| ||||||
| قصص و روايات تهتم بالقصص المنقوله وقصص الاعضاء الطويلة والقصيرة |
 |
| | LinkBack | أدوات الموضوع | انواع عرض الموضوع |
06-02-2008, 02:14 PM
| رقم المشاركة : [ 51 ] |
| عضو جديد |  «®°·.¸.•°°·.¸¸.•°°·.¸.•°®»حلووو الجزء و نتريا الي عقبه«®°·.¸.•°°·.¸¸.•°°·.¸.•°®»
__DEFINE_LIKE_SHARE__
|
|
| |
 |
|
06-06-2008, 03:04 PM
| رقم المشاركة : [ 52 ] |
| عضو ماسي ![الصورة الرمزية +[ حكومة قلبي ]+](files/customavatar/avatar729_2.gif){kind=avatar} | يسلمووو حبايبي ع المرور
__DEFINE_LIKE_SHARE__
|
|
| |
| |
|
06-07-2008, 11:22 PM
| رقم المشاركة : [ 53 ] |
| عضو ماسي | الجزء التاسع .. عقب اليوله و الربشه الي عاشوووها الشباب .. سرى كلن لداره ... تم مبارك هو و سعيد عند سلطان عقب ما سرووو الشباب ... و كل شوي تتصل ام مبارك محتشره عليه عشان يسرووون رماح .. مبارك : فدييييييييتج العيوز شوي و بيييج .. ام مبارك : يالله عليك يامبارك .. يوم ان خاطرك في اليلسه الين نصايف الليل جان قلتلي جان خليت سراج و الا واحد من خوانك اييبني ... مبارك : امايه امايه .. اسمع خالوه تزقرج توايبيلها ... ام مبارك : تزقرني .. عنلاتك مسود الويه .... مبارك : ههههههههههه ... فديتج فديتج و الله شوي و بييج .. ام مبارك : ما عليه بشوف هالشوي هذي .. تم سلطان و سعيد و مبارك يسووولفون .. سلطان : بو عسكور . سعيد : عونك .. سلطان : طلبتك قل تم .. سعيد : تم .. سلطان : اباك اتشللي شلة العامري احب صوتك ... مبارك : افا بو عسكوور تشل و انا ما عندي علم ... سعيد : هههههههههه .. هب من زين الصوت ربي يطولي في عمرك .. سلطان : لا خل عنك .. حرااام يا صوووت ما فيه حيله .. مبارك : يالله يالله .. سلطان و بعد ما شغل الكيمره ..: يالله بو عسكوور .. سعيد : ههههههههههه ... و ليش مشغل الكيمره بعد ؟؟.. سلطان : جاد ربك وحده من الغراشييب تشوووف الشريط و الا شي .. و يذبحها صوتك ههههههههه سعيد : هههههههههه ... احب صوتك و محلا رنت الهاتف ... لي من جداكم حبيبي صدق تسعدني و محلا حديثك معايه يوم تتعاطف ... كل متى حبك من الخاطر تفرحني همسات صوتك و نار الشوق بي عاصف ... متى حبيبي بك الايام تجمعني اكف دمعي و دمع العين بي ذارف ... اخفي دموعي و دمع العين يفظحني احبك انت حبيبي و انت بي عارف ... من غيرك انت بهمساته يسامرني اخذت قلبي و ليتك بالقلب رايف ... انت مريحن و انا عيني تسهرني احب صوتك و محلا رنت الهاتف ... لي من جداكم حبيبي صدق تسعدني مبارك : ما فيك حيله بو عسكووور .. و عقب ما يلسو شوي سرى مبارك و سعيد عن سلطان ... دخل سلطان البيت و كانت روضه بعدها واعيه .. روضه : وين كنت ؟؟؟ سلطان : يالس عند الشباب ... روضه : يالفضايح و خوانك ترهم يوم دخلو البيت كان حد باقي من الشباب ؟؟!!.. سلطان : هيه لا ربعي .. روضه : ازين هات الكيمره ... سلطان : شو تبنها ... روضه : بشوووف .. ظنك بايته ارقبك تحدر عسواد عيووون .. الا عشان ان الكيمره عندك .. سلطان : و الله ؟؟.. ما عليه عيل ماشي كيمره و لا بتشوفينه الفلم روضه : سلطان فديييييييييييتك .... سلطان : ههههههههههههه .. ترجيني اكثر .. روضه : بتبطي ... يالله عطني الكيمره ... سلطان و هو يمد الكيمره لروضه : ههههههههههه ... لو مب تعبان جان راويتج .. روضه : ههههههههههه و اهون عليك سلطووون .. سلطان : و هو رايح صوب حجرته : لا ما تهونين .. بس يله رقاد خلي عنج السهر .. روضه : انشالله باباتي ... دخلت روضه حجرتها و الكيمره في يدها ... يلست عشبريتها و هادت الفلم الي في الكيمره و فتحت الشاشه الصغيره الي في الكيمره و يلست تشوووف الفلم ... و طلع مبارك في الفلم وااايد و كانت كل ما تشووفه تعيد اللقطه .. الين ما وصلت عند الاهداء يوم نزل مبارك بالكلاشن من سيارته ... كنت الصوره مب وايد واضحه و الصوب مب زين ... بس من لغثت روضه ما قدرت تستنا اللين ما يودون الفلم للاستيديو عشان ينسخونه عشريط فيديوو ... كانت تشووف مبارك و هو ايووول ... ذبحتها حركات ... منوه المعنايه بهاليوله ... شمامي ؟؟.. الي اتصلتبه و احنا في العزبه ؟؟.. و الا وحده غير ؟؟.. و الا انا ؟؟؟.. احتارت روضه بافكارها ... في شي في مبارك يجذب روضه صوبه .. و هي ما تقدر تجذب و تقول ان مافي مشاعر في قلبها صوب هالانسان ... بس هي خايفه من مشاعرها .. خايفه من مبارك اكثر ... هو شوو يريد منها ؟؟. ليش يعذبني .؟؟!!... روضه تفكر في مبارك .. و مبارك اول مره فحياته يحس بشي غريب هالليله .. شي مب عارف شو هو .. ليش اهديتها الغنيه و اليوله ؟؟.. كيف تحق نفسي لبنت عايفتني و لا هي بحاسه بشي ... انزين انا ما احبها .. يالله و الله كرهت عمري و الله ... حشى انا شالله بلاني بهالبنت ... حتى يوم حب لطيفه ما عاش هالشي معاها .. شمعنا روضه هي الي تحرك هالشي فيه ... تم مبارك يفكر في روضه طووول الليل .. كان يتخيلها و هي تمشي.... و هي تتكلم .. كان يتخيلها و هي معاه ... نش مبارك و طلع من حجرته صوب سيارته هو لابس الا الفالينه و الوزار .. ركب سيارته و ظهر قصيدة روضه و يلس يقراها ... مستحيل وحده كتبت هالقصيده يكون شي في قلبها صوبي ... شغل مبارك سيارته و تم يحوووط في الشعبيه ... و بعدين رجع البيت و نام ... يوم اليمعه بعد صلاة اليمعه .... الكل في بيت قوم شمامي يالسين عقب الغدا يسولفون ... كانت خالة مبارك قد قالت لريلها ان ختهال سلامه تريد وديمه لراشد ولدها .. و هم يالسين ام شمامي : شمامي تعالي اباج ... شمامي : عووونج الغاليه .. ما تم في الصاله الا بو شمامي و علي و سعيد و سالم و وديمه .... نشت وديمه بترووح حجرتها بوشمامي : هاه وديمه وين بها ؟؟.. وديمه : سلامتك الغالي .. برووح الحجره بذاكر شوي .. بوشمامي : صبري لاحجه عالمذاكره اباج في سالفه .. انتي و خوانج .. وديمه : انشالله ... و رجعت وديمه و يلست .. بوشمامي : امس خالتكم سلامه يت ورمست امكم ... سعيد : رب ما شر ؟؟.. بوشمامي : ما شر يعني افداك ... الا بغوو وديمه لراشد ولد خالتك ... تم ويه وديمه احمر من المستحتى .. ما كانت تتوقع هالشي .. و تمت ساكته ... سعيد : و الله يا راشد انه ما ينعاب ... سالم : ريال ما عليه رمسه ان بغيت الشوور .. ما بتلقون حد اخير عنه لوديمه ... بو شمامي : و هذا شوري انا بعد .. الا ما رمت اقول شي قبل لا اشاوركم ... و ترى الشور كله لوديمه .. و التفت صوب وديمه .. هاه وديمه شو رايج .. وديمه و هي مستحيه : ... ما ادري .. بو شمامي : كيف ما تدرين بعد ؟؟.. تبينه و الا لا ؟؟.. علي : يابويه هذا عرس مب لعبه .. عطوها فرصه تفكر .. سعيد : عاد بخبرك لو هو واحد غريب بنقوول الا يوم هو ولد خالتها شعنه تفكر بعد ؟؟.. نشت وديمه عنهم و خلتهم برووحهم يكملون الرمسه ... دخلت وديمه حجرتها و يلست تصيح ... في هالوقت شمامي و امها في المطبخ .. شمامي : الحين ساحبتني من البراد صوب المطبخ عشان ما ادري شوو هالدله الي ادورينها القايله .؟؟؟!!!!!!.. ام شمامي : لا .. في سالفه بين بوج و خوانج و سحبتج عنهم .. شمامي : سالفة شووووووو ؟؟؟؟؟... ام شمامي : انشالله بنشووف عالشووه بيتفقوون و عقب بقولج ... شمامي : حرااام عليج .. و الله لتقولين شوو السالفه شووو مستوي ؟؟؟... ام شمامي : سلامتج .. خالتج سلامه امس يتني تخطب وديمه ... شمامي و هي فرحانه : و الله ؟؟؟؟... لمنوه ؟؟.. ام شمامي : لراشد ... انصدمت شمامي بهالشي ... رااااشد بياخذ وديمه ختيه ؟؟؟.. راشد من بد الشباب بياخذ ختيه ؟؟؟؟ .. طلعت شمامي عن امها و راحت حجرتها و يلست تصيييييح و تصيح من الخاطر ... من بد البنات يوم بغى ياخذ خذ ختيه ؟؟؟... شووو هو ما يحس ؟؟.. تمت شمامي حابسه عمرها في حجرتها و تصيح اللين المغرب .. جن روضه كانت حاسه ان شمامي فيها شي .. اتصلت روضه بشمامي و شله سالم .. روضه : السلام عليكو .. سالم : و عليكو السلام روضه : شمامي موجوده .. سالم : هيه نعم .. لحظه .. راح سالم و دق عشمامي .. سالم : شما ... تعالي تيلفون ... شمامي : منوه ؟؟؟.. سالم : شدراني وحده من ربيعاتج ... شمامي : اوكي ... نشت شمامي و طلعت من حجرتها و شلت التيلفون عندها في الحجره .. شمامي : الوو .. روضه : هلا و الله .. شمامي : روضووووووووه ... يلست شما تصيح روضه : شمامي شو فيج ؟؟؟.. شما : روضوه بموووت .. روضه : بسم الله عليج .. شعندج ؟؟؟.. شما : رااااااشد .. روضه : شوو بلاه راشد؟؟.. شما : بياخذ وديمه ختيه ... من الصدمه ما عرفت روضه شو تقول و الا تسوي ... روضه : خلاص شمامي انا بييج اللحين .. سكرت روضه عن شما و راحت و تلبست و راحت صوب شمامي و يلست عندها تحاول انها تهديها .. بس يلست روضه تصيح فطرفها .. كان عند روضه امل ان راشد ياخذ شما .. و يمكن يكون لها امل مع مبارك ... بس بهالشي انعدم أي امل الها مع مبارك ... روضه : ازين يمكن وديمه ما توافق عليه .. و الا بوج ما يوافق شما : مستحيل بوويه يرفض حد من عيال خالوه سلالالامه ... بعدين لو رفضوو امي ما بترفض و انتي تعرفين امايه اذا عزمت عالشي لازم تسويه ... ما عرفت روضه شو تسوي و الا شو تقول لشما عشان تهديها ... طلعت روضه من حجرة شما و راحت صوب وديمه تشووف شو الوضع عندها ... كانت وديمه يالسه تذاكر ... روضه : شوو تسوين ؟؟؟.. وديمه : هههههههههه ... اوين اذاكر ... روضه : ههههههه .. وديمه : من متى و انتي عندنا محد قالي انج يتي ... روضه : تلقفتني ختج الله يهديها من عند البنات ... حشى ما خلتني اسلم عحد .. ههههههههههه وديمه : ههههههههههه ... و منوه هالحد ؟؟؟.. روضه : ههههههههههههه ... الا قوليلي صدق الرمسه الي قالولي عنها .. وديمه و هي مستحيه : أي رمسه ؟؟.. روضه : خلي عنج .. اوين انج ما ترفين يعني ؟؟؟.. وديمه : تصدقين روضوه و الله انصدمت ... روضه : ليش عاد ..؟؟؟!!!.. وديمه : ما ادري بس صدمني ان راشد يباني ... تعرفين امايه عقب ما دخلت عن قوم بويه .. دخلت عليه الحجره و قالتلي ان خالوه سلامه قالتلها ان راشد هو الي ياها و قالها انه يريدني ... انا بصراحه كنت متردده .. لاني ما اعرف شي عن قووم خالوه عن طباعهم و الا عن حياتهم .. تعرفيني مالي دخل بحد ... بس يلست امايه تقول انه بغاني و انه لو مب شارني ما راح و طلبني من امه بالاسم ... ما ادري روضوه و الله خايفه ... روضه بعد ما سمعت هالشي عرفت ان ما في امل لشما مع راشد لان راشد يريد وديمه و مب هله الي خطبوها له .. روضه : ودوووم هذا عرس ... و تراج بتعيشين حياتج كلها مع هالانسان و لازم انج يووم تاخذين واحد تكونين واثقه انج بترتاحين معاه و بيسعدج و بتسعدينه ... وديمه : ادري و الله ... رجعت روضه بيتهم و هي مب عارفه شو تسوي .. محتاره .. حب شما لراشد كان من طرف واحد ... مسكينه شما جن الانسان الي تحبه بياخذ ختها و بتم طول حياتها تشووفهم جدامها ... و في هالاثناء كانت شما ميته مب عارفه شو تسوي .. اول شي خطر في بالها انها تتصل براشد ... و صدق اتصلت شما براشد .. راشد : الوو .. شما : ... الو . راشد : مرحبا ... شما : راشد ؟؟.. راشد و هو مستغرب : هي راشد ... شما : .. شحالك ؟.. راشد : بخير و نعمه .. تم راشد ساكت مب عارف منوه هذي الي متصلتله الساعه 12 فليل .. راشد : نعم ختيه رب ما شر ..؟؟ شما : راشد انت ما عرفتني .. راشد : ليش الشيخه المفروض اني اعرفج يعني ؟؟.. شما : راشد انا شما .. عرف راشد انها شما بنت خالته فاطمه بس ما حب انه يتمادا معاها في الكلالالام .. راشد : شما ؟؟؟ شما : شما بنت خالتك فاطمه .. راشد : مرحبا شما شحالج ؟ شما : يهمك تعرف حالي .. راشد :....... شما : راشد انت ما تحس ؟؟؟.. راشد : شوووو ؟؟؟ شما : حرام عليك انا شو سويتبك عشان تعذبني ... حرام عليك راشد انت شو جنسك ؟؟.. راشد : لحظه لحظه ... انا شو سويت عشان كل هذا ؟؟.. شما : ما سويت شي سلامتك .. بس بكل بساطه تريد تاخذ ختيه ... حراام عليك يووم انت عايفني .. تاخذ ختيه عشان تنتقم مني يعني ؟؟؟.. راشد : شما ما كان من بيننا شي .. و انتي شرات ختيه و... شما : ختك ؟؟؟؟؟ اللحين تقولي ختك ؟؟.. حرام عليك سنين و انا عايشه عشانك .. سنين و انا اتخيل اليوم الي بتكون فيه ملكي و اليوم بكل بساطه تقولي ختك ؟؟؟؟.. راشد : شما .. شما : شوو بتقول ؟؟؟.. راشد شووو ما تذكر يوم قلتلي مستحيل تكونين لريال غيري .. شووو ما تذكر .؟؟؟.. راشد : شما هالسالفه مر عليها سنين .. شما : بس انا بعدني عايشه على هالرمسه .. بعدني اذكر شكلك و انت تقولي هالرمسه ... راشد : شما ممكن تسكتين شوي ... شما : ..... راشد : شما الي كان من بيننا كان لعب مراهقه و مر عليه سنين اللحين ... الله مب كاتبلنا نصيب .. شما مبارك بياخذج .. و من فكر فيج مبارك تحرمين عليه ... شما : مبارك ما رمس .. راشد : و منو قال انه ما رمس ... شما مبارك من سنه طافت .. في نفس اليوم الي قلتلج فيه هالرمسه .. ياني مبارك و قالي انا اذا فكرة اعرس في يووم ترى شما هي الي باخذها ... تعرفين شو معناة هالشي ...؟؟!!!... يعني انتي في خاطر مبارك .. و مبارك يريدج .. شما : عشان جذيه انت كنت تصدني كل هالفتره ؟؟؟... ليش ما قلتلي راشد .. مب حرام عليك ..؟؟؟.. راشد حراام عليك تذبحني و انا مالي ذنب .... راشد لو كنت تباني و قد كلامك لي كان المفروض تخطبني انا مب وديمه ... راشد : شما صاحيه انتي ؟؟؟.. شو ما تفهمين ؟؟؟. .. اقولج خويه خاطره فيج كيف تبيني ااخذج ؟؟؟... شما : و انا خاطريه فيك .. كيف تباني ااخذ خوووك ؟؟؟؟... سكت راشد ما عرف شو يرد عشما ... راشد : ارجوج شمامي لا ... شما و هي تصيح : تعرف انك من زمان ما قلتلي شمامي ..؟؟!!!.. في هاللحظه ما قدر راشد يمسك عمره ... صدق هو حب شما و هي كانت الانسنه الوحيده الي في حياته .. ما قد كلم بنت و لا قد طرت عالبال أي وحده من البنات كانت شمامي ماليه عليه كل دنياه ... كان يعرف انها تحبه ... كان يشووف الحب في عيونها .. كان يسمع الشوووق في همسها ... كان الحب من بينهم حب عذري حب ما مسه حب هالايام .. كانوو يحبون بعض بصمت .. كانت شمامي دوووم عندهم في الاجازات .. كانت عادي تيلس عنه و يسولفون .. بس في كلام كانو يقولونه بالرسايل .. بس من سنه اعترف مبارك انه يريد شمامي ... بس هو مأجل ستافة العرس شوي .. و من ذاك اليوم وراشد يدوووس عحبه لشما و يكابر على حبها ... سوى المستحيل عشان يبعدها عنه ... و شما حست بهالشي .. بس ما كانت تدري انها ممكن تهون على راشد و يقدر انه يعذبها بهالطريقه ... راشد : شما .. ارجوووج ... شما : انت الي ارجوووك ... راشد .. انت ما لقيت حد تخطبه غير وديمه ختيه ؟؟.. ليييش ؟؟؟ اذا عايفني خطب الي تباها بس ليش تخطب ختيه ؟؟؟.. انا صنتك و ربي عكلامي شاهد ... و تجازيني انك تخطب ختيه ؟؟؟... راشد : شما ... انا ما خطبت وديمه عشان انتقم منج ... انا خطبت وديمه لاني من شفتها و انا معجب بها... شما : شوووووووووو ؟؟!!!!!!؟؟!؟!؟!... راشد : هذي هي الحقيقه ... انا ما احب وديمه ختج ... بس انا معجب بها من الخاطر ... و يوم عزمت عالعرس هي الي طرت عبالي ... شما : حراااااام عليك راشد .. انت تذبحني بكلالامك هذا ... راشد : شما ... شما : و الله اهون عليه انك تقولي انا بعتج عشان خويه و لا انك تقولي انا بعتج عشان ختج عيبتني .... حراااااااام علييييك و الله حرااااام .... سكرت شما عن راشد و هي ميته من كلالالام راشد ... حتى راشد حز في خاطره هالموقف ... هو تعمد انه يقولها هالرمسه عشان ما تفكر فيه ... هو صح عيبته وديمه بس مب لدرجة انه يعاف شما عشانها ... بس لازم شما تنسى راشد عشان مبارك ... كان هالحال على شما و راشد ... و مبارك ما يدري عن الي مستوي ... ما كان يدري ان كلمه نطقها في يووم ممكن انها ادمر حياة غيره .. قد قال مبارك لراشد انه ايريد شما بس هالكلالام كان من زمان و مبارك نسى هالسالفه و لا طرت عباله حتى .. و لو راشد رجع و كلم مبارك في السالفه جان عرف هالشي ... بس راشد ما كان يقدر انه يكلم أي انسان عن شما ... لانه ما يريد حد يمسها بشي ... بعدها بيومين اتصلت ام شما بختها و قالتلها انهم موافقين و حددو يوووم عشان يروحون الريالييل و يخطبوون رسمي ... و تحدد اليوم و كان الخميس الياي ... تلايموو قوم بالخيل كلهم و راحووو صوب الوثبه و كانو المناصير عمومة شما و خاوالها يستنونهم .. و بعد هاليوم الكل عرف ان وديمه تم خطيبة راشد ... في هاليوم تموو الشباب يالسين يسولفون و مبارك عندهم .... سعيد : مبارك ... مبارك : عوونك بو عسكوور ... سعيد : اباك في رمسه .. عبيد : يالله يالله ... و ما ينفع هالرمسه تنقال جدامنا .؟؟... علي : هههههههههه ... لا ما ظني .. مبارك : ههههههههه ... نش نش خلنا نروحلنا في بقعه عدله بدل ما نرتز في نص هاليهااااااال سعيد : ههههههههههههه ... عبيد : برووووووك اشووف فيك شعر ابيض ... سالم : يمدحونها الصبغه ... مبارك : عنلالالاتكم .. الشيب هيبه ... علي : خل عنك اللواته ... اوين الشيب هيبه ... راح مبارك هو و سعيد ولد خالته في سيارة سعيد و تموو يحوطون في الشعبيه ... خطف سعيد من جدام بيت هل رووضه ... مبارك لا اراديا افتر براسه صوب الباب جنه يتوقع ان روضه واقفه اتطالعه ... انتبه سعيد لحركت مبارك .. سعيد : خييبه افترت الرقبه ... مبارك : شووو ؟؟؟... سعيد : سلامت قلبك ... الا رقبتك افترت و انت توايج ... مبارك : لا كنت اشووف جن سلطان في البيت و الا لا ..؟؟ سعيد : سلطان ؟؟.. ههههههههههههه مبارك : هههههههههههههههه ... المهم .. علومك انت ؟؟؟ سعيد : علوم الخير يالخوي ... مبارك : عساك دووم انشالله ... سعيد : يمييع انشالله ... مبارك : انزين ... سعيد : انزين .... مبارك : لا و الله ؟؟؟؟... سعيد : هههههههههههههه ... مبارك : شو فخاطرك بو عسكوور ؟؟؟... سعيد : اممممممم ... ياخي ما اعرف شو اقولك .. مبارك : قول الي في خاطرك و لا تستحي ... سعيد : انشالله ... بس ما اباك تفهمني غلط ... مبارك : ..... سعيد : انا ... اريد امنه ختك ... انصدم مبارك بهالشي .... عمره ما توقع ان سعيد يريد ااامنه ... تم مبارك ساكة مب عارف شووو يرد عليه .. سعيد : و الله اني اباها من زمان و الله .. الا انت تعرف كيف كانت ظروفي و لا قدرت اني اتقدملها الا و انا ريال ساد عمري ... مبارك : افا عليك يا بو عسكوور انت تنشرى بفلوووس و الله .. سعيد : لا و الله بس حتى ... بس انا ما قدرت ارمس حد الا يوم شفت عمري ارووم اسد عمري و اسد حرمتيه ... بس استوت خطبت راشد و وديمه .. مبارك : و انت شو عليك منهم .. سعيد : مبارك ... انا اريد ختك .. بس ما ادري اذا هي تباني و الا لا ... يمكن البنت ما تباني و خالتيه تتلوم و تقول هم قربونا و احنا ما قربنابهم ... تعرف الحرمات عاد ... و انا ما اريد اظلم ختك معايه ... ان ما كانت تباني انا ما بخطبها رسمي ... مبارك : اها فهمت عليك .... يعني انت تبى تعرف رد امنه عليك قبل لا تخطب رسمي ..؟؟.. سعيد : هيه ... بس و الله و الله و الله يشهد عهالشي اني ما قد غلطت على ختك و لا فكرت بها أي تفكير شين و اني اباها عشرع الله ... مبارك : و انا اعرف هالشي فيك يا بو عسكووور و انشالله فالك طيب انشالله ... عطني يومين و بردلك خبر انشالله .... مسكييين حالج يا شما ... ظنكن امنه بتوافق على سعيد ...؟؟؟ امممممم ... القدر بيجمع روضه و مبارك .... شو هالموقف الي بيجمعهم ..؟؟؟... كيف روضه بتتصرف مع مبارك ؟؟؟.. كيف مبارك بيتصرف مع روضه ؟؟؟... ثنينتهم يكابرون في حبهم لبعض ... منو الي بيتنازل و بيعترف لثاني ؟؟؟ __DEFINE_LIKE_SHARE__ |
|
| |
| |
|
06-07-2008, 11:22 PM
| رقم المشاركة : [ 54 ] |
| عضو ماسي | الجزء العاشر ... في هاليوم ما قدرت شما انها تنام ... خلالالاص ظاع الامل في ردت راشد لها ... اكره وديمه و الا اكره راشد و الا اكره عمري و الا اكره هالزمن ؟؟... وش جرمي عشان ما انال محبوبي ؟؟!!!... ااااه يا زمن ليت ترفق بالحال و ترحم قلبي المسيكين ... شما تصيح حب راشد .. و روضه تصيح شو مبارك ... من الخاطر روضه حبت مبارك .. يمكن هي رافضه هالحقيقه .. بس حب مبارك تملك كيانها .. و صار شريان فوادها ما يرتوي الا بشوووق مبارك ... حتى مبارك و لو هو يكابر بس هو اكتشف ان روضه عسكرت في فواده .... و ما في انسانه ممكن اتحل مكانها ... بعد خطوبة راشد و وديمه بيومين ... شما : روضوه و الله مب قادره استحمل و الله ... روضه : .... و الله ما ادري شو اقولج يا شما ... بس ربي يصبرج ... شما : يا ويلي يا روضه و الله مب قادره اجابل وديمه ... ما ادري اكرها و الا احتقرها و الا شووو ... بس و الله مب قادره اجابلها و الله ... روضه : شما لا تظلمين وديمه ... انتي اكثر وحده تدري ان وديمه ما لها ذنب في هالخطبه ... و اذا بتكرهين و الا بتحتقرين فألاولى تحتقرين راشد ... هو النذل ... عنلاته ما لقى الا ختج عشان يخطبها ؟؟؟!!!... شووو جنسه هالانسان ؟؟!!!.. شما : ههههههههههه .. هذا حال الشباب كلهم ... من ياخذ من البنت الي يباه بيطبها و بيطب ترابها بعد ... روضه : لييييييييييييش شمامي شي كان بينج و بين راشد غير الي اعرفه ..؟؟؟!!!!... شما : لا و الله و ربي يشهد عكلامي .. و الله يا راشد ما قد غلط عليه بكلمه و لا لمس شعره من راسي و الله و رفجت يدي في قبره ... روضه : يا ويلي خوفتيني .. قلت البنت سوت شي و انا ما ادري ... سكتت شما و روضه ... كان خاطر روضه اتشوف وضع شما بالنسبه لمبارك اللحين بعد خطبة راشد .. روضه : اممممممممم ... الا مبارك ما خطبج رسمي ؟؟ شما : لا ما خطب ... روضه : اممممم ... شما اذا خطبج مبارك .. بتوافقين عليه ..؟؟ شما : اممممممم .. روضه : .... شما : تعرفين .. بعد ما كلمت راشد ذاك اليوم .. حلفت اني لخليه يندم عاليوم الي فكر فيه انه يبيعني .. روضه : ... شما : تعرفين شووو قررت ؟؟؟.. روضه : شووو ؟؟؟... شما : و الله ان خطبني مبارك اني لاوافق عليه ... بس عشان انتقم من راشد ... عشان يصبح و يمسي و هو يشوفني ... انا ادري ان راشد بعده يحبني ... بس صدقيني و الله لذوقه المر الي قاسيته و انا اشووف دبلته في ايييد وديمه .... و الله لخليه يجاسي مثل ما انا جاسيت .. و الله .. و يلست شما تصيح ... من بعد ما سمعت روضه كلام شما ... ما عرفت شو تسوي .. اذا راشد و هو الي يحب شما سنين يجازيها بان ياخذ ختها .. كيف ممكن يسوي في مبارك و هو الي ما يعرفها الا من كم ٍ شهر بس ؟؟!!!!... ليييييش حبيت هالانسان من بد كل الخلق ؟؟!!!... خلالالاص مالي امل بمبارك ... هذا كان الحال في الوثبه .. و في رماح .. كان الجو ثاني ... الكل يخطط لعرس راشد مع ان العرس بعده مطول ... عوشه : شوووفووو ... لازم تيبووون بوصلالاح ... امنه : هيه لازم ... بو مبارك : و شو الي الزمه عاد ؟؟!!... امنه : شو تباهم يقولون حمد الخييلي غلبه بو صلاح ما رام اييبه لعرس ولده ؟؟!!.. بو مبارك : ههههههههههههههه ... لا امايه ما بيغلبنا لا بو صلالاح و لا بو فلالالاح .. عوشه : هههههههههه ... باباتي ..الا بتخبرك .. بو مبارك : عووونج غناتي ... عوشه : هالقوم الي روحوو معاكم الخطوبه منوووه ؟؟؟.. ام مبارك : القوووم ؟؟!!!.... حشى يلسانج .. ما قد تنطقتي لا انتي و لا ختج بكلمه عدله . بو مبارك : شو بلاج يا سلامه عالبنات خليهن يرمسن ... و انا اشهد انهم قوووم ... حشى ما خليتي حد ما دعيتيه ... هاي الخطووبه و ودعيتي هيلا كلهم عيل العرس شووو بتسوين ؟؟؟؟.. مبارك : ههههههههههههه ... لا يوم العرس العيوز بتحد لافتات في الشوارع ... عرس بالخيل و المناصير .. لمن يرغب في الحظووور من الشيوووخ و ابناء الجبايل .. هههههههههههه ام مبارك : تتطنز مسود الويه ؟؟!!!... ما عليه .. راشد الكل بينش في عرسه .. و الا انت بن عروه بينش في عرسك .. مبارك : هههههههههههههههه ... بس عليه شوووفت بن عروه .. هههههههه بو مبارك : ههههههههه ... الا بتخبرك شعندك باغظ العرس ؟؟؟.. راشد : ههههههههه ... يمكن الريال شالنه الهوى .. مبارك : اااه هيه و الله يييت عالعوق يا بوسنيده ... بو مبارك : هههههههههه ... لحقي يا سلامه ولدج متعوق ... وديه المستشفى ... ام مبارك : عوووق ولديه لا هب في مستشفيات و الا مطيوعيه ... عوق وليده عند السوده ... من شاف بنت ظربه هواها و بات يهويسبها .. مبارك : هههههههههه .. امايه بنات هالزمان ما تمن يلبس شيل سووود .. حلن في الشيل البيض و الملونه .. يا ويل حالي يوم البنت تلبس شيله ورديه و جلابيه ورديه .. ااااخ يا قلبي .. و في هاللحظه تذكر روضه يوم كانو سارحين العزبه هي و يدتها ... هو قال هالكلالام بس ما كان قاصد به روضه .. بس اكتشف انه كل ما يطرى عباله شي لازم يربطه بروووضه ... بو مبارك : هههههههه ... لا ولدج ما ينسكت عن حالته .. هاه بو حمد ... شالحال عليك ؟؟.. مبارك : انتفض قلبي بشوفت غزال منصوري ... و صابني سهم الهوى وصرت مقتوله فتان خلي و لا له من مثيل في داري ... و انحفر قبري من اسباب الهوى و عشقه ام مبارك : وااايه بسم الله عليك من طاري الموووت و القبر ... حشى مب فال .. لا اله الا الله من ذا الولد الي ما يرحم حالي .. بو مبارك : لا يا سلامه مره ولدج متخشع تخشيع ... الكل كان يعتقد ان هالقصيده في شما و اولهم راشد الي ذبحته هالقصيده ... يالله يالقدر .. بس مبارك ما طرت عباله شما و لا فكر حتى فيها ... كان كل فكره في روضه ... هالغزال المنصوري الي سلبه حلو المنام .. و سلب فواده من مكانه ... مبارك : امنه ... تعالي اباج شوي ... و نش مبارك عن هله و هو يغمز لامه .. ام مبارك : شعندك ؟؟؟؟... مبارك : سلالالامت قلبج يالعيووز ... ما شي اغازل ... ام مبارك : حمد ولدك هذا ان ما ذبحني تراني ذابحتنه .... بو مبارك : هههههههههه ... بروووك وثق عمرك .. لا تغزيك عيوزك في الليل و تقصبك هههههههههه مبارك : ههههههههههه تسويها منصوريه .... ام مبارك : يا ويلي ... تلايمووو حمد و بروووك عليه ... عزات اني ما ظويت عخير .... مبارك : هههههههههههه ... تعالي امون اريدج ... عوشه : و انا ما تباني ؟؟؟... ام مبارك : لا بغتج هله .. وين تبين بعد ...؟؟؟!!!... عوشه : باباتي شوووف حرمتك .. كله تسبني ... بو مبارك : مرخوووصه ام مبارك ... الي بغت تسبه تسبه و الي بغت تقصبه مره نفاده .. فدوى عن راس سلامه ... امنه : الله الله ... يا ويل حالي انا ... مبارك : ايه يالله كل واحد حجرته يله ... و خلووو الشواب يتغازلون شوي ههههههههههه ... بو مبارك : ههههههههههههههههه ... مبارك : هاه العيوز تعرفين تغازلين و الا تبيني اعلمج ؟؟؟.. ههههههههههههه بو مبارك : هههههههههههه ... لا معلمنها من قبل لا تعرف المغازل يالخام ... مبارك : هههههههههههه .... الشيبه اريد منك كوورسات في التعامل مع المنصوريات ... ام مبارك : ليييييش .. شي في خاطرك من جدى المنصوريات ؟؟؟... مبارك : هههههههه .... جاد ربج ... هههههههه و طلع مبارك هو و امنه خته و راحو صوب حجرة مبارك ...و اول ما دخلو فتح مبارك مع امنه الموضوع ... مبارك : امممم .. امنه .... سعيد ولد خالتيه فاطمه رمسني عنج ... امنه : رمسك عني ؟؟!!!!.... ليييييييييييش ؟؟؟؟.... مبارك : هو يبى يخطبج ... الا بغى رايج قبل لا يخطب رسمي ... امنه : شووو ؟؟؟؟... مبارك : سعيد يريد يخطبج ... شووو رايج ؟؟؟... امنه : .... مبارك : شوفي اذا تبينه قولي و اذا ما تبينه بعد قولي عشان اقول لريال ماله نصيب عندنا ... امنه : انت شو رايك ؟؟؟.. مبارك : و الله مب انا الي بجابل سودته طول حياتي .. انتي الي بتعيشين معاه .. و الراي رايج ... امنه : امايه تدري ؟؟؟... مبارك : لا محد يدري الا انا حتى خالتيه ما تدري .. هو ما بغى يخبر حد الين ما ياخذ موافقتج و من عقب بنخبر الطايفه الكريمه .... امنه : يعني امايه ما تدري ؟؟؟.. مبارك : اقولها ثووور تقوول حلبووه .... ظهري ظهري ... امنه : حرااام عليك مبارك و الله مرتبشه ... مبارك : مقفاج لو سمحتي ... امنه : بروووووووووووك ... حرام عليك ... مبارك : ههههههههههههههه ... امنه فكري و خذي وقتج و عقب قوليلي رايج .. انزين ؟؟؟.. امنه : انزين ... طلعت امنه عن مبارك و هي مرتبشه ... هي كانت تدري ان سعيد بيخطبها بس ما كانت تتوقع انه بيخطبها في هالفتره و الا بهالسرعه ... بعدها باسبووع راح مبارك الوثبه صوب يدته ... و بلغ سعيد ان امنه موافقه ...كان مبارك متعلث بهالشي بس عشان يرووح الوثبه ... مسك نفسه عشان ما يرووح بيت قوم روضه ... بس صادف ان سلطان كان في الوثبه و عزمه عالعشا عندهم .... مبارك فرحان . .. يالله يا رب اشوووفها لو من بعيد .. بس اشوفها يااااارب ... كانت روضه تدري ان سلطان خوها عزم واحد من الشباب للعشى الا ما عرفت منوه و لا استهمت من هالريال الي بيتعشى عندهم ... روضه : يدوووه ما تبيني احني شعرج بعد ... يدت روضه : لا ما فيني .. حني ريولي و اديه بس .. روضه : انشالله يدوووه ... ألس ... ألس ... و يت الخدامه حق روضه .... روضه : روحي داخل حجرتيه بتلقين مله فيها حنى هاتيها ... يدت روضه : الا بتخبرج هالسباله شعنه ما كنسلتوها ؟؟؟.. انا مب حالفه عليها ما تبات في البيت ... روضه : يا ويلي يا يدوووه .... حليلها شو سوتبج بعد ...؟؟؟ يدت روضه : سلامتج ... مقيله ادق ع رزاق ما دري شو تباه ايب الها من الدكان مسودت الويه ... لا تقيل و لا تخلي الدريول يقيل .... و ان الخدامه داخله عليهم ... روضه : الس ثاني مره لا تروحين و ادقين عرزاق .. اذا تريدين شي من الدكان قولي حق يمعه بايييبلج ... يدت روضه : و الله يا ان دقيتي ع رزاق لا اكنسل ويزتج .. حماره مسودت الويه ... يلست روضه تغمس يدتها و تحنيها ... روضه : يدووه خليني احط الباقي في شعرج ... يدت روضه : لا لا تغمسيبه انتي ... و تغمست روضه بالحنا الباقي من حنا يدتها .... و هن يالسات سمعن واحد يهوود ... ....: هوووووووود هووووووووود .. يدت روضه : هداااااااااااا .. هدااااااااا ... مرحبا الساع .. روضه و هي تبا تربع و تدخل داخل ... يدت روضه : روضه صكي التراب ... عيب عليج اتجفين الخطار ... منقووود ... لفت روضه و عطت مقفاها للباب .. لانها ما قدرت تتغشى لان اديها مخمسات حنا .. .....: السلالالام عليكم ... يدت روضه : واايه مرحبا ملاييييييييين .... ....: المرحب باجي و لا هان ... و خر الريال عراس يدت روضه و وايها و حبها عراسها ... تم قلب روضه يدق بطريقه غير طبيعيه ... يدت روضه : منووو الريال ؟؟؟؟... ....: فديتج يدوووه .. ما عرفتيني ؟؟؟.. في هاللحظه عرفت روضه هالريال ... يدت روضه : يا بويه الشيب ذبحنا ... ما نعرف روسنا من رويلنا في هالدنيا .... ....: وين الشيب بعدج شباب و الله ... يدت روضه و هالمدحه يت عهواها : ههههههههه ... وين شباب ؟؟.. خلينا الشباب حق روضه و خوياتها ... ....: شحالج .. روضه ؟؟؟.. روضه و قلبها يدق : بخير ربي يسلمك ... و من صوبك ؟؟... ....: ما نشكي باااس الحمدلله ... الا قاصرنا شوفتكم ... روضه : ..... يدت روضه : روضه عرفتيه الريال ؟؟؟.. روضه و هي مستحيه و تقول في خاطرها ( من بد كل الخلق مستحيل اني ما اعرف هالانسان ) : هيه يدووه عرفته ... مبارك و هو طاير من الفرحه : هههههههه .. الحمدلله يوم انج عرفتيني و انتي عاطيتني مقفاااج ... قلت العرب ما بيعرفون ... اكيد الا نسوني ... روضه : نساااك الموت انشالله ... يالله فديييييييت منطوقها و الله ذابحتني هالانسانه .... مبارك : يالله عسى الموت ما يصيب دار غاليج ... روضه من الخاطر : اميييييييييييين ... يدت روضه : قرب قرب فديتك بتتقهوي عندنا ... و يلس مبارك عدال يدت روضه ... روضه : السموحه منكم .. يدت روضه : ودي وين تبن مويهه ؟؟؟... روضه : ههههههههه ... ما بتم يالسه و عاطيه الريال مقفايه .. بحد اغسل الحنا ... يدت روضه : ودي توج حاطيتنه .. ما يوحيله يصبغ ... مبارك : اذا تبين عادي بعدل شيلتج و بغشيييج .. و يلسي عندنا و خلي حناج الين ما يصبغ .. ههههههههههه ... روضه و هي مستحيه : لا مشكور ... مبارك : يا بنت الحلال لا تحليفين ... روضه : ههههههههههههه ... يا ويييييلي محلالالات ظحكتها ... حشى عذاب هالبنت ... يدت روضه : و هي شو تباها الغشوه .. متقبعه بالشيله و الغشووه ... انت الا ولد خالتها ... روضه : السموحه منكم ... نش مبارك و هو يشووف روضه تدخل في باب .. و عقب رجع و يلس عند يدتها و يلس يسووولف ... كانت روضه منخشه ورى الباب تتسمع سوالف مبارك مع يدتها ... اول مره تكتشف ان مبارك انسان حنووووون ... كان وايد رقيق في معاملته ليدتها ...شوي و دخل سلطان و محمد خوه و يلسووو عند مبارك و يدتها ... كانت تسمع سوالف مبارك و ميته عليك ... و الله تحت مبارك اللعاب انسان رقيق و حساس ... انسان يمكن انظلم في هالدنيا ... كان مبارك يسولف من الخاطر و هو فرحان ... حس ان روضه في قلبها شي صوبه ... يمكن ما تحبه بس اكيد ما تكرهه .. .. انحط العشى و تعشوو الشباب و تم مبارك في ميالس قوم روضه يلعبون ورقه هو و الشباب ... كان حاس ان روضه قريبه منه .. ما كان يريد يظهر من بيتهم .. بس ما باليد حيله و لازم يظهر من بيتهم و من الوثبه بعد .. كانت روضه توايج من دريشت الصاله كل شوي .. اتريد تشووف مبارك و هو ظاهر من بيتهم ... و شافته و كان عاق العقااال و السفره حاطنها على كتفه و لابس الطاقيه بس ... ألتفت مبارك و هو ظاهر من الميالس صوب البيت ... و شاف روضه و هي توايج .. الحبيبه توايج و ليتات الصاله مشتغله .. ما كانت تدري ان ظلها منعكس عالستاره و هي توايج ... ظحك مباارك من الخاطر ... صدق هالانسانه بتذبحني بحركاتها ... يم مبارك يمشي بشوي شوي و ايريد يلتفت و يشوفها بس خاف لا تعرف انه شافها و تشرد ... كان مبارك موقف سيارته جدام دروازت بيتهم .. كانت هي تشووف السياره من ورى بس ما تشووف مبارك ... و مبارك ما كان يقدر يشوفها .. شغل مبارك السياره و تم واقف و لا راح ... و قبل لا يرووح حط هالغنيه و طول عليها بس مب وايد .... (حايره و الشوق بين عيونج ... خايفه تحبين و يلومونج ... باقيه بنص الدرب محتاره ....ما تعرفين هذا العشق و اسراره و السهر ذبل سواد عيونج ... حايره و الشوق بين عيونج ...) الحزينه 11-12-2003, 06:29 Pm تسلم اخوي البدوي ويعطيك العافيه على هالجزء عندي طلب بسيط واتمنى اني ما ازعجكم فيه ...( يريت تطولون الاجزاء شوي ) ونتريا الجزء ال11 لا تطولون علينها والسموحة منكم البدوي الحبوب 11-12-2003, 07:05 Pm فالج طيب اختي الحزينه وهالجزء اهداء مني لج وان شاءالله اتكونين راضيه من صوبنا البدوي الحبوب 11-12-2003, 07:08 Pm الجزء الحادي عشر عرفت روضه ان مبارك شافها ... و فرحت من الخاطر ... يالله هالغنيه مهدنها لي ... فديته و الله ... ما قدرة روضه انها تنام هاليوم كل ما تخر عينها تتذكر مبارك ... يالله فديت هالانسان .. هي تحب مبارك و هذا واقع هي ما تقدر انها تنكره ... بس مبارك يحبني ؟؟!!!... هذا الي كان مسهر روضه ... كانت تريد تعرف مبارك يحبها و الا يسوي هالحركات لحايه في نفسه ... معقووول مبارك يسوي كل هذا عشان بس يكلمني و من عقب يبيعني برخص لاثمان بعد ما يلقاله وحده غيري ؟؟!!!... و مبارك شالنه هوى غزاله المنصوري ... كان راد صوب رماح و يسمع المسجل و هو خلالالاص ميت من روضه ... عمره ما اثرت فيه وحده مثل تأثير روضه عليه ... و يرن تيلفون مبارك ... مبارك : مرحبا الساع ... خليفه : مرحبا ملاييييييييييين ... مبارك : و لا يسدن بالمري ... خليفه : تسلم الغالي .. علومك بو حمد مبارك : علوم الخير يالخوي ... و من صوبك .؟؟ خليفه : علومي تسرك و لا تضرك .. مبارك : يالله عساك دوم انشالله ... خليفه : يميع انشالله .... هاه المزيون وين دارك ؟؟؟ مبارك : و الله توني واصل بوسمره ... خليفه : ليش وين امبونك انت ؟؟؟ مبارك : كنت عند سلطان .. خليفه : وش سلطان ؟؟؟!!!.. مبارك : المنصوري ... خليفه و هو يقطع رمست مبارك .: بسك بسك ... راعي الوثبه ؟؟.. مبارك : وصلت ... خليفه: اها ... بو حمد ما تشوف عمرك كثرت بروحاتك صوب الوثبه ؟؟؟ مبارك : لا اله الا الله .. يا خي هليه في الوثبه ... خليفه : و من متى هلك في الوثبه ؟؟ مبارك : من زمان و هليه في الوثبه ... شو ما تعرف اونك ان عيوزي من الوثبه ؟؟؟ خليفه : اعرف الا ما اذكر من متى و انت تسير صوبهم ... مبارك : عنلاتك ... بتخبرك شو في خاطرك انت ؟؟؟ خليفه : سلامت راسك ... مبارك : حراااام لا تقول شو الي في خاطرك ... خليفه : مبارك تحبها ؟؟؟. مبارك : منوه ؟؟؟؟ خليفه : المنصوريه .... مبارك : امممممممممم ... خليفه : حبيتها صح ؟ مبارك : ياخي ما ادري اذا هذا يعتبر حب و الا لا ... خليفه : ... مبارك : ياخي ذابحتني هالبنت و الله اني بموووووووووووت عليها و الله ... شو بموت الا و الله عمري كله فداها و الله ... و الله يا خليفه اني .. كيف اقولك ... مره متخشع منها تخشيع ... خليفه : ههههههههههه ... خييييييييبه ... مبارك : لازم انت تقول هالرمسه لان ما تانس الي انسه .... خليفه : انت متأكد انك تحبها ... و الا هذي ردت فعلك لانك من 3 شهور و انت تحاوطها و هي مب معبرتنك ؟؟؟.. مبارك : لا و االله .. حتى لو كلمتني و لو عبرتني ياخي هالانسان في شي ما ادري كيف ساحرتني و الله ... بعدين امب من 3 شهور .. من 4 شهور و يومين ... خليفه : هههههههههههه ... لا وضعك مستعصي انت .. مبارك : اااااااااه ... خليفه : بسألك مبارك : امر الغالي .. خليفه : منو حبيت اكثر هي و الا لطيفه ... انصدم مبارك بسؤال خليفه و مع هذا جاوبه و هو واثق من مشاعره : ما في وجه مقارنه بين المنصوريه و لطيفه ... حب المنصوريه له طعم ثاني اول مره اذوووق مثله ... و ما اظن اني بذوق مثله ... خليفه : هذي رمست بعد عن لطيفه ... تحيد .. مبارك : ... اممممممممم ... تعرف لو كانت أي وحده غير روضه ماكنت بحس صوبها بهالشي .. و صدقني حب لطوف كان من نوع ثاني .. كيف اقولك .. حب يهال .. يعني انا لو موت ماكنت باخذ لطوف .. بس روضه بسووق مالي و حلالي و قوم بالخيل كلهم عشان نظره منها ... خليفه : و الله و ظوت راسك المنصوريه .. مبارك : لا ما ظوت راسي الا ظوت فوادي .. و هذا الي ما في بنت قدرت تظويه و لا بتظويه انسانه غيرها دامني حي ... خليفه : خلاص نويت ... مبارك : نويت انشاااالله ... خلاص ما بجى بالعمر باجي .. خليفه : ههههههههههههههههههه .... خلاص بتودع العزوبيه مبارك : الا بطبها ..ههههههههههههههههه خليفه : عنبووها المنصوريه ... اسميها مب الا ظوتك الا خشعتك ههههههههههههههههههه مبارك : اااااااه ... لا تخبر و الله ... خليفه : الا صح متى بيعرس راشد خوك ..؟؟؟ مبارك : ما ادريبه و الله ... بس اذا هو بيبطي .. انا ما استحمل بعرس قبله .. خليفه : هههههههههههههه ... خييييبه .... لالالا ما اصدق برووووك الي يكلمني و الا واحد ثااني !!!!!... مبارك : شووو بروك بعد .. عنلات صداك .. اصغر عيالك ... خليفه : هههههههههههههه .... لا كنت تلعب عندي في السكه امس ما تذكر ...؟؟ مبارك : ههههههههه ... خليفه : شو بعدك ما وصت رماح ..؟؟؟ مبارك : لا عننبوه من ساعه واصل ... الا يالس في السياره.. خليفه : اكييييييد جدامك وحده من غراشيب رماح ...مزروعيه و الا .. هههههههههههههههههههههه مبارك : هههههههههههه ... عنلاتك ... لا غراشيب رماح خليتهن لك يالخام .. انا سدتني غرشوبة الوثبه عن غراشيب الدار كلهن ... خليفه : هههههههههههههههههههه ... بويه روح و حط راسك و استريح احسن لك .. مبارك : صورته ترافقني كل ما ارمش بعيني ... و همسته تعزف البسمه في مسمع الليل . وصرت ذا اليوم اتخيل اعيونه تداعبني ... و بهمس صوته صار قلبي بالمحبه يميل و كل ما نعس طرفي احلامي به تذكرني ... و يفزله شوق قلبي كما العواصف مهاطيل خليفه : يا ويل حالي انا ... مبارك : اذا انت يا ويل حالك انا مسكين حالي و الله ... خليفه : ههههههههههههههههههههه ... الله يرحم ايام اول ... مبارك : ايه بتخبرك عاد .. تراني وايد عطيتك ويه ... يله يله جلب ويهك .. خليفه : اجلب ويهي ؟؟!!!.. ماله مونه الي يتصلبك .. مبارك : ههههههههههه ... اذا ما تعنيت و اتصلتبي بمونه بتتصل عيل ؟.. خليفه : عرب عيونهم سود .. ما ذاقوو ماي رماح .. مبارك : هههههههههههههه .. لتكون السودانيه .. خليفه : هههههههههههههههههههههههههه ... الشيمه طلبك .. لا تذكرني بذيج المأساه ههههههههه حرام الين اليوم و انا اتذكر هالمقلب و االله ...ههههههههههههههههه... بعدها بيومين .. في ميالس حمد الخييلي .. عم مبارك : هاه .. راشد شو هباتك .. شو ما نويت عالعرس ..؟؟ راشد : و الله بعدنا شوي ... عم مبارك : و شو الي مأخربك .. حمد عليكم قصور في شي .. ؟؟ بو مبارك : لا قصور و لا شي .. الا العروس بعدها تدرس .. مبارك : وش حايتها بالدراسه خلاص يوم انها بتعرس اطبها المدرسه .. راشد : عاد ما بقى الا شهرين و تخلص و انا مب عيل ... مبارك : بس انا عيل ... عم مبارك : شعنه ترك انت الي بتعرس و الا راشد .. مبارك : هههههههههههههه .. شو اسوي غرت من بوسنيده .. عم مبارك : هاه .. و عمنوه عزمت ؟؟؟ مبارك : عرب عيونهم سود ... بو مبارك : ليش ترك تفطنت في عيونهم هالعرب ..؟؟؟ مبارك : هههههههههههههههههه ... يا ليت و الله .. كانت راشد حاس ان مبارك بيقرر انه يعرس في يوم بس ما كان يتوقع ان قراره بيكون بهالسرعه .... يالله كيف بستحمل ان شما تكون لمبارك .. يالله بمووووووووووت ... و في الوثبه ... ام شما : خالكن محمد بيرد البلاد الاسبوع الياي ... شما : و الله ؟؟.. ام شما : امس ترمسه سلامه .. و قالها انه بيرد بالاسبوع الياي ... وديمه : غريبه ... ما شي اجازات اللحين عندهم .. شما و هي تحاول قد ما تقدر انها تتحاشى أي كلام بينها و بين وديمه ..: يالله عسى ربي يسوقه بالسلامه ... ام شما : باجر متى يخلص دوامج ..؟؟ شما : الساعه 2 الظهر .. ليش ؟؟؟.. ام شما : خلاص عيل بخلي سعيد و الا سالم يسير صوبج ... شما : غريبه من متى ؟؟؟... دومه الباص الي يردني .. ام شما : لا بغيتج اتشلين وديمه عندكم و تروحون السوق و تتشرون قطع فساتين .. وديمه : ليييييييييش ؟؟؟؟.. ام شما : امس خالتج ترمسني .. يبووون يملجون .. شما و دمعتها بتنزل خلالاص : ..... وديمه و هي فرحانه : و الله كنت حاسه و الا شو باييب خالي محمد في نص الدراسه .. نشت شما عنهن .. ام شما : شما وين بها فديتج ؟؟؟.. شما : بروح اذاكر .... ام شما : خلاص عيل ... الا اتصلي بواحد من خوانج ايسيربكن باجر السوق ... شما : امايه انا مب فاضيه باجر .. وديمه : عادي امايه .. بروح انا بروحي .. ام شما : و شعرفج بالقطع انتي ..؟؟؟ دخلت شما عنهم و هم بعدهم يسولفون عن الملجه .. حاولت شما انها تدرس و الا انها تسوي أي شي يشغل بالها عن راشد ... بس ما قدرت .. بعده راشد في بالها و في قلبها ... و في بيت قوم روضه .. كانت روضه و ميثه و موزه بنات عمها و شما حرمت محمد خو روضه و مريم بنت يريانهم .. موزه : يا حلوات انتباااااااااااه ... بقولكن خبر وااااااااااايد حلو .. شما : هههههههه ... و شو هالخبر ؟؟.. موزه : و ليش تضحكين بعد ..؟؟؟ شما : لاني اشك ان ايي من وراج انتي و الا مرييييم شي حلو .. مريم : يالله عليج .. انا ساكته و لا قلت شي .. ليش كلكم ظالميني فديتني .. روضه : عالشوه تتفدين عمرج ... مب من حلات الشيفه عاد .. مريم : لا خليت الحلاه لج انتي .. شما : خافي ربج جن روضه مب حلوه منو الحلو ؟؟.. موزه : اكيييييييييد انا .. ميثه : ههههههههههههههه ... روضه : اقول ما انتبهتن لشي ..؟؟ شما : شو ؟؟ روضه : ميثوه وايد هاديه اليوم موزه : ترى هذا هو الخبر الي بقوله لكن ... مريم : شوو .. ليكون انخطبت ؟؟؟.. هههههههههههههههه موزه : كيف عرفتي ؟؟؟؟؟!!!!.. مريم : و الله ؟؟؟ ... انخطبت ..؟؟ روضه : شووووو ؟؟؟؟؟؟؟؟؟؟؟ موزه : ايه مريوم كيف عرفتني ؟؟؟؟ مريم : يا لقعتيه و الله ما ادري ... الا جذيه قلت .. روضه : كيف ايونكم خطاطيب و ما عندنا علم ؟؟؟... شما : يالله ... صدق ميثوه انخطبتي ؟؟؟ ميثه : لالا ... موزه : هيه .. خطبها واحد هاملي من بوظبي ... امس امه رمست امي و يريدوون ايحددون يوم عشان ايون و يشوفونها .. روضه : الحمدلله ... انا تحسبت خطبو رسمي ... حرام لا بويه يتغيض ان محد قاله ... ميثه : عاد ما حصل شي عشان يتغيض .. مريم : الا بتخبرج من وين ظويتيه هالهاملي بعد ... ميثه : عنلاتج من وين بظويه بعد ... ؟؟ .. لا اعرفه و لا يعرفني .. الله يستر علينا .. مريم : علينا ... واحد و من بوظبي لا و هاملي بعد .. بيظوي الوثبه و بيخطب منصوريه منيه و الدرب ..؟؟!!!.. قيسوها بالعقل .. شما : ايه خلي عنج هالرمسه .. مرفوجه بنت خميس عن هالسوايا ... روضه : لا صح هو من وين عرفها عشان يخطبها ؟؟؟.. موزه : ما اقدر اسكت ... شما : اتلن الخبووور من طويز .. كل العلوم عندها .. موزه : لا انا ما عندي علوم .. انا عندي تاريخ .. ههههههههههه .. روضه : بااااااايخه ... يالله .. عاد رمسي شو تعرفين ؟؟؟؟.. موزه : تحيدين الصيف الماضي يوم كنا في محاظرنا في ليوا ؟؟.. روضه : هيه ... موزه : تحيدينهن الهامليات الي دوومهن بالسكيتي ..؟؟ مريم : هيه هيه ذكرتهن ... روضه : ما اذكرهن ... المهم كملي .. ميثه : يالله من دمجات في السالفه ... روضه : انتي لمي ثمج .. بنتفاهم بعدين مسودت الويه .. ميثه : محد مسود الويه الا انتي ... روضه : هههههههههههههههههههه .. جب .. كملي طويز .. موزه : بتخبركن عاد احترمني شوي ... من اصبحتن الا طويز و طويز ... مريم : حليلنا ندلعج .. موزه : ما باكن تدلعني .. روضه : عيل منوه تبينه يدلعج غيرنا ؟؟؟.. موزه : واحد من مخاوين شما .. مريم : ياويل حالي عمخاوين شما والله ... شما : لا تصيحن مخاوين شما .. بييكن يوم بتكرهن فيه طاريهم و الله ... مريم : لا انا مستحيل اكرههم ... و الذات لو كان عنده رنج .. اااااااااه اسميني ميته .. من قالت مريم هالكلام ماتت روضه من الغيض ... روضه : و منو هذا راعي الرنج بعد الي تصيحينه ؟؟.. مريم : ااااااه ... غرشوب رماااااااح .. روضه بنقمه : شووو ؟؟؟. موزه : حشى من شافت مبارك و هي ميته عليه .. شما : عليه و الا عالرنج ..هههههههههههههههههههه .. مريم : قبل كان عالرنج .. الا من ريت بروووووك مره مت .. روضه : بروووك بعد ؟؟؟.. ليكون اصغر عيالج بس ؟؟.. ميثه : ايه مالك خص بالريال ... مريم : ليش انشالله ...؟؟؟ ميثه : لانه خاطب شمامي .. و عيب عليكن تطرن الريال ... مريم : اسميه ما ظوى عخير يوم انه بيظوي عشمامي .. موزه : تعرفن ... انا اريد واحد عنده كروزر ... و الكل ظحك ... مريم : هههههههههههههههههههه ... خذيه عيل هذاكي راعي الكروزر الحمر الي دوم يحوط في ليوا ,, موزه : ههههههههههههه ... لا ما باه هذاكي .. و تدخل خدامة شما عليهن ... الخدامه : مدام .. في واحد ريال برى ... شما : و عمتيه وين ؟؟؟.. الخدامه : ما ادري .. روضه : راحت هي و بويه صوب الفله يشوفونها و مناك بيرووحن صوب عوشه بنت راشد .. شما : برايكن عيل برووح صوب الريال .. روضه : انزين كملي سالفة الهاملي .. ميثه : يالله خليتنها سالفه بعد ..؟؟؟ موزه : ماشي سلامتج .. هالهاملي خو وحده منهن .. و هي عندنا في التقنيه و تعرفت عليه ... و اللحين ايريدون ميثوه لحميد .. يلسن البنات يسولف الين فليل و عقب سرن عن روضه ... عند العشى قالت روضه لهلها عن هالهاملي الي يريد ميثه و كانوو خوانها كلهم موجودين .. سلطان : شوووووووووووو ؟؟؟؟..من وين ظاوي هذا بعد ..؟؟؟ ام روضه : من وين ظاوي بعد .. من الدار .. بو روضه : امس انا عندهم ما خبروني .. روضه : لا هم الا امس اتصلتبهم ام الريال و بعدهم ما ردولها خبر ... سلطان : و لا يردولها خبر .. ام روضه : يالله عليك .. تبى تقطع نصيبها ؟؟.. شما : بصراحه ميثه تستاهل كل خير .. و الحمدلله يوم ان الله عوضى خير .. ام روضه : صدقج .. ميثه هب بنت امس .. ماشالله عليها حرمه .. الي من سناها بعيالها .. سلطان : لا يستريح .. ما عندنا بنات له .. ام روضه : ودي ... محمد : عاد سلطان انت ما لك خص عمي وعياله ان بغوه بيقربوبه .. سلطان : يخسي الا هو .. يقربربه بعد .. عنلاته ... روضه : و انت ليش متغيض عاد ؟؟.. خلها تعرس .. سلطان : و الله انا ولد عمها و اولابها من الغريب ... الكل انصدم .. ميثه اكبر من سلطان يمكن بسنتين او زوود حتى .. ام روضه : ياويلي شو تباها ..؟؟؟ ميثه اكبر عنك .. سلطان : و الله هالشي ما يعيبني و لا يعيبها .. بو روضه : صدقك .. و الله انك ريال .. هيه جذيه اباك .. سلطان : و انتي قولي لربيعج .. يخسي لا الهاملي و لا غيره ياخذها دامني حي .. روضه : ههههههههههههههههه .. لا بقول و لا بسوي شي .. جن شي في خاطر ادل بيتها ... سير صوبها و قولها الي في خاطرك من جداها .. بعد اسبوع ... في بيت قوم مبارك .. ام مبارك : عبيد .. اباك توديني الوثبه باجر ... مبارك : ليييييش..؟؟؟ ام مبارك : ودي بروووح اسلم عهليه ... مبارك : حشى يا هالسلالام الي ما يوقف .. كل يوم هو السلالالام ..؟؟!!.. عوشه : برووح فياج ... امنه : و انا بعد .. مبارك : لا انتي استريحي .. ماشي رووحه .. امنه : ليش عاد ..؟؟؟ مبارك : لا و الله ..؟؟؟ .. عوشه : شو مستوي بينكم انتم الاثنين ..؟؟؟؟ ام مبارك : شعنه ما تبى ختك تخاوينا ... مبارك : هي تعرف .. امنه و هي مستحيه : اوكي خلاص ما برووح ... مبارك : يا ويلي عمستحى البنات ... امنه : ايه بروووك .. و تفر عليه الكنينكس ... مبارك : هههههههههههههههههههههههههه ... ام مبارك : ايه شو بينكم ..؟؟؟ الا تتغامزون ... عوشه : امايه تراهم عهالحال من الاسبوعين اللحين ... و لا طاعوو يقولولي شو بينهم .. عبيد : انا اعرف ... مبارك : تعرف شووو ؟؟؟؟.. عبيد : ما بقول ... ام مبارك : لا قول شعندهم ..؟؟؟ مبارك : ههههههههههههههه .... العيوز ذابحنها الفضوول ... ام مبارك عطت مبارك نظره ... مبارك : خيييييييييييبه .. ام مبارك : تخيبك .... عبيد رمس شعندهم مبارك : هههههههههههههههههههه ... ما يعرف .. الا جذيه يرمس هو ... عبيد : انزين و كان الي بقوله صدق و هو الي من بينكم .. شو بتعطيني ؟؟؟.. مبارك : ههههههههههههه ... علمنك خاواتك تعطيني و اعطيك ... عبيد : هههههههههههههههههههههه ... هذي هي الحياه يا صاحبي ... مبارك : هههههه ... لك الي تباه .. عبيد : اريد سيارته يوووم كامل من الصبح الين فليل ... مبارك : اريد اعرف شوو مشكلتكم .. الكل يباها هالسياره .. حشى حاس انها بتنعدم الا من عيونكم .. عوشه : انزين يله قوول ... عبيد : .. اممممممممم ... احم احم .. ام مبارك : ما قلنالك غني .. تتحنحن احم احم .. عوشه : امايه سكتي ... يله عبووود قووول .. عبيد : اعتقد .. ترى هو مجرد اعتقاد .. ان السالفه سالفة عرس .. ام مبارك : عرس ؟؟؟... منو بيعرس ؟؟؟. مبارك : و الله و ظويتها السالفه هههههههههههههه ... عبيد : و الله ..؟؟؟ خلالاص عيل باجر سيارتك عندي طول اليوم .. مبارك : لا باجر برووح عرس الشدود في سويحان .. ورى باجر انشالله .. عوشه : سعووود بيخطب امنه صح ؟؟؟؟ استحت امنه و نشت عنهم .. عوشه : اوين مستحيه ... عبيد : الله يرحم لسانها و الله هههههههههههههههههههههههه ... و قال مبارك لامه ان عن السالفه ... مبارك : و ابشرج العيوز ... و انا انشالله نويت اعرس بعد ... ظنكن مبارك بيقول لامه انه يريد يخطب روضه ؟؟؟ و ميثه بتوافق على سلطان و الا عالهاملي ..؟؟؟ ظنكن الله ممكن يقرب شما و راشد و يرجعهم لبعض .. و الا انحكم عليهم بالبعاد ؟؟؟ انتظرونا وان شاءالله بتعرفون شو بيصير __DEFINE_LIKE_SHARE__ |
|
| |
| |
|
06-08-2008, 10:05 AM
| رقم المشاركة : [ 55 ] |
| عضو دائم  | تسلمين ونتريا البااارت الياااي لا تبطين علينا يالغالية __DEFINE_LIKE_SHARE__ |
|
| |
| |
|
| مواقع النشر (المفضلة) |
« ¦ ¦ `•¸•` )روايه بنااااااااااات المافيااااااا - ((خطيررره)).. .كاملهـ
|
ماتت وهي تقول .. أبويه أنــآآ بريئه »
العرض العادي
| |
المواضيع المتشابهه | ||||
| الموضوع | كاتب الموضوع | المنتدى | مشاركات | آخر مشاركة |
| غيـر قلبـي عنـوانه ..~ | ›• غَنٍجَ اڷشاُمً ‹• | الشعر المنقول | 9 | 03-27-2010 12:44 PM |
| أهديـك قلبـي ياحبيــبى | راعـــ الــحــب ـــي | شعر و خواطر | 11 | 09-30-2009 06:17 PM |
| انـ غبت قلبـي معلن لكــ حداده *~.. | الـــرزيـــن | تصاميم الاعضاء | 19 | 08-18-2009 08:43 PM |
| سؤآهـآ قلبـي -- اصآلـ‘ـه ^^" | دلوعـــ الغربيه ــــة | المواضيع المكرره | 1 | 07-19-2008 01:42 AM |
| ¤!||!¤ فز قلبـي من غواهم .. وانـتفـض بحـلاهم ¤!||!¤ | •¦[بدويه رحيمه]¦• | تراحيب وتهاني | 14 | 02-19-2008 07:25 AM |
الساعة الآن 10:13 AM
- اخبار رياضية
- اخبار الامارات
- اخبار ريال مدريد
- اخبار برشلونه
- العاب فلاش
- مسلسلات وافلام
- مسجات
- فيديو كليبات
- سيارات للبيع
- ارقام سيارات
- ارقام هواتف
- هواتف للبيع
- حيوانات للبيع
- قوارب ويخوت للبيع
- ملابس واكسسوارات
- ساعات ومجوهرات
- اناشيد اسلامية
- نغمات اناشيد
- نغمات اسلامية
- ادعية اسلامية
- رقية شرعية
- قران كريم
- ديبيات اسلامية
- اذكار المسلم
1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90 91 92 93 94 95 96 97 98 99 100 101 102 103 104 105 106 107 108 109 110 111 112 113 114 115 116 117 118 119 120 121 122 123 124 125 126 127 128 129 130 131 132 133 134 135 136 137 138 139 140 141 142 143 144 145 146 147 148 149 150 151 152 153 154 155 156 157 158 159 160 161 162 163 164 165 166 167 168 169 170 171 172 173 174 175 176 177 178 179 180 181 182 183 184 185 186 187 188 189 190 191 192 193 194 195 196 197 198 199 200 201 202 203 204 205 206 207 208 209 210 211 212 213 214 215 216 217 218 219 220 221 222 223 224 225 226 227