كنت اشقى منه بالصور

محروم.كوم · #1 05-04-2018, 02:40 AM

السلام عليكم ورحمة الله وبركاته
مسيكم بالخير الجميع

في يوم كنت عند خوالي في الديوان نادتني شايبتي الله يشافيها ويعافيها وطلبت مني اشب النار لاجل يخبزون العجين كان في حوش بيت خالي بعض حريم العشيره خالاتي وشايبة حميدي صديق طفولتي
وعمتي ام صالح رحمها الله واموات المسلمين
جبت الفرن وافرغت منه الرماد وحطيت داخله خرقه قديمه واشعلتها وصرت احط عليها الخشب والحطب لين صارت شبه قويه بعد فتره بسيطه تجمعن حريمنا وصارن يرقين العجين بايديهن
كانو الاولاد يتراكضون في الحوش وقربو منا طردتهم رجعو وصراخهم العالي ويقوم ابن اخوي حاتم وده يقفز من فوق الفرن ويلحقه ابن ضاري قمت امسكت ظاري
وقلت له : ويش هاذ ودكم تقفزون من فوق الفرن وهو مشتعل بالنار انصرف من هنا والا ترى والله اخلي العصا تعلم على جسمك وانت بعد يا ابو 4 سنون مثل سنون الارنب
امسكتني خالتي ( امي بالرضاعه ) من يدي
وقالت لي : نسيت نفسك وانت كنت بعمره كنت اشقى منه يوم ابلشتنا واطلعت الطليان من الحظيره
جاوبتها : يا يمه ما اسوي سواتهم اقفز من فوق الفرن والنار شابه داخله
ناظرتني وقالت : ويش السوا معاك خلص والله كنت اشقى اولاد الحي وفوق هاذ تضربهم ما انسى يوم ضربت اخوك حمد والا نسيت ذيك السوا
قلت : ضربته لانه ضرب اختي وده يسوي فيها رجال البيت يقول اسمعي ترى اضربك ان خالفتي كلامي انا اخوك اكبر منك تراني رجال البيت البنات يظلون داخل البيت
قالت : كل سؤال وكلمه جاوبها حاظر عندك
قمت وقلت لهم : وديعكم الله ودي اروح الديوان عند الرجاجيل

امسكتني خالتي من ثوبي واجلستني وقالت :
اسمع حين نخلص خبز العجين تروح عند الرجاجيل خلك لاجل تظل تحط الحطب والخشب داخل الفرن
حطيت عالجرح ملح وسكت كانت خالتي تقول للحريم وبعدين مع هالولد هاذ حمد سوا لي صداع في راسي ما وده يتزوج ما خليت من جهدي جهد لاجل يوافق انه يتزوج لكنه رافض هالامر
واحترت معاه ويش الراي والتدبير يا خواتي وشايبه ترك لي هالامر ادبره بمعرفتي وللحين ماني عارفه ويش اسوي
قلت : اسمعيني يمه ما عليك انتي منه اتكلم مع حمد واقنعه انه يوافق يتزوج لا تراجعيه بهاذ الموضوع اتركيه
لي اعرف شلون اقنعه تطمني يمه
قالت : ليتك سالم غانم يمه ترى ريحتني من هالموضوع ودي اخلص لانه ابو العيال دوم يسألني وجوابي
له الولد رافض فكرة الزواج
جلست جت علينا اختي بالرضاعه حامله بيدها ابريق شاي وباليد الثانيه الصينيه وعليها كاسات حطتهم جنبي وصارت تصب الشاي لنا شربت الشاي
امسكت فرع شجره وحطيته داخل الفرن وخالتي ام حاتم جابت صينيه فيها قطع لحم وعليه زيت زيتون وبهار وجاهز للشوي حين فرغن الحريم من الخبيز شايبتي شافاها الله وعافاها
امسكت صينية اللحم وحطتها في الفرن وغطتها بعد لحظات سمعت صوت بنت خالي دخلت الحوش كانت رجعت من وظيفتها في اجازه مدتها 3 ايام طرحت السلام علينا ردينا السلام امسكتني
من رقبتي من الخلف
وقالت لي : والحين تقدر تفلت من هاذ المسكه ؟
جاوبتها : للحين ما عرفتي اخوك ابو ظاري مديت يدي وامسكتها من يدها من المعصم وضغطت عليها وسحبتها لين صارت قدامي
قالت : خلص اترك يدي والا ترى اصارخ على ابوي
قلت : اذا طلع صوتك ما تلومين الا نفسك .
قالت : انا بوجه عمي حسن الله يرحمه واموات المسلمين اللهم آمييين *** اللهم آمييين
اغمضت عيوني وقلت : نكأت الجراح واثرت الشجن وفتحت المواجيع يا خيه طلبت من زوجة اخوي سلمان تعطيني ثوب من هدوم زوجها لانه ثوبي صارت ريحته نار وتلطخ بالرماد وقطع الفحم
تروشت ورحت لعند الرجاجيل جتني خالتي ( امي بالرضاعه ) ناظرتها اشرت لي بيدها يعني ودها تكلمني تعذرت من الرجاجيل ورحت لعندها
قالت لي : متى تكلم اخوك حمد لاجل تقنعه بالزواج ؟
جاوبتها : اليوم إن شاء الله اكلمه والحين اعرف وين يكون لا تبلشين نفسك بالموضوع هاذ
تعذرت من الرجاجيل ورحت لمقهى بلياردو يجتمعون فيه شباب الديره يلعبون البلياردو والكوتشينه وتنس الطاوله ويقدمون فيه مشروبات ساخنه ومشروبات بارده دخلت ذاك المكان
وطرحت عليهم السلام الجميع صار يناظرني وصابهم سكوت غريب
قلت بصوت عالي : قلنا السلام عليكم ما تردون السلام ؟
صارو الربع يردون السلام جلست على طاوله جاني راعي المقهى وجلس على نفس الطاوله
ولحقه ابنه قدم لي كاس شاي
قلي راعي المقهى : هاذ اول تدخل المقهى يا ابو ظاري لاجل كذا الربع كلهم استغربو وصابهم السكوت
قلت له : الصراحه جيت ودي اكلم ابن خالتي بموضوع ودي اصبر لين يخلص شوط البلياردو
حين خلص ابن خالتي اخوي بالرضاعه لعب البلياردو طلعنا مع بعض ومشينا لين وصلنا طرف الديره وسولفت معاه بموضوع الزواج بطريقتي الخاصه اقنعته انه يوافق يتزوج
ورشحت له اصغر بنات خالي ابو حاتم وكانت خلصت دراسه في كليه مدة سنتين وبعدها كلمت خالتي
(امي بالرضاعه ) وهي بدورها كلمت ابو عيالها وخطبو بنت خالي لاخوي حمد
والحمدلله تم النصيب والحين عندهم 4 اولاد اكبرهم عمره حوالي 7 سنوات

الحين اترككم مع صور الفرن وخبز العجين

هاذ هو الفرن المصنوع من المعدن وعليه الغطا

شبة النار في الفرن والماده اللي باللون البني تحت النار( الجفت )
( بقايا مخلفات ثمار الزيتون بعد عصر الزيت منها )

شدة حرارة الحصى داخل الفرن وطلوع الدخان الخفيف حين رفع الغطا

وضع فرع شجرة زيتون داخل الفرن

اشتداد الحراره لاجل الخبيز

العجين على الصينيه وعليه الطحين

تم رق اول رغيف من العجين

وضع اول رغيف على الحصا الحار

الرغيف على الحصى الحار ينتظر يستوي الوجه الاول

قلب الرغيف على الوجه الثاني لاجل يستوي من الوجهين

الرغيف ينتظر يستوي وجه الثاني

انتهاء اول مجموعه من الخبز

انتهاء المجموعه الثانيه من الخبز

وسلامتكم يالربع
__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
اسقي الورد بالماء....@@	محروم.كوم	منتدى أخبار المواقع والمنتديات العربية والأجنبية	0	05-09-2010 08:50 PM
اسقي الورد بالماء....@@	محروم.كوم	منتدى أخبار المواقع والمنتديات العربية والأجنبية	0	05-09-2010 08:10 PM
فحل اشقح للبيع في الكويت	محروم.كوم	منتدى أخبار المواقع والمنتديات العربية والأجنبية	0	01-03-2010 02:20 AM
كوب ماء .. كوب زيت .. كوب فارغ ..	♕ وليد الجسمي ♕	الإسلام والشريعة	22	02-11-2009 04:42 AM
كنت احبكـ . كنت اعزكـ . كنت ابيكـ . كنت لكن !!!!	خذاني الشوق	هواتف , مسجات , وسائط , برامج , ثيمات , نغمات , بلوتوث	20	01-01-2009 10:26 PM