乂آآه يا ويـــله .. قلــــبٍ صويــبٍ بانــت أقداره乂 - الصفحة 40

مشاعر خليه · 02-16-2008, 11:52 PM

thnx 3laya

kamleeha bsr3a

=) __DEFINE_LIKE_SHARE__

نونه راك · 02-17-2008, 01:33 AM

يلاااا عاااااد وين التكمله ...........لا تتأخرين عليناا حبوبه __DEFINE_LIKE_SHARE__

Ms.AlShamsi · 02-17-2008, 04:16 PM

كمليييييييييييييها بليييييز __DEFINE_LIKE_SHARE__

عليا · 02-18-2008, 02:47 AM

الجــزء الـ 72 ~

احمد : بطلوا الباب !! بلاكم؟ منو يزاعج جذيه؟ (هو ثره الفضول ضارب عنده أزيّد عن رشود ..)

راشد : بطلوا الباب !! امايا؟

اليدة : سيري يا جودوه صكي حلوجهم عن اينشّون العيال !!

الجود :سايرة .. سايرة .. صبري بلف شيلتي !!

(والبنات سيده اندسن في الفراش ..)

نشبة :هيه اندسن .. اندسن !! ملاعين الصير .. وااااي يا رويلاتي .. أحس كسر في ريولي شوفي ميثوه شوفي !!

(ميثاء اتهمز ريل واليدة الجود اتهمز الريل الثانية ..)

ميثاء : لا كسر ولا شي .. روحج مستعيلة على رزقج ..

اليدة : بنسويلج سح وكركم ..

نشبة : لالالالالا .. ماعليه ماعليه .. انا بخير ..(الجود طلعت ..)

الجود : بلاكم؟

راشد واحمد : ليش الزعيج؟

الجود : لا ماشي

راشد : والله تقولين

الجود : كم بتعطوني ؟

راشد : بعطيج كاف يالله رمسي ..

الجود : عفانا الله وين الأخوة؟ ماشي بس خالوه نشبة اتكرفست وطاحت ..

راشد : وين في الحمام؟

احمد : لا ياخي .. انا اقول اكيد هاي امايا منسدحة ومادة رويلاتها وخرطفت بها ..

راش واحمد والجود :ههههههههههااااااي

اليدة توايج : أدريبك يا مسوّد الويه ترمس عني ..

احمد احمر ويهه : ياربي هالحرمة ساحرة ولا شو؟

اليدة : ساحرة فويهك ملعون الصير !! توّني شرقت !! اذكر الله ..

راشد : عيّنتها ياخي عيّنتها !!

اليدة : عيّن من الله خير .. ويالله دشوا داخل رقدوا !!

احمد بصوت عالي : سلاماااااات سلامااااات خالوه !!

نشبة تزاعج : الله يسلمك يابويه !!

(وراشد واحمد ميتين من الضحك ومن دشن داخل ..)

اليدة : ياختيه شيطان هالولد ..

(والبنات طول الوقت يبن يطلعن .. بس مب رايمات ..)

ميثاء : اميه هندوه !! جتلي الليت نبا نرقد ..

نشبة تتسدح :واااه !! واااه !! واااه !! يالله .. شموه؟

شما تلبس دلاغها : خير؟

نشبة : يقولون وحدة من البلدان بييهم قصف !!

(واحمد وراشد واقفين عند دريشة شما يتسمعونهم )

احمد يرمس بشويش : ياخي هات كرسي بنيلس نتسمع سوالفهن ..

راشد : اصبر .. (والبنات يتضحكن على رمسة نشيبة .. لأنها كانت تبا اتزيّغ شما ..)

شما : لاإله إلا الله .. هاي رمسة يرمسونها في الليل؟

ميثاء : هيه انا سمعت بعد ..

اليدة : ما حطوها فأخبار الامارات ..

نشبة : لا يا امايا .. مب في مال ها بشّر !! لا قناة ثانية .. يمكن في قناة ام تيلة (قصدها روتانا ..)

شما : يابوكم ارمسوا بشي عدل .. حد يرمس بهالسوالف ؟ (وانسدحت شما وغمضت عينها ..)

نشبة : ام سالم؟ سمعتي عن هاكي السروق اللي عافد على بيت العيوز ؟

اليدة : حشا مووول ما وصلني الخبر .. جيه منو هي؟

ميثاء : يقولج سارق بيزاتها وذهبها .. وبشيكيرتها شردت .. ثره الريال عافد من الدريشة !!

شما بطلت عينها وقامت : دريشتي نسيت أبندها !! والله بيسرقوني !!

احمد وراشد : هههههههههههههههه

راشد : أسميهن عيايز !!

فطيم مغفية ومقفلة عيونها : انا بسوي حق بشكارتج وبرمسها ارتاحي انتي ..

شما : ما عندها موباااايل .. طرشي مسك حق الدريول .. والله قلبي ما بيرتاح!!

نشبة : هههههههههه أحينه الله يحفظ بيتج في صورة !!

اليدة : حليلها يا نشيبة !! هالله هالله فيها ..

فطيم : سكتوا .. سكتوا .. طاعوا حاطين أم خماس !!

نشبة : شميم تعالي شوفيها .. انتي ما شفتيها فرمضان !!

( قامت شما ولحافها على راسها ..)

شما : طاعوا !! غربل الله منكرهم .. اندوج !! طاعي والإيد محناية !!

نشبة : هيييه شو اتحرين !! هذا تلفزووون هب لعبة !!

(وكانوا حاطّين حلقة ام خماس .. يوم إييها ريلها في الليل .. بوخماس ..)

شما : لاإله إلا الله .. شو هالحلقة السقم ؟ اعنبوه !!

(نشبة وميثاء يتضحكن ..)

ميثاء : هاي اتذكرنا في وحدة الله يستر عليها ..

اليدة : منو هذي علموني؟

نشبة : حد غير شميم ؟ تراها ماخذة 4 !!

شما تزاعج : فعين الحسود !!

راشد : ول !! مزواجه هالحرمة هع هع هع !!

احمد : حليلها خلها تعيش حياتها ههههههههههه

اليدة : عادي خلها اتعرس ..

نشبة : وهاكي ريلج الرابع نسيتيه؟

شما : انتوا ما بتفوتون الليلة على خير؟

ميثاء : يطوّلي بعمرج الحرمة ياء خطبها واحد من دبي المهم ..

شما : الله يغفر له ويرحمه ..

ميثاء : يقولج الريال من ملج عليها .. دخلت الحرمة بسويعيتها .. الحرمة يالسة .. وهاكي ميّحلط .. هب متسبح .. (احمد احمر ويهه من الضحك .. وراشد حاط ايده يصّك حلجه ..)

اليدة : ويدي فضل عنه !!

نشبة : هيه شو اتحرين !! حتى مخاطه يمّثه في وزاره !! ويدي شايفينه !! فضل عنه !!جنه ماشي حمامات !!

شما : الا قولي ماشي كيليلللكس !! (ماتروم تنطق كلينكس )

ميثاء : سار وجابلها .. وهي مستحملة .. بدال ما يقول شي حلو ..

شما : الله يغربله تغربيل ان شاء الله .. هذا ريال هذا؟

(اليدة تضحك )

ميثاء : قام يخبرها فأول ليله لهم .. كيف حريمه الثلاث ماتن .. كل وحدة منهن ..

اليدة : طاع مذهبه الخايس .. أكيد زغتي !! زغتي شميم؟

شما : الا ما زغت !! قلت أكيد بيذبحني وبكون الرابعة !!

ميثاء : روحت عنه وردت له مهرها كامل له .. وطلقها .. ويقولج سار خذ له هندية وياب عيال منها واحينه تجار !!

اليدة : ما طلع لج شي منه؟

شما : حشا .. انا مطلقة ما ايوز !!

(وسار راشد يبا يسوي صوت عشان يزيّغ شما ..وهو توّة بيوايج ..)

احمد ضربه على راسه : ياخي عيب !! يمكن البنات مرقدات وكشفات !!

راشد : شو بشوف غير صراويل !! انا ابا ازيّغ العيوز !!

احمد يزاعج : أماااااااااااااايااااا !! (وكلهن زاغن )

اليدة تزاعج : امك تقولك وصّمة !! شو تبا؟ روّعتنا !!

احمد : رشود يبا يوايج عليكم !!

(وهم استوت عندهم حالة استنفار .. البنات يتراكضن بلحفاتهن ..)

فطيم : وابوييييه ..

هنود فخاطرها : الله يغربلك !!! (ونشبة اتلحفت كامل عشان ما تروم اتحرك ..)

ميثاء : ويه ويه ويه !! الهرم !! (وتربع داخل .. وشما من الزياغ سارت وبندت دريشتها .. ويسمعون صرخة تدوي )

راشد : آآآآآخ ايدي !!!!

شما : إشووووه هذا؟ (والدريشة ما بندت عدل وردت بقوة وبندتها أزيّد للمرة الثانية ..)

راشد يزاعج : آآآآآآآآآآآآآآآآآآآآآخ !!!

اليدة : والخيبة !! (لفت اليدة شيلتها وظهرت ..) شو هالزعيج ؟ مب عيب عليكم؟

احمد يضحك : أشوف اصبوعك أشووووف؟

راشد :آآآآي .. بسير المستشفى ما روم !! عظامي !!! عظام صبوعي !!

اليدة : بلاهن صبوعك؟

راشد محتشر : بندتوا الدريشة على صبوعي !! اعنبوا ما تشوفون؟ آآآخ !!! اوووف اوووف ..(وينفخ على صبوعه ..) اوووووه يعوّر !!!

احمد يضحك : حوباتي عشان ما اتوايج عليهم !!

اليدة : وحدة بوحدة .. يوم بندت الباب على صبيعاتها !!

راشد معصب : انزين انا ما كنت ادري !!

اليدة : هي بعد ماكانت تدري !! سر سر حط لها ثلج وبتستوي بخير .. (ويوم دخلت داخل ..) طلعن !! طلعن ثره يتمصخر ..

(اما عند زينة ..)

زينة اتداوي مي : ويييه حسبي الله عليه من صبي !!

فاضل : انا باجر برمسه .. جيه؟ احينه بيشوّهج وبيطردونج من الشغل !!

مي تزاعج : وانته كل همك الشغل والبيزات؟ آآآخ شفتي ويهي؟ والله طر عند بوزي .. ومنيه .. ومنيه !! الله ياخذك يا ميود !! (وتصيح صياح .. اما اليوم الثاني .. نشت غريبة من صباح الله ..)

غريبة : ابويه محمد .. (وكان ينظف الموتر كعادته ..) يالله بنطلع ..

محمد : ان شاء الله ماما ..

(وكانت الساعة 7 الصبح .. ما اتريقت بس شربت قهوتها عالريج .. وظهرت وهي الهم ماكلنها ..)

غريبة فخاطرها : يالله كيف بناتي اتغّيرن عليّة .. مي مب عايبنها الوضع وقامت تسبني .. وهندوه عيونها فاضحتنها من الغبنة .. انزين انا شو اسوي؟ تراني آدمية وأغلط .. دوم المصايب تي على راسي .. وتنحل .. الا سالفة البيت .. البيت عمره ما بينباع وراسي يشم الهوا ..

غريبة تبتسم : مرحبا الساع ..

عيسى : مرحبا ملايين ..

غريبة : يالله عالقاطع احينه اتذكرت انه عندك ام؟

عيسى : مادري يا ااميه حلمت حلم .. وحسيت شي ياكلني .. من غير انا انتي دوم على بالي .. (وغريبة اتذكرت مي وسكتت .. ) في شي مستوي؟

غريبة : ابدا يابويه .. انا احينه سايرة عند يدتك وخواتك تراهم بايتين في المزرعة .. (وتخبره عن الملجة ..)

عيسى : انتي شفتي الريال؟

غريبة : يابويه الريال ما يعيبه أي شي .. بس هذي افكار لندن اللي مخربتنه .. يتحرى هندوه ربيعته !!

عيسى عصب : شو تقولين؟ ربيعته؟ شو قصدج؟

غريبة : يعني هندوه اتطوّلها وهي قصيرة .. تغار على ريلها بس !!

عيسى : هييه اتحريتج اتقولين شي ثاني ..

غريبة : انته خبرني شو حالك؟ متوّله علينا ؟ متوّله على طبيخي؟

عيسى : يالله يا اميه .. متوله على غرّوبة !! اتعرفين انتي اني انا احبج ..

غريبة تدمع عينها : وحد ما يحب أمه؟

عيسى : والله اتدوريلي على حرمة شراتج !!شرا طبعج والله لآخذها !! حتى لو كانت خسفة !!

غريبة : وابويه عليك وانا خسفة؟

عيسى : هههههههههه ماماتي انا اقول لو البنية خسفة ومتطبعة بطبعج باخذها !!

غريبة : ويه يعلني افدا منطوقك يابويه .. ومتى بترد بالسلامة؟

عيسى : بشيرج .. آخر الاسبوع .. يوم الخميس !!

غريبة: لالا؟ صدق؟

عيسى : والله صدق .. يالله اسميني متوله عليج ..

غريبة : فرحتني الله يفرح قلبك ان شاء الله .. ابويه.. بجهّز غرفتك وبدخنها وبعدلها .. يالله البيت بيشرق بردتك ..

عيسى : الا البيت منوّر براعيته !! (واترخص عنها وبند ..وكانت اتكلم الدريول ..) لف يمين واقبض الخط سيده .. هيييه .. دوار يسار .. (ومن وصلت ..) شحالج ام مي؟

زينة : بخير يا عيوني .. شو هالزيارة اللي تسر؟

غريبة : بلاه ويهج؟ شكلج هب راقدة ..

زينة : كنت سهرانة مع مي .. استريحي ياعيوني ..

غريبو : شو فيها بنتي؟ واعلية عليها !!!

زينة : ميود سار لمكان شغلها وضربها !!

غريبة منصدمة : شو تقولين؟ ودّيني غرفتها !!

فاضل : استريحي مكانج !! يالله بصباح خير !!

غريبة : بنتي وبتمنعني عنها ؟

زينة : انا راح اسويلكم قهوة .. فاضل !! هد الوضع !! (وسارت المطبخ )

فاضل : من متى بنتج؟ (ومي تسمع صوت غريبة .. وكانت متلهفة تشوف ويهها .. ويوم طلعت شوي شوي ..)

فاضل صد : مي؟ شو مطلعنج؟ ردي حجرتج !!

غريبة توّها بتسير ل مي : مي غناتي ..

مي : انا قلت لج .. انتي مب اميه .. بلاج؟ اتكلم هندي انا؟

غريبة : لو تقولين اللي تقولينه انا امج !! اعنبوا اتنكّرين لأمج؟

فاضل : سيري غرفتج يا مي !!

مي : ما خلصت كلامي !! انتي منوه عشان اتحددين الأمومة ؟ انتي ام عيسى !! مب أمي !! مادري منو قاص عليج .. ممكن تذلفين عن ويهي لأني مادانيج ..

غريبة : بس انا احبج .. انا امج اللي ربتج !!

مي : طز !! اتعرفين شو طز؟ يعني لو تذرفين دموعج دم ولو آخر نفس اللي تنفسينه هو الموت بيكون عندي العيد بذاته !! يالله انفدي عن ويهي !!

(غريبة نزلت دموعها .. اعنبوا ليش كل هالكراهية؟ وروحت مي لغرفتها .. وهي متغايظة الا مقهورة ..)

غريبة : سمعت شو قالت؟ اعنبوا داركم كرهتوا البنية فأمها؟

فاضل : تستاهلين من هذاوأزيّد !! شو يايبنج هنيه؟ تبيني أردج؟

غريبة : قصوري بعد ان فكرت فيك !! (واتطلع الورقة من مخباها وتفرها عالارض ) انته آدمي؟ منو إمرك تبيع البيت؟ بعد ما كتبت لك البيت بإسمك جذيه تسوي؟

فاضل :ههههههههه انا من شهر بايعنه !! وشكله توّة واصلنج التحذير !!

غريبة : خاف الله وانا؟ وعيالك؟ وين نسير؟

فاضل : وأبوج؟ هاكي الشيبة الأصمخ يكوّد البيزات لمنو؟ سكني عنده !! مش مشكلتي !! انا ما يخصني !!

غريبة : والبيت اللي نحن فيه؟ خاف الله هذا البيت لامّنا !!

فاضل : كلمة ثانية وبفّرج بأي شي جدامي ..يالله فارجي !!

غريبة : هب طالعة شو بتسوي؟ بلّغ الشرطة !!

فاضل يمسكها ويدفرها عالارض : برع يا ويه السقم !!!

غريبة : سقم؟ سقم؟ بس ترد بيتي !! بيتي !! انا حياتي وياك كانت سقم !! ومن طلقتني اعتدلت حياتي !! بس رديت اتخبرها من خذت بناتي .. وبيتي !!!

فاضل : ردت وقالت بيتي !! طل !! بيتج !! بعناه وشبعنا بنص بيزاته !!

غريبة تصيح : يعله زقوم فجبدك ان شاء الله .. وما اتهنّى بفلس حمر ببطنك !!

فاضل: شفتي؟ ادريبج حسودة !! برع !! برع يا بنت الشوارع !! سيري بيعي عمرج بتحصلين لج على بيت ..

(ويسحبها ويدفرها برع )

غريبة :آآآآخ !! (وطاحت ع دجة الدري ..) آآي ظهري !!

الدريول يربع لها بايوّد ايدها : ماما !! ماما !!

غريبة تتألم وما خلته يدقها : لالالالا انا بخير .. (وقامت شوي شوي .. وهي تصيح .. بس قامت ومسحت دموعها بتكبر .. عشان ما تبيّن للدريول هزيمتها .. ركبت الموتر ..) محمد !!ردني ليوا .. (وهي في الموتر جاسها هبوط .. ما كانت اتحس بعمرها اتدوّخ .. وترد مرة ثانية تبا تقول شي وتدوّخ مرة ثانية .. ) يالله !!

(وصلت البيت .. وكان حمد واقف عند الباب يترياها ..)

حمد: وين سرتي ؟ ما سرتي عند امج؟

غريبة تناهي : لا يابويه .. ما سرت .. ادخل ابويه ادخل ..

حمد: عيل وين سرحتي؟

غريبة: سرت البنك .. يالله بويه ادخل بسوي لك الغدا ..

حمد : خلاص قلت حق البشكارة تسوي .. تعالي اتغدي عندي ..

غريبة : ابويه مالي خاطر اتغدا ..

حمد : بلاج؟ محتاية شي؟ بيزات؟ مادفعتوا مال الكهرباء؟

غريبة : لا يابويه خيرك سابق .. (والصيحة يايتنها .. ) الله يطولي بعمرك !!

حمد : انزين العصر بمر عليج بنسير عزبة نشيبة نتمشى !! جيه عيل هم بس يتمشون؟ انا وبنتي بنتمشى بعد !!

غريبة : من عيوني .. يالله بويه سامحني بسير استريح .. انته سر اتغدى وارقد ..

(وروحت عنه وسارت داخل ..) يا زهووور؟ زهووور؟

زهور : نعم ماما؟

غريبة : اتغديتي؟

زهور : لا ماما اسوي انتي سبري
غريبة : فديتج سيري اتغدي انا مابا .. لا تخلين لي .. شوفي اذا ياء ميود ناديني ..

زهور : اوكي ماما

(وغريبة سارت المطبخ لبجت الضو .. عشان اتدخن حجرة عيسى .. وسارت فوق ..)

غريبة اتعج عباتها وشيلتها : متى ردتك يا عواس ؟ انته انته اللي بتيّمعهم كلهم !! كله بإيدك انته !! فديتك وفديت طاريك يابويه !!

(حطت المدخن ودارت على الغرفة كاملة .. وقامت اتشم ثيابه من غلاته .. شلت سفرته .. وسارت حجرتها بدلت ملابسها وانسدحت ع فراشها اتصيح .. تتذكر مي كيف كانت اتعاملها .. كأنها عدوة .. وبعدها السفرة فإيدها .. وغمضت عينها .. اما في حجرة عواس كانت الضو شابة وكله من المدخن في الكبت وقامت تتوسع وتزيد اللهيب .. وكانت غريبة تتجلب من الحر .. ) __DEFINE_LIKE_SHARE__

غاايه · 02-18-2008, 03:17 PM

اوييييييييييه

مسكيييينه غرييييييييبه هالمصايب كلها ومستحمله

ثاانكس علياا نتريا التكمله فديييتج __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
乂°•..•°乂 جــراجــتي أتـجـرج فونـكم بدون كهـرباء ((مع فيديو للشرح)) 乂°•..•°乂	كوين فاشن	بيع و شراء و عروض التجارية	9	11-27-2012 10:24 AM
乂★乂☆乂(( عروس مسوية الكيكة على شكلهــــــــــــــــــا )) 乂★乂☆乂	♕ وليد الجسمي ♕	فن المطبخ والطبخ	25	08-09-2010 06:13 PM