عرس المنتدى تعااااااااااااااااااااااااااااااااااااالوا

5rbo0osh · #1 05-18-2008, 01:32 AM

السلام عليكم ورحمة الله وبركاته.....

ملاحظة اولية .. اللي يقرا الموضوع يشغل مخيلته شوي ويتخيل انه صدق يشوف احداث العرس ويتخيل بعد انه كان في موقع الحدث .. واذا كان معرس فبعد تخيل انك صدق معرس وفي عرس جماعي وظاهر في التلفزيون وهذا الاهل مسجلينه لك .. اما العضوات .. فتخيلوا انكم تشوفون العرس في التلفزيون..
بسم الله نبدأ...

اليوم تاريخ مهم في منتديات محروم.. حيث يقام عرس جماعي لأعضاء المنتدى .. على شرف الاخ المعطاء محروم.. (( خلوني احول على العامية احسن ))
اليوم طبعا انا مراسلتكم 5rbo0osh من قناة سما محروم ..
بنقل لكم حدث مهم ومميز لهاليوم ..
ان شاء الله اليوم بيحتفلون اعضاء محروم بعرسهم الجماعي حيث تلتقي الفرحة وينتقلون كلهم إلى عش

الزوجية في يوم واحد ..
طبعا العرس الجماعي كما هو معروف ما يقتصر على العشا (( واللي قبل كان عيوش وذبايح وهريس .. بس الحين اتطوروا .. قاموا يحطون مقبلات من تبوله وحمص .. وعقب اونه الطبق الرئيسي.. اللي هو العيش بأنواعه .. واخيرا يختمون العشا بتحلية .. قبل يحلون يمكن بعصيدة.. الحين يحلون بأم علي وكارميل وغيره من الحلويات اليديدة )) .. ولكن فيه احتفالات وأغاني وأهازيج طبعا بأنواعها المختلفة.. راعي العرس طبعا ما قصر لا في العشا ولا في تبني الفرق الغنائية..

طبعا كوني انا المراسلة الوحيده .. فانا بنقلكم كل فرقة بشو بتطربنا وبقولكم طبعا شو نوع هالفرقة وشو مميزاتها وإلى آخره...

خلنا نسير الصوب هذاك .. لاني اشوف ان الفرقة هذيج بدا الطرب عندها ..
وصلت .. هذي الله يسلمكم .. فرقة العيالة

مثل ما انتوا تشوفون الفرقة مكونة من صفين من الشباب يغنون ويرزفون .. والجماعة اللي في النص تعزف على الطبول .. طبعا هاي الفرقة معروفة من زمان واصيلة عند العرب .. وكانوا في الماضي يؤدون هاي الرقصات والعزف بعد فترة الحرب، لكنهم بدوا يستخدمونها بعد في الاعراس.. وأحيد انهم يسمون هاي الرقصة بالرقصة الشريفة ، لانها تمثل الشجاعة والفروسية والبطولة وغيرها من العادات الأصيلة.. اتشوفون هناك ،، لا مب صوب اليسار .. شوفوا صوب اليمين .. هيه هيه هذاك الريال.. يطولي بعماركم هذا رئيس الفرقة واتشوفون انه معلق في رقبته طبلة اسطوانية ويسمونها الكاسر ويدق عليها قو بحيث الصوت يكون عالي ويحمس الحضور.. تحمستوا انتوا؟؟ انا متحمسة

خلال هذا البث .. خلونا نسوي مقابلات مع العرسان..
بما ان كنترول النعيم اقربهم لي فبنبدأ معاك ..
5rbo0osh: مرحبا اخويه كنترول النعيم

كنترول النعيم: مرحبا بج اختي ..
5rbo0osh: شو شعورك في هاللحظه والكل حواليك يحتفل معاك حفل زواجك؟
كنترول النعيم: سالتيني عن الشعور .. وشعوري في هاللحظه ما اعتقد اقدر اوصفه بكلمات بسيطه بس اقدر اقوولج اني مستانس وانا احتفل ويا باقي اخواني من منتدى محروم.. والله يدوم هالفرحة علينا ..

5rbo0osh: آمين يا رب .. وانخليك تكمل فرحتك..

طبعا انتوا تشوفون ان الكل مبتهج وفرحان وشعور يمكن ما ينوصف.. ويييه انا اشوف مزيون بوظبي .. خلنا نغتنم هالفرصة قبل ما تفوتنا ومحد يسويلنا سالفة ..

5rbo0osh: ألف مبروووك اخويه مزيون بوظبي.. ما شاء الله الفرحة باديه على محياك .. والله يديمها ان شاء الله
مزيون بوظبي: الله يبارك فيج .. وتسلمين اختي وان شاء الله الكل يفرح وعقبال باقي اعضاء المنتدى ..
5rbo0osh: سؤال واحد بس اخويه مزيون بوظبي.. هل كنت متوقع ان العرس يكون جذي والا في خيبة امل ؟
مزيون بوظبي: لا والله ... بالعكس العرس فاق التوقعات .. واللي حلى العرس زياده هي الفرحة اللي تشاركنا كلنا مع بعض في هاللحظه .. فمنو ما يتمنى هالعرس؟!
5rbo0osh: صحيح اخويه .. وان شاء الله توصل هالفرحه للباقين في المنتدى وعقبال الجميع.. تسلم اخويه

والحين نحن بننتقل للرقصة الشعبية الثانية .. واللي هي الرزفة .. ننتقل لها الصوب الثاني .. بخبركم شو الرزفة لين ما نوصل هناك ونسمع شو يغنون ..

الرزفة معروفة اكثر عند البدو من الحضر .. بحيث تتكون من شباب يكونون صفين متجابلين ويه بويه ..
ويوم يغنون .. الصف الأول يغني البيت الأول .. أما الصف الثاني فيكمل البيت الثاني.. وكل مرة يكون لهم دور يعني بالترتيب .. وصلنا لهم بس اول خلوني اكمل اللي عندي ... فمثل ما قلت لكم كل صف يردد البيت اللي عنده والصف الثاني يكمل .. وبهالطريقة لين ما تخلص الأبيات .. طبعا البيت ما يرددونه مرة وحده .. بالعكس يرددونه كم من مرة ..

ما ادري اذا انتوا تشوفون ويايه بس .. هذاك الصوب المجابل .. اشوف المزروعي وقايد الحلوين واقفين مع بعض يتابعون الرقصه ..
خلوني الحق عليهم ..

5rbo0osh: الف مبرووك اخواني المزروعي قايد الحلوين والله يهنيكم ان شاء الله ..
المزروعي وقايد الحلوين: الله يبارك فيج وعقبالكم ..
5rbo0osh: اذا كانت لكم فرصة انكم تغيرون شي في العرس الجماعي.. فشو بتغيرون؟ هل بتنقصون شي او بتضيفون شي ؟
المزروعي: والله انا ابغي ازيد شي واحد .. اللي هو ان يكون العرس الجماعي يكون لكل أعضاء المنتدى .. وما يقتصر على كم عضو..
قايد الحلوين: حتى لو كان ياهل ؟؟؟
المزروعي: لا مب ان ياهل .. بس تكون عنده المقدرة يعني .. افهم يا ريال ...
قايد الحلوين (يضحك): هيه صح انا فاهمنك اصلا .. صحيح نبا الكل يشاركنا ويحس بالفرحة اللي نحن عايشينها الحين .. والعرس ما عليها قصور في رايي ...
5rbo0osh: تسلمون والله يوفقكم ...
الفرقة بدت.. فخلونا نسمعهم

سالم سعيد باشكيلك في ظبي طاح لوطاني
شيبني شمسي ادخيلك طحت في الحب غرجاني
سالم سعيد باشكيلك في ظبي طاح لوطاني

شيبني شمسي ادخيلك طحت في الحب غرجاني

ومثل ما انتوا تشوفون ان الصفين مب بس يرددون لكنهم يرقصون على ايقاع الأبيات بحيث انهم يهزون راسهم والأيادي متشابكة ..

5rbo0osh: اخويه ولد الامارات .. لو سمحت
ولد الامارات: نعم ..
5rbo0osh: الف مبروك اخويه ... ونتمنى لك السعادة ان شاء الله ..
ولد الامارات: الله يبارك فيج .. الجميع ان شاء الله..
5rbo0osh: بما انك في عرس جماعي وانت واحد من العرسان .. فهل برايك ان العرس الجماعي احسن والا كنت تفضل يكون عرس خاص فيك بس.. ؟؟
ولد الامارات: لا والله .. بالعكس . العرس الجماعي مخفف علينا بعض الاعباء المالية .. ولكنه يزيد الفرحة بينا .. وخصوصا ان نحن اعضاء منتدى محروم .. فاغلبنا يعرف الثاني .. فهالشي يزيدك وناسة ويوثق الصلات اللي بينا..
5rbo0osh: أكيد اخويه .. والله يدوم العلاقات الطيبة بين بعض.. تسلم اخويه واخليك تكمل فرحتك ..
يالله قدرت ازقر ( انادي) على ولد الامارات والا جان ما حصلته ..
خلونا ندور حد ثاني قبل ما تبدأ الفرقة الأخيرة ..
ما شاء الله من الزحمه مااروم اشوف حد ... كان المفروض اشل ويايه علم عليه شعار منتدى محروم عشان شوي يسوولي سالفه ..
واخيرا لقيت ابو الجازي..
5rbo0osh: الف مبروووك اخويه ابو الجازي .. (( ولا 100 مرة قلتها اليوم))
ابو الجازي: الله يبارك فيج وعقبال الباقين ان شاء الله ..
5rbo0osh: ان شاء الله .. اليوم طبعا يوم كبير بالنسبة لك .. منو كنت تتمنى يكون متواجد؟؟

ابو الجازي: الحمدلله اليوم صحيح يوم كبير .. والحمدلله الكل متواجد ويشاركني فرحتي ..
5rbo0osh: الحمدلله .. والله يوفقك ..

عقب كم من لقاء ويا العرسان خلونا نسير صوب الليوا ..

الليوا معروف عنها انها رقصة شعبية تخص اهل البحر اكثر من اهل البر .. قبل كانوا اييبون الليوا قبل الرحلات البحرية لباقي المناطق سواء كانت الخليجية او الهند .. ويقولون ان الليوا يت من العمال الأفارقة نتيجة تعامل اهل الخليج مع أفريقيا .. وبدوا يييبونهم في الأعراس لان فيها ايقاعات تسر الناس الحاضرين والمعازيم .. مثل ما انتوا بتستانسون وانتوا تسمعونها الحين ..
الليوا مكونين الحين حلقة دائرية وهم حفيّ (( حفاة الأقدام يعني)) وفي النص تشوفون عازف المزمار او مثل ما انسميه الصرناي ... وحلقة الشباب تتجدم خطوتين وترجع خطوتين وهم يدورون عكس عقارب الساعه .. وبعد يستخدمون الطبل في هالرقصة .. ممكن هالحلقة تكبر وتوصل إلى 40 شاب او حتى اكثر.. ولعلمكم ان ليوا كلمة عربية مشتقينها من "لواء" وهو العلم مب الرتبة .. وفي كينيا الليوا معناها مبتكر الرقصة او دائرة الرقصة ..
وبهالطريقة بيكمل العرس مع الفرق والرقصات الشعبية .. لين ما يخلص العرس..

ولكن قبل ما نخلص خلونا نقابل اخر عرسانا ..
محد بقى من العرسان ما تكلم غير الزعيم و كويتي.. وخلونا نسير لهم وانشوف شو رايهم ..

5rbo0osh : مبرووووووك الزعيم وكويتي.. الزعيم وكويتي : الله يبارك فيج
5rbo0osh: المايك لكم وقولوا اللي تبونه..
الزعيم : انا ببدأ .. انا اليوم ابارك لاهلي ولباقي العرسان .. والحمدلله الفرحة ما كانت فرحة صغيرة .. بالعكس كانت اكبر من المتوقع .. واتمنى اللي ما عرس يعرس عرس جماعي حتى لو ويا عيال فريجه .. لان الفرحة غير . .. والحمدلله انا اليوم ما انتقل لعش الزوجية بروحي .. انا انتقل لها مع اقرب ربعي واقرب ناسي اللي هم اعضاء المنتدى..
كويتي: عطني المايك .. خلني انا اعبر بعد .. الحمدلله .. نعمة من الله .. اليوم نحتفل مع اقرب ناسنا واهل والكل فرحان والحمدلله .. نحن محتايين من الدولة تشجع هالاعراس .. والشباب المفروض ما يستحون او حتى يضايجون لانهم بيعرسون في عرس جماعي لان لها طعم غير ... ويرجع المايك 5rbo0osh ..
5rbo0osh: الله يدوم هالفرحة وان شاء الله تتغير نظرة الشباب للاعراس الجماعية ..

في ختام بثنا اليوم .. اتمنى الكل ذاق طعم الفرحة اللي الكل عايشها هني معانا ... ونتمنى النظرة تتغير ونشوف اغلب الاعراس تكون جماعية ان شاء الله
ونلقاكم ان شاء الله في عرس جماعي قريب ,, وان كان نسائي ..

استودعكم الله والسلام عليكم ورحمة الله وبركاته..

كلووووووووووووولووووووووووووووووووووووولوووووووووو لييييييييييييييييش
ألف الصلاة والسلام عليييييييييييييك يااااااااااااا حبيييييب الله محمد

مع خالص تحياتي لكم 5rbo0osh __DEFINE_LIKE_SHARE__

مزيون بوظبي · 05-18-2008, 03:23 AM

^__^

ما شاء الله علييج =)

تسلمين ع الطرح النأأأيســ

ما تقصرين

نترقب يديدج __DEFINE_LIKE_SHARE__

*نظره مني تسدك* · 05-18-2008, 09:47 AM

ههههههههههههههههههههههههههههههههههههههههه

سلامي علييييييج في ذمتيه طررررررررر وابدعتي

يعطييييييج العافيه

وألف مبرررررررررك للمعاريس خخخ...^^ __DEFINE_LIKE_SHARE__

ємαяαтya Kαsн5a · 05-18-2008, 03:40 PM

هههههههههههههههههههه
يسلموووو __DEFINE_LIKE_SHARE__

الماسه الحساسه · 05-18-2008, 04:47 PM

يسلموووع المووضووع الفنتكــ

وكله ابدااع × ابدااع
ونترقبــ كل الزود منجــ __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
المنتدى العام قسم يعرض القضايا التي تهم زوار المنتدى والتي لا تنتمي لأي من الأقسام ال	محروم.كوم	منتدى أخبار المواقع والمنتديات العربية والأجنبية	0	07-08-2010 05:30 PM
أضافة سكروبال في صفحات المنتدى وهو يعمل كــ مؤاشر لصعود و هبوط صفحة المنتدى + مثال	محروم.كوم	منتدى أخبار المواقع والمنتديات العربية والأجنبية	0	05-28-2010 05:10 AM
السوم داخل المنتدي وخارج المنتدي والسوم القديم والجديد	محروم.كوم	منتدى أخبار المواقع والمنتديات العربية والأجنبية	0	03-22-2010 04:10 PM
إللي يوووصل رقم 7 يكووون ( شيبة المنتدى) أو ( عيووز المنتدى)	رحلت عن بلادي	المواضيع المكرره	1	08-09-2009 03:28 PM
[ عرض دعم فني ] : ترقيية المنتدى+ترقية جميع الاستايلان+حماية المنتدى=100 ريال فقط	محروم.كوم	منتدى أخبار المواقع والمنتديات العربية والأجنبية	0	06-01-2009 06:10 AM