واليد متصبب من العرق )

• مايد : ما يندرى يابويه !! ان ماتت كله بسبتي (ويغرغرن دموعه ) انا اللي فرطت فيها!!

• مانع : استهدى بالله يا مايد !!

• اليد حمد : جاب !! وفارج !! لك ويه ترمس بعد ؟

• مانع منصدم : انا مقدّر الوضع وسامحني !!!

(ووقف بعيد عنهم .. وكان ينبض قلبه بطريقة غريبة..وبعد ربع ساعة يشوفون 5 حريم يترابعن .. كانن ميثاء وشما ونشبة وشمسة وغريبة..)

• غريبة تصيح : بشرني يابويه .. بنتي !!!

• شمسة : دخيلك يا مايد لا تجذب علية !!

(وكانن يصيحن بالمصيبة اللي حلت عليهم وكل وحدة تدّعي ..وبعد ساعة ..)

• الدكتور : تستاهلون سلامة بنتكم ..

(وكلهم استبشروا خير )

• غريبة وشمسة : من؟

• الدكتور : حرمتك !!

• مايد ردت له الروح والابتسامة : صدق؟ احلف ؟ والله اتحلف !!! (ودموعه ينهمرن لأنه هب مصدق )

• اليد حمد يرفع ايده : يالله .. اللهم مالك الحمد والشكر ..

• غريبة وبهستيرية : وهند؟ بنّيتي ؟

• الدكتور : اي هند؟

• اليد حمد : توّنا مدخلينها !! ( ويأشر ) فهالغرفة !!

• الدكتور : بروح اشوفها .. لحظة لو سمحتوا !!

(وبعد ربع ساعة ظهر )

• غريبة منهارة : ها بشّر ؟

• الدكتور : الحمدلله ما صار الا الخير ..عطيناها شي يهديها ..والدكتورة النسائية من تطلع من غرفة المريضة راح تدخل تكشف عليها ..

• غريبة تصفع عمرها : واعلية !! واعلية !! بنيتي عفدوا عليها !! لا بارك الله فيهم !! الخياس ... الجلاب !!!!

• ميثاء : امايا احمدي ربج !!

• اليد حمد : لا تسوين جذيه يا امايا !!!

• نشبة : اتحمديلها بالسلامة واذكري الله ..

• شما : انا دخلوني وبقرا على راسهن ..

• مايد : دكتور ؟ لو سمحت ممكن شوي؟

(وساروا لغرفة الدكتور ..)

• الدكتور : نعم؟

• مايد : دكتور؟ شو حالة شمايل ؟

• الدكتور : سامحني بس الدكتورة اللي كشفت عليها واتسجلت الواقعة وهي الاغتصاب والصراحة هذيلا مب اوادم ..الله سلمها ..بس الله يعينها يوم بتقوم .. ونحن لازم نخبر الشرطة ..

• مايد ما سمع غير : مغتصبة ؟ (وحط ايده على راسه ) لا حول ولا قوة الا بالله !!

• مايد فخاطره : كنت اتوقع مضروبة !! مسروقة !! لكن اغتصاب؟؟!!

• الدكتور : يالاخو ؟؟؟ احم احم !!

• مايد : هاااه؟؟ وأختيه بعد مغتصبة ؟؟

• الدكتور : بعدها الدكتورة ما كشفت عليها .. لأنه حرمتك كان العنف مبيّن في ينبها .. وفي طر في رقبتها كان بالسجين .. وفأماكن متفرقة فجسمها .. الله يكون فعونكم ..وانا انصحكم بيحتاجون لدكتور نفسي .. وأي طلبات ما يردك غير لسانك ..

(اما فحجرة شمايل ..وبعد ساعة ..يعني عالعصر ..كانوا يلفون راسها بالشيلة)

• شمايل وهي راقدة : لااااا !! هدني !! خايس واحد !!! (وتصيح لين وعت )

• شمسة : بسم الله عليج يابنتي !!!

• ميثاء : عوذ بالله من الشيطان ..اشربي امايا هالماي مقراي فيه ..

• شما : تستاهلين السلامة يا بنيتي !!

• شمايل : امايا؟ انتي هني؟؟

• شمسة تحبها على راسها : هييييه فدييييت ويهج !!! (ويوم توها بتتحرك )

• شمايل تتويع : آآآآي !! امايا !! شو بلاه ينبي؟

• ميثاء : لا تتحركين غناتي ..يعلني افداج !!!

• شمايل : امايا !! (وتصيح بهستيرية ) توّني اتذكرت !! ثلاث رياييل !!! هييييه !!! (وعيونها يغرغرن ) عف !! عفدوا علية !!! ليش ما مت؟ ليتني مت ولا شفت هالشي !!! هذيلا مب اوادم !!! امايا !! سمعتي الحينه في التراب !!! آآآآآآآآآآآآآآآآآآآآآآآآآخ يا امايا !!!

• شمسة تصيح : استهدي بالله ..اذكري الله !!

(ويدخلون سرر حذال شمايل وكانت منصدمة )

• شمايل : هنــــــــــــ ــــــ ... هنود؟ (وصدت يمين ويسار ) هنود صح؟ بلاها؟

• غريبة : واعلية عليها !!! حسبي الله عليهم ونعم الوكيل !!!

• شمايل تصارخ : أرمسكم !!! اقولكم بلاها هنود ؟

(قفزوا مكانهم من صرختها .. مب متعودين عليها جذيه )

• ميثاء : اللي حصل لج حصل لها !!

(وشمايل تصيح بهستيرية ... مب طايعة تسكت .. وقامت ترفس الفراش تبا تطلع من الحجرة )

• شمايل: طلعوني من الحجرة !!! مابا أيلس !! والله بيوني بيعفدون علية !!! انتوا ما اتعرفونهم !! هذيلا مكارين !!! حزتها منو بيدافع عني !!!

(وعجت الآلآت مال قياس القلب ..وتصارخ شرات المينونة ..لين نشت هنود ..مع انهم كانوا يحاولون يهّدونها ..)

• هنود: آآآآآآ

• هنود فخاطرها : شو مستوي؟ (وهي ماتروم اتكلم )

• مايد : شمايل؟

• شمايل : ميود ؟ (وعيونها يغرغرن ) اللي حبيته وحافظت عمري من أي زلة عشانه راح ..ههههههههه شو المهم؟ محد مهم !! صح ميود؟

• مايد : شو تقولين يعلني افدا روحج؟

• شمايل: ههههههه تفدا روحي؟ والله ؟ أحينه؟ لالالالا شكلك مغلط في البنية

(واتقرب منها ويحط ايده على راسها يمسح عليها وتمسك ايده بالقو وتعضه ...)

• مايد معصب : شمااايل !!!

• ميثاء ونشبة : شمايل بس قلنا !!!

• شمايل : كلكم تظهرون برع !! بسرعة !!! (وقامت وهي يرحها بعده ما برى ) بسرعة برع !!! (وقامت اتدزهم واتدفّر العيايز ..)

• شمسة : يا اميه لا مب جذيه !!

• شمايل : برع ما بشوف حد !! (وما استراحت لين طلعتهم كلهم وقفلت الباب ) هذي هي خياس الدنيا !! همهم جسم الحرمة !! ترا الاغتصاب ما يعرف لا بنية ولا ياهل !! (وتيلس عند الباب تصيح )

• مايد يدق الباب : يا شمايل فجي الباب ولا بكسره !! (وكان الدق عالي لدرجة اتحسه بين ضلوعها لأنه يهتز جسمها من الدق عالباب ..وهنود اتطالعها وزايغة لأنه شمايل طول عمرها هادية وما بتسوي شي مثل هذا )

• شمايل تصارخ : اكسره !! وبتشوفني منتحرة !! شو تبا فية؟ انا مب شمايل اللي تعرفها !! انا وحدة سمعتها في الطين ... تسمعني في الطين !!

(وهنود اتطالعها وتنتفض .. اما مانع كان صوب المصعد يتكلم في التيلفون )

• مانع: ها امايا؟

• ام مانع: بتتأخر ابويه؟

• مانع : اميه استوت مشكلة عودة ..

• ام مانع : خير ان شاء الله ...

• مانع : بنت فاضل وبنت محمد عفدوا عليهم .. وأحينه منّومات في المستشفى ..

• ام مانع منصدمة : شو تقول؟

(وكانت حذالها وداد اللي بججت عيونها وشغلت الرادار )

• وداد: شو مستوي؟

• ام مانع اتكلم شوي شوي : لاماشي ... (وقامت سارت غرفتها ) مانع !! اتحمّل اتخبر حرمتك !! والله انها بتتجهز حق الشماتة !!

• مانع: امايا حرام عليج .. وداد جذيه؟

• ام مانع: وهم انزين في أي مستشفى؟

• مانع : مستشفى ............

• ام مانع : انا احينه بييي ..

• مانع: شو تين مالج حاية !! بيروغونج !!

• ام مانع: لو يروغوني بعصا .. نحن اللي سويناه فبنتهم شي مب هيّن .. ولا شو رايك؟ (وسكت لأنه متلوّم ) هذيلا عشرت عمر وياهم .. وجانك انته اللي فرقتنا بعرسك ..الوليف عمره ما يفترق عن ربعه .. (وبندت عنه وسارت اتبدل ثيابها دهدييه وهي نازلة ) يا آسيا !! آسيا !! نادي بشير خله يشغل الموتر ...

• وداد حاطة ايدها على خاصرتها : هاااه؟ سايرة عند عيال فاضل؟ دواهم من هذا وأكثر ..يعلهم ما يتهنون فحياتهم شرات ما خربوا عرسي

• ام مانع : خافي ربج فيهم !! مهما يكون هذيلا كنتي اتزورينهم وعادينج شرات بنتهم !!

• وداد : اي بنتهم؟ اي خرابيط؟ ايهبون !! انا اشتريهم وأخليهم عبيد فإيدي ..

• ام مانع : مالت عليج وعلى كلامج السم فوقج !! خافي الله فيهم !!

• وداد: عيل انا مابا اطوّفها السالفة على خير وإلا أزورهم !!

• ام مانع : يلسي مكانج وجري الدعنة !! أحينه بتيج العنود ..

• وداد واتحولف : والله ما يلست لين أبرّد حرتي !!

• ام مانع : تبين تسوين فضيحة ..العرب في محنة !!

• وداد : عيل يوم يت السمسومة هندوه الكوشة ما قلتوا شي ..وانا حقي ما بضيّعه ..(ولبست عباتها )

• ام مانع : عيل والله ما ركبتي الموتر ..تبين؟ إلتعني فموتر ثاني يالحية ام روس !!

•

• وداد تضحك مب هامنها : من زين اللي بيركب وياج عادة !! روز رايز بييبلي ابويه !!!

(وروحت ام مانع وكانت مضغوطة من اللي صار .. ااما وداد ركبت التكسي وسايرى اتسوي الفضيحة ..) __DEFINE_LIKE_SHARE__

عليا · 01-06-2008, 03:48 PM

(الجزء 27)

• مايد : فجي الباب يا غناتي فجي !!

• شمايل: يا غناتي؟

• مايد: هييه غناتي ..لو استوابج اخس عن جيه تراج غناتي ..وحبيبتي تذكرين شو عطيتج آخر مرة؟ (وتطالع الاسويرة اللي فإيدها .. ) موجودة بعدها؟

• شمايل: هاااه؟ هيييه ..

• مايد : راويني ابا اتأكد ..

• شمايل تصرخ : انا مب ياهل اتقص علية !!

• مايد : اقص عليج؟ شمايل؟ بسألج سؤال .. (وهي ساكته ) انتي بعدج اتحبين مايد؟ (ويالله ضربها عالعوق .. كيف ما اتحبه دامنها عاشقتنه من يوم هم يهال وهو اتربى عالقسى وهي اترده بحب ..) شكلج عمرج ما حبيتيني !!فمان الله ..

(وهو روّح وكانن الحريم ميّلسات يتريونها تفتح وسيده تفتح الباب )

• شمايل : بذبحك بإيدي ان قلتها مرة ثانية تسمعني؟

• مايد صد صوبها ومشى جداها : وانا بذبحج ان ما سمعتي كلامي في معلوم ؟ (واحمر وييها وابتسمت له ) اتعرفون اني احب بنتكم !! الا عاشقنها عشق !!

• ميثاء : آآآخ عليك !!عيب !!

• شمسة بعصبية : مايد !!!

• نشبة : يوم بتاخذها قول لها هالكلام ..احينه انطب ...

• مايد: شومايد؟ انا كم بصبر؟ وهذي بنت عمي يعني مب غريبة (ويغمز لها ) صح؟

(شمايل سكتت وردت داخل وتصاصر هنود .. اللي اتطالعها باستغراب ..)

• شمايل: سامحيني ياختييييه ياهنود !!سامحيني عاللي سويته فديت روحج ... (وابتسمت هنود )

• مايد دش الغرفة : طاعوا !! انا ارمسها وهي سارت عني !!! إإييييه حرمة سعادة مايد ..

• شمسة : طاعي اسمعي التنقيع ...اميه نشبة لحقي اتفوّق عليج !!

(وردت لسريرها ..اما مايد سار وحب هنود على راسها واستسمح منها وكانت اول مرة وهذي هي البداية .. ورد يلس صوب شمايل ويسولف وياهن كأنه شخصية عيسى ردت واتحولت لمايد ..وعن هنود لين الحينه مايدرون باللي صاير لها ..والعيايز ما طاعوا يرمسون بالسالفة لين يوصلون البيت ..ويلقون لها حل)

• مانع: هود .. هود .. مايد؟

• مايد : لحظة !! لحظة !! شمايل ..هنود؟ اتغشن ...

(اما هند انتفضت من الزياغ)

• هنود اتغشت وفخاطرها : مانع؟ شو يسوي هني؟

• اليد حمد : اتغشن ...بندخل ...

• ميثاء : اقربوا ...اقربوا ...

(ودخل مانع واليد حمد وعبيد )

• مانع وعبيد : السلام عليكم (وردوا السلام ..)

• مانع : نحن يايين نسألكم كم من سؤال ..

• مايد : خلاف ما يستوي؟

• مانع: كل ما قربّنا بنحصلهم ...

• مايد : بس لا تتحيرون ...

(شمايل تنتفض وماسكة يد امها ..)

• مانع: انتي هند؟

• شمايل : لا .. انا شمايل ..

(وقلبها يدق ..ومانع احمر ويهه ..ومستعيل يبا يسمع صوت الهند ..)

• مانع: ممكن اتخبرينا شو استوا؟

• شمايل معاندة : ما استوا شي ..

• مايد : شمايل ... لا تناحسين وسمعي كلامي ..

• شمايل وتوجه كلامها لمايد : هذا شي ما ينقال ..

• مانع : اختيه؟ نحن شرا اخوانج نعين ونعاون ..ومحتايينج اتعاونينا ..

• شمايل : وينكم يا اخواني عني ؟ وينكم يوم اغتصــــــ ..اغتصبوني (ودمعتها انذرفت ..وهي اتطالع مايد اللي محمر ويهه ويبا يسوي شي ..يمسح دموعها لأنه حاس بها .. بس مب قادر..وخبرتهم بكل شي يبونه ..بس المشكلة ما عرفت توصفهم عدل ..)

• مانع : ما قصرتي يا اختيه .. (وقام وسار جهة هنود ) وانتي هند..

(وما عرفت شو اتقول ..ويسمعون صوت وحدة اتيهيل ..)

• ................: كلولولولولولوش !! (وهم صادين عالحشرة برع )

• اليد حمد : انطبن !! طب الله راسكن !!

• نشبة : ويييييه يعله مبارك وسعيد ..يعله مبارك وسعيد .. (ودشن شما ونشبة )

• غريبة : بلاكن ؟

• شمسة : حصلتوهم؟

• نشبة : طلعت بنتج ما جاسوها ... توّها الدكتورة قايلة ... (ومانع صد يطالع هند ..وهند احمرويهها بس طبعا ما يبيّن منها شي .. وهو قايم..لأنه عبيد لمح له بشي .. )

• مانع: نحن بنخليكم تستريحون وباجر بناخذ افادتها .. (بس شكله هو يماطل عشان يطالع هند ..طلع هو وعبيد وساروا يكلمون الدكتور ..)

• ام مانع : السلام عليكم ..

• هند فخاطرها : اكيد خبرها مانع ..

• نشبة : هلا عليج السلام يا مرحبا الساع ...

• ميثاء : عليج السلام والرحمة مرحبا بخويتيه ...

• اليد حمد : انا بترخص ...فمان الله ...شخبارج ام مانع ؟

• ام مانع : بخير ..بخير ربي يعافيك ... (وروح ..وروحت شما وياه ومايد طلع بس واقف برع .وسلمت عليهم ام مانع ويلست ..) انا من سمعت الخبرما حسيت والله برويلاتي ..ما تستاهلن .اللهم مالك الحمد والشكر .. (واتطالع هنود واتحبها ع راسها ) حاطة فخاطرج من صوبنا ؟ (وهنود اتعج الغشوة وتبتسم لها )

• هنود فخاطرها : وانا ازعل منج يالغالية ؟

• ميثاء : فيج الخير والله ..

• ام مانع : باجر ريوقكم وغداكم وعشاكم علية ..انتوا بتنشغلون في المستشفى..

• غريبة : مشكورة يا اميه ما تقصرين ..اعنبوا البنات كلهن بخير ..

• ام مانع : هذيلا بناتي واتربن على ايدي ..والله وهذي حلفة ... بتردوني بعد ؟

• غريبة : لا لله ..

• شمسة : مشكوووورة يا خالوه يعله مديم ...

• ام مانع : هذا الا من خيركم فديتج ...

(وتمت وياهم ساعة اترفه عنهم وتسوي سوالف ويا البنات ..وخلاف روحت .. )

• غريبة : هنودة؟ بلاج امايا؟ من يت الحرمة ما اتكلمتي .. (وهنود اتأشر بإيدها مب فاهمة ..) بلاج امايا اتأشرين؟ (واتأشر بإيدها انها ما تروم اتكلم ..وردت الام تصيح وتنوح ..ونادوا الدكتورة ..وكشفت عليها .. بس بكل صراحة كانت هنود مستانسة انها ما تتكلم افتكت من الصريخ والزعيج ...) بلاها دختورة ؟

• الدكتورة : هذي حالة نفسية .. او عقدة يمكن من اللي شافته .. ويمكن مع الايام تتحسن بمساعدة الدكتور ..

• غريبة ودمعتها على عينها : يالله .. يالله يا عزيز يا كريم ترحم بنتي وبنت اختيه برحمتك ...

(وروحوا بعد ألف يا ويلاه ..وتمت شمسةويا البنات ..وكانت اطول ليلة في حياتهم ..اما في غرفةمانع وكانوا رقود ..)

• مانع يهذي باسم وحدة اكيد عرفتوها : هنود؟ هنود؟ فدييييييييييييييييت روحج يا حبيبتي ... هنود؟ فدييييت ويهج يالقمر ..قطعتي قلبي يا غناتي .. (وهو يوّن الا باسمها )

• وداد نشت واتدزه : قم !! قم اقولك !! قم يعل ليحان ظهرك ينفجن فج !!

• مانع ناش مغفي : الله يغربلج زيغتيني ..بلاج؟

• وداد : وبعد في فراشي تطري هندوه الجلبة؟

• مانع : حشا !! منو طراها؟؟ اظني فحلمج ..بس انا ما يتني اليوم ههههه

• وداد : سخيف وايد ..

• مانع : وايد حلو أعيبج ..

• وداد : من زينك عاد ..الشيفة شيفة والمعاني ضعيفة ..

• مانع : ودادوه يالحيواة .. ثمني كلامج يالبقرة !! (وتدفره دفرة وتعجه من على الشبرية ..) والخيبة اتخيبّج يالجيكرة !! مب ايد عليج

• وداد : انا جيكرة؟ يالدب !!

• مانع : انا دب؟ مادري منو مرّبي شحوم ولحوم ..مالت على هالشيفة .. (وانسدح ويدفرها هاييجي الدفرة ويتلحف ) هاااااااااااااااايه فديت اللي في بالي ..لا خليت ..لا خليت .. (وهي منشحنة واتسب في خاطرها)

• وداد : اذا لقانا هب اليوم ان شاء الله باجر يالسبالة ..

(وعلى يولة الحادث والمستشفى ..يوم درا فاضل ما اهتزت شعرة منه ..يمكن انصدم لكن ما فكر حزتها اييها .. اما مي وفطيم ما ياهن الرقاد ..وعند مي في الغرفة ..)

• مي : انا شمدريني انه هذا رح يحصل .. ولمن؟ لأختيه.. يالله تعينها ..

(اما عند فطيم )

• فطيم : ما يستاهلن ..حليلهن .. مادري كيف بيكملن حياتهن وعلى هذا العار اللي بيلازمهن طول حياتهن .. وينك ياعيسى اتشوف شو استوا على خواتك !!

(اما البنات الاربع ما رقدن الليل..وحتى مايد يفكر بحالة حبيبته .. من كثر ما يفكرن بالحادث كأنه فيلم رعب وينعاد .. بس شمايل اللي ترقد وتنش وتوّن من اللي تشوفه ..واتذكرت ويوههم وكيف كانوا يضربونها بس عشان تسكت ..والصبح وصل لهم الريوق ودش مايد على الساعة 8)

• مايد : صباح الخير .. (ومحد رد ..هنود كانت راقدة وشمسة حاطة راسها على هنود ومتغشية وراقدة عالكرسي ..وشمايل عدلت شيلتها ودخلت شعرها وهي ساكتة وسرحانه ..) احم احم بلاها الحب مالي؟

• شمايل : هاااه؟ صباح النور ..

• مايد : شمايل اتحبيني ؟ (واتراويه السلسلة ) ابا اسمعها منج ..

• شمايل: ماله داعي هالسؤال.. يعني على كل ما تشوف شيفتي بتسألني؟

• مايد : اتحبيني ولا لأ؟ لا تنرفزيني؟ كل يوم بسألج وكل دقيقة عشان اتأكد انج اتحبيني ..

• وداد : ماشاء الله حب وغرام ..ولا بيّن فيج اعنبوا عفدوا عليج ثلاااااثة وبعد عاشقنج الرابع؟ شو تبا فيها؟ جان ما اتكون حامل ف ولد حرام هي وهندوه الجلبة (وهنود سيدة بطلت عينها من اللي سمعته ) يعله ان شاء الله توائم وما اتوفقون ..عاد شو بيفججكم من كلام الناس ..

• هنود فخاطرها : خافي ربج (ونشت شمسة )

• مايد يصارخ يبا ينهد عليها : انتي الا بنت شوارع ..اشوف ظهري برع لأرقعج بأي شي جدامي

• وداد حاطة ايدها على خاصرتها : اونه بيرقعني !! ههههههههههه اصلا زين اللي صار ..اسميني الا استانست وقمت أوّوع بيزات من الفرحة .. يعلكم من هذا وأزيّد .. انا ببيزاتي أبيعكم وأشتريكم وبتكونون تحت ريلي ..غصب عنكم ..

(ومانع كان عند الباب هو وعبيد ومنصدم من اللي يسمعونه ومبججين عيونهم على الحرمة الملسونية اللي تسبهم سب ..)

• عبيد : والخيبة !! بنت الذين ..اسمع شو تقول .. خلنا اندش انأدبها ... ملعونة الصير !! __DEFINE_LIKE_SHARE__

عليا · 01-06-2008, 03:49 PM

الجزء (28)

مانع يمسك عبيد: لحظة لحظة !! خلني اسمع ...

(ومانع مب مستوعب ..حرمته شو تسوي هني ..مع انه ورثه ابوه الفطنة والذكاء لكن هنيه خانته حاسته )

مايد : عنلات صيرج يالخايسة !! ظهري برع اقولج ..(ارتفع ضغطه من غير ويهه محمر ..)

وداد : احينه ودرتني ..وسرت عند وحدة خايسة ؟

شمايل اتطالعها منصدمة : ودرتها؟

مايد : شمايل لا تصدقينها جذوب !!

وداد : انا جذوب؟ اوكي جاني جذوب ..فجي ايميله وبتحصلين صوّري كلها موجودة ..ومن غير عشقنا وغرامنا ..اصلا من سنين وهو عاشقني ...

شمسة : ايييييه استري على عمرج وانفدي !! محد بيستر علييج !!

(وقامت شمايل مب مصدقة ..)

شمايل وشياطين الدنيا ع راسها وقامت وصلت لين عندها : طلعي برع احسن لج !!

وداد بكل جرأة : ما بطلع شو بتسوين ؟ (مايد سار لها ودزها يبا يطلعها وهي تفلت عمرها ..) هدني !!

مايد : طلعي بكرامتج !! جان بقى شي منها !!

وداد : انته ريال انته ؟

شمايل : ما بتطلعين صح؟

وداد اتمردت : ما بطلع شو بتسوين ؟ فضيحة في المستشفى ؟

(على الرغم انه الكل يسمعها ..يعني ما حشّمت ولا استحت على ويهها وقالت حرمة عوده تسمع هالكلام ..أبدا ... متمردة ..ولعينة ..ونذلة فنفس الوقت ..وقامت شمايل ومسكتها من شعرها بكل قوتها ..)

وداد اتحاول تفلت منها : هديني يالمينونة !!

(ووصلت عند اليدار مال حجرتها ..وكلهم نشوا..بيمسكونها .. مايد يمسك شمايل من بطنها ..وهي ترافس بريولها ..)

شمايل : هدني اقولك ..

وداد : مينونة !! خبلة .. جلبة وحدة !!

(وداد اتقربت من شمايل اللي ترافس ومب طايع هو يهدها عن اتسوي شي ..)

مايد : شمايل فديتج ..استهدي بالله ..

شمايل تصارخ : هدني اقولك !!

(وتصفعها وداد هاييجي الصفعة ..حزتها شمايل ما استحملت ..عضّت ميود .. وفلتها .. من الويّع )

مايد :آآآآي !!

شمسة : شمايل !! لا يا بنتي !!

(وعفدت على وداد اللي طاحت عالارض وتيوّدها من رقبتها وتصفعها كم من كف ..ومثبتنها بريولها ..)

شمايل : احينه انا مينونة؟ يالخايسة يا ام الرياييل؟

(وميود رد يمسكها بس مارام يجلعها ..وهنود من الخوف سارت بتنادي الممرضات ..ويوم طلعت انصدمت ب عبيد ومانع ..وهي اتأشر وهو حزتها احمر ويهه ..كان معصب ومفوّل بس مب عارف شو يسوي جدام هنود ..ولحفت هنود ايدها بالشيلة وقامت تدزه داخل هو وعبيد ..)

عبيد : تبانا نتدخل ..

مانع: ما يخصك ..

(اما في امريكا )

عيسى يصارخ وحاس روحه بتظهر : آآآي !! لحقوا علية احس شي ينهش ينبي !! آآآي!!

حسن توّة داش : عيسى ياخوي .. بلاك بسم الله ؟

عيسى : ازجر الدكتور خله يعطيني مسّكن بموووت ..آآآآآه ... (وكان يتحكك وعينه مسوّدات هالمرة صدق ..) آآآي !! يا حسن وصاتي اهلي ان استوا شي ..(ويصيح من الويّع)

حسن : ما بيصير الا كل خير يا عيسى وهذا آثار المخدر ..وبعد فترة بيخوز عنك ..

(والممرضة اتطالعه وتبتسم وتضربه بالابرة عشان اتهّديه ..ورقد ..وكانت الممرضة تتمدح ل حسن بجمال عيسى وهو ساكت .. وكانت هاي آثار المخدرات بدت اتأثر فيه .. كان يكره الاكل وما ايعرف يرقد الا بمسّكن .. بس طول الوقت يحاول عشان خواته وامه وابوه وفطيم ..)

عيسى وهو راقد يتلفظ ب : فطيم ..احبج يا غناتي ..فطيم ..انا حبيتج ..حبيني شرات ما احبج ..

(اما في المستشفى .. دخل مانعوشمايل مب مستسلمة ..ويوم شافت مانع ..)

مانع: هدّيها !!

(وقامت شمايل وهي منتصرة )

شمايل : شفت الشرف والكرامة؟ شفت؟ شفت يالأخ !! شفت حرمتك اللي غدت بنت شوارع؟ شفت؟ (وعبيد منصدم وعيونها تدمع ومسكها مايد من ايدها ..) هدني !!ولك ويه تلمسني؟ صدق انه الرياييل مالهم امان !!

(وداد هالمرة زايغة لأنها صدق في ورطة ..مانع يطالعها بحقارة الود وده ذابحنها..ونزل لها ..وهي كانت تنتفض اول مرة تشوفه جذيه ومسكها من كشتها )

وداد : آآآي !! آآآي !!!

مانع : براويج الخساس على اصوله طوفي جدامي ..الله يلعنج ويلعن اليوم اللي خذتج فيه ..

(ويوم طاف جدا هنود ..وبعده ماسك في وداد ...)

وداد : تف عليج يالخايسة !!

(حزتها صدق احمرت عينها ودموعها نزلن ..لأنها تفلّت عليها ومانع بكل قوته مسكها من رقبتها ..)

مانع : هاي عمتج وعمّت طوايفج كلهم ..(ويرد يمسك شعرها ) تسمعين ؟ (ويوم توّة قرب ايده بيمسح على خدها اللي متفلة عليها ..صدت الجهة الثانية ماتباه يلمسها ..كانت زايغة ..بس لمس خدها ومسح ..)

مايد: ايييييه !! لا اتدق اختيييه !! ياويلك مني !! (وسار له )

مانع يأشر له : مالك حق ترمس !! أقدر أعجك فقضية وكل الدلائل عندي ..ومحد بيفججك منها تسمعني؟

مايد : حرمتك الا جذوب !! (وحزتها فار دمه .. وهد راس وداد )

مانع : ان تحركتي ..بثوّر فيج وانتي اتعرفيني .. (وهي اتطالعه وزايغة واتهز راسها..ويطالع مايد ) شو قلت؟ (وسار له )

شمسة : يابويه استهدوا بالله ..مب جذيييه !!

مايد : خلييه خالوه !!

(وطبعا حركةمانع من يمسك حد من رقبته خلاص قاضية ما يرومون يتنفسون ومسك مايد بنفس الحالة .. )

عبيد : دخيلك يا مانع مب جذيه مب بالدريس

مانع : واحينه؟ كلمت الحرمة ولا لأ؟

(وشمايل اتطالعه بتكبر )

مايد : هدني اقولك !! (وكان رافعنه عن الارض ) هـــ ...هـــ.. هيييه كنت اكلمها .. (وكلهم انصدموا )

مانع : والصور؟

مايد : مـــ .. مو ــــــ موجودة..فلـــــــ فالكمبيوتر ..(ويدفره مانع هاييجي الدفرة ..اما في بيت فاضل ..يصيح التيلفون )

غريبة : مرحبا ..

الجود : السلام عليج خالوه ..

غريبة : عليج السلام فديتج ..

الجود : هند موجودة؟

غريبة : سامحيني ا غناتي .. منوّمة في الدختر ..

الجود : بسم الله عليها ..شو صار عليها ؟ (واتخبرها بالسالفة كلها ..ويوم بندت عن غريبة ..كان احمد ياي على غفلة ويقرقطها ) هههههه مب عيب عليك؟ انته ياهل الحينه ؟ احينه بينش زايد ...

احمد : خليه ينش .. شووراه من الشغلة ؟

الجود : احمد؟

احمد: حياته وروحه ..(وهي اتطالعه وتبتسم )

الجود : نسيت ..

احمد : ادري كلامي كله عسل ..

الجود واتدزه مال مصخرة : يهالويه ..

احمد : الجود؟

الجود : يالبيه ..

احمد : لبيتي الحاية ويايه ..

الجود : هههههه على نفس الوزن والقافية ..

احمد : خلينا من القافلة الحينه (وهي تضحك على استعباطه ) مستانسة ويايه ؟

(حزتها ردت بها الحاسية يوم يقول لها محمد هالكلام ..احمر ويهها ..وصدت الجهة الثانية منحرجة ..)

الجود : هييه مستانسة .. مستانسة ..

احمد : يوم انج مستانسة ليش اتصدين الجهة الثانية؟ انا ماخذنج من سنتين وبعدج تستحين مني؟

الجود قامت : احمد؟ اتعرف ليش وافقت آخذك؟

احمد يلعب بشعرها : عشاني غرشوب؟

(الجود ضحكت من خاطرها )

الجود: انته مكار !!

احمد: ولا لأنج ما استحملتي كل يوم انج تشوفيني ..اعترفي اعترفي

الجود تبتسم اونها متعجبة منه : خجاج واحد ..

احمد : وطبعا ثمرة حبنا زايد ..

الجود: وايد اتحلم ..

احمد : وايد ..شكلي الا بسير اعرس عليج ..يمدحونهن بنات البلاد من غواهن (اونه عاد مروّح ومسكته من ايده )

الجود : ياويلك !! احمدان !! (ومسكها من ايدها وحباها ع راسها )

احمد : وانا منو عندي غير جامتي ..

الجود : يا ريال شو هالتشبيه؟ ههههههه

احمد يطالعها فعينها : احبج يا ام زايد ..

زايد : اهىء اهىء أهمد !!

احمد: طاعي مذهب ولدج .. (وسار صوب زايد اللي عمره سنتين ..وماخذ ملامح ابوه وبياض امه )

الجود : بلاه بسم الله عليه ..متعلم ومتربي ..

(واحمد يضحك عليها .ويحبب زايد الليكان يضحك )

الجود : ماعليه انته ما شفته البارحة ..اميه وفاية تضحك عليه ..

احمد : شو مسوي ؟ لابس برقع يدوه؟ دومه ادريبه !!

الجود : لا ..بس عواد منزل سالم ولده وحليله .. كل ما يشوف زايد يهز راسه ..ههههههههههه

احمد: ههههه حشا غادي سبال ..

لبجود : وعاد ولدك اشوفه يايني ايطير ..ماما ..وماما .. ويهز راسه ..عادة يقولي يو هذيلا اللي يهزون روسهم (وهم ميتين من الضحك )

احمد : شكله عواد من احينه معلمنه عالتجوليع ههههههههه من اولها ..

الجود : عن انسى ..بسير وياك بتشرى هدية حق ربيعتي ..

احمد : منو هاي؟؟

الجود : وحدة متعرفة عليها في العرس .. وأحينه متنومة في المستشفى ..

احمد: جيه؟ متى بتسيرين لها؟

الجود: برمس اميه وفاية ونداية والجود ..بس يمكن باجر اذا الله راد لأنه ماشي تحفيظ قرآن غير يوم الاحد ..

احمد : خلاص غناتي ..انا بشتري لكن التوصيلة خله اخوج يوديكم

الجود : ان شاء الله فديت عيونك

احمد وبجدية : صدق؟

الجود : شو الصدق؟

احمد : عيوني حلوة؟ (واحمر ويهها )

الجود : انته صدق ما تستحي

احمد : اندوج انتي رد رقد ..

شو راح يحصل بين وداد ومانع ؟

هل بيطلقها وبيرد لهنود؟

هل عيسى بيتعافى ولا حد بيلعوزه؟

وشو مصير هنود وشمايل بعد الحادث؟

وشمايل بتكمل ويا مايد ولا بتودره؟

كل هذا يوم السبت بتعرفونه .. __DEFINE_LIKE_SHARE__

عليا · 01-06-2008, 03:49 PM

الجــزء الـ ( 29 )

(وعلى غفلة وعتها رحيل )

رحيل : ماما؟ ماما نشي ..

الجود : هممم؟ (ويوم بطلت عينها شافت رحيل جدامها واتبخر كل الكلام اللي صار بينها وبين احمد وزايد الصغير ) وين زايد؟

رحيل : عند ماما سلامة ..

الجود : سيري هاتيه اتولهت عليه ..(ويوم سارت رحيل ) اشوا انه كله حلم ..وينك يا احمد؟ الله يذكرك بالخير .. حتى في الحلم اتزوجتك خخخخ ..قبل كنت اعرف اخبار محمد منك ..وأحينه من سافرت ولا الطشة .. يا سبحان الله يحصل لبنتين ..وكان بيحصل لي ..اللهم مالك الحمد والشكر ..يالله اتعينهم ..(وكان احمد مسافر برع البلاد ..وكل اللي حصل حلم ..بعد ما كلمت غريبة ) بسير اكلم اميه نداية عن سيرتنا للسوق ..

( اما في المستشفى .. يلست هنود وشمسة عالكرسي يتنهدون من اللي صار ..)

هنود فخاطرها : يالله الحمدلله واخيرا !!!

مايد : اعنبوا ما بغت !!

شمسة : يالله يالله لبجتوا ضو في الدختر !!!

شمايل اتطالعه : واتحرى عمرك ما اذنبت؟

مايد: شو؟

شمايل وعيونها محمرة : اطلع من الحجرة !! برع !!

مايد مسكها من ذراعها : ما بظهر شو بتسوين ؟

شمايل: هدني !! (ويوم هداها ) تف عليك من ريال جانك ريال مغازلجي بو الحريّم !!

مايد : ايييييييييييييييه عن الغلط !!!

شمايل: شو غلط ؟ هاااه؟ اباك تطلع من حياتي وتنجلع منها ...

مايد: ما بطلع وجانج حرمة سوي بعد شي ..والله هب ساكت ..

شمسة: جاب ولاكلمة !! بتسكتون ولا لأ؟ العنت الله عليكم !! مايد؟

مايد وبغرور : خير ؟

شمسة : تبا شمايل؟

(مايد اتغيرت ملامح ويهه)

مايد : نعم؟

شمسة: ما سمعت؟

مايد: هيييه اباها

شمسة : عيل بتاخذها !

(شمايل وهنود منصدمين )

شمايل : شوووه؟ ومنو قال اني موافقة؟ جيييه مالي شور؟ وعقب اللي سمعتيه تبينه لي؟

شمسة : يالخبيلة نستر الفضيحة !! اعنبوا دارج الناس بتاكل ويوهنا وانتي ولا بهمه؟ __DEFINE_LIKE_SHARE__

عليا · 01-06-2008, 03:50 PM

(الجزء ال 30)

( في موتر الشرطة )

• وداد : انا .. انا .. مانع .. انا كنت اجذب ما سويت من هالشي ..

• مانع : تجذبين هاااه؟

(ويطالعها من المنظرة النصفانية ..لأنها كانت يالسة ورا ..شرات اللي قابضين عليها )

• وداد : والله ما اجذب عليييك ..بس كنت ابا ألعّوز شمايل ..

• مانع : لا حرام عليج.. خليتيني أصّدق (ويزاعج ) انطبي طب الله راسج !!

(اول ما وصلوا البيت ..بطل الباب وسحبها من كشتها )

• وداد : آآآآي !! آآآآآي !! آآآآي (والبشكاير والدريول يطالعونهم ) مب جدامهم دخيلهم ..

• مانع محمر ويهه : جاب يالله جاب !!

(وتوّة مبطل الباب وغصّت ام مانع )

• ام مانع : اح اح يالله شو مستوي لا إله الا الله !!

• مانع : ما يخصج !!

• وداد : لحقي عليّة خالوه بيذبحني والله !! (وهي تترجى )

• مانع والشرار فعيونه : الا بقصبّج !!

(وسحبها فوق لحجرته وامه تلحقه ..بس قفل الباب وهي ما لحقت )

• ام مانع : افتح الباب يا مانع ... (وهي اتدق بقو ) يابويه استهدى بالله ..

• مانع : انا تفشليني جدام اهلي وتنزلين راسي؟ وتفضحيني ؟ (ويصفعها طراق يعجها عالارض ..ويضربها ضرب ..وخذ العصاه المحناية ..وانا اقول اسميك ريال..وسفرجل مبججة عيونه ومتقبضة فية ..وعطاها من الخاطر) بس على هذا كله تستاهلين اللي ايييج وزود ... انتي طالق !! (وبطل الباب ويسحبها ويفرها برع حجرته ماكان يشوف شي جدامه ..وبند الباب وهو يطلّع ثيابها والغصة جايستنه ) انا انخدع من بنية؟ اكرم انها مينونة .. لكن والله لأراويها .. (وكان يطلّع ثيابها ويرّض بباب الكبت ..وبطل الدريشة ..ويشوفها برع بتركب الموتر ..ويزاعج ..) ان ركبتها يا بشير بتتكنسل !! (الدريول زاغ وهي اخسّين ) تبين ثيابج؟ (وهي اتطالعه ) خذيهن !! ( ويفرهن من فوق وقامن ثيابها يتطايرن في الهوا ..اللي على الموتر ..واللي على الزرع واللي على صوب يرانهم ..ويلس في حجرته يفكر في وداد ..اما في المستشفى )

• شمايل ماسكتنها امها : بتظهر ولا لأ؟

• مايد : ما بظهر شو بتسوين؟ انا قلت لج اني آسف ..

• شمايل تزاعج : اظهر برع لا بركتن فيك ولا في أسفك

• شمسة : يابويه اظهر الله يهديييك .. (وتغمز له عشان هي بتهديها ) كفاية الفضايح !!

• مايد : مب ظاهر لين تعقل بنتج !!

• شمايل : جيه انا مينونة؟ هديني عليه !! هالهرم !! بو الحريّم !!

• مايد : قولي اللي تقولينه ..انا راضي بس انتي لي انا فهمتي ؟

• شمايل : ياخي ماريدك غصب هوو؟ اطلع !! اطلع !!

(هنود ردت فراشها لأنها ضايجة من ها كله )

• مايد : اتحلمين !!

(يعني شمايل منفعلة ومايد عنادي مب طايع يهدها ..وهي خذت جلاص الماي وفرّته ..بس ضرب الباب وانكسر )

• مايد منصدم : لهالدرجة اتوّصل؟

• شمايل : وأزيدك بعد !!

(وطلع من الغصة ..وهو طالع يصيح تيلفونه )

• مايد: نعم؟

• فاضل : ميود؟ رد البيت اباك !!

• مايد : ان شاء الله ..بس انته ما بتي المستشفى؟

• فاضل : لا ما بيي خلها تلتعن عني ...

• احلى البنات = ياويلي ايقول عن بنته جذيه ...

(ويوم سار البيت محد كان في البيت كلهم ساروا المستشفى )

• مايد يتنهد ويلس وهو يرد شعره على ورا : خير يا بويه ..

• فاضل : الخير بويهك .. انته ولدي ..اللي تسمع كلامي ..واباك اتحط هالشي في بالك مبدنك عن كل اخوانك ..

• مايد : خير؟

• فاضل يدوخ له المدواخ : اباك تاخذ شمايل بنت اخويه وتستحملها ..

• مايد : بس ..

• فاضل : لا بس ولا شي ..هالمرة بتاخذها وبتستر عليها ويوم بنحصل على بيزاتها .. خذ عليها البنية اللي تتمناها .. بعد ما انروم انخليك اتطلقها .. مافينا الناس بتاكل ويوهنا ...

• مايد : بس انا اباها .. مابا بيزاتها ..

• فاضل : ههههه اسميك يابويه .. انته اتحب؟ واتحبها؟ اتقص على ابوك اللي ايعرفك؟ ماعليه حبها خخخخخ قص علية بكم من كلمة ... (وبجدية ) دامنك ما تبا بيزاتها انا اباهن .. خذها وحبها وعطني البيزات مفهوم؟

• مايد اتضيّج :خلنا من هالشي ..انا تراني خذت البيزات عنك هب هنود ..

• فاضل منصدم : بعد انته اتغطي عنها؟

• مايد : لا والله يابويه .بس انا وايد زعلت شمايل هاكي اليوم .. وسرت آخذ لها شي رضوة .. وانا دقيت عليك بس يمكن ما سمعتني ..

• فاضل : ماعليه فدوى عن راسك .. تراهن بيزيدن بعد الزواج بدبلات ..

(واحمر ويه ميود ..وطلعوا هنود وشمايل من المستشفى ..ومن ردت غرفتها)

• هناء بكل شماتتها : شحالج شموول؟ تستاهلين السلامة حبيبتي ..

• شمايل : الله يسلمج ..

• هناء فخاطرها : يالله يا شماتة الناس فيج !! أحينه مول محد بياخذج .. طاح سوقج ياختيه ..

• هناء : شو قالج الدكتور؟

• شمايل : جاب واذلفي عن ويهي

(وهناء انصدمت انه اختها اتجرأت اتقول هالكلام .. اللي عمرها ما يكون في لسانها غير آسفة وسامحيني ..وعيال الحارة موول ما قصروا من هاكي اليوم وهم يدورون عليهم وكانوا روحهم مسوين قضية من السالفة .. لأنهم يخافون يتهجم على خواتهم وخصوصا لأنه ليوا طول عمرها دار الامان )

• سعيد: ميود .. نحن حصلنا امسات الباكستاني اللي...

• مايد: وين؟ زخيتوهم؟

• سعيد : حصلنا واحد بعيد صوب السلع .. المهم غسلناه لك غسال الدمان والله يظهر منه .. نحن وخويان شما ما قصروا ..

• مايد : وينه الحين؟

• سعيد: وديناه الشرطة ..

• مايد : والباجين حصلتوهم ؟

• سعيد : ماشي ولا أثر .. من غير هاكي الهيس ..يقول انهم افترقوا ..

• مايد : مشكور يا بوعسكور ..يالله عيل انا ساير الشرطة ..

(اما في الموتر كانت اليدة الجود ويا الجود وراشد اخوها اللي يسوق )

• راشد : احينه شعنه ما تخلون حمد البطالي هو اللي يوّديكم؟ انا وراية 100 شغلة !! لا وبعد طلعوا من المستشفى ..

(وتظهر اليدة عصاتها وتضربه على جتفه )

• اليدة : جاب يالله جاب !! كفاية متحيرين عالعرب بسبت رقادك !! (راشد يضحك وتبيّن غمازته )

• راشد : يالله بالعفو العافية يا جراند ماه (قصده يدته )

• الجود : اسكت الشيبة !!

• راشد : ما خبرتوني بلاهن هالبنيات؟

• اليدة : ما بلاهن شي ميهّد !!

(الجود اتصد ورا )

• الجود: هيه .. هيه ..

• اليدة : سويتيلهم تيلفون؟

• الجود : لا بعدني .. قلت لين نوصل ليوا ..

• اليدة : المدحوبة اتصلي يمكن هم محد ..

(واتصلوا بغريبة اللي دلتهم الطريج بس دلتهم بيت ابوها لأنه ريلها بيفضحهم.. وكانت عالباب موقّفة نشبة خخخخخخ)

• نشبة : ياهلا يا مرحبا وسهلا ..

• شما : يامرحبا الساع .. اتفضلوا ..اتفضلوا ..

• اليدة الجود : زاد فضلج الغالية ...

• نشبة : الميلس على يمينكم .. (ومن عفاشتها ودتهم ميلس الرياييل ودششتهم ..وراشد ينزل الاغراض ) شحالك ابويه ؟

• راشد منزل راسه : بخير ربي يعافيج ويسلمج ..

• نشبة : اقرب ..اقرب الميلس على يمينك .. احينه بييون الرياييل .. (ودخّل الاغراض داخل ودخل ميلس الحريم وشرب القهوة ..)

• ميثاء اتلف شيلتها واتعدل برقعها واتدخن شيلتها شي وتدخل : ياهلا ياهلا (ويوم بطلت الباب ) ويه ويه ويه السموحة (وتفر ع ويهها الغشوة )

• راشد قام ونزل راسه : لا انتي سامحيني خالوه ..

• ميثاء : شخبارك ابويه؟ واخبار الاهل ؟

• راشد : بخير ربي يعافيج ..

• ميثاء : استريح ..استريح ..احينه بييي مايد وبو غريبة ..

• راشد : مشكووورة خالوه .. (وروحت )

• ميثاء : حسبي الله عليج يا نشبوه يالمدحوبة !!!

(ومن درت مي انه في عرب يايينهم على طول اتعدلت واتمكيجت و يت مسرعة ..وعلى طول لميلس الحريم .. وفجت شيلتها اونها عادة تبا تراويهم كشختها وتبطل الباب )

• مي: السلام عليكم ..ويييييييه (وتلبس شيلتها ) آسفة يا عيوني !!

(راشد قام وصد ورا وكان محمر ومب رايم يقول شي )

• راشد فخاطره : شو السالفة بلاهن؟

(وبندت الباب )

• مي تتنهد : آآآه يا قلبي (وتتساند عالباب ) ايش جمال؟ الا غرشوب ياويلي !!

(اما هنود كانت عند شمايل ويوم اتصلوا ببيت شمسة يت ..)

• هنود فخاطرها : ياربي فشلة .. كيف بسّلم عليهم وانا ما ارمس؟ احينه بيتشمتو علية !! لا وبعد مب حاطة مكياج ولا حتى جحال ..يالفضيحة !!

(غريبة تبطل باب الميلس مال الحريم من داخل صوب الصالة)

• غريبة : يا مرحبا السااااا ـــــــــــ ويه ويه ويه ريال !! (واتغشى ) سامحني يابويه سامحني وافضيحتيييه !!

• راشد حزتها مب عارف شو يسوي : لا مسموحة مسموحة..انا بترخص ..

• غريبة : لا والله تستريح .. نحن مغلطين ... (ويوم هي مبندة )

• راشد : ياهي بلشة ... شو هاللي جايسنهم؟ بطلع احسن لي !!

(وهنود طبعا مادخلت من باب الصالة وعجت اللثامة وتمت متحجبة .. وبطلت الباب مال ميلس الحريم من برع يعني شرات مي ..وينكفخ راس حد بالباب وعينكم ما تشوف الا النور وينسمع صوت طاااخ )

• راشد ماسك راسه : يالله !! والخيبة !!

(ورد على ورا ويلس عالغنفة .. وهنود مبججة عيونها وتوايج من الباب ..)

• هنود احمر ويهها وفخاطرها : وييييييييييييه يالفضيحة !! ريال !! ريال !!

• راشد فخاطره وهو يطالعها : ياحر قلبي حرااااه ... تذبح من دنى يومه !!

• راشد : ياويلي !!

(ومنصدم من حلاتها وبراءة عيونها وخصوصا الرصاصيات الحادة كانت خايفة وحايرة ..وعلى طول فرّت الغشوة ع ويهها .. وهي اتأشر له اصبر اصبر .. وتربع المطبخ )

• هنود فخاطرها : ياهي نشبة !! اكيد انطر راسه !! وابووووييييه !!

(وقلبها يدق بطريقة فظيعة .. ومتلوّمة منه .. وهو حاط ايده على راسه )

• راشد يبتسم : ياويلي ويلاه ..ياليتها دوم ... ياليت اللي شفته هب حلم .. يالله اترد !! يالله اترد .. ردها لي دخيييلك ياربي !! __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
乂°•..•°乂 جــراجــتي أتـجـرج فونـكم بدون كهـرباء ((مع فيديو للشرح)) 乂°•..•°乂	كوين فاشن	بيع و شراء و عروض التجارية	9	11-27-2012 10:24 AM
乂★乂☆乂(( عروس مسوية الكيكة على شكلهــــــــــــــــــا )) 乂★乂☆乂	♕ وليد الجسمي ♕	فن المطبخ والطبخ	25	08-09-2010 06:13 PM