ممثلة خليجية ، كل ماطلعت في التلفزيون هي وبراطمها ، احس براطمها شوي وبتظهر من حلقة المسلسل وبتيي تيلس ويانا ونحن نتغدا..!




يعني ماشاء الله من كثر النفخ اللي فيهن ، تحس انهن مطبات ، مب مجرد براطم ، مما اهل الممثلة وعن جدارة واستحقاق منقطع النظير انها تدخل موسوعة جينيس للبراطم القياسية ، حتى يقول لك يوم تتعاقد على مسلسل يديد ، يطلبونها بالاسم ، تخيل ، يقولون هاتوا لنا ام براطم خل تمثل ، والغريب انها تشترط اجر عن دورها ، واجر مختلف للبرطم ، وانهم لازم يكتبون في مقدمة المسلسل بطولة فلانة بالإشتراك مع براطمها،بعد تلزم عليهم يكتبون هالعبارة في نفس المقدمة: هناك براطم كثيرة تقابلنا في حياتنا ، منها البرطم المتشقق من ارف الصيف ومنها البرطم المتروس بهموم الحياة، ونحن نعتذر في المسلسل إن شابهت براطم الشخصيات التي لدينا، أياً من براطمكم ..



لانها الممثلة الوحيدة اللي يوم توقف جدام الكيمرا ولا صار لا سمح الله ودعمت العدسة وهي مندمجة بالتمثيل، يصدم برطمها ويرتطم على العدسة ، فيمنع انها تتخدش ، اقصد البراطم مب العدسة ، لانه تدرون اهيه سامعة عن فكرة الاير باااق ، اللي ينحط في السيارات ، فقالت خل نسوي لنا واحد على الويه.. اللي مستانسين من السالفة ، يهالها ، كل ماودتهم البحر ، وتبا تعلمهم على السباحة ، تمد برطمها جيه لين يطفو على الماي، وكلن يتعلق يهالها ويهال خلق الله اللي في الماي ، حتى يهال السمج اول مايظهرون من البيضة يسيرون على طول يتمسكون في براطمها ، كله عشان تعليم السباحة ، وهنيه يظهر دور البرطمسولوجي التربوي في حياة فنانة البرطم الأولى. سمعت بعد انه المطافي راح يتعاقدون معاها بنظام البارت تاايم ، لانه مرات يوم تستوي حريجة في البنايات ، يخلون الشخص المتوهق في الطابق الخامس ينقز ، ويطيح على فراش مطاطي ، لكن في الاجتماع الاخير للادارة قرروا يوفرون بند الفراش المطاطي ويستعينون بالاخت ام براطم ، يعني اللي راح ينقز من الحين وساير يحط في باله انه راح يطيح على برطمها ، ونحن والمطافي نخلي مسؤوليتنا من الاخ المحترق ، يعني لو طاح في حلجها بدل برطمها ترا مالنا خص.



كان عندي واحد من الربع ، رزقه الله ابرطم ولا كل البراطم، يعني نحن كنا نتحرى انه ملكية البرطمة الكبرى ، كانت له ، بس الممثلة صراحة صكت على جميع البراطم من برطم النملة مروراً ببرطم الشمبانزي إلى برطم الحوت الأزرق…. عندي احساس انه ريل راعية البرطم ، يكرها من كل قلبه (اكيد كل قلبه عيل 30% !!)، اكيد تخسره بيزات يصرف على براطمها ، كفاية عليه مصاريف الروج من باريس جلري ، احس كل خمس دقايق تخلص لها درزن، فيسير ياخذ العربانة ويدخل باريس جلري ويترسها روووج ،بعد مساحة مشاء الله ، يبالها مقاول بنغالي اييب عمال الصبغ اللي عنده و يشتغلون عليها بس عشان الروج يغطي البرطم ، بس والله فكرة على طاري الصبغ، بدل مازوجها يخسر روحه رووج ، اييب قوطي جوتن من العود ، واييب له الممسحة مالت الحمامات وانتو بكرامه، يترس الممسحة صبغ، ومرة وحده على البرطم ، واللي راح يزيد من الصبغ يخليه حق اليوم الثاني، الصبغ الاحمر ينفع للبرطم الاصفر.




المشكلة العويصة الحساسة واللي شغلت مجلس الامن والامم المتحدة ، انه فنانة البرطم الاولى هذي ، تواجه مشكلة في النطق من كبر برطمها ، يعني الكلمة وهي ظاهرة لازم تصطدم بعارضة البرطم ،فتلقى الرمسة تطلع يا تطلع آوت ولا ترجع برطومية من خط التماس،مما يوجد مع الوقت مجموعة كدمات وعشر قتلى وثلاث جرحى وخمسة في حالة خطرة على اطراف البراطم ، خاصةً لو في الجملة كلمة مابي ، بعد هالكلمة اكثر كلمة تقولها في المسلسلات ، يوم تقولها تحس الطبقة العليا تسير يسار والطبقة اللي تحت تسير يمين ،((جيلي مب برطم)، قمة الوناسة صراحة ، لاو تحسها تتمضمض مب يالسة تقول مابي ، واللي زاد وغطى ، هالغمازتين الصناعيات اللي جنهن بواليع حوض الغسل ، مايتحرك البرطم ، الا الغمازتين يظهرن شرات الفلاااش ، بالغصب تبا تصير حلوة الاخت ، بس وحليله البرطم يوم تبوز ، يذكرني بتوم اللي يطلع بتوم وجيري يوم بلع طاولة الاوتي لي يكوون فيها الملابس ، مادري تحس انها جسر مب مجرد برطم ، لا فيه مشهد من المشاهد كانت تلعب ابرطمها ، الا وشوي اسمع ، طننننق ، تلفت يمين يسار ، ماعرفت شو السالفة ، ردت تلعب ابرطمها ، الا طلع صووت “طننننغ” ، اونه من الباب التغيير ، بس عقب عرفت انه صوت برطمها ماشاء الله عليها (جنه ميد ان شاينا) .. وقد اعلن البنشرجي قصدي الدكتور اللي نفخ البرطم ، عن انه يعتبر هالفنانة ذات البراطم مثال مصغر ، لهضبة المقطم اللي في مصر .. من الجدير ذكره حالما وبينما وفيما (وايد يسمع أخبار) إنه الممثلة الآنفة (الآنفة ولا الخاشمة خخخخ) تنتظر مولود ..وبرطم يديد. يالله “برطموا” بحياتكم اشوف…