السلام عليكم ورحمة الله وبركاته:
أخواني و أخواتي هاذي أول مشاركة لي وأرجو انها تعجبكم!!!!!
 الشخصيات:-

 الأب: سعيد متزوج بريم من 19 سنة وأبو أحمد و جمانة عصبي المزاج و عنده أخو أسمه راشد و صار بينه و بين زوجة سعيد سوء تفاهم مما خلا زوجة سعيد تطرده من البيت .

 الأم : ريم زوجة سعيد و أم حنون تجتهدعشان تربي أبنائها ولكنها بدأت تحس ببداية فقدانها السيطرة على أبنائها و بداية المشاكل بينهم.

 أحمد : الولد الأكبر عمره 17 سنة يحب الوحدة و لا يصارح أحد باللي بخاطره و لا يرد ربعهه بأي طلب حتى إذا وصلت الأمور إلى انه يزعل أمه و أبوه عليه و يعتبر عمه راشد أخوه الأكبر.

 جمانة: حبيبة و دلوعة أمها و عمها راشد عمرها16 سنة لا تردها أمها بأي طلب تهوى الإنترنت و الدردشة مع ربيعاتها عن طريق الماسنجر و المنتديات.

 راشد:أخو سعيد عمره 18 سنة أبوه توفى و أمه عيوز يحس بأنها تحب أخوه سعيد أكثر منه ولكن هل هذا صحيح؟؟

 عائشة: الجدة أم سعيد و راشد و شجون أم حنونة و طيبة القلب صابها الشيب و ابتليت بجني فيها يوم اييها يقول لراشد اطلع من البيت و يقول لسعيد تعال ويحضنه و لكن شو السبب بنعرفه من القصة.

 خميس: عم سعيد وراشد و عنده ولد أسمه خليفة و بنت اسمها ريم.

 سارة: رفيجة جمانة عمرها 16 تأمنها على أسرارها و تحب أخوها أحمد.

 عبدالله: أخو سارة و رفيج أحمد و يعتبره أخوه اللي ما يابته أمه.



* شجون15 سنة و سعيد 17 سنة قاعدين يلعبون لعبة الصراحة" يعني الأول يسأل والثاني يجاوب بصدق".......

شجون: أخويه أبيك تجاوبني بصراحة أنت تحب؟

سعيد: ما بقول لتج هذا سؤال شخصي اسألي أي سؤال ثاني إلا هذا.

شجون: سعّود أخوي أفا قول عيل ليش لعبنا هاللعبة يلا قول .

سعيد: أوكي بس لا تخبرين أي أ حد ترى إذا خبرتي حد تراج بتزعلين مني.

شجون: أوكي هذا وعد و عشان تطمن بخبرك منو أنا بعد أحب.

سعيد: و الله امممم... والله ريم بنت عمي خميس .

شجون:كنت أعرف انك بتقول جي أوكي يا دوري و أنا بعد أحب ... بس أخافك تضحك علي .

سعيد:لا والله.

شجون : أنا أحب ولد عمي خميس خلوف.

سعيد: خلوف صح انه مرات يصير خبلة و ما يعجبني بس تستاهلينه يا أختي الغالية.

شجون : بس أنا حاسة اني مهمومه .

سعيد : ليج أختي خبريني حد زعلتج و إلا شو؟

شجون:لا محد زعلني بس أخاف خلوف ما يحبني.

سعيد : عجان خاطرتج يا شوجي أنا باسأله .

شجون : والله انك أخوي حبيبي ريحت قلبي و طفيت ناري وعشان خاطرك برد لك الجميل بس إنت اصبر وفالك طيب.


*و في اليوم الثاني.....
سعيد راكب ويا ولد خالته خليفة السيارة النيسان......

سعيد : ولد عموه طالبنك طلبه قول تم.

خليفة: تم على المقدور.

سعيد : والله ما أدري كيف أفتح وياك الموضوع بس يلا انت ولد عمي و أكثر واحد يفهمني.

خليفة: تعرف يا ولد عمي إنك غالي و ان ماشالتك الدني اتشيلك بعيوني .

سعيد : أوكي بقول بس لا تزعل و الله أنا أحب أختك و قلت إني إذا ما خبرتك بكون خاين للعشرة و الصداقة اللي من بينا.

خليفة: ما عليك يا سعيد إنت آخر واحد يمكن أزعل منه بس ريم بعدها تدرس وإذا قلت إلها الحين بتشغلها عن الدراسة و الإمتحانات.

خليفة : أنا بعد بغيت أقول لك إني أحب أختك شجون بس كنت خايف تزعل مني و أنا مب متأكد من حبها لي.

سعيد : والله إنك تقرأ أفكار ي كنت الحين بفاتحك بهذا الموضوع بس إنت فتحته قبلي، والله شجون أختي تحبك و كانت مهمومة وايد وقلت إلها إني بتخبرك عن رايك.

خليفة طاير من الفرحة: والله قالت جي.

سعيد : والله إنها قالت.
*بعد خمس سنوات تخرج سعيد من الجامعة و دخل الجيش برتبة ضابط.

عائشة: يا وليدي صابني الكبر وماأدري كم يوم باقي لي لين ما ألاقي ربي ،أبي أجوف عيالك و عيال عيالك شاور على أي بنت و أخطبها لك.

سعيد : ييتي بوقتج يا أمي .

عائشة : يعني حاط عينك على وحده قول يا وليدي و أخطبها لك.

سعيد : و الله أنا حاط عيني على بنت عمي خميس ريم.

عائشة : و الله طالع على أبوك الله يرحمه تعرف تختار و الله ريم بنت حلال و ما فيها عيب و إن شاء الله من باجر بأخطبها لك.

سعيد : مشكورة يا أحلى أم بالكون كله بس اتهقين بتوافق.

شجون تظهر من و ورا الباب : كولو لولو لي مبروك أخوي منك المال و منها العيال عقبالي أنا بعد.

عائشة : والله من الحين تفكرين لا أبوي لا تفكري وراتج دراسة تخلصينها.

شجون" أونها تدلع " : أنا ما بي ما بي ما بي ها.....

عائشة وهي تضحك : شوف أختك تخبلت .

*بعد خمس دقايق وصل راشد و التم شمل العايلة كامل.

راشد: السلام عليكم ورحمة الله و بركاته.

الكل:و عليكم السلام ورحمة الله و بركاته.

عائشة : من طول الغيبات ياب الغنايم ها من وين ياي.

راشد : و الله قعدت ألف بالفريج لين ما مليت قلت أرجع البيت.

سعيد : انت مب وراك دراسة حق الإمتحانات يوم الأحد؟

راشد : والله مب لازم بذاكر قبل الإمتحانات بيوم.

سعيد : أنت بأي صف الحين؟

راشد : الحين بالصف الثالث إعدادي و يوم بخلص من الثالث إعدادي بظهر بروح الثانوية الجوية.

سعيد : والله هذا مستقبلك و انت حر فيه بس شد حيلك بالإمتحانات.

راشد : إن شاء الله.

عائشة : راشد أبويه تعال ودني العزبة.

راشد : يا أمي خلي الدريول يوديج أنا مب فايج.

سعيد : وابوي عليك إنت ما عندك غيرة أو احترام ما تخاف على أمك قم ودي أمك لعن الله هالشيفة.

راشد : أوكي بس لا تقعد تسب اسمحي لي يالغالية عالقصور .

عائشة : مسموح يا وليدي الله يهداك بس يعني كان لازم يهزبك أخوك سعيد عجان توديني العزبة يلا خلنا نروح توكلنا على الله.

سعيد : يلا بحفظ الله.

*بعد يومين في بيت العم خميس.....
خميس : يا مرحبا بمن يانانور البيت بوجودتج يا حرمة أخوي .

عائشة : منور بوجودك يا بو خليفة، و الله نحن يايين نطلب ايد بنتك ريم حق ولدنا سعيد على سنة الله و رسوله و الي تطلبونه نحن حاضرين.

خميس : و الله سعيد ولدنا منا و فينا و نحن شارينه و ريم ما تغلا عليه بس أشاور البنت أول.


عائشة: شاور البنت.

خميس : يا بنتي ولد عمتج سعيد ياي يطلب إيدتج على سنة الله ورسوله و أنا من ناحيتي موافق بس أبي شورتج و أنا ما تهمني إلا سعادتج .

ريم مستحية : و الله الشور شورك أبويه.

خميس : يعني نقول مبروك؟

ريم : ايه أبويه.

خميس : و الله شاورت البنت و هي موافقة .

عائشة : كولو لولو لي مبروك مبروك ، و الحين نتشاور عالمهر و متى الخطبة و الملكة والعرس .

خميس : والله نحن ولدكم شارينه و مهر بنتي بيكون مصحف قرآن و الخطبة و الملكة و العرس بيوم واحد مب لازم كل هاذي الخساير و بنخلي المعرس والعروس يحددون اليوم.

سعيد : والله يا عمي يفضل لو يكون العرس بعد شهرين بتكون عندي إجازة سنوية و بكون فاضي.

خميس : عيل تم و أنا عمك نقرا الفاتحة.
*بعد أسبوعين راشد خلص الإمتحانات و دخل المدرسة الثانوية الجوية.....
سعيد : ها يا خوي متى الدوام ؟

راشد : بعد ثلاث أسابيع.

سعيد : زين زين شد حيلك و ها لا تجي لي بعدين تقول و الله أبي أفنش ترا بكسر راسك و حتى لو رسبت بتعيد مره ثانية.

راشد : ما عليك أخوي غالي و الطلب رخيص.
*بعد ثلاث أسابيع داوم راشد و يوم رجع بالويكند .......سعيد : هلا و الله
بأخوي راشد ها شو المدرسة الثانوية الجوية ؟

راشد : والله أحس الدراسة صعبة و امتحانات كل يوم بحاول أشد حيلي و أنجح.

سعيد : شد حيلك و لا تخليني أخيب ظني فيك.

راشد : إن شاء الله أخوي، بس عندي طلب أبي سيارة .

سعيد : عندك سياراتي سوق السيارة اللي تبيها.

راشد : أوكي أخوي بسوق الألتيما.

سعيد : روح خذ المفتاح من الدرج الأول في مكتبي.
*قبل العرس بيوم .....سعيد يتصل بريم .....

ريم : ألو ... هلا والله بحبيبي و غلا روحي.

سعيد : هلا والله بناس ملا غلاهم السما و الأرض، شخبارتج حبي؟

ريم : بخير حبيبي و إنت شخبارك؟

سعيد : تمام و الله، ها حبيبي جاهزة حق الليلة الكبيرة؟

ريم : جاهزة بس أحس اني خايفة.

سعيد : ما عليتج كلها ساعات و بيخلص العرس.

ريم : أدري بس دامك معي أنا مطمئنة.

سعيد: أخاف أنا اللي أزيغ و أشرد من الكوشة.

ريم : بربطك بكلبشات عجان ما تشرد هع هع.

سعيد : أقول خبري أمتج يوم بتفر الحلاوة علينا تفرها شوي بعيد تراني مب فايج أتكسر يوم عرسي.

ريم : حبيبي أبي حلاوة.

سعيد : أنتي لوحدتج حلاوة.

ريم : بس عاد عن الخراط..

سعيد : شوف أمنو يتكلم عن الخراط ههاي!!

ريم : أنا يوعانه بروح آكل.

سعيد : بالهنا و الشفا.

ريم : حبيبي بسكر الحين أوكي بكلمك بعدين.

سعيد : بس عندي طلب قبل ما تسكرين .

ريم : شو حبيبي؟

سعيد : أبغى أسمع كلمة حلوة من عندتج قبل ما أسكر.

ريم : أحبك.

سعيد : شكله بيغما علي من هالكلمة.

ريم : عيل كيف إذا قلت لك أموت فيك؟

سعيد : بذوب بموت.

ريم : لا تقول جي ترا أموت نفسي وراك.

سعيد : هالقد تحبيني؟

ريم مستحية : يعني كل هذا و ما حسستك إني أحبك.

سعيد : فديتج عيل أخليج الحين أموووح باااي.

ريم : باااي حبيبي.
*بعد سنة يابت ريم ولدها الأول أحمد و يا خبر انه راشد رسب......

سعيد : أفا يا راشد شو اللي صار كيف انته راسب.

راشد : والله أنا ناجح بس هم رسبوني .

سعيد : هم رسبوك و الا انت كنت ما تدرس؟

راشد : لا أنا شديت حيلي و كل المواد كانت بالإنجليزي و انت تعرفني أنا طمطمه بالانجليزي.

سعيد : ما عليه شد حيلك أنا ما بضربك تراك صرت ريال تفهم الكلام.

راشد : بس أنا خلاص كرهت الدراسة بحول الجيش أو بفنش.

سعيد : هب هباك يا العايب يا الردي إن عدت هالكلمة مرة ثانية بكسر لك ضروسك تفهم و إلا لا؟

راشد زعلان :..... إنزين أخوي.

سعيد : يا أخوي أنا أبي مصلحتك و أنا أحس إنه مستقلبك بالثانوية الجوية لا تزعل تارني بحس بالذنب و إذا ما فلحت هالسنة إن شاء الله بخليك تحول للجيش .

راشد يرفع راسه ويطالع أخوه : إن شاء الله يا أخوي بكون عند حسن ظنك.

سعيد : زين يلا يحفظك ربي يلا نروح نصلي صلاة العشا.
*و بعد سنة اتزوجت شجون من خليفة ولد عمهاو يابت زوجة سعيد ريم جمانة و للأسف مرة ثانية رسب راشد .....

راشد : يا الله يا أخوي و الله إني شديت حيلي بس ما أدري كيف رسبت حليت أوكي بالامتحانات.

سعيد : ما عليك الله كاتب لك إنك ترسب يمكن يكون خير لك.

راشد : إن شاء الله.

ريم : إنت أصلا ما شديت حيلك لاهي بالحواطه بالسيارات ما شفتك مرة تدرس.

راشد : إنتي شو دخلتج بالموضوع السالفة بيني و بين أخوي.

سعيد : بس يا راشد عشاني أسكت.

راشد : عشانك بسكت بس هي صايرة رزه ترتز بأي شي.

ريم : أنا بس قلت وجهة نظري شو فيك بتاكلني.

راشد : والله لو لا إنتي حرمت أخوي كنت بصكتج بطراق.

ريم : اتخسي و أقول لا تدخل بيتي و مالك خص لا فيني و لا بعيالي روح انجلع!!!

راشد : البيت بيت أخوي بس ما بييه مرة ثانية لو انتي فيه.

سعيد : راشد راشد تعال أخوي راشد .......

راشد : حياك أخوي أنا ما بزعل منك بس حرمتك طردتني السموحة مع السلامة.
*بعد ثلاث سنوات.....راشد يتصل بأخوه سعيد يقول له إنه أمه استلبست.....

راشد : ألو ... سعيد الحق علي أمي استلبست و قامت تقول لي اطلع برا البيت.

سعيد : ما عليك يا أخوي خلك عندها لين ما أيي لا تخاف.

راشد : ييب وياك المطوع عشان يقرا عليها.
*بعد خمس دقايق وصل المطوع و دخل سعيد عند أمه و فجأة ركضت أمه عليه و حضنته....

المطوع : شو تبا الحرمة المسكينة؟

الجني : ماأريد منها شيء بس هذا اللي أسويه أبين فيه منو أكثر واحد تحبه الحرمه و منو اللي مزعلنها.

المطوع : منو اللي تحبه أكثر واحد ؟

الجني : اللي حضنته.

المطوع : وليش توك طردت ولدها الصغير من البيت؟

الجني : والله الحرمه زعلانه منه .

المطوع : بتظهر مناه والا لا.

الجني : شغلتي إني أوصل الرسالة و أروح و لكن إذا أي واحد زعلها مرة ثانية برجع.
*..... و تقوم الأم من اللي هي فيه....

عائشة : شو اللي صار؟

سعيد : ما شيء يا أمي بس أبي أسألتج؟

عائشة : آمر يا وليدي .

سعيد : إنتي زعلانة من راشد أخوي شيء صار من بينكم ؟

عائشة : يا أبوي محد بقالي غيره هو اللي مالي لي دنيتي كيف أزعل منه؟

راشد وهو يصيح راح وحضن أمه قام يبوسه راسها: و الله يا أمي كنت أحس انتج ما تحبيني و تحبين سعيد أخوي أكثر مني.

عائشة : لا يا بوي لا يقص عليك الشيطان و يفرق بينكم تراني أحبكم مثل بعض و أفديكم بروحي.

المطوع : ترا الجني اللي توه كان بأمك كان يبا يفرق بينكم و كلامه كله كذب بكذب و حياكم.

سعيد : مشكور يا مطوعنا جزاك الله كل خير تفضل تعشا ويانا.

المطوع : مشكور دام فضلك بس لازم أروح الحرمة و العيال يتريوني في أمان الله.
........ وصل سعيد المطوع و رجع.

راشد : قولي لي يا الوالدة أي شيء أسويه لتج حتى لو تطلبين روحي أعطيها لتج.

عائشة : ..... أبيك تراضي حرمة أخوك .

راشد : ما عليه يا أمي يصير خير لين باجر.

عائشة : ها حبايبي ما تبون تتعشون شيء قبل ما تظهرون ؟

سعيد : و الله ما شيء أحلى من طبيخ الوالده .
*باليوم الثاني يا راشد يراضي حرمة أخوه .....راشد : سامحيني على اللي صار و هذا راستج أبوسه.

ريم : مسموح بالحل و أنا بعد اسمح لي ماكان لازم أدخل بأمورك الشخصية.

سعيد : و أخيراً التم الشمل بس أقول وين أحمد وجمانة.

ريم : في غرفهم نايمين.

سعيد : زين إنزين قومي سويلنا عشا ترانا ميتين من اليوع.

ريم : انت تآمر بس.
*بعد 3 سنوات تزوج راشد من بنت خاله و سافر دورة في الخارج لمدة سنة.... و بعد 10 سنوات و صار عمر أحمد 17 سنة و جمانة 16 وتبدأ سوالف المراهقين"الحب".









يا ترا شو اللي بيصير مع أحمد و جمانة .....
و نكمل إن شاء الله البارت الثاني قريب مع تحيات أخوكم CanYouBelieveMeILoveYou.