❤

الجزء الثامن..


راحت هند وهي منقهره وااايد اما نوره وامها فكانو فرحانين ويتكلمون ويا بعض .

وفي يوم الثاني اللي هو احلى يوم عند نوره لانها بتشوف خطيبها عبد الله اللي عمرها ماشافته وكانت مستعيله تبى تشوفه بس عشان تبى تعرف هل هو عبد الله اللي كانت صدق معجبه بشخصيته ووسامته وكانت وااايد خايفه من هاليوم وهي متوتره بالغرفه وحاطه صبعها في فمها دخل عليها خالد .
خالد : هلا والله بالعروس
نوره متوتره وماردت على خالد
خالد ( يبتسم ) وراح قعد عند نوره عالسرير : شو فيج اختي خايفه تقولين نتايج الثانويه العامه
نوره : والله حتى في الثانويه العامة ماكنت جذي متوتره وخايفه
خالد : ههههههههههههههههههههههه انزين ليش هالتوتر كله .كل هذا بس عشان بتشوفين احم احم عبد الله
نوره استحت : بس خالد عاد لاتزيدني توتر ترى اللي فيني مكفيني
خالد يضحك : الله عليكم يالبنات والله انكم سوالف
نوره تطالع خالد : ليش تضحك وشو السوالف اللي علينا
خالد قام من عندها ووقف ويشوفها وهو مبتسم : لا بس اقول بعض البنات يعني أو أغلبيتهم في الخطوبه يالله كيف يستحون وأصواتهم ما تطلع من الحيا وفي الملجه يالله انواع الغزل والحب والطاعه كل أوامر الريال تنفذه الحرمه في الملجه وبرقه طبعا ..وفي العرس يالله عالعرس بس شهر أو شهرين بالكثير ومخالب المرأه كلهم يظهرون من طولت اللسان ومن العناد ومن حب التحكم اعوذ بالله .
نوره بقهر : هالكلام لكم انتو يالشباب اللي كل طلباتنا في الخطوبه أو الملجه اوامر والوعود وبعدين بعد ما تضمنون انا حقكم خلاص ما شي هالوعود ماتنفذون ولا وعد .
خالد يشوف فوق : اممممممممممممم مب كل الشباب نفس الشي
نوره : ولا كل الحريم نفس الشي
خالد : خلاص تعادلنا يا حلوه بس لا تبلعينا عاد.. والله يعين عبد الله عليج .
نوره : ليش ان شاءالله اصلا ما في احسن مني لا في الدلال
ولا ( بدلع) في الجمال .
خالد ياخذ المخده ويفر على ويه نوره : يالله عاد ادلعت الحين
نوره : ايه خربت شعري
خالد : تقولين الحين الريال بيشوف شعرج اصلا هو بيدخل بيشوفج النظره الشرعيه يعني بحجابج وطبعا اطلعين ويهج بدون مكياج
نوره : ادري أصلا متى طلعت انا جدام الرياييل بالمكياج.
خالد : هي جذي اباج يالغاليه .
( ورن موبايل خالد وكان المتصل عبد الله لانه الحين هو ياي ويا اهله عشان يشوفون نوره )
خالد :نوروره قولي منو المتصل
نوره: منو
خالد : خطيبج جنه الحين ياي
نوره أول ما سمعت ان عبد الله ياه على طول اتوترت ووقفت من مكانها وتمت تتحرك يمين ويسار .
وخالد أول ماشافنوره تم ميت من الضحك : ههههههههههههههههههههههههههههه
نوره : هي هي شو عليك اضحك علي (نوره وهي تدز خالد عشان يطلع برع غرفتها) خالد قوم اطلع روح عند الريال وخلني بحالي
خالد وهو يبتسم : زين زين بطلع بسير عند احم احم..
نوره بعد ما طلعت خالد كانت خايفه وااايد ومتوتره لان ياي هاليوم اللي تشوف عبد الله .

وراح خالد يستقبل عبد الله وأهله وشاف عبد الله ودخلاه في الميلس
وطبعا فرحة خالد كبيره لان عبد الله صديقه من الطفوله.
وبعد مادخل عبد الله واهله الميلس راح ام خالد تسلم عليهم وبعدين راحت فوق عند نوره عشان تقولها تنزل .
ام خالد: نوره يمه حبيبتي وينج
نوره وهي متوتره واقفه مكانها : هلا امي انا هني
ام خالد : يالله يا نوره ترى عبد الله واهله تحت وبالذات عبد الله ياي يشوفج
نوره بتردد: ها..ممممممممم .. يشوفني
الام : هي يا بنتي يشوفج يالله بلا دلع ونزلي طبعامع الشيله والعيايه اوكي
نوره : اكيد طبعا امايه
الام : يالله نترياج تحت

نوره راحت لبست وتغطت وما طلعت الا ويها وطبعا بدون أي مكياج وهي وااايد متوتره ونزلت تحت وانتظرت خالد عشان ياخذها للميلس لانها تحس ان ريولها ما تقدر تشيلها .
خالد ياي عند نوره وهو مبتسم : ها يالغاليه يالله ندخل
نوره ماسكه ايد خالد : والله خايفه
خالد : والله كأنج داخله الحرب
نوره : اصعب من الحرب
خالد يالله لا تتفلسفين وايد يالله ندخل .

خالد فتح الميلس ويا نوره.. عبد الله كان قاعد وأول ماشاف نوره وقف من مكانه وفي خاطره يقول ( واخيرا شفتج يا بعد عمري )
نوره كانت منزله راسها من الحياء وبعدها ماشافات عبد الله .
يت ام خالد وخذت نوره عشان تسلم على ام عبد الله وابوه .
ونوره طول الوقت منزله راسها وتبى تشوف عبد الله بس ما تقدر لانها مستحيه وبعد ما سلمت نوره على ام عبد الله وحبت راسها وتمت تشوف الام وهي مبتسمه ومستحيه .
وخالد شاف ان نوره مطنشه عبد الله ولا سلمت عليه ولا شافته وعبد الله بعده واقف مكانه .
خالد : نوره حبيبتي تعالي سلمي على اللي بيكون ان شاء الله ريلج المستقبلي
نوره كانت منزله راسها ويوم طلب منها خالد انها تشوف عبد الله نوره تمت ترفع راسها شوي شوي ويوم رفعت راسها وحطت عينها بعيين عبد الله فتحت عيونها من الصدمه وحست ان قلبها بيوقف من الصدمه وطبعا الصدمه لان عبد الله اللي ياي يخطبها هو نفسه اللي كانت تتمناه هو اللي شافته في البنك واللي صلح سيارتها هو نفسه اللي كانت معجبه فيه واول ماشافته استحت ويها احمر ونزلت راسها مره ثانيه بس في قلبها شي ثاني لانها صدق كانت ميته من الوناسه .

عبد الله وهو مبتسم يشوف نوره وتعجبها : اشحالج يا نوره
نوره منزله راسها وبصوت واطي وبرقه : تمام الله يعافيك
خالد : عبد الله اقعد يالغالي ليش واقف
عبد الله صد لخالد وابتسم وقعد عالغنفه وحتى نوره بعد قعدت وعبد الله كان مجابل نوره وهو يشوفها منزل راسه بس بس رافع عينه أما نوره فطول الوقت مستحيه ومنزله راسها وكل ما يكلمها عبد الله هي ترد بتوتر .
ابو عبد الله يكلم ابو خالد : خلاص عيل يا بوخالد ان شاء الله الخطبه باجر .
ابو خالد : ان شاء الله على بركة الله
ام عبد الله : اقول يا ام خالد متى تبون الملجه
ام خالد : والله لين الحين ما حددنا بشوف راي البنت
ام خالد تصد لنوره : ها يا نوره متى تبين الملجه
نوره منزله راسها وبرقه صوت : ما دري يا امايه اللي تشوفينه
عبد الله طول الوقت وهو يشوف نوره ويبتسم من حيائها ورقتها .
ام عبد الله تشوف ولدها عبد الله : يا عبد الله متى تبى الملجه ؟

عبد الله في خاطره ( ابي اليوم قبل باجر ): اممممممممممممممم تقريبا بعد شهرين زين
نوره اول ما سمعت شهرين صدت لأمها وراحت تصاصرها : امايه شو بعد شهرين لا توافقين اصلا 3 شهور ما تكفي حق التجهز والاستعاد .
ام خالد : اوكي
ام خالد : شوفي يا ام عبد الله شو رايج بعد 5 شهور

عبد الله فتح عيونه اوف يا عمتي وااايد 5 شهور
ام عبد الله تبتسم : تعرف يا ولدي البنت يوم تبي تعرس اقل شي يبالها 3 شهور لين تجهز
عبد الله : زين يا عمتي خليها 3 شهور
ام خالد تشوف نوره : ها يا بنتي موافقه على 3 شهور
نوره : 3 شهور احسن من شهرين خلاص اوكي
عبد الله استانس يوم نوره وافقت
والكل استانس وباركو لبعض عشان هم الحين خلاص راح يكونون أهل أما نوره فستأذنت وطلعت بعد ما سلمت على الكل وبالذات عبد الله اللي طول الوقت وهو مبحق فيها ومستانس وينتظر متى 3 شهور يمرون .
نوره بعد ما طلعت من الميلس حست عمرها شوي بطير من الفرحه لان هذا عبد الله اللي كان في احلامها ورقظت في غرفتها عشان تكلم ساره .
نوره وهي منسدحه على السريروبصريخ: الو سارووووووه
ساره : باسم الله شو فيج ينيتي
نوره : ساره باركيلي
ساره :الف مبروك شو عالخطبه صح
نوره : لا مب بس على الخطبه ساره تعرفين منو طلع عبد الله اللي ياي يخطبني اليوم
ساره : منو يعني
نوره : عبد الله اللي ذيج المره صلح سيارتي واللي كنت معجبه فيه تذكرينه
ساره : مممممممممممم هي فارس احلامج
نوره : هي هو الله يا فرحتي اليوم
ساره استانست : فديت عمرج والله واخيرا تحقق حلمج الف مبروك والله تستاهلين
نروه : الله يبارك فيج يالغاليه وعقبالج
اول ما سمعت ساره كلمه عقبالج حست بالحزن تذكرت بلاوي فهد واتذكرت حبها لخالد .وسكتت
نوره : بالاج سكتي يعني اونج استحيتي
ساره : نوره يوزي من سوالفج
نوره : اوكي ساره انا ألجين بنزل عند امايه زين
ساره : صبري ما قلتيلي شو اتفقتوا
نوره : ممممممم تعالي اليوم بقولج
ساره : لا اليوم ما أقدر امايه تباني اطلع وياها
نوره : خلاص باجر تعالي الظهر
ساره : باجر خطبتج ان شاء الله
نوره : زين شو يعني ترى الكوافيره بتي بيتنا بتسويلي شعري وبتمكيجني ومره وحده بتمكيجج

ساره : ما يحتاي انا
نوره : لا شو مايحتاي ترى وايد ناس يمكن ايون
ساره : ممممممممممم اوكي خلاص ان شاء الله باجر بيي بس لازم تخبريني شو صار اوكي يالعروس
نوره أول ما سمعت العروس ويها احمر : اوكي حبيبتي
نوره : هي صح ساره قبل ما ابند لاتنسين تعزمين الريم على خطبتي باجر
ساره : أصلا من غير ما تقولين اكيد بعزمها هاي الريم مب أي حد
نوره : يالله بدت ساره بالاسطوانه
ساره : ههههههههههههههه
نوره : خلاص يا بنت خالتي ألحين اسمحيلي بخليج اوكي
ساره : اوكي غناتي
نوره : سلمي على الريم واترياج باجر
ساره : الله يسلمج ويسلم غاليج ويالله روحي عند امج لا تتأخرين عليها.
نوره : اوكي حبيبتي مع السلامه
ساره : مع الف سلامه

راحت ساره واتصلت في الريم عشان تعزمها على خطوبة نوره
ساره : الو السلام عليكم
الريم : يا هلا والله وعليكم السلام
ساره : اشحالج يالغاليه
الريم : بخير يسرج حالي وينج يالقاطعه ؟
ساره : والله بالدنيا
الريم : قطعتي عني من بعد سالفة فهد
ساره : تعرفين بعد كنت مستحيه أتصل فيج
الريم : افا ليش
ساره : لاني أحس انا السبب في عذابج انتي واخوج فهد
الريم : لا يا ساره انتي مالج خص
ساره بتردد: زين شو اخباره الحين من بعد ذاك اليوم شو بعده يحبني ولانساني
الريم تتنهد : اااااااااااااااااااااااه أي نساج هو كل يوم اييب طاريج ويتكلم عنج ودايما يقولي اذا ساره ماتزوجتني أنا ما بعيش بهالدنيا والله ياساره قطع قلبي فهد
ساره اتضايقت يوم عرفت ان فهد بعده مصر عليها .
ساره : والله ماعرف شو اقولج
الريم : الحين خلينا من سالفة فهد شوي وخبريني متى خطبة نوره
ساره /: أصلا انا متصله عشان أعزمج على خطبة نوره باجر ان شاء الله
الريم : ماشاء الله باجر والله زين زين يالله بالبركه
ساره : الله يبارك فيج يالغاليه بس عاد لا تنسين تنورينا باجر واتين
الريم : افا عليج وانا أقدر ما ايي
ساره : هي فديتج تعالي باجر من وقت زين
الريم :خلاص يالغاليه باجر بيي عندكم تقريبا العصر بعد ما أتلبس بيي بيت خالتج اوكي
ساره : اوكي اترياج
الريم : ان شا ءالله ولا تعالي سارووه
ساره : نعم
الريم : أي لون فستانج
ساره : مممممممممم ما بقولج تعالي باجر وشوفيه
الريم: يالله عاد قوليلي
ساره : اسفه ما بقولج تعالي باجر وشوفيه
الريم : زين ساره والله براويج
ساره تضحك : والله بعد تعرفين تهددين يا الريم
الريم : هي طبعا
ساره : يالله عن إذنج بروح عند امايه عشانها تباني اطلع وياها
الريم : اوكي يا ساره يالله روحي عند امج
ساره : شز زعلتي يا الريم
الرمي : لا غناتي ما أزعل من اختي وربيعتي وعمري كلها
ساره : الله الله عالكلام
الريم : عشان تعرفين غلاتج عندي
ساره : فديت عمرج والله لايحرمنا من بعض
الريم : امين يارب العالمين
ساره : اوكي حبيبتي من رخصتج


الريم : مع السلامه وسلمي على الكل
ساره : الله يسلمج مع السلامه

وصكت ساره من الريم وهي فرحانه لخطبت نوره بس بعدها تفكر بسالفتها .

وفي اليوم الثاني اللي هو يوم خطبت نوره .نوره كانت متورته وااايد وفرحانه بنفس الوقت لانها بتنخطب من الانسان اللي كانت تتمناه وأما هند فكانت مستانه بس مب وايد لانها تفكر في سالم اللي ما اتصل فيها من مده طويله .
والظهر يت الكوافيره تسوي شعر نوره وساره وصلت بيت خالتها ويوم دخلت شافت خالد وام خالد وهند قاعدين في الصاله .
ساره دخلت عليهم : السلام عليكم
ام خالد وهند وخالد : وعليكم السلام يا هلا
راحت ساره تسلم على خالتها وتحبها وسلمت على هند ويوم يت عند خالد ابتسمت وسلم عليه : اشحالك يا خالد
خالد يشوفها بفرح : بخير يعل السعاده ما تفارقج
ساره ابتسمت: ولا تفارفقك
ساره صدت لخالتها: خالتي
ام خالد : هلا حبيبتي
ساره : عيل وين نوره
ام خالد : فوق مع الكوافيره تسوي شعرها وبعدين بتيي الممكيجه وبتمكيجها .
ساره : والله زين بلحق عليها
ام خالد تشوف خالد وابتسمت وغمزت لساره: عقبال ما نشوف عرسج يا ساره يا بنت الغاليه
خالد ابتسم .
اما ساره فحست بالتوتر والخوف وابتسمت ابتسامه خوف : تسلمين يا خالو وألحين عن اذنكم بروح عند نوره
هند وهي تنغز: ساره اقول قولي حق الكوافيره تراني بعد نوره اوكي
ساره عرفت قصد هند هند تقصد انها تبى راعية الصالون تمكيجها وتعدلها قبل ساره.. خافت هند ان ساره تاخذ مكانها
وساره وهي صاده لهند : لاتخافين يا هند انتي بتكونين بعد اختج
ام خالد : اصلا ياساره انتي ماتحتاجين للمكياج ماشاء الله عليج لج جمال طبيعي
ساره ابتسمت واستحت : تسلمين خالتي كلج ذوق
خالد : والله يا امايه ما قلتي شي غلط لان محد ايي بجمال ورقة وحلاة ساره
ساره استحت من كلام خالد وراحت فوق عند نوره
أما هند طبعا قلبها يحترق من كلام امها واخوها لاانها وااايد تغار من ساره .

وراحت ساره عند نوره وكانت تشوفها وهم يمكيجونها وبعد ما خلصت نوره كانت تتصور واما هند فكانو يمكيجونها بعد
نوره بعد ما خلصت مكياج وشعر لبست فستانها اللي كان روووعه ورقيق كان لونه على السماوي والفضي والاكسسوار لاعب دوره مخلي الفستان حلو وااايد وشعرنوره كان طويل يعني لين ظهرها وشعرها أسود ونااااعم ونوره خذت جدام من شعرها وسوت عليه تسريحه بسيطه والباقي فتحته كان شكلها رووعه ويا المكياج السماوي

ساره : ماشاء الله عليج طالعه قمر
نوره : عيونج الاحلى
ساره : شو ألحين بتتصورين صح
نوره : هي الحين بتصور ان شاء الله ولا تعالي متى بتتمكيجين وتتلبسين ترى الحين الساعه 6 يعني ما شي وقت
ساره : راعية الصالون قاعده تمكيج هند وبعد شوي بتخلص يعني بلحق ان شاء الله
نروه : يالله نبى نشوف كشختج
ساره : اهم شي انتي مب انا

وساره ونورهقاعدين يسولفون يت راعية الصالون ونادت ساره عشان تمكيجها
هند طلعت بفستانها الوردي اللي كان بسيط وحلو وحطولها مكياج واايد بسيط لانها صغيره بعدها وكانت حليوه بس طبعا ما إتي بجمال ساره ونوره .
وراحت نوره تتصور واما ساره فراحت تتمكيج وهند قاعده تشوف نوره .

والريم وصلت والريم كانت حلوه ماشاء الله مكياجها كان بسيط ولبست بدله حلوه بلون الفستقي وكانت رافعه شعرها .
وساره بعد ماخلصت طلعت وكانها ملاك بجمالها كأنها هي اللي بتنخطب مع ان مكياجها كان وايد بسيط بس لان جمالها الطبيعي هو اللي عطاها كل هالجمال وفستانها كان خيال كان بلون البنفسجي الفاتح اللي عليه تطريز روعه وطبعا كان شيفون وكان حلو والفستان فيها قصات من تحت عشان جذي لبست معاه البوت البنفسجي الغامج وكانت صدق غاويه .

نوره والريم اول ما شافو ساره فتحو عيونهم وتمو يشوفونها من فوق لتحت : وااااااااااااااااااااااو
ساره تدور عشان تراويهم الفستان : شو رايكم حلو
نوره : غطيتي علي الله ياخذ بليسج
ساره : هههههههههههههههه
الريم : ماشاء الله عليج ياساره طالعه قمر اليوم
ساره : تسلمين حبيبتي
نوره : فستانج وااايد حلو تصدقين لو ما لبستيه وخليتيه حق عرسي مب احسن
ساره : لا حبيبتي ان شاء الله في عرسج ما بلبس فستان جاهز لأني بفصل عند أشهر المصممين
الريم : يالله يالله وانا
راحت ساره وحضنت الريم : وانتي بعد يا اغلى ربيعه بالكون

والكل كان مستانس بهاليوم وطبعا البيت امتلئ بالناس والاغاني من صوب والكل كان فرحان

نوره نزلت من عند الدري وكانت ساره بشمالها وام نوره بيمينها وأول ما نزلو الكل تم يطالع طبعا عيون الناس اكثر شي على ساره لأنها كانت أحلاهم بس بعد الكل تخبل بجمال نوره ورقتها ونوره كانت خايفه ومتوتره وماسكه ايد ساره بالحيل
ساره تبتسم ولكن بقلبها شي ثاني وفي خاطرها تقول ( الله يا نوره انخطبتي من الانسان اللي تمنيتيه بس أنا يمكن ما اتزوج من اللي تمنيته )
والخطوبه كانت من أروع ما يمكن كلها وناسه وضحك ونوره كانت طايره من الفرح وام عبد الله واااايد تعز خطيبة ولدها عبد الله لان شافا ان نوره طيبه وحبوبه وتدخل الخاطر

وخطوبة نوره كانت صدق حلوه والكل استانس من هاليوم لان هالفرحه الاولى اللي صارت بعايلتهم.



: :: :: :

تتوقعون ساره بترضى على فهد وبتزوجه؟؟
وحياه نوره تتوقعون بتكون سعيده؟
وهند شو بيكون مصيرها ويا سالم ؟؟
والريم هل بيكون لها أحداث بعد؟؟


❤