][ قصة بنكات الأعضاء ][

بقايا هواجس · #1 05-22-2008, 03:45 PM

تنويهـے :- الشخصيات تندرج ضمن النص
يعني كل حد يتريا دوره و لا يزعل اذ ما لقى
عمره في النص الأول ..

][ قصة بنكات الأعضاء][

الفصل الأول

][ نروح المدرسة بدري نضحك داخل الطابور ][

الجزء الأول

حنان : بقايا بقايا قوم .

بقايا : هاه ..

حنان : نش دوام يالله وراك سكول ..

بقايا : اشو سكوله ؟؟

حنان : سير المدرسه ..

بقايا : على الصبح مغثه ..

حنان : يالله سير الا اخر كم
أسبوع عندك ..

بقايا : متى نخلص و نفتك ..

حنان : اويه انا بسير أتجهز انت
خلك تولي ..

بقايا : يا حبج حق التكشيخ ..
حد يتجهز للمدرسه عرس شو ..

(( بقايا و حنان اخوان توم عمرهم 18 سنه اخر سنه
دراسه .. حنان القسم العلمي و بقايا في الأدبي ))

بقايا : شو ها العيشه ..

حنان : يالله قوم وصلني عقب رد ارقد..

بقايا : الساعه كم ؟؟

حنان : الساعه ثمان الا ثلث..

بقايا : زين راحت حصه .. الحين بتسبح و بتريق
و بييج ..

و تسير حنان الصالة ..

بنت الأفلاج : ها حنان وين بقايا ؟؟

حنان : توه بيتسبح و بي ..

بنت الأفلاج : يا ربي من هالولد ..

حنان : اماه ما عليج بينجح ..

بنت الأفلاج : شو فايده ينجح نبغيه
أييب نسبه هالحمار كله متأخر و لا شارد..
عمره ما داوم دوام كامل ..

حنان : أنزين أميه هو ما يحب المدرسه
يمكن ينجح في شي ثاني برا المدرسه..

بنت الأفلاج : الا مب ناجح الا فالخرابيط
و المشاكل ..

حنان : حليله أخويه ..
فقير ما عنده مشاكل ..

بنت الأفلاج : إلا بليس السو ..

حنان : الحين جيه تقولين بس يوم
أي جدامج ما تقولين له شي ..

بنت الأفلاج : شسوي ..
يوم أشوفه احن عليه بعد ما اروم
اضربه و لا اقدر اهزبه ..

حنان : اويه امي حنونه ..

بنت الأفلاج : لا تشطين ترا اييبلج
العصا الحين ..

حنان : أمبيه كل ها .. توج حنونه
على بقايا ..

بنت الأفلاج : هذا الولد بعدين
ها اكبر عيالي لازم يكون غير..

حنان : عاد يالله و عيالج الفرق بينهم
ثواني و يفرق غلاهم أميال ..

بنت الأفلاج : شسوي يعني حد قالج
أتين وراه سيده . لو تريتي سنه

حنان : اويه .. اميه عيب هالكلام ..

بنت الأفلاج : كله منج انتي تخربطين
و تهذرين و لا تخليني اعرف راسي
من كرياسي ..

بقايا : السلام عليكم ..
صباح الخير اميه

بنت الأفلاج : و عليكم السلام
هلا هلا بحشاشة يوفي ..
تعال تريق ..

حنان : الله أكبر .. توج تتهندقين
و معصبه ..

بقايا : ما عليج من امج تتهندق
اخر شي يوم اي تسكت كلي جاذبيه

حنان : حمار انته ..

بقايا : يالله مناك ياللا ..
أنا بيلس عدال أماه ..

حنان : طالع فروني بعد ..

بقايا : سيري مناك .. اننننن

بنت الأفلاج : يود شاهيك
أشربه سرعه عسب تسير
المدرسه .. من اليوم ابغيك
تشد حيلك ..

بقايا : ما عليج أماه انا اداوم
بس شسوي تعبت من المذاكره
في اليل و رقدت ..

حنان : امبيه يالجذب .. يقطر منك

بنت الأفلاج : الا يقطر عسل..
أدريبه اسمعه يلعب سوني طول اليل

بقايا : اوب جكوه ..
لا اميه كنت ارفه عن عمري
شوي ..
تدرين ما يصير كله ادرس ..

حنان : باين تدرس ثواني و ترفه ساعات

بقايا : اقول شو سويتي فالمنتدى؟

حنان : أي منتدى ..

بقايا : بعد الي تدشينه بعد نص اليل
يوم ترقد أماه ..

حنان : و أنت شدراك ..

بنت الأفلاج : هيه هذا أنتو بقول
عن واحد منكم شي .. بيفضح لي
أخوه ..

حنان : انزين دواك بعدين..

بقايا : ياللا انا بسير تبين اتين
تعالي و لا غيبي ..

حنان : ياللا الحين يايه ..

و في السيارة ..

حنان : انت ليش جيه قلت,,
الحين أمايه بتتحسبين ادخل
أغازل و لا شي ..

بقايا : ما عليج انا اعرف
أماه ما بتقول شي ..

حنان : هذا انت انا غير..

بقايا : ههههه نفس الشي
بس انتي تحسين جيه لأنج
ما جد واقعتج و تخافين من
اي شي تسوينه انها تواقعج
لكن نفس الشي نحن توم..

حنان : يعني هزرك ما بتقول
شي عن سالفة دخولي المنتدى..

بقايا : انا اعرف كل شي تسوينه
فالمنتدى ..

حنان : كيف .. ؟؟

بقايا : سر من اسراري ها..
و لو شفتج تسوين شي غلط
ما بخبر أماه لانها بتعصب
و بتحط في خاطرها و بتسكت
أنا بضربج بيديه ..

حنان : بس انا ما اسوي شي
غلط ..

بقايا : عشان جيه ما صاربج
شي لين الحين ..

حنان : امبيه .. يعني بضربني ؟؟

بقايا : الضرب هين .. لا تتخيلين
بتتعبين و قد ما تتخيلين بيكون اقسى

حنان : أنت ليش تغيرت عليه؟؟

بقايا : ما تغيرت و لا شي .. بس
أنتي كله مشغوله فدراستج ..

حنان : بس قبل كنت تدرس معاي
و نرتبش على كل شي سوا..

بقايا : قبل كنا يهال و كان كله
نفس الشي بس الحين تفكيري
غير عنج ,. لانا غير عن بعض
لو أن لنا نفس الشكل ..
لكن بعدج أختي ..

بقايا : ياللا انزلي و بعدين فكري
فهالسالفه الحين ادرسي و ييبي نسبه
عشان امايه حليلها تحاتيج..

حنان : أن شاء الله خيو ^___^.

و يروح بقايا المدرسه ..
و هناك يلتقي بالربع..

(( الحريزي : ربيع بقايا و صديقه
الروح بالروح من هم صغار ))

الحريزي : حيبو الحلو وين متأخر..

بقايا : شو نسوي تدري المشاغل..

الحريزي : يا ريال لو ما داومت
احسن..

بقايا : ليش شو السالفه ..

الحريزي : محد مداوم أنا و انته
واليديد ..

بقايا : زين تعال بنظهر بنسير
نتحوط ..

الحريزي : وين يا ريال صبر
خلني بسلم مشاريعنا و بنظهر ..

بقايا : ياللا انزين بنسير نسلم..

الحريزي: طوف جدامي..

بقايا : ازيك يأستاز حمدي..

الأستاذ : أهلا يا باشا .. فينك

بقايا : موجود و يايب لك كل
شي ..

الأستاذ : زين .. انا بحطلك 90
بس انت شد حيلك و حاولوا
تيبون علامه حلوه فالأمتحان
او تنجحون ..

الحريزي : ما عليك استاذ
بنشد حيلنا فالأمتحانات..

الأستاذ : و لا تنسون الحصه
اليوم ..

بقايا : أن شاء الله الساعه 7
بنكون عندك ..

الأستاذ : زين و لو تيبون حد
معاكم حد زين ..

بقايا : حد مثل ..

الأستاذ : الود الجديد داه ..

الحريزي : هيه النورس ..

بقايا : بس ها ما نعرفه ..

الأستاذ : ما تفرئش .. اصلا
هو جديد و ما عندوش اصحاب
فلو تعرفو تصاحبوه يبئى كويس..

بقايا : ما عليك بنييبه
و مع الأيام بنصاحبه ازا كان كويس.

الأستاذ : خلاص نلتئي فالحصه ..

(( النورس : واحد يديد فالفريج و الصف
مع الحريزي و بقايا لكن بعدهم ما يعرفون
عنه شي ))

--- -- --- --- -- --- -- --- ---- --- -
يا ترى شو بيصير فبقايا ؟
و هالنورس منو هو ؟؟ __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
صور ألقاب الأعضاء والادارة متحركة & رتب الأعضاء ^ النجوم ^ مجموعة رآئعة جداً	محروم.كوم	منتدى أخبار المواقع والمنتديات العربية والأجنبية	0	02-12-2010 02:10 PM
شباصات و توكات و تك تكات للعيد	غبشوهـ	بيع و شراء و عروض التجارية	13	11-16-2009 10:52 PM
[ تبادل اعلاني ] : المواضيع: 17,805, المشاركات: 314,609, الأعضاء: 1,581, الأعضاء النشطين: 266	محروم.كوم	منتدى أخبار المواقع والمنتديات العربية والأجنبية	0	07-03-2009 06:40 PM
[ تبادل اعلاني ] : المواضيع: 538, المشاركات: 1,927, الأعضاء: 28, الأعضاء النشطين: 19 -http://vb.qlb.	محروم.كوم	منتدى أخبار المواقع والمنتديات العربية والأجنبية	0	06-19-2009 06:10 PM
[ تبادل اعلاني ] : المواضيع: 2,234, المشاركات: 13,547, الأعضاء: 1,352, الأعضاء النشطين: 1,352	محروم.كوم	منتدى أخبار المواقع والمنتديات العربية والأجنبية	0	05-03-2009 07:20 PM