الاهداء الى -عوق الخريش ولكم - مطلق الفزران-

محروم.كوم · #1 08-18-2009, 06:20 PM

اعجبتنى مواضيع اخونا عوووق الخريش ماشالله متنوعه والصور تسولف عن نفسها

وحبيت اشاركه واشاركم بفرحة نجم سهيل بقصيده لى واتمنى عدم نقلها من المشرفين الكرام

كتبتها بلندن قبل عامين مدرى وش جانى ذاك الليل ازريت انام وكل اشوى اقوم واطالع السما ومدرى وش اللى
هدانى واطالع الجوال ولا التاريخ 23-8
وعرفت وشهو اللى مبعد النوم عنى باكر طلوع سهيل الله يانى مشتاق لنقلت الطير
وطلعت هالقصيده اللى اتمنا تعجبكم وتعجب عوووق الخريش لانه شاعر ومعجبنى شعره بالطير

باكر طلوع سهيل يا مقرنس الطير ==== راح الكثير ولا بقا غير ساعات

راحت شهورٍ ليلها حار و قصير ==== باكر نهاية قيض وايضا بدايات

موسم عليه اشواق قلبى مصادير ===== اخذ معه عن مر الايام سجات

كل ٍ يزهب عزبته يا الصقاقير ====== وكل ٍ يضبط موتره للمسارات

حتى السوالف فى دواوينا غير ===== من عقب باكر نبتدى بالمعايات

هذا يمارى بالحرار المغاتير ===== وهذا يقول ان المجاهيم صلفات

وهذا يعاند بالشياهين والجير ===== وهذا يقول ان الدعاوى سهالات

في كل ديوان ٍ تشوف المباهير ===== وشاى وتراحيب ونفوس ٍ عزيزات

تلقا بها طلق الوجيه المناعير ====== وسوالف ٍ تشلع همومك من الذات
-------------------------------------------------------------------------------
واحسب شهر من طلعة سهيل لا غير===== كانه عصب موسه تغافله بسكات

ثم برقعه بشويش من دون تذيير ======= وفك الجرير اللى عليه الزمن فات

وبدل سبوق مسرول ٍ ساقه قصير ====== صافى ظهر ضربات كفه عطيبات

العام محلى طلعه الصبح وعصير ====== طلعه صدوق ولا تجى فيه شكات

ومحلى بعد تشخيصته تلة السير ====== ثم راح يطوى بالمناكب مسافات

وروح يلم ويرتفع كنه الزير ====== لا ارخا عنان الخيل ثم شن غارات

واهوى عليها هوية الدلو فالبير ====== ثم تلها من بعد رده وشعطات
-----------------------------------------------------------------------------------
واحسب شهر وانطر علوم المعابير ===== لامن جهز طيرك ليوم الملاقات

وكانك تبى فرخ ٍ يعوق المدابير===== اتعب على الاصلى وخل الهجينات

عليه من شعاق لون وتصاوير===== طير ٍ لبو مشهور عوق الخريشات ------------>>>> ( هالبيت تونى ضفته للقصيده وابو مشهور يستاهل ولا عليكم زود )
----------------------------------------------------------------------------------
يا رب يا والى جميع التدابير ===== اجعل ليالينا سعود و مسرات

يا رب تمم كل هالموسم بخير ===== مادام باقى لطلعة سهيل ساعات

============== وسلامتكم =====
اخوكم: مـــطلق الفــــــزران ------------------------- ( مغاليس ) __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
قصه وقصيده اتمنى تنال اعجابكم-- اخوكم :مطلق الفزران	محروم.كوم	منتدى أخبار المواقع والمنتديات العربية والأجنبية	0	08-21-2009 06:10 AM
الاهداء الى -عوق الخريش ولكم - مطلق الفزران-	محروم.كوم	منتدى أخبار المواقع والمنتديات العربية والأجنبية	0	08-18-2009 06:10 PM
طلب هاك الاهداء لنسخه3.8.2	محروم.كوم	منتدى أخبار المواقع والمنتديات العربية والأجنبية	0	05-27-2009 05:11 AM
إن لكل بداية نهاية ولكل قوة ضعفاً ولكل حياة موتاً	الفرعون الذهبى	الإسلام والشريعة	7	03-18-2009 09:11 PM