乂آآه يا ويـــله .. قلــــبٍ صويــبٍ بانــت أقداره乂 - الصفحة 115

شوقي لمكة · 10-13-2008, 09:29 AM

تسلمين عليا ع البارت

وعيسى عين العقل اذا رضى ع فطوم

والله ما تستاهل اللي يصيرلها __DEFINE_LIKE_SHARE__

ذبحهم غلاي · 10-13-2008, 04:04 PM

تسلمين ع البارت
نتريا البارت الياي __DEFINE_LIKE_SHARE__

شيوخيه بطبعي · 10-13-2008, 07:10 PM

تسلمين ختيه ونرقب البارت الياي على احر من اليمر..

اختج شيوخيه بطبعي... __DEFINE_LIKE_SHARE__

عليا · 10-14-2008, 04:52 PM

(الجزء 97 )

(رد راشد وهو مسرع ..وطهف وراه من كثر ما يسرع ..)

راشد داخل : وينها؟ أقولج وينها؟

الجود : أول شي قول لا إله الا الله ..

راشد : لا إله الا الله .. (وراوته التسجيل ..)

الجود : طالع عدل .. دقق .. البطلة .. هذي هي هنود .. شو فها عدل ..

راشد : اقطعي !! (معناتها انطبي .. سكتت وهو يطالع ومتفاجئ )

راشد فخاطره : شو اللي خلّاج تتنزلين وتسوين بعمرج جذيه؟ كله مني !! انا اللي بهدلتج وشتتج .. وأحينه شردتي من كل شي وغديتي بنت فيديو كليب .. بس ليش قلبي مب مطمن !!

راشد : انا طالع .. (ويرّض لباب وراه .. سار القناة ومن وصل .. ما حصل حد غير الموظفين ..) لو سمحت؟

نادر : نعم ..

راشد : مدير المحطة موجود؟

نادر : لا والله راح البيت ..

راشد : ممكن عنوان بيته أو رقمه؟

نادر آسف هذي معلومات خاصة .. تقدر بكرة تاخذ موعد مع سكرتيرته ..

(راشد أسلوبه دوم دفش .. فر على طاولته البيزات ..)

راشد : والحين؟

نادر مبجج عيونه : آسف ما اقدر (وغامضتنه البيزات .. وراشد حزتها مسكه من ثيابه )

راشد محمر ويهه : شوف انا واصل حدي .. ان ما عطيتني لأزجر الشرطة لكم وأجلبه هالمكان ..

نادر : خذ الرقم خذ !! (ويعطيه )

راشد : عفانا الله بالطيب محد يباه لازم نحسّر عن إيدينا !! وبالمناسبة الكليب اللي تعرضونه حصري ..

نادر : قصدكالفنان ؟ إيييه شو فيه؟

راشد : شو اسمها البنية ؟

نادر : امممم ريم إيييه اسمها ريم ..يخربيتها شو جميلة ..

راشد عصب : يخربيتك انته يالهرم !! حشّم وغد ريال !!

نادر : بتعرفها؟

راشد : حرمتي !!

نادر : أنوو حرمة؟ هادي مو متزوجة!!

راشد : عطني رقمها او عنوانها ..

نادر: تريد الخبر اليقين ؟ انا راح أجيبلك إياه .. عطني رقمك وانا راح أتصل بيك لأنه بعد بكرة راح تعمل برنامج .. راح يخلي القناة تشتهر ..

راشد : كسّر الله راسك وراسها ان شاء الله ..(ويكتب رقمه ..) أي شي عن هالبنية تعلمني مفهوم ؟

نادر : ان شاء الله (وأول ما ركب الموتر سيده يتصل )

راشد : السلام عليكم ..

حمد : عليكم السلام ..

راشد : حمد صالح؟

حمد: هيه نعم ..

راشد : وياك راشد بن سالم

حمد : المليونير؟

راشد : هيه نعم ..

حمد: يالله يا طويل العمر آمرني ..

راشد : البنت اللي فقناتكم ..

حمد : قصدك الريم صح؟

راشد : كيف عرفت؟

حمد: لأنه يتني اتصالات وايد من شخصيات مهمة .. معجبين فيها ويمدحونها ..

راشد : شو هذيلا ما يحشمون !!! شوف والله ثم والله القناة ببندها ..

حمد : هد بالك يا طويل العمر ليش معصب؟ كل اللي تباه بيستوي انته بس آمر ..

راشد : ابا اقابل هالبنية ريم .. ولا ما ادري شو اسمها ..

حمد : الحينه ؟ بس الوقت متأخر ..

راشد : وانا وين بييني رقاد؟ عندك رقمها ؟

حمد : أكيد اتفضل .. (وهو يعطيه الرقم )

راشد : شكرا .. (وبند فويهه ويتصل بس يظهر عنده اسم مي ..) مي؟ ليش رقمها؟ ألووو؟

مي : ها رشود ؟

راشد : شحالج؟

مي : ربي يسلمك غريبة شو هالاتصال ؟

راشد ساير بيت قوم مي : ماشي بسألج عن هنود ..

مي زاغت : هنود ؟ وانا شدراني؟ هاااه؟

راشد : بسم الله بلاج شابة ضو؟ انا بس أسألج ..

مي : لا .. بس انته ما تتصل الا ووراك شي ..

راشد : وانتي يا اخت حرمتيه ما وراج شي ؟

مي : أقول يالله باي .. (وما وحاله انه وصل ويدق الجرس ..)

راشد : أقول زجري مي قوليلها ريال يباج ان قلتي لها راشد يباج بجتلج ..

البشكارة : بابا هزا انته ما تعرف .. ماما مي وايد جير في سوي سيرجري مشان وجه مال هي ..

راشد : سيرجري؟ ليش بلاها؟

البشكارة : هيّه في سوي سيم سيم فيس ماماهند والله بابا

راشد : إشوووه؟

البشكارة : هيه والله انا في نادي ..

راشد بعده مب مستوعب : سيري زجريها .. (وهي سارت ) كيف بعد جذيه؟ لا يكون هندوه عندهم ؟ عشان جذيه سايرة المستشفى هاكي اليوم توّدي مي ..

مي بطلت الباب : نعم ؟ (اثنينتهم انصدموا ..)ررر راشد؟

راشد : هنود ؟ (وهي صدت تبا تشرد وزخاها ..) على وين؟

مي: هدني !! الله يخليك هدني .. (وقلبها بيطلع من مكانه زايغه وايد ..)

راشد : وين بتشردين؟

مي: انا مي مب هنود !!

راشد : اتقصين على منو حضرتج؟ شردتي من قبل أحينه ما بخليج ..

مي : والله العظيم انا مب هنود .. انا مي .. شوف هنود أطول عني انا قصيرة .. شوف هالندب .. (وتراويه آثار العملية ) ندب العملية .. استويت شرات هنود .. يعني ما ينعرف صوتي من صوتها؟

راشد : ما أصدق !! (ومنصدم واييد من اللي مستوي )

مي : هند كانت من سنين فمستشفىالأمل .. خاشنها أبويه .. دفع حق الفلبينية تآويها .. ويوم دريت ظهرتها سيده ..بس ما وديتها البيت وديتها ويايه المستشفى عشان يسوون لي العملية وأغدي شراتها وانا روحي سألتها وهي وافقت .. وخذيت رايها ..

راشد معصب وواصل حده : في شوه؟ في العملية ؟ تطلعين تشبهينها؟ يا حرمة خافي الله !!

مي عصبت وتصفعه طراف : عشان تصحى !! جاب يالله جاب !!

راشد يبتسم والمكان اللي ضربته معّلم وغادي أحمر على ويهه : مشكورة .. قبل ما اتدبرين حضرة جنابج .. وين هنود ؟

مي بانفعال: تسألني انا؟ كانت وياي في المستشفى وبعدها يوم نشيت ما حصلتها .. دوّرتها .. خلها تنفد ما حطت حد في الاعتبار .. هاي روحها تبا الفكة منا .. (وتروح عنه )

راشد : صدقيني هالسالفة مب ساكت عنها .. تسمعين؟ بعد كل اللي سوّته لج وبعد تنكرين جمايلها عليج ؟

مي: اللي فراسك سوّة !! مريض نفسي ..

راشد ركب موتره : والله مادري منو المريض النفسي انا ولا انتي !! والله هندوه احلى عنج يالحيوانة بحشمتها .. منو بياخذج انتي يالفالتوه ؟ لا وبعد تبين توصلين لجمالها لو تموتين ما استويتي شراتها .. يعل الله يخسف بج شرات ما سويتيبها ..

(اما عند بيت حمد )

ميثاء : عواس .. شو رايك تبات عندنا ؟

شمايل : ومحرمنا؟

مايد : وانا شو جدامج؟ ما اييوز؟

شمايل تضحك : لا ما اييوز مييوووط..

مايد يتحرطم : أظني الا تشوفيني حريموه جدامج !! وابويه عليج انا !!

رشود : انف عليك .. ميووط عيبن عليك ما يقولون هالكلام

مايد : انطب انته !!

عواس: فطوم سيري هاتي لي جلاص وفيه ثلج ..

فطيم مستانسة : ان شاء الله (وردت يايبة الجلاص )

عواس : اوووه سيري هاتي الاورنامين في الثلاجة ..

فطيم : ان شاء الله

مايد : أيواااااااااا .. اشتغل شغل المذلة ..

عواس يضحك ويصاصر ميود : اسكت .. اسكت .. اباها اتعصب ..

فطيم : تفضل ..

عواس: سيري حطي العشاء يوعان ميت !!

فطيم : ان شاء الله

نشبة : يالله يابوك ما يسوى عليك ..

عواس: باجر خلصوا الغدا من وقت تراني بطلعكم ..

نشبة : جيه شو عندك؟

عواس : بحوّطكم ..

شما : الله يحفظك في صورة يابويه .. عنبوا القايلة نحن نرقد عادة ..

عواس قام عن ثبان نشبة : نسيتي فطيم الدقوس .. (وروحت وهي تتحرطم ) لالالا ما عليّة انا من كلامج ان ما سرتي بتتكنسل السيرة ..

نشبة : ويدي من زود الشغل عندج؟ ما عليك منها هاي وين ترقد؟ عيونها مبججه تتريا الاخبار المحلية ..

عواس : أصلا ما اصبر عن شما النسيم لو مب يدي بييلس جدام جان يلستج حذالي ..

نشبة : هاااه هااه هاااه استريح !! استريح !! (وترمس شوي شوي جدام ميود ) ما فينا بعد تعطيه هذيجي البخة ويدوّخ علينا .. لا يابويه ..

(ميود ميت من الضحك )

رشود : شفت انك مب أبو كفو!! مب مواعدني بتعلمني السواقه؟

ميثاء: جاب يالله جاب وتطوّل لسانك على أخوك ؟

نشبة : بلاج ميثوه؟ الولد يتمصخر .. فيج شي ؟

ميثاء : لا ماشي .. بسير أرمس البشكارة ..

عواس سحب رشود : ها بن دعوان؟ زعلان من يدتك؟

رشود : هيييه .. ولا بكلمها أبدا ..

عواس: انف عليك .. الرياييل ما يسوون جذيه .. سر جان تباني أعلمك السواقه .. سر راضها وحبها على راسها وشعرها وخشمها .. وبرقعها وحيس لها البرقع من الحب ..

رشود يبتسم : افا عليك ما طلبت .. أحبك انته يا حلو .. (ويوم وصل المطبخ .. يصيح يتويع ) يدووووه !! آآآآي إلحقي عليّة بطني يعورني .. آآآي ودوني الدكتر ..

ميثاء سارت تطالعه : بسم الله عليك شو ماكل؟ أشوف؟ بتزوع؟

راشد يوم حادها موّخية : اموااااح امواااااح اموااااح .. وياج صادوه رشود !! أحبج انتي يا حلوة .. امواح امواح ماواح رضيتي ؟

ميثاء : بس يابويه الله يهدي سرّك مسموح مسموح !!

راشد : لالالالا مييوط قاللي لا توّدرها الا احبج ياحلوة هاتي راسج وبرقعج بعد !!

ميثاء : بس بوطبر ..

راشد : ما شبعت منج !! (وهو يحبها وهي تضحك مب رايمه تيوّد عمرها ..) انا ادري انج تحبيني جان قلتي لي من زمان .. جان خذتج !!

ميثاء: طاعوا مذاهبهم هالعيال ما يفكرون الا بالعرس ..

(اما في الصالة )

اليد : إشوووه؟

نشبة : أقولك باجر باجر الصبح ..

اليد : ما أسمعج انتي شو تخربطين؟

نشبة حلجها عوّرها : لا حول ولا قوة .. أقولك باجر باجر الصبح أباك توّديني العزبة !!

اليد: أدريبج انج نشبة ..

نشبة : يا صبر أيوب .. اعنبوك أصمخ ؟

اليد : شو تقولين ؟

نشبة عصبت : أقول استغفر الله العظيم ..

مايد يضحك : برايه استغفري استغفري ..

نشبة : حسبي الله عليه رفع لي الضغط ..

اليد : وانتي من سبّج بتطيحين في النار .. (شمايل تطالعهم وتضحك )

فطيم فخاطرها : فديت ويهه .. ياربي كيف استوا غاوي جذيه .. (وهو يلعب بتيلفونه )

عواس يتثاوب : شمايل انا برقد هنه ..

شمايل: بتوّدرنا؟

عواس: أكيد لا .. بس متوله على اخواني .. قولي حق خالوه باجر الدكتورة بيييبها ..

كلهم : أي دكتورة؟؟

عواس احمر ويهه : هاي ويانا في الشغل دكتورة نفسية .. وخالوه موصّتني.. أييبها حق هنوه

نشبة : لاحول ولا قوة هالبنية مادري بلاها هب طبيعية

شما : عادة شعنه ما قالت من قبل انها ما تبا حسن؟

عواس: بعد ربكم يوم بيستوي شي .. يالله تصبحون على خير .. (وسار فوق ويغمز لميود عشان يلحقه .. من وصلوا الحجرة .. ) بسوي مقلب في العيايز ...

مايد : بتزيّغهن؟ مب ناقصات في الليل !!

عواس: اسمع انته بس .. (ورشود داش ..)

رشود : انا بسمع ليش ما اسمع !!!

عواس يغلظ صوته : السلاموو عليكووم ؟ (ميود مبتسم وحفزان ورشود يضحك ومتشجج )

نشبة بحزم : مرحبا ..

عواس : كيف حالييك؟

نشبة : حمدلله

عواس: كيف حالييك حجية ؟ ان شاء الله منيحه؟

نشبة تقاطعه : حمدلله ..

عواس: انا المدرس بتاع راشد اللي راح أعلمه يضمر الجمال ..

نشبة : هــيييه شو علومك؟

عواس يضحك عالهزاز : علومي طيبة الحمدلله بخير ..

نشبة : حمدلله تستاهل ..

عواس : انا بالأردن .. بالأردن موجود ..

نشبة : هيه في الأردن انزين شو تباني أسويبك في الأردن؟

(ميود يصقع من خاطره ..)

عواس: والله انتي قلتي حق راشد لما تطلع عالمزرعه بدك تعطيني فلوس وجواز ..

نشبة : فلوس وجواز؟ متى قلت ؟ حشا علية .. بنسير بك صوب الشيوخ بيعطونك الفلوس والجوااااز وبيوّزونك بعد فالك طيب ..

عواس: لااا .. ما بدي .. مابدي .. بدي أتزوجك انتي ..

نشبة منصدمة : انااا؟ لا مب على منيّة هههههههه (وترمس شما وميثاء ) يباني أنا مدرس رشود اللي بيعلمه يضمر رجاب .. (وتكلمه ) لالا انا ما أتجوز اليوم ..

شما : قوليله عيب عليه طفس واحد !!

عواس: لا بدي أتجوزك ..

نشبة : لالا حد يعرس اليوم ؟ العيوز ما تعرس ..

عواس: لا انا بحب العجايز ..

ميود : عطها عطاه من هاكي الزين !! خخخخخخخخ

نشبة : لا عليّة اتخسي عن العيايز هههه

عواس: حرام عليكي .. انا من سمعت صوتك حبيتك ..

رشود : ايوا يا عاشق ..

نشبة : حبيتنيّة .. انزين حبيتنيّة آخذك عادة ؟ مب شور هذا !! اعنبوا خذ من رفايجك .. رفايجك في الأردن مكّودين !!

عواس: لالا بدي مواطنة مشان يطلع لي جواز

نشبة : مواطنة انزين ما عليه وايد غيريّة دوّر ..

عواس : لا بدي ياكي انا .. اذا ما اتجوزتك بدي أموت يعني

نشبة : هاه؟ لالا هب ميّت بيتجوزني انا .. عيبن عليّة .. اليوم أم عيال .. انا يدة اليوم

اليد : طاعوا الجذابة !!

نشبة : عيل هذي سمعتها يا منكرك !!

عواس: بتعرفي رشود شو عمل فيني ؟

نشبة تقلد اليد : هاااه؟ ما أسمعك !!

عواس : رشود .. رشود ضربني !!

نشبة : ضربك رشود ؟ أجدا فيك !!ههههههه

عواس: بدي أتجوزك عشان لما تموتي أروثك ..

نشبة عصبت وفوّلت : بعمرك يعله بعمرك .. هب هباك الله .. هب .. يعله بعمرك يا ربيه .. ما تسوا عليّة هالدراسة ... رشود بندوّر له معلم ثاني غيرك ..

عواس ويرد صوته العادي : عيل ثرج تبين تعرسين هااه يا عموه؟

نشبة : جيه منو انته؟ أبووووووووووووووووه .. ويدي تغربلت يا ميود !!

عواس: هيييييه ميود ما عرفتيني؟

مايد : كلاك الساحق يالحيوان .. والله عمووه لا تصدقينه جذاب عود هذا !!

نشبة : عواس؟ ويدي غربل الله منكرك !! بدينا بالمغازل ؟

عواس : لا خالوه قصدي لا عموه بس أتمصخر وياج .. بمزج معك ..

نشبة : انا لو أقدر يالهيس أركب الدري جان ييتك هرم واحد !!

(وبندت فويهه ويضحك اليد كان ميت من الضحك )

عواس: هههههههههههههاي

رشود : كااااك كااااك قطعووه الا نتفوووه !!

مايد : مالك ويه بعد نظهرهم باجر؟

عواس: لا والله لي ويه .. مييوط؟

مايد : هااا عواط ؟

عواس: لو .. لو .. أقول فرضا ..

مايد : هيييييييه؟

عواس: لو .. لو .. ؟ (ويصاصر ميود .. وهاكي منصدم)

مايد : واعثرتنا واعثرتنا !! انته اتخبلت؟ كيف؟

عواس: ياخي استر الله يهديك .. (ويصاصره ..)

مايد : ياويلك ويلاه أسميه البيت بيشّب ضو !! وانته صدق مقرر هالشي؟

عواس: مادري بعدني أفكر .. بس مأجلنه لأنه هب وقته ...

مايد : ياويلك وسواد ليلك من لياليك ما بتحصل غير رش وسب ونعول وطردة محترمة !!

(عواس مب مهتم لكلام ميود ويتصل .. اما عند سارة .. انا بترجم )

سار : شحالك؟ انا بخير .. سمعت من أمي انك وايد تضغط على عمرك .. شوف يا حبيبي .. نحن متفقين شؤون البلاد .. لو سمحت لا تقاطعني .. انته مهما يكون أبويه على عيني وراسي بس صحتك أهم .. العام الجلطة الثانية لك .. واذا ما انتبهت صدقني بيزداد عليك الألم .. والله يستر من الثالثة .. تعرف اني احبك .. ان شاء الله بعد شهر و 10 أيام بس أتريا يخلص العقد وياهم ..ههههههه لا حبيب ولا صديق .. شغلي أهم .. هيييه آكل برياني ..هههههه سنتين يا بابا يعني لازم أتعلم أكلهم وعاداتهم حتى اني ألبس العباة وصلتكم الصورة وانا بالعباة .. (وتصيح ) والله متولهه عليكم .. منو بيي؟ خالي جيمس ؟ وحرمته ؟ ههههه هذي اتخبلت؟ شكلها تبا اتربي في الامارات .. ههههههه حياهم الله على قولة UAE people بابا؟ سلّم على أمي وتعرف اني I love you انا بعد .. لا بسويله باجر تيلفون وبسأله عن موعد طيارته .. ولا يهمك ... أحبك بابا .. باي ..

عواس عصب : هاي منو ترمس فنصايف الليل؟ حسبي الله على ابليس ..

مايد : منوووه؟

عواس : سارووه الحيوانة مادري منو ترمس !!تيلفونها مشغول !!

مايد : البيت ولا الموبايل؟

عواس: البيت !! انا براويج ردي علية انتي بس !!

(وهي تشوف رقمه )

سارة : ما أقدر صدقني ما أقدر انته ملزم انك تنعجب فية او حتى تحبني بس عشانك قريت مذكراتي .. وانا ما اريد هالشي .. انا آسفه عن حق .. فخاطري أرد وأقول اني أحبك يا عيسى ..

(اما شمايل ..يوم وصلت البيت )

شمسة : وين عيسى؟

شمايل: بيبات فبيت يدوه ميثوه ..

شمسة : هيييه بدينا !! باجر بيقول ببات بعد !!

شمايل متعجبة من أمها : امايا؟ مب جنج أنانية؟

شمسة : انا احينه انانية؟

شمايل : هيه انانية .. تراه آدمي وعنده روح ارحميه شوية وخليه ياخذ راحته ..

شمسة : وانا شو قلت؟

شمايل : انا بسير أرقد ..

(اما اليوم الثاني كان عواس ناش .. وعيونه تعبانة .. كان يرقد وينش يحاتيها .. ناش ما يبا يكلم حد ..)

اليد : بلاك؟

عواس : ابويه ما بلاني شي ..بس رشود محموم ..وما بيسير المدرسة

اليد : عطيته دوا ؟

عواس: والله الساعه 3 قمت وسرت الصيدلية ويبت له خافض الحرارة .. تم حليله ينتفض بس أحينه أشوفه خفت عنه .. ميود قال بيجابله .. انا ساير الدوام .. (وهو طالع ) ألو ؟

راشد : السلام عليكم

عواس : عليكم السلام

راشد : شحالك عواس؟

عواس: ابنعمه .. ومن صوبك؟

راشد : ربي يعافيك .. ( وسكت )

عواس : فخاطرك برمسه ؟ عجها ..

راشد : هندوه ..

عواس: لا إله الا الله .. ردينا ؟

راشد : والله اني شفتها ..

عواس: انته سكران؟ شارب شي صح ؟ ولا شوه؟

راشد : لو سكران جان ما اعترفت أختك ميوه بالسالفة كلها ..

عواس : أي سالفة بعد؟

راشد : بطّل التيلفزيون الحينه .. وحط على هذي القناة ................

عواس: اصبر ... (ويربع للميلس ويبطل التلفزيون ..) شو يعني ؟ أغاني .. والله انك انساااا (وكأنه لسانه انقطع وبصوت خافت ) هن .. هنود؟ هنود أختيه؟ (انصدم صدمته من اللي شافه )

راشد : أدري انعقد لسانك عيل انا شو أقول؟ من البارحة وانا على هالحالة .. لا رقاد لا أكل لا قلب يخفق .. وهاي هب هندوه !!

عواس بعصبية : كل هذا وهب هنوده؟ كل هذا وهب هندوه ؟ ياخي خاف الله !! على الاقل يوم شفتها جان سحبتها من كشتها وراويتها صنع الله بدال ما تفضحنا جذه .. لا بارك الله فيها .. حسبي الله عليها ألف تحاسيبه !!

راشد : لا تدعي عليها !! قلت لك هاي هب هندوه !! هذي ميوه الجلبة !! تعرف اختك شو سوّت؟ سحبت هندوه من مستشفى الامل اللي كلنا اندوّرها فيه طلعت مخدرة هناك .. ومدسوسة فحجرة الناطور .. لا هي حية ولا ميتة !! وأختك شلتها ووين ودتها؟ سيده على عيادة التجميل عشان تغدي شرات هنيد .. آآآه يا هنيد !!

(ويخبره بكل شي .. اما مي ما عرفت ترقد الليل من الزياغ اللي جاسها .. قامت تلبست وطلعت وكانت وجهتها قبل ما تسير القناة .. هاكي المكان .. كانت مقوية قلبها على اللي بتسويه .. اما فموقع التصوير ..)

حمد : انا ادري باللي استوا .. بس اذا كان هذا حلمج انا بحققه لج ..

مي مب مصدقة : صدق؟ صدق يا استاذ حمد ؟

حمد : صدق واللي قاله راشد يعجه في البحر .. انتي مذيعتنا وما في أي شي بيخلينا نخسرج ..

مي مبتسمة : أكيد ..

حمد : سيري اتلبسي لين يجهزون المكان عشان نسوي الدعايا ..

مي: ان شاء الله

(اما في الموتر )

عواس : لابارك الله فيها من بنية !! فضحتنا والله لأجتلها !!

مايد : خلصنا من الجلبة هنوه ويتنا الجلبة ميوه !!

(وكانوا مفوّلين عالآخر .. ودمهم حامي .. انه عرضهم أختهم مذيعه لا وبعد بنت فيديو كليب .. ومن وصلوا بيت فاضل ما حصلوها ولا حصلوه هو بعد ..)

عواس: ألو؟ ها راشد .. اتدلها هذيجي القناة؟

راشد : هيه أدلها .. تباني أدليكم ؟ خلاص انا ياي ..

(وكانوا ثلاثتهم متفقين عليها هي .. وكل واحد ياخذ جزاه وياء جزاء مي ..)

مايد : هذي القناة؟

عواس: اصبر لا تنهّد !! خلنا انكلمها الضرب ما يفيد خلنا بالزين ..

مايد : كل هالتحليف في الموتر وما بتصطعها قليلة الأدب؟ لا حشمت ولا شي فضحتنا وفضحت أختنا .. اللي ما ندري وين الله حطها !!

(ويدليهم راشد المكان .. اما ماي كانت لابسه فستان أصفر كات وعليه كرستالات صفر على ذهبيات وشعرها منشول .. وحاطيلها آي شادوه أسود وروج وردي هادي .. وحاطين لها سماعه ما تبيّن فأذنها .. مغطي عليها شعرها ... وملبّسة عقد ب 5 آلاف درهم وكواشي كبار .. )

مي واقفة وتبتسم وزايغه فنفس الوقت : يا مرحبا بكم ويانا ..

حمد : ستوووب كات !! ريم حبيبتي . ابتسمي أشوف (وتبتسم ) بعد !! بعد !! ايواااا جذيه أباج .. وأباج يوم تقولين يا مرحبا مليون تقولينها بدلع أكثر ..

مي تبتسم له : أكثر عن جذيه؟

حمد : واايه خبلتي بي !!

مي : هههههههه تسلم يا عيوني ..

حمد : يالله نبدا .. آكشن ..

مي : يا مرحبا مليوون بمشاهدين قناة ................. وياكم الريم تطلبون .. تسمعون .. تستمتعون .. تشاهدون أحدث الأغاني والحصرية بس عندنا .. وفالكم طيب ما يردكم غير ........ ولا ما بعلمكم .. هههههههه تابعوني ولا تنسوني ..

حمد : ستوووووب !! أسميج خطيرة ..

مايد واقف عند الباب : نساج الموت يا عيوني !!

(هذا الصوت تعرفه انفضه جاستها .. مبججة عيونها .. كانت حاسة انهم بييون .. هذا اللي كانت حاسبة حسابه..)

مي فخاطرها : كوني قوية ولا ترحمينهم .. هم مارحموج من قبل انتي بترحمينهم الحينه؟ أبدا ..

(وكانوا ميود وراشد وعواس واقفين يتريون حضرتها تي عندهم .. بس عكست توقعاتهم ..)

مي وبكل جرأة حاطة ايدها على خاصرتها : اللي يباني إيي لين عندي .. انا ما أتنزل أسير عند حد !! __DEFINE_LIKE_SHARE__

غلآآآآآهـ · 10-14-2008, 08:09 PM

وااااااااااااااااااااااااااااااااااااااااااااااااا ااااااااااااااااااو عليوووووه الباااااااااااااااارت

رهيييييييييييييييييييييييييييييييييييييييييييييييي يييييييييييييييييييييب

متى بيكون البارت 98 مافيه صبر الله يهديج __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
乂°•..•°乂 جــراجــتي أتـجـرج فونـكم بدون كهـرباء ((مع فيديو للشرح)) 乂°•..•°乂	كوين فاشن	بيع و شراء و عروض التجارية	9	11-27-2012 10:24 AM
乂★乂☆乂(( عروس مسوية الكيكة على شكلهــــــــــــــــــا )) 乂★乂☆乂	♕ وليد الجسمي ♕	فن المطبخ والطبخ	25	08-09-2010 06:13 PM