محاورة بين الشاص وراعيه

محروم.كوم · #1 12-07-2009, 02:10 AM

هذه مشاركة بسيطة عبارة عن محاوره بيني وبين الجيب الشاص (تويوتا) اقول فيها :

*راعي الشاص :

ياســــــلام الله على اللي مشتري شاصٍ(ن) جديدي **** هـــو سَنَدْه بشيِّة الله لا مشـــى بـأرض(ن) خليِّه

ماخـــسر في مشتراه ولـو دفع كـل الرصـــــــيدي **** مـــن ملك شـــاصٍ(ن) جـديدٍ(ن) واهنيِّه واهنيِّه

*الشاص :

مــرحباً بــاللي يســلم وانت ســــــواقي وســـيدي **** الله الله بـــالصـــــيانه والـــهدو وارفـــق علــيِّه

غــير زيــوتي ومسِّــح بــالفوط صــافي حـــديدي **** خلني بين المـــواتر وردةٍ(ن) دايـــــم طـــــريِّه

* راعي الشاص :

مــاطـلبت الا عمــارك فـــوق مطلــوبك نزيـــدي **** واردٍ(ن) حـــــقك عـــــلينا فــالصباح وفـالعشيِّه

الــمشي فــي الشاص الاول كــني مــوزع بـريدي **** وأنت مـــلزومٍ(ن) تريّح واقــفٍ(ن)في وسط فَيِّه

*الشاص :

لا تــحسب انــي ضعيفٍ(ن) ولا تحسب اني بليدي **** مــــنوتك لا مـــن ضــربت الخـط والا المهمهيِّه

وان ضــربت العــرق يــاعزيّز فهو ريفي وعيدي **** الـــــدّبل خـــله خفيـــف ولا عليـــك ولا عـــليِّه

* راعي الشاص :

والله انــي مــاحــقرتك خــابرٍ(ن) بــاسـك شديدي **** يشهد اللي له معك فــي البر روحـــاتٍ(ن) وجيَّه

مــار حــنا ذاخــرينك للــوعر واللــي بعيــــــدي **** يـــــالله التـــــوفيق يـــالمعبود يـــارب البـــريِّه

*الشاص :

صـــرت الاول واصـــبح النيسان ياعزيِّز طريدي **** فـــيه مـــــيزاتٍ(ن) ولكـــن مـــاقدر يعلى عليِّه

مـــن شــراني اشـــهد انه فـــاهم ورايه ســـديدي **** وان شـــرى غـيري يحصل فيه شاراتٍ(ن) رِدِيِّه

* راعي الشاص :

أنــت مـــا تحتــاج مدحٍ(ن) والحكي بك ما يفيدي **** مـــادحتك فـــعولك اللــي بيِّنه مـــاهـــي خـــفيِّه

مـــن يسبك فـاعرف انه جاهلٍ(ن) فيك او عنيدي **** يحكـم بغير الصـحيح ويــدري ان حكمــــه خطيَّه

*الشاص :

انشـــد الــرملة وهـــي اللـي تخْبر العلم الوكيدي **** يوم ان كلٍ(ن) راكبٍ(ن) شاصه وفي ساقة خويِّه

طـــرقةٍ(ن) فيهـــا يتبيَّن الجنيه مــن المجـــيدي **** خــــذت انـــا منه الشـــهاده نســـــــبتي ميه بميِّه

أبوعبدالله (شقراء)

__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
×××××××طير طيب وراعيه بياع ××××××××	محروم.كوم	منتدى أخبار المواقع والمنتديات العربية والأجنبية	0	04-07-2010 02:50 PM
جائزة لدائرة النقل في أبوظبي	دلــــــــوعة الامارات	اخبار محلية و عالمية	7	12-09-2009 06:38 PM
محاورة بين الشاص وراعيه	محروم.كوم	منتدى أخبار المواقع والمنتديات العربية والأجنبية	0	12-07-2009 02:00 AM
محاورة فكاهية بين متزوج و عزوبي	محروم.كوم	منتدى أخبار المواقع والمنتديات العربية والأجنبية	0	08-20-2009 02:18 AM
محاورة بين رمضان والناس	بنت السنينة	الإسلام والشريعة	10	08-14-2009 04:49 PM