حلفت لك والله والله منساك (قصة اماراتية ) روووعة

ملكة جمال العالم · 11-18-2011, 01:10 PM

البارت 5

علياء: منو
: انا ابراهيم ربيع مايد
علياء حست بنغزه في قلبها؛ بس ماعرفت شو السبب..
علياء: مايد وينه...
ابراهيم: والله ما اعرف شو اقولج...استوى حادث والحين نحن فالمستشفى..ومايد فالعنايه..
تمت الدنيا ادور على علياء..مااتعرف شو اتقول..هب مستوعبه اللي تسمعه وتمت اتصيح لا شعوريا واتصارخ..وكان ابراهيم يحاول يهديها فرت التلفون وطاحت علىالشبريه مسكت المخده وتمت اتصيح بصوت عالي...حست انه نفسها تنقبض..كانت مستعده اتسوي أي شيء عشان مايد..واتصلت بابراهيم وطلبت منه يخبرها كل شيء..قال انه في حالت غيبوبه..وعنده نزيف داخلي الين الحين ماقدروا يوقفونه..هذيج الساعه علياء حست انه الموت ياهه..فكرت بس بلحظه انها بتفقد مايد..مايد اللي كان كل حياتها..اتذكرت الماضي..اتذكرت اول يوم سولفت معاه على الماسنجر..وكيف قدر يخطف قلبها..مع هالانسان عرفت شيء اسمه حب..اتعلمت معاه احروفه من الالف الى الكاف "*احبك"* ،..كان الهوا اللي تتنفسه مثل ماهي كانت له الماء اللي يروي عطشه..
.
مر يوم كامل ومايد بعده في حالت غيبوبه..والدكتور خبر براهيم انهم وقفوا النزيف..وحالته الحين مستقره فاتصل وبشر علياء بـ هالخبر .. علياء طارت من الفرح وصلت ركعتين شكر لربها.. واليوم الثاني نش مايد من الغيبوبه..واتصل بعلياء واطمن عليها ...
.
.
.
ومرت الأيام والشهور..وموعد تخرج مايد من كلية زايد اقترب اكثر..يعني موعد زواجه من علياء اقترب بعد...

.
.
سيف كان حاس بـ هالشيء.. ان خلاص ماتمت إلا أيام ويودع حبيبته..اتحولت حياته الى جحيم لكنه أبد ماحاول يحسس علياء بحزنه وضيقه..بغى كل شيء مر بسلام ..مابغى يضيق عليها،وهي اللي كانت تتنتظر هاليوم..
.
.
.
وقبل العرس بـ 3 أيام ...
سيف وكل الحزن بصوته : هلا علياء
علياء: مرحبا سيف اشحالك
سيف: انا بخير دامني اسمع صوتج
علياء ساكته ما ردت عليه
سيف: الغاليه انا ما اريد اطول عليج بس بغيت منج وعد
علياء: آمر
سيف: ممكن اتدقيلي فالعيد واتعايدين عليه
علياء: بحاول ، ولو اني قلتلك خلاص ما بتسمع صوتي لكن اتـأكد انك بتكون دايما في قلبي ولا عمري بنساك

سيف ودموعه تنزل: اتحبيني؟
علياء: ................
سيف: بس جاوبيني وقولي الصراحه،..قوليها..
علياء حطت اغنية عبدالمجيد "* تنتظر كلمة احبك..شايفك مشغول فيها"*
سيف ماقدر يمسك عمره وتم يصيح لكن بدون ماتسمعه وقالها وهو يتنهد: خلاص ما اريد اعرف الجواب..بس بقولج شيء...
علياء: قول
سيف: بيي عرسج وبسلم على مايد ، يرضيج هالشيء
علياء: لا تقرب من مايد
سيف: ليش متروعه عليه لاتخافين ما بجتله..لوكانت هاي نيتيا..ماكنت بتريا الى هاليوم..
.
.
علياء خافت من رمست سيف وسكتت
سيف مارام يتحمل اكثر فا بند الخط وغلق تلفونه..وعلياء تمت ادقله لكن تلفونه كان مغلق..
.
.
ركب سيف سيارته وسرى صوب السيح...وقعد فوق العرقوب..دوم يروح هناك يوم يكون متضايق، تم يصيح ويندب حظه اللي عمره ما صفاله ..طرش حق علياء على البريد الصوتي شلة راكان:"*بحظر زفافك ياحياتي، بحظر زفاف اللي هويته،..وبرزف عشانك لاتحاتي..وبهديك كل اللي بغيته"*..
.
.
ويوم العرس الكل فرحان صغار وكبار..كان سيف موجود...ودخل الساحه اللي فيها الرزيفه واليويله.. وتم يرزف..ودخل المعرس..تم سيف يطالع مايد ونظراته كلها حزن..حسده على اللي عنده..على الانسانه اللي بتكون حلاله وحرمته..وهو خلاص اتحدد مصيره..يكون بعيد عن اللي حبها وتمناها له..ويوم زفوا المعرس..وخلاص بيدخلونه على العروس..سيف انهار..وطلع وهو بصعوبه يمشي..اتصل بولد عمه..يا وشله وداه المستشفى لان سيف يته ضيجه..ماقدر يتنفس..وهم فالدرب سيف وصى ولد عمه وطلب منه ان ينفذه لو صابه شيء..

.
.
في بيت المعاريس

مايد: الله كم اتمنيت هاللحظه، انا وانتي وبس
علياء: بس انا ما كنت اتمناها
مايد اونه معصب: ليش انتي ما تحبيني
علياء: لا ما احبك ....................................انا اموت فيك
مايد : ههههههههههههه فديتج
.
.
كانت علياء تعيش احلى لحظات عمرها ومايد فرحان من خاطره اخيرا اتحقق حلمه، وسيف راقد فالمستشفى محد يدرى عن حاله...
.
.
وقبل ماتسافر علياء ومايد لشهر العسل راحت علياء بيت ابوها عشان اتشل اغراضها..ودقت الخدامة البابه وعطتها صندوق مغلف وقالت انها هديه من وحده..علياء استغربت منو اللي طرشتله الهديه..قالت الخدامة ان الريال اللي ياب الهديه قال فالصندوق في رقم دقي عليه بتعرفين منو مطرش الهديه..فتحت علياؤ الهديه بسرعه واول شيء شافت بطاقه ومكتوب عليها رقم جان اطرش مسج كتبت .. منو انتي ؟...محد رد عليها .. فاتصلت ...
.
.
علياء: الووووو
) : هلا
علياء: اسمحلي اخويه مغلطه فالرقم
) : لا هب مغلطه انا اللي امطرش الهديه
علياء: انت منو
) : انا استوي ولد عم سيف لو تذكرينه
علياء: سيف ؟؟؟؟؟...
): هيه سيف
علياء: وليش امطرش الهديه
): هب مني الهديه..الهديه من صوب سيف..وصاني اني اوصلها لج وانا نفذت اللي يباه
علياء: عيل وينه هو؟؟؟
): شو تبيبه ،ادعيله ان الله يغفرله ويرحمه
علياء وهي مستغرب من رمسته وهب فاهمه شيء
): افتحي الصندوق بتشوفين شيء بس لا تخافين منه، وخلاف بتعرفين سيف وينه؟؟...وبند التلفون....
.
.
علياء شلت الرساله وحصلت صندوق صغير موجود فالصندوق العود لكن مافتحته قرت الرساله
.
.
"*"* هلا حياتي ، هديتي بسيطه ياليتها توصل مستواج وتقدرين تفهمين كيف كنت احبج..انا كنت حاس ان ما بقدر اعيش اكثر..وان يوم مماتي كان قريب..افتحي الصندوق الصغير بتحصلين فيه شيء..هالشيء تمنيتج تحتضينه..وتحطين وسط قلبج..كان ودي يسكن هناك..لكن ربي ماكتب لي معاج أي نصيب..والحين انا اقدمها لج وهو اغلى شيء عندي احتفظي فيه وانا بعيد عنج..وفي اخر الرساله كتب: انا واحد من آلالف العيون.. انا اللي احب وما اخون .. انا قصه مالها عنوان .. انا اللي انكتب شقايه وانا بعدني اصغير..انا اللي غديت في حبج جتيل"*..بودعج وبودع هالدنيا كلها اللي عمرها ماابتسمت لي**احبج حتى وانا ميت بتم احبج**
.
.
علياء فتحت الصندوق انصدمت يوم شافت هالشيء..ماقدرت تمسك ادموعها..تمنت اتموت ذيج الساعه...
.
.
ومرت الأيام وعاشت علياء مع مايد وكانوا احلى اثنين ..متفاهمين ويا بعض..والحب "*يجمعهم ..واللي عرفته ان علياء ربت ويابت ولد سمته "* سيف __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
خبــر لما نستشهد بنروح الجنة ( بالتركي ) والله روووعة وجناان	محروم.كوم	منتدى أخبار المواقع والمنتديات العربية والأجنبية	0	12-19-2009 02:20 PM
[ شرح ] : أسرار Xp.. روووعة والله	محروم.كوم	منتدى أخبار المواقع والمنتديات العربية والأجنبية	0	06-15-2009 02:20 AM
والله والله والله أتمنى أن يحصل كل سعودي على أعلى الوظائف	محروم.كوم	منتدى أخبار المواقع والمنتديات العربية والأجنبية	0	04-22-2009 09:30 AM
اللي ينقلوون المواضيع والله موضوع مهم جداا مهم والله مهمم بسررعه ادخلوو...والله مهم	سَوّافْ	الإستراحه العامة	88	07-15-2008 05:36 PM
روووعة جربو ادخلو ما بتخسروون شي والله لايفووتكم الكيك	كيفي دلووعه	فن المطبخ والطبخ	14	02-05-2008 08:29 PM