سارق النعاج والشياه

محروم.كوم · #1 09-22-2017, 11:30 AM

صبحكم الله بالخير الجميع .

يوم جاني صديقي ابو مرزوق وطلب مني اسرح بحلاله جته بعض الاشغال وامور خاصه اضطرته يغيب عن الديره ومعه اولاده
قلي : يا ابن آخي 3 ايام مو اكثر واكون هنا في الديره
ما رديت صديقي ابومرزوق سرحت بحلاله ورافقني صديق طفولتي زوج اختي بالرضاعه حميدي
اول يوم طلعت بالحلال لمنطقه بعيده عن الديره تقريبا 4 كليومتر تركت الحلال يرعى وجلست في مكان اشوف الحلال وهو يرعى ومعهم حصاني جلست اناظر
المكان ومعي صديقي حميدي لاحظت شخص واقف بعيد عن الحلال يناظره .
قلت : يا ابو دحام تشوف الرجال الواقف هناك يناظر الحلال ؟
قلي : اشوفه خلنا منه .
بعد شوي ما عدت اشوفه مدري وين راح عند الظهر وردت الحلال على بير المويه شربت وهجعت تحت ظلال اشجار الخروب قبل العصر نهجت بالحلال
لقريب المغرب ومشيت فيه على اقل من مهلي لين وصلت حوطه لحلال ابومرزوق ادخلت الحلال الحوطه وغلقتها عليها
في الصباح ناظرت باب الحوطه كان مثل ما تركته طريقة ربط الباب بالاسلاك الحديديه مو ملعوب فيها
اطلعت الحلال وسقته للرعي لفاني صديقي حميدي ومعه زواده من اهل البيت قريب وقت الضحى شفت رجال يناظر الحلال ومعه فرس لونها اصفر
راقبت هالرجال حوالي نص ساعه ركب فرسه وراح .
صديقي حميدي قلي : هاذ هو رجال امس وكاد وراه سالفه .
وافقته على رايه وظلينا على حذر صديقي حميدي قرر يقضي ذيك الليله عندي نحرس الشياه في الحوطه مضت ذيك الليله على خير والحمدلله
اليوم الثالث رديت شفت الرجال راعي الفرس الصفرا راكب فرسه ويناظر الحلال ركبت حصاني
ورحت له فقام انطلق بفرسه بسرعه رجعت للشياه
كان صديقي حميدي راح للديره لاجل يجيب زواده لنا حين رجع سولفت له السالفه
قلي : وكاد هالرجال هاذ سارق
ظلينا نراقب المنطقه والحلال وانتهى ذاك اليوم ورجعت بالحلال عالحوطه ادخلنا الحلال داخل الحوطه وغلقتها وربطت الباب بالاسلاك لمحت الرجال راعي الفرس
يراقبنا من بعيد سويت نفسي مو شايفه
قلت لصديقي حميدي : الرجال هاذ وراه سالفه
جلسنا وتعشينا وسهرنا وقررنا واحد ينام والثاني يحرس الشياه نمت وحميدي جلس يحرس الشياه صحاني حميدي لاجل احرس الشياه وهو ينام
غسلت وجهي وجلست بعد حوالي ساعه صهل حصاني بصوت خفيف صرت اناظر حولي على ضو القمر شفت زول شخص يمشي وهو محني ظهره

تركته لين قرب باب الحوطه نزلت من مكاني ووقفت وراه بعيد عنه حوالي 5 امتار وهو يحاول يفك الاسلاك
قلت له : ويش تسوي عندك ؟
توقف عن فك الاسلاك لحظات استدار وكان ملتصم بشماغه لاحظت شيء يلمع بيده عرفت انها سيف قصير قرب صوبي وهاجمني وضربني بالسيف
تفاديت ضربته وهاجمني مره ثانيه امسكت معصم يده اللي يحمل فيها السيف وضغطت على مفصل يده وتعاركنا واجبرته انه يوقع على الارض
وقع السيف من يد السارق صار السارق يتفقد وسطه كان المسدس وقع منه وحنا متعاركين
قلت له : تعال ما لك خلاص الليله هاجمني وتعاركنا صحى حميدي على صوت العراك وفزع لي دفعت السارق انحاش مني وركب فرسه وانحاش
صفرت لحصاني جاني ركبته ولحقت السارق حين صرت جنبه امسكته من كم ثوبه وشديته فوقعنا الاثنين على الارض هجمت عليه وامسكته من يده
اليمين حملته بسرعه ورميته على الارض وبسرعه وجهة له ضربه بقبضتي على وجهه فاغمي عليه

( هاذ الحركات من فنون لعبة الايكيدو القتاليه تعلمتها خلال خدمتي في العسكريه )

وصلني صديقي حميدي قلي : الحمدلله على سلامتك :
رديت عليه : الله يسلمك
خلنا نربطه زين والصباح رباح رحت جبت فرس هالرجال تفقدتها لقيت بندقيه M1 امريكية الصنع معلقه على سرجها صرت ادور مسدس السارق لقيته على الارض
كان من نوع بريتا عيار 9 ملم جبنا السارق وربطناه بالحبال وتركناه للصبح .
حين صحينا غسلنا وجوهنا واطلعنا الحلال وصلنا ابو مرزوق على صهوة فرسه طرح علينا السلام وتحية الصباح ردينا السلام والتحيه
حين شاف السارق وهو مربط بالحبال
قلي : يا ابن آخي وانت يا حميدي كفيتو ووفيتو الله يعطيكم الف عافيه ما قصرتو كلمة شكرا ما توفيكم حقكم
رديت عليه : يا خوي الغالي لا تشكرنا ما سوينا شيء انت عزيز وغالي
راح ابومرزوق للسارق حين شافه هز راسه
وقال : قبل سنتين ونص لحقتك لكن الله نجاك مني وحذرتك تيجي ديرتنا تشوف ذاك راعي الحصان الاسود هو اللي رافقني حين لحقناك .
بعد ما فطرنا وشربنا الشاي وحمدنا الله تعالى وصلونا اولارد ابو مرزوق فطلب منهم يسرحو بالحلال لين يرجع لهم .
جبنا السارق وركبنا على فرسه وركبنا خيولنا ورجعنا للديره طلب مني ابو مرزوق اسبقهم للديره واتصل على الشرطه وهاذ اللي صار
حين وصل ابومرزوق وصديقي حميدي والسارق اخذناه وخليناه مربوط جنب الديوان لين وصلت الشرطه سلمنا للشرطه بندقيته ومسدسه والسيف القصير
اللي كان معه اسلحته كانت مسروقه ومبلغ عن سرقتها والفرس بعد مسروقه ومبلغ عن سرقتها قبل 7 شهور .

اخذوه الشرطه على المركز عرفنا بعدين انه عليه 4 قضايا سرقه تم الحكم عليه بالسجن مدة 12 سنه في الاربع قضايا
من ذاك الوقت ما عدنا شفناه والحمدلله

صورة بندقية M 1 الامريكية الصنع بعد اذن الاداره

وهاذ صوره لمسدس بريتا 9 ملم بعد اذن الاداره

ملاحظه صغيره الصورتين للتعبير والتوضيح مو اكثر ما لهم دخل بالموضوع

وسلامتكم يالربع

__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
شياه 16 تحتها 16 عيالها ذبايح والشياه دفيع	محروم.كوم	منتدى أخبار المواقع والمنتديات العربية والأجنبية	0	04-25-2013 11:50 AM
طيور النعاج فى المسيجيد	محروم.كوم	منتدى أخبار المواقع والمنتديات العربية والأجنبية	0	08-17-2011 10:20 PM
شـرح اقوىبرنامج سارق ايميلات Spy v1.2 الشرح بالصور, برنامج سارق الايميلات	محروم.كوم	منتدى أخبار المواقع والمنتديات العربية والأجنبية	0	08-30-2010 02:10 AM
للبيــع ---> 87 رأس من النعاج البيض معها 38 تاابع	محروم.كوم	منتدى أخبار المواقع والمنتديات العربية والأجنبية	0	06-22-2010 04:00 PM
لا يفوتكم النعاج والفلمنقو جديد!!	محروم.كوم	منتدى أخبار المواقع والمنتديات العربية والأجنبية	0	09-22-2009 03:50 PM