سحاب -وعقاب الدكتور له يومه صغير

محروم.كوم · #1 11-10-2016, 10:20 PM

بسم الله صلى الله على محمد

الابذكرالله تطمئن القلوب لا اله الا الله وحده لا شريك له

يالله تحييهم وليا حيا كثر وتنثر بعد بصغيركم وكبيركم بعد

ترا كل شي تلقاله بديل في الدنيا الا امك الله يمتع الحي منهن متاع الصالحين والميت الله يسكنه الفردوس امين يارب العالمين

اذكر مره طحت ونشقت جبهتي قولو وتضحك بعد وتروحبي امي للصحيه منول نسمي المستشفى الصحيه
المهم والله يعينا على المهم ويخيط الدكتور الجرح
ويوم جينا من بكرا وتعلق في الدريشه يعني يالتوالي النافذه
وطيح منها وتنشق لحيتي يعني الفك السفلي انشق وتروحبي امي للصحيه والدم يضرب ويجي الدكتور وقال الله مهونتا امس مخيط لك راسك برضو اليوم تجي فيك اصابه تانيه بالمصري دنتا ولد شقي
ويخيط الفك السفلي مكان اللحيه الا كبرت ويوم خاطه ويخلي الخيوط ماقصهن بطول تقريبن شبر او اقل شوي خيطين اثنين يتدودلن ويقول عشان ادبك راح اسيبهم كم يوم والله وسواها الدكتور ومي ماخالفت جعلها للجنه ويصيرون البزارين الا شافوني يقولون ابو لحيه ابو لحيه وصرت اتوزا عنهم الين صار اخر الاسبوع وروح للصحيه ويقصهن الدكتور وهو يضحك وقالي لو جيت مره تانيه راح اسوي لك لحيه وشوارب والحمد لله مارحت صارت لي درس بس وشذا الدكتور الي يعقد عيال الناس
اصبرو خل اعلمكم بذا السالفه الثانيه علشاني مبطي عنكم
خل اعلمك بسالفتي يومني صغيييرتوي دعنوني
اوجعتني اللوز الي في الحلق لان عند الواحد اربع لوز ثنتين في الحلق وثنتين منيب معلمكم وينها فيه كل واحد يتلمس روحه ويلقاهن

المهم والله يعينا على المهم
تنفخت اللوز عندي وطيح في فراشي سبوع كامل ولا طب في بطني شي مقدر ابلع شي
وذكر اني منسدح عند الوجار ومي ياملا الفردوس تقرب البيز الي يمسكون به البريق او الدله تقربه عند الضو شوي الين يدفا ثمن تحطه على حلقي يعني تكمدهن
وكنا في ايام البرد يعني الشتا ويوم صرنا في اخر الاسبوع ويتظخمن اللوز خلاص مستويات ويتفجرن بغيت اموت منهن الله يكرمكم
ويوم تشاويت شوي قالت امي وش ودك تاكل ونا امك لك اسبوع ماطب في بطنك شي قلت ابي جحه ههههههه يالله حلها ونحن في الشتا
ومي ماتبي شي غير الجحه ونا امك ونا مصر ماابي الا جحه ولا حس ابوي ياملا الجنه جاي وهو يقول منذا الي مشتهي جحه قالت امي سحاب قال والله ياوليدي تبي تحتري الصيف الين يجي ابشر بالجح والجراوه بعد وقعد اصيح ابي جحه يعني ابي جحه
ومي ياملا الجنه تعرف نقطه الضعف الي فيني وتقوم وتجيب طماط وبصل وتسوي على الضو في الوجار تسوي مرقه طماط
وهي تطبخه وتقولي ياوليدي لك اسبوع ماكلتا شي ونا اشاهق ماابي الا جح
ويوم صارت جاهزه مرقه الطماط ونا كنت منسدح وقوم بشويش ونا اشاهق شره عليهم وراكم ماجبتولي جحه
ويوم قربته امي عندي في قدر صغيير خلاص مااقدر اقاوم صابني انهيار
ونا الي امسك الخبزه وعينك ماتشوف الا النور ماتسمع الا الرشخ وبلع الي في القديير كله ثمن قال ابوي هاه هلحين تشتهي جحه ونا ابوك ولا مالها شهوه

ونا الي ارسم ذيك الابتسامه تشوف ضرس العقل منها وهذي يسمونها ابتسامه الرضى
الله يغفر لهم ويرحمهم ويسكنهم الفردوس وكل مسلم
وفي حفض الله
وما نقول الا سبحان الله والحمد لله ولااله الا الله والله اكبر عددخلقه وزنه عرشه ومداد كلماته ورضى نفسه
__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
سحاب x سحاب رحلتي الى الطائف والباحة وابلجرشي الموافق 18\19\20\\6\1433ه	محروم.كوم	منتدى أخبار المواقع والمنتديات العربية والأجنبية	0	05-18-2012 01:10 AM
4صور لي سحاب عام 1429ه بروضة سدير سحاب قوي قوي الله يجيب الخير لي جميع المسلمين	محروم.كوم	منتدى أخبار المواقع والمنتديات العربية والأجنبية	0	10-15-2011 11:10 PM
صورة سحاب على الرياض عجيبه !!!.... إحترافية ...من مسلهم في سحاب	محروم.كوم	منتدى أخبار المواقع والمنتديات العربية والأجنبية	0	12-17-2009 01:00 PM
هل يوجد حساب في الدنيا وعقاب ؟؟؟	محروم.كوم	منتدى أخبار المواقع والمنتديات العربية والأجنبية	0	11-10-2009 05:40 PM
فستان ملجة سحاب الامارات بالصور كوني عالية كالسحاب مع سحاب الامارات	محروم.كوم	منتدى أخبار المواقع والمنتديات العربية والأجنبية	0	06-02-2009 08:20 PM