ليلة خميسن طاولتها الذعاذيع=فيها براد سهيل نوجس لسيعه
جتنا من القبله طروقن مقابيع=فيها الرطوبه بالفجوج الوسيعه
من صبحنا باقصى الصحاري نجاجيع=طير القميري نحتري فيه ديعه
وان ما لقينا الصيد ما به تجازيع=تكفي سلاة البال بارض الطبيعه
يسدنا التمر الضميد وجرابيع=وابريق شاهي والفعول السنيعه
من صبحنا بين الطلاح المفاريع=ندور فيها والحزوم الرفيعه

بدينا ندلج في دعوب القراشيع=وانحوص من دون الصخور السفيعه
ولقينا الارزاق بغصونن مصاليع=في خايعن فيه النصي والنقيعه
شاهدنا جولن باثر جولن متابيع=وتفرقت بين الشجر والتليعه
واخذنا مقسوم الولي والخفا مريع=وانفوسنا للي رزقنا مطيعه
قلنا نروح لهضبتن حولها ريع=لعلنا نلقى الحطب دون ريعه
في معزلن ما طوقته المشاريع=ما غير تاطاه السباع المجيعه
جلسنا يومن بين طبخن وتسبيع=والنار حيه والدلال السطيعه
متى تجينا من المزون المشاليع=كما المجاهيم السمان الشبيعه
اليا انتشر فوق الدعوب الدفافيع=فيها صحاصيحن تزايد ربيعه
يزين مرباع الفجوج المخاييع=عساها تاتي بالمسيل ونفيعه
تمسي حزوم الدو فيها مناقيع=يمشي درو ماها على كل قيعه
يالله يا غفار يا مشبع مجيع=يا مصلح الاحوال عقب الفجيعه
نرجيك همال المزون المضاريع=باول زمان الوسم كلن يذيعه