الرجال يوجب الرجاجيل

محروم.كوم · #1 07-27-2018, 11:40 AM

السلام عليكم ورحمة الله وبركاته
صبحكم الله بالخير الجميع

حين يصير فرح الرجال يوجب الرجاجيل اذا ما ارسل له بطاقه يكلمه ويقوله مثلا تفضل يوم الجمعه الساعه 5 في صالة كذا خطوبة ولدي او خطوبة بنتي هاذ هي العاده اللي اخذناها عن اباءنا واجدادنا
حين كنت في سن الطفوله كانت جاهة الخطوبه الربع اللي يتوجهون لبيت اهل البنت لاجل يطلبونها للزواج تتكون من حوالي 30 الى 40 رجال من الشيبان يخلصون الموضوع خلال دقائق
اليوم تلاقي شيبان وشباب وشيء يجيب اطفاله وتسمع صياح وصراخ واحيان بكا الاطفال مدري ويش
هالتفكير انت جيت لاجل تحضر موضوع يخص الرجاجيل ليش تجيب الصغار ؟

عندنا في الديره حين تروح جاهه تخطب بنت يمنع منع باتا اي شخص يجيب معاه اولاد او اطفال
الرجال يوجب الرجاجيل الحرمه تروح للحريم لاجل تعزمهم على فرح ابنها او بنتها
في يوم من الايام كنت جالس في البيت سمعت دق على الباب رحت فتحت الباب لقيت حرمه تكون زوجه واحد من الاقارب يسكن في ديره بعيده عنا حوالي 30 كيلومتر حين فتحت الباب
قالت : مسا الخير
رديت : مسا النور اهلا وسهلا تفضلي
قالت : لا لا مستعجله تفضلو باكر على خطوبة البنت الساعه 4:30 العصر
سألتها : وين ابو عيالك ؟
قالت : جالس في السياره ينتظرني .
غلى الدم في عروقي وقلت : توكلي على الله / ونعم بالله
طلعت الحرمه من حوش البيت رجعت وجلست مكاني كان الدم يغلي في عروقي وشفت الدنيا على اتساعها اصغر من راس الدبوس وضاق صدري من سواة هالرجال يرسلي حرمته وهو يظل جالس في السياره
قالت لي ام عيالي : ودك تروح باكر على الخطوبه ؟
رديت عليها : لا ما اروح لانه الرجال ما وجبني يرسلي حرمته تعزمني وهو جالس في السياره المفروض هو يجيني يعزمني هيك تعلمنا من اهلنا .
طلعت من البيت صفرت لحصاني جا لعندي اسرجته ولجمته اعتليت صهوته وانطلقت لبراة الديره مريت من قدام بيت صديقي ابو مرزوق كان يتكلم مع ابن عمه طرحت السلام عليهم
ردو السلام ونزلت عن ظهر حصاني صافحتهم وتبادلنا تحية المسا وكان الوقت بعد العصر ابن عم ابو مرزوق استأذن وراح يقضي مشوار له
قلي ابو مرزوق : تفضل ادخل ودي اشرب القهوه معاك
قلت له : يا ابو مرزوق ضايقن صدري ما ودي اجلس في البيوت
قلي : عسى ما شر ضايقن صدرك ؟
جاوبته : تعرف فلان ؟
قال : اعرفه ويش فيه ؟
قلت له : يا ابو مرزوق هاذ يرسلي حرمته تعزمني على خطوبة بنته وهو ظل جالس في السياره .
قال : عذ بالله من الشيطان الرجيم هاذ ما هي سواه من سواة الرجاجيل معاك حق يضيق صدرك لاجلها تعال نشرب القهوه ونطلع مع بعض
دخلنا حوش بيته صدفنا بنته كانت تطعم الفرس حفنه من الشعير بيدها البنت هاذ الحين زوجة ضاري ابن خالي ابو حاتم كانت تشتغل في الشرطه النسائيه برتبة ملازم اول
ناظرتنا وادت التحيه العسكريه بيدها وقالت : اهلا وسهلا حيا الله اخوي ابو ظاري
رديت :هلا فيك زود حياك الله .
ابو مرزوق قال : روحي سوي لنا قهوه وعجلي لا توني علينا
راحت البنت تسوي القهوه وابو مرزوق صار يشد السرج على فرسه اسرجها والجمها وجلسنا سولفنا بموضوع هالرجال اللي ارسلي حرمته تعزمني على خطوبة بنتهم بعد فتره
جا متعب اصغر اولاد ابو مرزوق يحمل صينيه عليها فناجيل القهوه شربنا القهوه وركبنا الخيول وانطلقنا براة الديره ابعدنا مسافه حوالي 4 كليومتر
قلي ابو مرزوق : هاذ قرابتك صابه خبال ما هو بصاحي انت ودك تروح تحضر خطوبة البنت ؟
جاوبته : لا يا ابو مرزوق يا خويي قرابتي ما وجبني لاجل كذا ما اروح له .
سولفنا بامور ومواضيع وحنا في الطريق راجعين للديره
قلي ابو مرزوق : تسابقني يا ابو ظاري ؟
هزيت راسي موافق صرنا نتسابق اخذنا عدة اشواط قصيره لين صرنا بطرف الديره ودعته هو راح لبيته ورجعت لبيتي مسا ذاك اليوم توجهت لبيت خالي وجلست مع الرجاجيل
في الديوان كانت سواليف الربع عن ايام الطيبيين ومزايهم الطيبه وخصالهم الحميده واللي لليوم موجوده
والحمدلله ما تركناها ولا نتركها وعلمناها لأولادنا وبناتنا
ومضت الايام والشهور في يوم لفاني شخص من اقاربي ومعه حرمته و2 من اولاده استقبلته وادخلتهم البيت وجلسنا بعد ما قدمنا واجب الضيافه له ولاهل بيته
قلي الرجال : يا خال تشرفنا انت واهل بيتك الاسبوع القادم يوم الجمعه تحضر حفل فرح ولدي .
رديت : يشرفني يا خال احضر حفل فرح ولدك وجعله مبارك والتمام على خير إن شاء الله .
وفعلا هاذ اللي صار واذكر انه يوم الخميس اخذت ام عيالي وبعض محارم العائله في سياره تتسع 10 اشخاص لحضور حفلة حناء العروس استعرت هاذ السياره من شخص باجره يوميه
30 دينار وظلت بنتي الكبيره مع بناتهم حيث انهم بنات اخوان الرجال تربطهم صداقه قويه جدا مع بنتي والبنات ينادوني يا خال
يوم الجمعه توجهت لذيك الديره وصلتهم كانت الساعه 10:40 دقيقه على ما اذكر جلست مع الرجاجيل وحنا نسولف جا الشخص اللي ارسلي حرمته تعزمني مد يده صافحته
قلي : تراني اني زعلان منك يا خال ما جيت حضرت خطوبة بنتي
جاوبته : اسمع اقولها قدام الرجاجيل ما جيت لانك ما وجبتني ما جييتني بنفسك وعزمتني ارسلت لي زوجتك الرجال يوجب الرجاجيل والا اني غلطان يالربع
الجميع ايدني بكلامي قال شخص منهم : معاك حق انك ما جيت يا ابو ظاري المفروض انه جاك بنفسه وعزمك على خطوبة بنته
قلت له : سمعت رد ربعك اخوك جاني بنفسه لبيتي ومعاه اهل بيته عزمني ووجبني لزوم اوجبه هاذ هي سلومنا اللي تربينا عليها لو انك اتصلت علي وابديت عذرك ما تقدر تيجيني لبيتي
وعزمتني على خطوبة بنتك اجيك لكنك يا خال سويت ساوه ما هي بزيينه بحقي الناس يلومك انت ما يلوموني لانك انت قصرت بالواجب مو انا (والعياذ بالله من كلمة انا )
يا خالي لا تضيق صدري اليوم اليوم يوم الجمعه اليوم الفضيل عند الله خلنا نكسب الصلاه على رسولنا الامين صلى الله عليه وسلم واتركني من هالسالفه
بعد صلاة الجمعه جلست مع هالرجاجيل تغدينا والساعه 5 توجهن الحريم لصالة الافراح بعد حوالي ساعه ونص دخلو الرجاجيل اقارب العريس اولاد عمومته ظليت اخر شخص فيهم
تقدمت صافحت العريس وعانقته حطيت النقوط بيده بمغلف كتبت اسمي عليه وطلعت من الصاله انتظرت محارمي عند السياره حين طلعن في السياره توكلنا على الله / ونعم بالله
رجعنا للديره وصلت للديره وكانت الساعه 8:35 في الليل
بعد ذيك المره ما كلمني قريبي الا قبل فتره صدفته في حفل فرح شخص من اقاربه كان الكلام تبادل التحيه مو اكثر
وسلامتك يالربع
__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
"فكرة" الرجاء الرجاء الرجاء الدخول	محروم.كوم	منتدى أخبار المواقع والمنتديات العربية والأجنبية	0	04-28-2013 12:20 AM
الرجاء المساعده الرجاء الرجاء حفظكم ربي !!	محروم.كوم	منتدى أخبار المواقع والمنتديات العربية والأجنبية	0	10-06-2011 04:50 PM
موضوع يعلم الرياييل الرومانسية شوفوا ردود الرياييل والله فضحونا‎	محروم.كوم	منتدى أخبار المواقع والمنتديات العربية والأجنبية	0	08-12-2010 08:20 PM
ابحث عن سلقه او سلوقي تكفون يا الرجال تارو تكفا تهز الرجاجيل	محروم.كوم	منتدى أخبار المواقع والمنتديات العربية والأجنبية	0	06-25-2010 05:20 AM
تكفوووووووووووون يا الربع تكفون ترا تكفا تهز الرياجيل لولا ظروف الوقت ما قات تكفا	محروم.كوم	منتدى أخبار المواقع والمنتديات العربية والأجنبية	0	06-07-2009 12:40 AM