~»¦مِـِـِـۈع‘ــڎ مِـِـِـع‘ـ ـآڵـڛع‘ـــآڎۿ ..!!●• - الصفحة 52

رهيفة القلوب · #1 07-06-2011, 01:10 AM

البآرت آلـ [ 47 !

------------------------
اليوم: الاحد..
المكان: بيت يابر..
الوقت: الواحدة ظهرا…
------------------------
(مبارك)…

سكرت عن سيف وفريت تيلفوني عالطاوله….
احس بالدنيا ملل….
افف..متى بسافر…!!!
في لندن الحياة ماتوقف على مدار الساعه…و الواحد يحصل مية شغله وشغله يسويها…
كان ممكن اني انشغل بتجهيزات عرس ابويه..
لكن ابويه مايبا عرس كبير…يبا ملجه وحفلة عائلية تضم الاهل والربع وشوية معارف…
اكثرهم من الرياييل طبعا…
بالتالي ماعندنا شي كثير نجهزه…. اما البيت… فزيدنا فيه شوية اثاث وترسنا المطبخ اغراض… والحوش وظف ابويه زرااع ايينا في الاسبوع مرتين عشان يرتب لنا الحديقه….
اكثر من جذي..مافي شي نسويه…
لانه كل شي فبيتنا يديد….
وبعد عرس ابويه بيومين بنسافر انا وسيف…
وعلى طاري سيف… كنت عازمنه عالغدا…لانه ابويه مب موجود وانا ماحب اتغدا بروحي…

بعد ربع ساعه وصل سيف…
سلمت عليه ويلسنا في الصاله…
سيف: ركب ركب البلايستيشن بنلعب دور..
مبارك: شو ياخي ماتزهق؟… يكون فعلمك مابنشلها ويانا لندن..
سيف: تحلم ..هذي اول شي تنحط في الشنطه..
مبارك: عز الله درست عيل ونجحت…
سيف: هههههههههه ماعليك بدرس لا تخاف… المهم ركبها…
مبارك: الحين لا بقول لهالخبل يحط الغدا يوعان…

وبعد ماحطوا لنا الغدا يلسنا انا وهو نتغدا… عالطاوله طبعا مثل ما انا متعود…
لكن سيف كانت اليلسه مب عايبتنه وكل شوي يتحرك فمكانه بعدم ارتياح وانا اضحك عليه…
مبارك: شوفيك سواف؟!
سيف: ياخي احس بعمري غلط…
مبارك: ههههههه ليش؟ عادي..
سيف: والله انه الاكل جي هب مريح.. اقولك شي.؟!..
شل سيف صحنه وراح يقعد عالارض ويلس يتغدا..
مبارك: احلف؟!
سيف: والله العظيم…
مبارك: شقايل جي خليتني اروحي..
سيف: انزل تحت عادي اونك خقاق وتاكل فوق..
مبارك: مثل ماانته تستظيج يوم تاكل فوق..انا استظيج يوم اكل تحت…
سيف: خلاص تم فوق يالحمامه…
مبارك: ههههههههه…. الا تعال بقولك…
سيف: قول لي…
مبارك: اتصلت بربيعي في لندن ووصيته يدور لنا شقه انا وانته…
سيف: منو ربيعك هذا.؟!
مبارك: ان قلت لك بتعلق..
سيف: مابعلق ليش اعلق؟!
مبارك: ربيعي ريتشارد…
سيف: ههههههههههههههههههههههههههههههههههههههه….
عقدت حياتي وتميت اطالع سيف بظيج…
مبارك: قلت لك بتعلق…
سيف: ماقلت شي الا ظحكت…. عيل ريتشارد.. والنعم والله شو من القبايل.؟!
مبارك: هههههههههه هذا ريتشارد ج. هندرسون…. يده رسام خطير…
سيف: لا والله… وانته ماحصلت ترابع غير هذا؟!..
مبارك: فنان ريتشي…
سيف: منو بعد ريتشي.؟؟
مبارك: الا هو ريتشارد… ندلعه ريتشي…
ابتسمت وانا اتذكر ريتشارد ربيعي من كان عمري 14 سنه…صاحب العيون الرماديات والشعر الاسود الطويل…
كم حنيت عليه عشان يقصه مايطيع..دوم يربطه… وقبل ماسافر بدا يقلدني وترك لحيته تطلع ..
يقول ان اللحية دامها تخليني انا وسيم اكيد بتطلع هو بعد عليه حلوه… وبتخليه يبيـّـن اكبر في السن…
ريتشارد له ميول رسم بعد مثل يده…
ومازلت اتذكر الرسمة اللي رسمها لويهي….لكني يوم عرفت انها حرام…رحت وحرقتها… بس كانت حلوه والله….
سيف: هاي هاي وين سرحت بافكارك؟!!
انتبهت على صوت سيف..
مبارك: هااه؟ سوري كنت اتذكر ريتشارد…
سيف: ردينا على ريتشارد… المهم ماخبرتني ظنك بيحصل شقة لين مانروح؟…
مبارك: اذا ماحصل بنسكن في شقته لين مانحصل شقة..
سيف: بس الدوله مطرشيني عند عايله اسكن عندها…
مبارك: عادي تقدر انك تطلع عنها … محد يغصبك يعني.. بندبرها لا تحاتي..
سكت سيف وكمل غداه.. اما انا تركت غداي…
كنت ادري انه امس سار عند مهرة…
كنت ابا اسال عنها…لكني مستحي…
اخافه يقول اني مهتم او شي….
وانا فعلا مهتم…
بيت عمتي من دون مهرة صاير بارد… حتى لولو اشوفها حزينه بدونها…
فكرت اييب الموضوع بطريقه غير مباشره..
تحنحنت وسالته..
مبارك: امس متى رديت من بوظبي؟
سيف: طلعت عن قوم مهرة حوالي الخمس او خمس ونص…مريت على السوق عقبها هناك وشريت بدلات…وصلت العين حوالي ثمان..لكني مارديت البيت اتصل بي جمال وقال يباني وسرت له وتميت عنده عشر تقريبا..عقب سرت البيت…
مبارك: اهاااا….
سكت…ماعرفت شو اقول عقبها…اففف ليش ما اساله بشكل مباشر وافتك…السؤال بطريقه غير مباشره مانفعت.. سيف فصل لي جدوله عقب ماطلع عنهم مش قبل ..!!..مالت عليك…
مبارك: وشو حالها اختك؟…قلت لي مريضه..!!
سيف: مهرووه…فيها حمى مسكينه …
مبارك: مرتاحه؟
سيف: طالع..اقولك فيها حمى تقول لي مرتاحه؟!
مبارك: يعني مرتاحه ويا ناصر هذا اللي اقصده..!!
سيف: هممممم..بصراحه مادري… اول ماشافتني لوت عليه وتمت تصيح... خفت لايكون فيها شي بس اخر شي قالت لي انها متولهه علي بس...وبعدين احسها لين احين مااندمجت مع ناصر وايد...اصلا ماكان شي وقت.. ماكان عندهم غير الجمعه بس والسبت تراها مرضت... ومايصير نحكم بسرعه..بس انا شفته يداريها ومهتم فيها...
مبارك: عفست لي مخي...
ابتسم سيف..
سيف: لا تحاتيها... يمكن مهرة حاليا مب متاقلمه وياه...لكنها بتصير بخير بعد كم يوم ان شاء الله...
انا سكت..
مادري شو كنت اتوقع....
وبعدين انا شو يخصني...!!..والا بس لانها كانت تحبني صار لي حق اني اتحكم او اهتم..!!..
اوففف..
انتبهت لزقره سيف لي...
سيف: مبارك..!!!..
مبارك: هااه؟!
سيف: قول آمين انزين..؟!
عقدت حياتي..
مبارك: على شو.؟!..
سيف: قلت انها بتصير بخير معاه ان شاء الله...قول امين..
ابتسمت..
مبارك: آمين يابوك...آمين...

دزيت صحن غداي بعد ما انسدت نفسي.. لكني تميت يالس ماتحركت...
شو هالاهتمام المفاجئ لمهرة؟!..
ليش النفور الغريب من ناصر مع اني كنت استلطفه قبل..!!
سيف: شياك؟ حلو الغدا.. اسميه هنديكم رمّــه عجيب ماشاء الله ...
عقدت حياتي..
مبارك: رمّـــه..؟!..
سيف: هيه..يعني نفسه حلو في الطبخ...
مبارك: معلومه يديده...
سيف: ليش ماكملت غداك؟!
مبارك: شبعت الحمد لله...

طول الظهر تمينا انا وسيف نلعب بلايستيشن ونسولف...اخر شي زهقنا وطلعنا من البيت..
------------------------------------
اليوم: الاحد..
المكان: في الجامعه..
الوقت: الثانية ظهرا..
------------------------------------
(كنه)...

مسكت ايد منى زين وسحبتها وراي في زحمة البنات في معرض الجامعه...
كنه: تعالي يابوج اخاف ريلج يرفع علي قضية اني ظيعتج والا تعبتج والا شي..
منى: يالله عاد ما استوى اهتمام هذا بتذليني عليه....هو بس اتصل عشان يتاكد اني نفذت اوامره والا لا...
ضحكت...
كنه: على منو بتقصين...ريلج وده يدخل الجامعه وياكلج بنفسه عشان يطمن وتقوليلي يتصل بس عشان يتاكد انج نفذتي الاوامر؟!... الله شوفي هالحزام...!!
وقفت منى عدالي وقعدنا نتفحص الاحزمه والاكسسوارات...
المعرض كان حلو وفيه اشياء يديده...
لكن زحمه البنات تخلي الواحد يطفر...
وقفنا عند ميداليات مع ابواك حلوه...
على طول قفز في بالي يسوووفي... وظحكت...ادريبه معصب علي...وادري انه زعلان... صحيح يحز في خاطري زعله وما اباه يزعل مني..
لكن اباه يفهم ان حياتي مابتتغير لمجرد اني انخطبت له او باخذه...
انا تربيت مع عيال خالتي...بنات واولاد على حد سواء... ومتعوده عليهم...
ومابمتنع عن الطلعه لهم والسلام والسوالف بس لمجرد انه هومايعيبه ولانه يغار..؟!!..
صحيح غيرته مطلوبه وانابحاول اخفف من ظهراتي لهم لكن عاد ماقدر امتنع كليا عنهم هذيلا بعد اهلي..!!!
وهو لازم يتفهم هالشي...
اذا تمينا على هالحال بنتعب...هو بيتعب من الغيره وانا بتعب لاني ماقدر امتنع عنهم...حالهم حال خواني وخواتي...
حسيت بدزه خفيفه على جتفي..
منى : اييه..وين سرحتي؟!..
كنه: بخبرج عقب...شو رايج بهاي حلوه؟!
مسكت ميدالية فضية وراويتها منى..
منى: هممممممم مب لي هناك...هاي احلى...لمنو تبينها؟!
كنه: لاخوج..
شهقت منى.. وفرت الميداليات...كانه مسكتها الكهربا...

منى: عنلاتج قومي نسير...
سحبتني وراحت مكان ثاني وانا اضحك...
كنه: ليش شفيج..؟!!..
منى: انتي خبله..ماتستحين على ويهج؟!... صح هو اخويه بس عيب عليج هالحركات..
كنه: هههههههه انتي ماتدرين شو صار امس...
منى: شو ماقلتيلي؟!
كنه: اخبرج في زحمه البنات الف وحده تسمع السالفه؟!.. خلينا نخلص حواطه في المعرض عقب بنشتري ذره وبنطلع...

وفعلا بعد ماخلصنا حواطه واشترينا شوية اشياء... خذنا ذره وطلعنا نتمشى صوب البوابه...
لانه كلنا بنروح الساعه ثلاث...

منى: يالله خبريني السالفه..!
كنه: الله يسلمج امس الظهر كنت اتكلم ويا يوسف..عالنت طبعا.. وكالعاده تمينا نتغايظ بس امس زيدت شوي الجرعه... واخوج يغار وايد... حذرني ما اطلع جدام غيره وجي بشكل عام يعني ماخصص....المهم سكرت عنه وسار يرقد...
منى: انزين وبعدين...
كنه: الله يسلمج يا خليفه ولد خالوه امس كان يبا مايد في شغله...وماحصله ..قام يترياه عندنا في الصاله... وقولي منو طب علينا..!
شهقت منى..
منى: شو يايبنه؟!!..
كنه: يايب دوا السكر ليدووه...وماقال لي انه بايي لو ادري جان مايلست عند خليفه...لكنه فاجئني.. ومن كثر زياغي من نظرته ذيج اللحظه قمت اضحك ..!!!!.. وهو شكله شافني مستانسه وفووووووووووول...
حطت منى ايدها تغطي حلجها المفتوح وهي منفعله معاي بالقصه...
منى: وبعدين شو صار؟!
كنه: طنشنا كلنا وسار عند يدوه قعد عندها شوي ورد طلع...بغيت اموت من الضحك يوم قال لخليفه ولد خالوه ..انته شو مقعدنك هني؟! ههههههههه... يعني جي بين على ويهه انه متظايق منه..
منى: هههههههههه اسميك يا يوسف..!!..وشو قال خليفه؟!
كنه: والله خليفه مسكين على ويهه...المهم انه يوسف حظرته زعلان عليه..طرشت له ايمييل امس بس مارد عليه...
منى: تحملي اللي ايييج..
ظربت منى على جتفها بقهر...
كنه: حرام عليج...
منى: عيل اخويه فديته يغار عليج ويقولج لا اطلعين جدام حد وانتي متبرزه تسولفين ويا ولد خالتج؟!!
كنه: انا ابا اعود يوسف انه مايغار من عيال خالوه..لاني مستحيل امتنع عن الظهرة جدامهم..
منى: لا والله..!!!!
كنه: هيه والله... حتى بعد العرس...!!
منى: لا عيل ناويه على اخرتج...بعدج ماعرفتي يوسف.. ماتحيدين يوم كنا في دبي يوم انا وانتي اول ثانوي؟!!
عقدت حياتي وانا اتذكر...
كنه: متى؟.. نحن سرنا وياكم كم مره دبي ذيج السنه عسب عرس ميثا ومحمد..!!
منى: هيه ويوسف كان توه مخلص ثانويه عامه وبيدش الدوره العسكرية...!! تذكرين يوم انفدعت ريلي ورحنا انا وانتي يلسنا على واحد من كراسي المطعم المفتوح؟!..
ابتسمت وانا اتذكر هذيج الحادثه فعلا... حادثه كلنا نبا ننساها...
كنه: هيييه...يوم تظارب ويا الشباب وزخته الشرطه....
منى: ناسيه ليش تظارب وياهم؟
كنه: لا ما نسيت منى... صدقج...يوسف يبيّن للناس انه بارد...لكن يوم حد يتعرض لاهله او شي تكون غيرته عنيفه....
قعدت اتذكر الحادثه وانا اتنهد...
يومها كان حبي ليوسف توه فبدايته... ماقدر اوصف شعوري كيف كان وانا اشوفه يمسك الريال من حلجه ويدقبه ...
هذاك يستاهل..فعلا تواقح معانا انا ومنى... لكن ماكنت اتوقع من يوسف ردة الفعل العنيفه اللي طلعت منه...كنا نتوقع ناصر يسويها ممكن!!..لكن ناصر يومها خلانا وراح يفرفر في السنتر....صدق كانت عينه زايغه ايامها بس الظاهر عقل...
اما يوسف..آآآخ من يوسف... كيف خفت وبغيت اكسر ايد منى وصبوعها من كثر ماكنت شاده عليها من الخوف وانا اشوف يوسف ماسك الريال الثاني من كندورته...وربع الريال تحاوطوا بيوسف يسحبونه عن الريال...
لين اخر شي يت الشرطه وشلتهم كلهم....
لكن الحمد لله اكتفوا بتعهد وقدرنا نرجع البيت يومها... ناصر تم يظحك ويطنز عالسالفه...ويوسف طول الدرب منتطب ومعصب... بعد مارجع من عند الشرطه اطالعني انا بنظره لوم..كاني انا السبب في كل هذا باني شليت منى وقعدتها في هالمكان...!! يعني شو كان يباني اسوي؟.. اخلي البنت تمشي على ريلها اللي تعورها واخر شي اطيح وتفتشل؟!!... حسسني يومها باني ثقيله وعاله عليهم..مع اني مب بروحي سايره...معاي نوره وخواتي عاشه ولطوف..وامايه بعد كانت موجوده...مايد يومها كان مسافر للخارج للدراسه عشان جي كنا نعتمد على محمد وناصر في اكثر طلعاتنا.... يوسف ماكانت عنده سياره لين ماتخرج من الثانويه....عشان جي ماكنا نطلب منه يودينا مكان اصلا
منى: انا الغبية يالسه اذكرج...ايييييييييه..!!
دزتني منى بظيج لاني سرحانه عنها ولاهية بافكاري..
كنه: تدرين ان السالفه ذيج تظايقني ليش تذكريني؟!
منى: بس عشان اذكرج كيف يغار يوسف على اهله...فمابالك اذا غار على حبيبته وخطيبته وزوجه المستقبل وام لعيال؟...تبينه يذبحج؟!

ضحكت انا بفرح على كل الاوصاف اللي صارت تربط بيني وبين يوسف... من كان يتوقع...انا حبيبة يوسف وخطيبته وزوجه المستقبل وام لعيال بعد...!!!..
كنه: خلاص بهدي اللعب... وصلنا الرسبشن..
كنه:. دقي لراشد شوفي وينه.. لانه دريولنا اكيد برااا...
نفذت منى كلامي وطلع راشد ياي بالدرب...
لين مايا يشل منى... وركبت انا سيارتنا ورحت البيت...وهناك....
صدمتني سيارة الغالي...

يوسف..!!
---------------------------------
اليوم: الاحد...
المكان: بيت ام سلطان..
الوقت: الثالثه والنصف ظهرا...
---------------------------------
(يوسف)...

اطالعت يدوه بابتسامه وهي تعدل برقعها وشيلتها...وتتعطر...
يوسف: يدوه انتي هب سايره عرس سايره الا بيتج الثاني...
ام سلطان: ادري بس عاد تدريبي احب الزين...
يوسف: افا عليج يدوه انتي الزين ماخذ اسمه منج....عيل تتحسبين انا طالع حلو على منوه..؟!
ام سلطان: هههههههههههههه ندريبها المدحه الا بترد عليك بالاخير ...
ظحكت وحبيتها على راسها..
يوسف: فديتج يالغاليه والله انج تاج عروسنا....
ام سلطان: حبتك العافيه الغالي... وجبلت صوبي يدوه بالعطر وقعدت تعطرني بالعطر العربي...وطبعا بقع في كندورتي...
يوسف: بسني بسني يدوه...الله يهديج كندورتي بيظا وعلم فيها...
ام سلطان: تعطر تعطر ولديه ريحته طيبه..
يوسف: ادريبه ريحته طيبه بس عاد لونه هب طيب... المهم انتي هذي بس اغراضج؟
ام سلطان: هيه..لحظه بشوف جان ناسيه شي...
وردت يدوه تفتش في الادراج...وانا ابتسمت وحطيت ايدي على خواصري...هذي ثالث مره تتاكد...!!..
مادري متى بتخلينا نسير... مرتين ابويه اتصل بي يتخبر متى بنوصل؟ لاني متغدي عند قوم يدووه...
واسميه ابويه استانس يوم درا ان يدوه بتي تقعد عندنا اسبوع...
وسالني كيف اقنعتها.؟!.. لانه هو مارام يقنعها قبل... بس الظاهر ان يدوه حست بقلة اهتمام ام مايد فيها .. والعيايز دايما يدورن حد يحن عليهن ويهتم فيهن ... اذا حست انها عاله على حد..بتنخش فحجرتها ولا بتطلع... واذا شي ياها محد بيدريبها.. بيت يدوه كلن لاهي بشغله.... حتى كنه اللي كنت احسها وايد ويا يدوه..التهت بالدراسه... وماتحصل وقت تقعد ويا يدوه وايد مثل قبل... لكن العتب مب عليهن العتب على ام مايد اللي لاهية ويا ربيعاتها وخواتها وناسية عمتها العيوز...
الله يهديهم...
الظاهر هذا الشي الوحيد اللي خلا يدوه توافق انها تي وياي...ومحد يدري يمكن اذا عيبتها القعده عندنا تستقر في بيتنا.... ابويه من متى يصيح عليها بس هي ماطيع تقول مابخليهم يتامى بروحهم..وهذا بيتها...الظاهر ما انتبهت ان هاليتامى كبروا وصار لكل واحد منهم حياه يلتهي فيها....

واخيرا..خلصت يدوه..
ام سلطان: توكلنا على الله...اطلع قبلي بقفل الحجره...
يوسف: شحقه فيها كنوز؟
ام سلطان: مايصير اخليها مبطله يتعبثون بشغليي...اغراضي كلهن في الحجره ما أامن اخليها مفتوحه...
ابتسمت...
يوسف: يالله يدوه ابويه حشرني يترياج..وتعرفينه شيبتج انتي اذا مارقد الظهر شو يسويبنا...
ظحكت يدوه ومشت جدامي وانا شال شنطتها في ايدي...يدوه مسكينه كانت بطيئه في المشي...وعصاها في ايدها دوم..
يوم وصلنا الصاله لاحظت وحده تتغشى وتنسحب..على طول انا نزلت راسي...الظاهر هذي حرمه مايد..

قام مايد وامه من مكانهم..
ام مايد: هااه عمتيه؟!..امرره مروحه عنا..!
ام سلطان: بسير عند عيالي اسبوع وبرد عليكم عقب...
يوسف: لو ترخصونها تي تقعد عندنا على طول بعد يكون احسن...
مايد: لا تحلم يدوه ناجرها عليكم بس.. هالبيت بدونها مب بيت بصراحه مانستغني عنها...
ام سلطان: هههههههههه فديتك يامايد كلكم عيالي وغالين عندي بس بعد لهم عليه حق .. انا ساكنه وياكم وماشوفهم وايد...
مايد: مسموحه يدوه ندريبج ولهانه عليهم وهم ولهانين عليج بس انا اقولج عن تعيبج القعده هناك وتكنسلين عنا...
ام سلطان: لالا هذا بيتي ما استغنى عنه... يالله شي في الخواطر؟
مايد+ ام مايد: سلامتج..
ام سلطان: فمان الله...
طلعت يدوه من البيت وطلعت انا وراها بعد ماسلمت عليهم...
اول ماطلعت شفت سياره البيت يايه... نزلت منها كنوه وهي معقده حياتها وتعدل حجابها...
اول ماشفتها فز قلبي...وتذكرت رسالتها الامسية اللي اخترت انا اني اطنشها عشان تتادب شوي...
تعذرت مني وايد لكني ماسامحتها.... هذا وبعدني مب محذرنها وطالبنها طلبه تخاف الله فيني من هالغيره...وهي بعدها تظهر له خلوف هذا....

حظنت كنه ملفها ووقفت بعد ماسلمت على يدوه وحبتها على راسها....
كنه: شحالك يوسف؟
يوسف: الحمد لله...شحالج انتي؟
كنه: بخير الحمد لله.....يدوه وين بها؟!!..اشوفج متشلله...!!
ام سلطان: بسير بيت ولديه....
كنه: بيت عمي؟...وحق شو الشنطه..؟!
قلت لكنوه بغياظ...
يوسف: اقنعت يدوه تقعد عندنا اسبووووووووع...
بطلت كنه عيونها؟
كنه: اسبووع..؟!!!...يدووووه...!!
ام سلطان: هااه فديتج...
كنه: يدوه عطيني ربع ساعه بزهب شنطتيه وبايي وياج...
غصبن عني ابتسمت...
اتخيل الطراق اللي بايي كنه من مايد لو اقترحت هالاقتراح....لكن يالله اسميني اتمنى...لو تقعد كنه فغرفة منى..وتسكن عندنا...!!..ياسلاااااااااااااام وناسه...
ام سلطان: مايخالف سيري بس عاد شاوري امج واخوج...
كنه: يدوه مابيطيعون تدريبهم انتي...بس انا ماصبر عنج شو اسبوع عنبووو بسج يوم واحد باجر ردي...
ام سلطان: عاد انا وعدت يوسف وانتي متى ماتولهتي عليه تعالي بيت عمج تراه الا بيتج...
كنه: واذا ماطاعوا اييبوني..؟!
ام سلطان: بييبج يوسف متى مابغيتي...
كنه التفتت لي بعيونها وفيهن ابتسامه...اما انا التفت ليدوه مستنكر...
يوسف: دريول عندها ثرني...!!!..
قالت كنه بصوت واطي..
كنه : هيه بعد شو..!
انا هني فريت الشنطه عالارض...
والتفت ليدوه..
يوسف: يدوه عصاج لو سمحتي شوي...
سحبت عصا يدوه اللي بغيت اظرب بها كنه لكن الخبيثه شردت وهي تظحك...
يوسف: يالله دشي...دشي داخل البيت عطلتينا... قال شووو قال دريول...
ام سلطان: وابوي يوسف شو ياك هالبنت هات هات العصا...عيب ولديه الريال مايمد ايده عالبنات...
ظحكت كنوه على يدوه اللي اصلا ماتشوف بس فهمت من السالفه اني يالس اظرب كنه وصدقت...
يوسف: ثرها بنتج تنلحق تشرد جنها فاره.....
ظحكت يدوه ...
ام سلطان: عيل شقايل بتزخها عقب ماتاخذها..؟!...

انا هني يميع الالوان تيمعت في ويهي من القفطه....ابتسمت نص ابتسامه غصبن عني والتفت لكنه اللي كان ويهها مثل ويهي محمر..حاظنه ملفها وفاتحه عيونها اطالع يدوه...
لكنها قالت وهي تتراجع بسرعه داخل البيت..
كنه: مع السلامه يدوه...

واختفت ورا الباب...

تميت انا اطالع الباب وقلبي يدق..... كيف الواحد يقدر يتم زعلان عليها هذي..!!..
ام سلطان: يالله فديتك نسير ...
يوسف: هاه...هي هي يالله نسير يدوه....
فتحت الباب ليدوه وساعتها انها تركب عدالي... سكرت الباب وحطيت شنطتها في الدبه...ورديت ركبت مكان السايق وطلعنا من البيت...
-------------------------------------

اليوم: الاحد...
المكان: سيارة ناصر..
الوقت: الرابعه عصرا...
-------------------------------------
(ناصر).....

بعد ماخلصنا غدا انا ومهرة ...في المطعم نفسه اللي عيبها...كنت الاحظ على مهرة انها هادية... ماحاولت اتقرب منها عن تتنرفز... كان عاجبني هدوءها... وخجلها وارتباكها من الناس...مب مني انا....من الناس...
كانت تستحي من الكل وترتبك منهم...
تذكرت كيف انخشت وراي ونحن نمشي داخلين المطعم...لانه كانت شلة شباب طالعه من المطعم واصواتهم عاليه... عورني قلبي ساعتها....ياترى انا سببت لها هالخوف من الناس..؟!!!...

رغم حب مهرة لنوعية الاكل في هالمطعم..الاانها ماكانت مرتاحه...من الناس...عشان جي طلعنا بعد ماتغدينا على طول...
طول فتره بعد الغدا ماعرفت وين اوديها.. مرينا عالسينما واخترنا فلم معين لكن كان مايبدا قبل الساعه خمس..وماحبيت ارجعها الشقة دامها بهالمزاج الهادي...
قعدت احوط بها على بوظبي كلها...من شرق لغرب... وانااراويها المعالم للعاصمة....راويتها كل شي تقريبا.... حتى اني نزلتها تتمشى عالكورنيش...
طبعا حرمت اقربها من الشاطي لانها ماتقاوم تدخل فيه..وان دخلت بتمرض..وانامافيني عالمرض ماصدقناها تصح...
طول فتره الغدا وبعد الغدا ماكلمتها عن أي شي شخصي... كانت تسرح عني وايد..تسالني احيانا اساله عفويه اذا شافت شي غريب... واجاوبها على قد السؤال...
ويوم كنا عالكاسر...شفنا اثنينه يلعبون بالسكوترات... يا واحد لف عدال ربيعه عمدا وخرسه بالماي...انا ابتسمت..لكن مب عليهم..ابتسمت يوم سمعت ظحكه مهرة... اللي بسرعه اختفت يوم ادركت انها قاعده تظحك معاي....وردت تسكت..!
يالله حتى الظحك معاي مستخسرتنه...!!!...

لكن ماعليه...احين تحاسب على تصرفاتها...باجر بتنسى نفسها والدنيا كلها معاي...
لازم اصبر عليها...
يوم قرب الوقت على صلاة العصر وقفت عدال مسيد...
ناصر: انا بنزل اصلي...بتصلين؟!
مهرة: وين...كيف اصلي عندهم...؟!
ناصر: شي من ورا مسيد حريم مهرة لانه نحن مابنرد البيت لين في الليل...انزلين صلي ماعليج شر..
مهرة: اخاف...
ناصر: من شو؟..يمكن حتى ماتحصلين حريم داخل...بوصلج لين الباب..تمي داخل لين ماتخلص الصلاة ..طلعي وبتحصليني جدام الباب...

تمت مهرة لحظه متردده....
مهرة: .... اوكي...
تغشت مهرة...ونزلنا من السياره..وصلتها لقسم الحريم ورديت صوب المسيد اصلي...
وفعلا بعد الصلاة رحت ووقفت جدام قسم الحريم....صح فقط ويهي... لكن ماعليه من الناس اهم شي مهرة ماتتعرض لمواقف بايخه بسببي...ودامني وعدتها لازم اوفي بوعدي واوقف جدام الباب..
_________________ __DEFINE_LIKE_SHARE__

رهيفة القلوب · 07-06-2011, 01:12 AM

شفت مهرة تفتح الباب شويه وتوايج ..يوم شافتني طلعت بتردد...
ابتسمت لها ...
ناصر: تقبل الله منج...
مهرة:....منا ومنك صالح الاعمال..
ناصر: آمين... يالله نسير..
ركبنا السياره وتوجهنا للسينما مره ثانيه...
عاد شو بنطالع.؟!!... الفلم اللي اختارته مهرة كان فلم " انيميشن"..رسوم متطور يعني...
صحيح شكلنا انا وهي غلط داشينه بلا عيال عندنا ولا شي..لكن عشانها كل شي يهون...وهي جذبها الفلم هذا وعلى قولتها شايفه دعايا عنه ... واختارته من بيت كل الافلام الرهيبه اللي نازله يديد...
ساعتها انا سكت وماقلت شي...لكني بديت افكر كيف بقضي الوقت وانا اطالع هالفلم...
ناصر: اول مره ادشين سينما؟
مهرة: هيه.... وعدني سهيل مره...بس ماوداني...
يلست مهرة في كراسي زاويه واخر شي...
ناصر: شو تبين بيبسي ميريندا شو بالضبط؟
اطالعتني مهرة وهي مبطله عيونها...
مهرة: وين بتروح؟
ناصر: بروح اشتري شرب وفراخ...
مهرة: بروح وياك....
ناصر: وين تسيرين يلسي مكانج محد باييج...
مهرة: انته شوو انته..!!..تخليني بروحي وتروح لو حد تحرش بي..
ناصر: اول شي قصري حسج... ثاني شي احين في القاعه هذي شكبرها محد غيرج يتحرشون به؟!!.
مهرة: ليش لاء..؟... حظرتك تحرشت بي والا؟!!!..
تنهدت بظيج....انا شو هالحظ اللي عندي..!!!..شو خلاني انطق؟..جان قلت لها قومي وياي وخلاص...
انا عرفت ان سكوتها قبل كان هدوء ماقبل العاصفة احين بتنكد علينا اليوم...!!..
ناصر: قومي انزين...قومي وياي..
حاست مهرة بوزها وتغشت مره ثانيه وطلعنا نشتري...
ناصر: شو تبين؟
مهرة: هممممممممم.....
ناصر: بسرعه الفلم بيبدا عنج...
مهرة: اشتر انته اول وخلني افكر...
ناصر: شو بعد يبالها هذي من التفكير؟!!.. يالله عشان اطلب مره وحده ...
مهرة: اوووه....!!...
صديت للهندي وقلت له..
ناصر: اثنين ابيبسي...
مهرة: ماريد انا بيبسي...
ناصر: قولي عيل شو تبين..
مهرة: ميرندا...
ناصر: وغير؟
مهرة: جالكسي...
ناصر: وبعد؟
مهرة: بس...
ناصر: وسلامتي صح...
مهرة:.............
سكتت عني مهرة وماردت والقهر..التفتت الصوب الثاني...
لكني طنشت وطلبت اللي بغته مهرة واللي انا اباه...خلصنا ودخلنا القاعه وحصلنا الفلم توه بادي...
مهرة: اووووه...شفت؟!!..
ناصر: شو بعد شفت انتي اللي قاعده اتخيرين شو تبين من الصبح عطلتينا...
مهرة: انته اللي اقترحت انه نشتري شي...
ناصر: وانتي اللي اصريتي تطلعين معاي لو انا اروحي جان ييت بسرعه وانتي مافاتتج بداية الفلم...
مهرة: اصلا انته المفروض تشتري قبل ماندخل...
ناصر: اوففففففففففف...نسيت...ممكن تسكتين عن يروغونا احين؟! مب رواحنا في السينما والا ناسيه.؟!..
شلت مهرة الميرندا مالها ويلست عالكرسي بهدوء...
وانا عدالها...بعد ماهدت اعصابي المتنرفزه من تصرفاتها الطفولية...بديت استمتع بتلامس جتفي بجتف مهرة اكثر من استمتاعي بالفلم....
كانت مهرة من كثر اندماجها كل شوي تظحك على شخصيات الفلم ومواقفهم...
لحسن الحظ كان الفلم قصير نوعا ما...فقدرت الحق على صلاة المغرب في المسيد..ونفس الشي مهرة صلت في مسيد الحريم.... ويوم طلعنا...وركبنا السياره..
ناصر: وين تبينا نسير؟!..
مهرة: البيت...
ابتسمت مره ثانيه لتسمية مهرة الشقة بالبيت...!!
ناصر: تعبتي؟!
اسندت مهرة راسها وغمضت عينها...
مهرة: همممم...
ماحركت السياره...ولا تحركت انا من مكاني..تميت اطالع مهرة ومشاعر غريبه تتنازع في نفسي...
مظهر مهرة المستسلم اثر فيني... حسيت بحروره تمشي فصدري...لا يكون بس ردت لها الحمى؟!!..
مديت ايدي كنت ابا اشوف اذا حاره او لا...
لكن مهرة انتبهت فجاه وبحركه سريعه بعدت ايدي عنها بعنف...
عقدت حياتها وهي اطالعني...وانا بعد عقدت حياتي منصدم من سوء المعاملة...
مهرة: شو تسوي؟..
عظيت انا على شفايفي افكر كيف اني انحط دايما بموقف الدفاع عن النفس وعن نواياي البريئه اللي دايما تفسرها مهرة انها نوايا خبيثه...
ناصر: مهرة..كنت خايف لا تكونين تعبانه بسبب الحمى..بس كنت بشوف اذا الحمى ردت لــ..
قاطعتني مهرة وهي معصبه..
مهرة: انا قلت لك اني صرت بخير...
ناصر: انزين بس كنت ابا اتاكد...
مهرة: لا تحاول تخدعني... انته تنتهز الفرص عشان تلمسني... بس يكون فعلمك ...مب لان القدر خدعني وخلاني اكون زوجتك ..معناته انه لك الحق انك تلمسني... !!... الزوج مايملك حقوقه بمجرد عقد الزواج... الزوج يكتسب هالحقوق اكتساب....
انقهرت من هالمحاضره الي حتى ابويه ماسمعني اياها...!!!..
ناصر: انتهز الفرص عشان المسج؟!!!... هه..!!... انتي صارلج ثلاث ايام ترقدين معاي بنفس الشقه... مرضتي وكنتي تحت رحمتي كليا يوم كامل.... امس بالذات انتي بنفسج وبريولج ييتي عندي لين غرفتي ورقدتي فيها.... مع ذلك مالمستج بنية خبيثه ... ياعمري انا لو ابا المسج مثل ما انتي تتخيلين مابتريا الاذن منج... لكن صابر عليج ومابفرض نفسي عليج ... ومابلمسج الا برضاج وتاكدي من هالشي..!!..

مهرة: بتبطي تتريا جانك تتريا رضاي....!!
ناصر: ماكان لهالحشره كلها داعي.... كنت ابا اتكد ان حرارتج ما ارتفعت مره ثانيه هذي هي كل السالفه... فيكون احسن لج لو انج تلمين ثمج وماتسمعيني محاضرات انتي مب قدها...
وغصبن عنها حطيت ايدي على يبهتها اتهيس حرارتها.... لكنها كانت بخير...
ناصر: مافيج حراره... الظاهر انه تعب بس...
دزت مهرة ايدي مره ثانيه وهي تتافف..... مادري شو اللي خلاني اضحك ساعتها..مع اني مقهور في داخلي بس ماقدرت اكتمها.... مديت ايدي مره ثانيه وقرصتها في غزها مثل ماقرصتها يوم الجمعه الظهر...
مهرة: آآآآآي....افففففففففففففف ياشيييينك ياخي لا تصكني....
خليتها وقعدت اضحك عليها...حركت سيارتي ورحنا للشقة...البيت على قولة مهرة..
------------------------------------
اليوم: الاحد..
المكان: سيارة ناصر..
الوقت: السابعه والنصف..
------------------------------------
(مهرة)....

كنت مظايقه حدي من ناصر هذا....
انا متاكده انه يتحين الفرص عشان يلمسني...رغم المحاضره "الرفيعه المستوى" اللي عطاني اياها... لكني متاكده من كلامي...
صحيح اني مش خبيره بالرياييل ونواياهم...
لكن اقدر اعتبر نفسي خبيره بالانسان هذا بالذات...
نفس النظره اللي اطالعني بها ذاك اليوم في بيتنا... النظره المتفحصه هذي... نفسها يطالعني بها احيانا ...
شكثر اخاف يوم اشوف فعيونه هالنظره.... كل ما اعصب به اشوفها فعيونه...مادري ليش...
اتم حاطه قلبي على ايدي اتوقع منه يهجم علي فاي لحظه...
لكن ولدهشتي..لين احين ما تحرك...
وانا اخاف اني اذا تميت اعصب به جذي يقوم يعاقبني باسوا طريقه ممكن اني اتخيلها...
لكني ماقاوم...ماقدر افوت فرصه دون مااخلق مشكله...والا كيف بيطلقني اذا ماطفرت به..!!!
والله شي يحير شو اسوي..؟!...
اتنقرش به واظيج به عشان يطلقني؟!..
والا اسكت عنه واتق ِ شره لين ما ارد لاهلي؟!!..

وصلنا العماره ..تغشيت مسكت شنطة ايدي ونزلت...
في المصعد ماكنا بروحنا... دخلت معانا حرمه عيوز... يوم دققت النظر... لا ارادية قمت اتسحب لين مالصقت في ناصر... حتى ناصر استغرب مني وتم يطالعني مايعرف شوفيني....
لكني انا كنت فالخه حزتها...
هذي الجنيه طلعت لي مره ثانيه... غربلها الله شو تبا مني..؟!!..
تميت اسمي واتعوذ بصوت واطي.. لين ما انفتح المصعد وكان على الطابق مالنا...
بسرعه انا طلعت من المصعد لكني سمعت صوت الحرمه تقول لناصر..
الحرمه: ابويه هذا طابق كم؟
قال لها ناصر رقم طابقنا....
الحرمه: انزين انا ابا اسير الطابق السابع...
ناصر: احين بحط لج عالطابق السابع من ينفتح طلعي..
الحرمه: يزاك الله خير...
حط لها ناصر رقم الطابق وطلع عن المصعد وهو يخش ايده فمخباه يطلع مفاتيح الشقة اللي فصلهن عن مفاتيحه الثانيه...
مهرة: انته كيف تكلم الجن جي بقواه ويه ماتتروع...!!!..
بطل ناصر عينه يطالعني مندهش...
ناصر:...هاااه..؟!!..
مهرة: هذي هي نفسها السكنية اللي يتني امس...
نقع ناصر من الضحك وطنشني وفتح الباب ودخل... سكرت انا الباب وراي وانا اتبعه للصاله واراقبه وهو يفصخ سفرته وعقاله ...
مهرة: انته ليش تظحك..!!!!..
حط ناصر سفرته داخل العقال ومد ايده لي عشان امسكه...انا بدون ماحس مسكته له وانا اطالعه باستغراب...ليش يظحك على ؟... صدق هالعيوز هي نفسها السكنيه...!!!...ليش يظحك يوم اخاف..!!
مد ناصر ايده وفج معاقم كندورته لانه كان لابس كويتيه يومها...
ناصر: حليلها يامهرة جان هاي سكنيه...
مهرة: انته ليش جذي ماتصدقني..!!..
ناصر: مهرة العيايز يتشابهن...
مهرة: لا هي هذي السكنيه...
يلس ناصر عالكرسي ومسك الروموت يشغل التلفزيون وهو يظحك عليه..
ناصر: انزين ارتاحي العيوز قالت بتروح الطابع السابع يعني ماعندها زام في طابقنا اليوم...

تصاعدت الضحكه في داخلي غصبن عني لكني سكرت حلجي بالغصب عشان ماتطلع...
اتخيل السكن عندهم زامات..!!!...
ناصر: علقي العقال والسفره في الشماعه بليز...
انقهرت...!!
قمت فريت عليه عقاله وسفرته...
مسكها ناصر بسرعه...
ناصر: يالسباله السفره يديييييده....
صرخت فويهه...
مهرة: ماغيرك سباااااااااااااااااال.....
وكنت بشرد عنه لكن ناصر مسكني...
ناصر: تعالي تعالي....اصغر عيالج انا كل يوم تسبيني وتشردين... تعالي...
مسكني ناصر من اذني وسحبني...
مهرة: آي آي آي ...فجني يعورني..
ناصر: احسن.... شلي السفره..
مهرة: مابااااا....
مسك ناصر اذني بشكل اقوى وعورني اكثر...وانا اتويع اباه يفجني لكن السبال مب طايع...
ناصر: شليها اقولج لا اجلع اذنج...
مهرة: انزين انزين....
شليت السفره في ايدي...
ناصر: ربعيها مثل ماكانت وحطيها في العقال...

نفذت... وانا اتويع... قسم بالله لو يدري ابويه انه زاخني جي من اذني بيشخطه بعصااا...لكن حكم القوي عالظعيف... خلني اوصل بيتنا بشتكيلهم من معاملته لي....

سحبني ناصر مره ثانيه برا الصاله ومشينا في الممر...ماسحبني من ايدي مثل الناس....ساحبني من اذني جنه يعاقب ياهل...
ناصر: يوم اطلب منج طلب ثاني مره تنفذينه..وانا قلت علقي عقالي وسفرتي في الشماعه...وبتعلقينهن غصب...
مهرة: انزين فجنييييييي تعورني.....
ناصر: عشان تتادبين..شوفي أي حركه مقاومه بتعورج اذنج اكثر عشان جي امشي وياي بهدوء احسن لج...
مهرة: آآي ..انزين انزين...
وصلنا غرفة ناصر وانا ماسكه السفره والعقال في ايدي.... علقتهن مثل مايبغي...
مهرة: خلاص فجني...
بدل مايفجني ناصر...مسك ويهي بايديه الثنتين...وتقرب مني بسرعه وباس اذني بقو وبسرعه....
دزيته عني وانا اتنفس بقوو ومقهوره ومعصبه عليه..كان ودي اظربه...لكني كنت مشغوله بالم اذني اللي كنت افركها....
ومشغوله بحراره الجو.... اللي فجاه حسيت بها..!!..

ابتسم لي ناصر..وقال..
ناصر: سوري غناتي...بس ماتحمل حرمه تعاندني... روحي ارتاحي..ولج عليه اني اطبخ لج احلى عشا... بيض وطماط...
مهرة: خليته لك البيض والطماط...
ورحت لغرفتي وانا منزعجه بالقوو....
سكرت الباب وحاولت اقفله لكن القفل ظايع من امس...وانشغلت ومادورته...
يلست عالشبريه وانا مشغوله بنفسي...
ليش دوختني ريحة عطره..!!.. ليش حسيت بشي غريب يلفني يوم تقرب مني ناصر
لالا...
اكيد هذا كله من الاشمئزاز.... لاني مادانيه ولا احب لمسه لي...
فصخت عباتي وشيلتي وعلقتهم...وبديت افتش عن مفتاحي...
لكني ماحصلته...اخر شي طلعت من حجرتي ورحت حجره ناصر..ماحصلته هناك... تذكرت انه يبا يسوي عشا...فرحت للمطبخ...وفعلا كان هناك يفتش في الثلاجه...
لابس شورت اسود... وتي شيرت احمر مكتوب عليه كلام بالابيض عالصدر... يوم شافني واقفه عند باب المطبخ اعتدل في وقفته واطالعني من فوق لتحت...
ناصر: مابدلتي ثيابج..!!
مهرة: كنت ادور....
ناصر: ادورين شو؟!..
حطيت ايدي على خصري وقلت له بلهجة ممطوطه..
مهرة: مفتاااااااااحي....
ابتسم ناصر...
ورد يفتش في الثلاجه...
ناصر: ماحصلتيه؟
مهرة: اونك ماتدري وين المفتاح؟!
ناصر: وحتى لو ادري...مابقولج وينه الا يوم تستوين مؤدبه وياي...
مهرة: ماتساهل حد يعاملك بادب...
ناصر: وانتي ماتستاهلين اني اعطيج مفتاح الحجره...كيفي شقتي كيييييفي....
مهرة: ترا هالتصرف تصرف يهاااال....
ناصر: هههههههههههههه اكيد بتكون عندج خبره بتصرفات اليهال....
مهرة : شو قصدك؟
ناصر: قصدي واضح.... لانه تصرفاتج كلها تصرفات يهال ماتقولون عمرج عشرين سنه...

مهرة: مايخصك انته بتصرفاتي....وعطني مفتاحي لو سمحت...
ناصر: مابعطيج اياه...
مهرة : عيل....عيل بسرق مفتاح حجرتك...
ظحك ناصر بسخرية على تهديدي التافه....
ناصر: من متى انا اقفل عنج؟... انا اتعمد اخلي بابي مشرع لج ...
مهرة: وليش؟
ناصر: عشان متى ماظربج فضول تفتشين في اغراضي تحصلين الدرب سالك...
مهرة: وليش افتش باغراضك ان شاء الله..!!..
ناصر: الانسان يوم يحب انسان ثاني يتحمس يفتش باغراضه...
شهقت انا وفجيت حلجي...وتم ناصر يظحك على شكلي..
اما انا انقهرت...
مهرة: تقدر تقفل حجرتك واطلع هالفكره من بالك لاني ابدا ابدا ابدا مابحبك....
ناصر: "ابدا" وقت طويل وايد مهرة..شو رايج تبدلين ثيابج وتين تساعديني..
مهرة: مابااا... بروح اشوف المسلسل لاني من خذتك وانا يفوتني....
اللي قهرني ان ناصر مازال يتبسم...
خليته مقهوره ورحت لغرفتي ... دورت بين ثياب النوم لبس للنوم مريح وساتر ماحصلت..اغلبهن كشفات غصبوني اني اشتريهن ..شيخه وعفرا... على اساس اني عروس اون....
بالتالي ماكان عندي شي البسه ويريحني غير بجامات البنطلوون والقميص الحرير المفضلات عندي...لانهن وساع..مريحات..وساترات... اخترت وحده لونها احمر وبيج... بدون قصد...ماكنت ناويه اطقم ويا ناصر بقميصه الاحمر...وما انتبهت انه نفس اللون الا يوم اطالعني ناصر وهو رافع حواجبه واطالع قميصه بعد..كتلميح واضح لتشابه الالوان....
حست بوزي وطنشته ومسكت الروموت ادور القناة اللي اتابع فيها المسلسل الخليجي...
ويوم كنت مندمجه في المسلسل رجع ناصر من المطبخ ويلس عدالي بثقة ...
ناصر: مهرة...
مهرة: اوفف..شوو...
ناصر: شو رايج بريحه الشياط والبصل...!!!
وتقرب مني اكثر...
مهرة: مثل ويهك...
ناصر: آآه يعني حلوه...خلاص عيل مابتسبح...
انقهرت واطالعته بطرف عيني....
ناصر: هههههه خلاص بقوم... متى يخلص مسلسلج..؟!
مهرة: بعده ثلث ساعه...
ناصر: يمديلي اتسبح....
قام ناصر ودخل الحمام عشان يتسبح بينما انا كملت مسلسلي....
ياسلام علينا من معاريس..
الريل يطبخ والحرمه اطالع المسلسل..... عاكسين الادوار..لكن خله..يستاهل...!!
رفعت ايدي افرك اذني مرة ثانيه ...بعدها تعورني....
الله يخسه مسكته قويه...!!!
---------------------------------
اليوم: الاحد..
المكان: بيت خلفان..
الوقت: التاسعه والنصف مساءا...
---------------------------------
(سهيل)....
دخلت بيتنا وحصلت في الصاله ابويه مع عمتي يالسين...
سهيل: السلام عليكم...
بو حمد + آمنه: وعليكم السلام والرحمه...
يلست عندهم لاني شميت ريحة "كلمة راس".. وبما اني ماعرف علوم البيت من كم يوم قلت اقعد عندهم اشوف شو عندهم من السوالف...
سهيل: شو امسيتو...
بو حمد: الحمد لله..انته من وين ياي؟..
سهيل: مبوني في الصناعية عقب سرت عند ربعي في ميلس الـ(....)... ليش؟
بو حمد: ماشي.. اشوفك لحقت اخوك حمد ماتنشافون في البيت... مبونك اعتدلت شوي بس رديت اختربت..
حست بوزي انا متظايج...وكاني مب ملاحظ يعني..!!!..
الانسان تيه حالات يطفر من اهله ومن نفسه ومن كل شي.... ليش مايقدرون هالشي.؟!..
سهيل: ليش شو مستوي عندكم؟!
بو حمد: اما انتوا شباب اليوم صدق غير شكل..يعني لازم تستوي مصايب في بيتكم عشات تتيمعون؟..
سهيل: انزين ابويه انا اشوفكم كل يوم..!
بو حمد: مانشوفك غير وانته طالع وانته راد...قعده مثل الناس ماتقعد...
سهيل: انزين تراني يالس وياكم احينه....
طنشني ابويه وصد صوب التلفزيون..
سهيل: وين شويخ؟!
آمنه: احيدها فوق فحجرتها...
سهيل: وقوم حمد هنيه؟..
امنه: لا طالعين يتمشون...
ابتسمت انا بسخرية...
سبحان مغير الاحوال... يوم نكون انا وشويخ سمنه على عسل كان حمد متمشكل مع حرمته...
وانا انا وحرمتي في حاله ركود...وهو طالع يتمشى مع حرمته..!!!
يالله... الله يهنيهم...
سهيل: وعلومج انتي العروس؟
ابتسمت عموه...
آمنه: علومي زينه...
بو حمد: عمتك مينونه...
سهيل: جي شوفيها؟!
بو حمد: تقول تبا تكنسل العرس ... ومب مرتاحه اون..
سهيل: افااا...ليش عمووه شياج؟
آمنه: والله يا سهيل بقولك الصدق...انا لو خوفي اني اكون ثقيله عليكم انته واخوانك عقب كم سنه ماوافقت على هالعرس..والا انا وين والعرس وين؟...
سهيل: شو هالرمسه عمووه..اولا انتي عمرج مابتكونين ثقيله علينا... ثانيا خالي ريال زين وبيداريج...ثالثا نحن نباج تعيشين حياتج دام يتج الفرصه لين عندج انج تيبين لج ولد والا بنت ينفعونج فحياتج... ترا ماشي يعوض عن لعيال....
آمنه: والله مادري...
سهيل: انتي توكلي على الله... يعني عايبتنج حياتج هذي؟
آمنه: افا يا سهيل.. تراني بين اهلي معززه مكرمه شو ناقصني..؟
سهيل: ناقصنج الاستقرار...ناقصنج لعيال...ناقصنج تشاركين انسان حياتج غير عن اخوج وعيال اخوج...نحن بنتم لج دوم صح لكن مانعوضج عن الزواج والريل والعيال...!!
آمنه: بس انا كبرت..عمري 43 سنه الحين....
سهيل: اكبر عنج وبعدهن اييبن عيال انتي بس مكبره عمرج...
تنهدت عموه وسكتت...
سهيل: ابويه احين شو بخصوص القسم اللي بنبنيه ورا؟..
بوحمد: مادري... ليش ماينزل حمد تحت وياخذ حجرة عمته عقب ماتعرس وبنضم له غرفة الضيوف والصاله الصغيره...؟ وانته خذ قسمه وبنضم له زياده غرفتك.... وغرفة سيف ومهرة بيتمن لسيف......
آمنه: شقايل يابو حمد بتضم الصالة الصغيره لحمد..مايوزوون عنها يوم ايهم ظيوف والا شي يحتاجونها...
بو حمد: خلاص بنوسع لحمد من ورا بنبني له صاله وغرفه زياده...والقسم الفوقي مثل ماخبرتك...
سهيل: هممم انا ماعندي مانع...بس ان يبنا عيال عقب بنتم الا نوسع ونوسع.؟!
اطالعني ابويه بنص عين منقهر...
بو حمد: انته قول تبا تطلع من البيت وخلاص...
سهيل: لا والله يابويه ماقصدت جي..
بو حمد: يابوي اللي يبا يطلع يطلع انا مابمسك حد عندي لكن بيتي مابظهر عنه...تحملوا شوي ويوم بموت سووا اللي فخواطركم...
سهيل: افا يابويه شو هالرمسه الله يطول بعمرك ونحن بيت انته مب فيه مابنسكنه...خلاص سوا اللي تشوفه مناسب ونحن مستعدين...
سكت ابويه وانا وعموه نطالع بعض مب ياسرين نتكلم..عشان جي بعد دقيقه يا صوتي واطي...
سهيل: متى بتحطون العشا...؟
آمنه: متى مابغيتوا...
سهيل: وينه سواف؟
آمنه يحوط كالعاده..
سهيل: هذا يبا يفجج راسه قبل مايسافر... المهم انا بسير فوق شوي وبرد عشان اتعشى ويا ابويه..
نشيت فوق وسرت عند شويخ...
كانت شويخ فاتحه شعرها وتسحيه...
صدت صوبي وابتسمت..
شيخه: هلا..
سهيل: هلا شويخ.... شوتسوين؟
شيخه: توني متسبحه... متى ييت؟
سهيل: من شويه كنت يالس عند ابويه...طبعا مايفوت فرصه يسمعني رمسات سم...
ابتسمت شيخه بتعاطف...
شيخه: انزين ليش ماتسوي اللي يرضي عمي...ليش دوم معصب عليكم ؟..ولا واحد منكم مفرحنه..
سهيل: هوو دوم جي ماتعرفينه انتي.... بروحه يدور شي ينرفز به ويسويه مشكله...
شيخه: حرام عليكم عمي وايد طيب... ووحيد...اكيد يباكم حواليه...
سهيل: اففف..جي نحن هب فاظين ورانا اشغال ومشاغل ..دوم بنقعد مجابلينه؟..تراني يلست عنده توني طفرني من المهازب.... كيف الواحد يقعد عنده هذا...!!..
سكتت عني شيخه وردت تسحي شعرها...
شيخه بعد احسها زعلانه مني لسبب مجهول...
ومب عارف كيف ارضيها...
فجاه قالت لي شيخه...
شيخه: سهيل...
سهيل: عونج...
نزلت شيخه راسها وهي تلعب بظروس المشط...
شيخه: ماتروم تاخذ اجازه اسبوع؟!
عقدت انا حياتي...
سهيل: اسبوع.؟. ليش؟
شيخه: نبا نطلع نغير جو...
سهيل: نطلع وين؟ عرس عموه وخالي الخميس الياي وتبينا نحوط؟!
حاست شيخه بوزها...
شيخه: خلاص ماريد شي....نقعد في البيت احسن...
سهيل: شيخه... لا تقعدين تتزعلين على اسباب تافهه... هالفتره مانروم نطلع يمكن عقب عرس خالي نقدر..
شيخه: عقب عرس خالي بيسافر سيف..وعمتك بتطلع من البيت..منو بيتم فيه؟!!..نخلي البيت خلي ونطلع؟!..
سهيل: انزين شو تبينا نسوي يعني؟!..
شيخه: مانسوي شي.. خلاص نقعد هني... احسن...
سهيل: اففف..انتي من اول تبين تسوين مشكله....
شيخه: سهيل.... انته ماقمت تحبني صح..!!
رفعت راسي واطالعت شيخه...بصدمه....!!!
جاده هذي..!!!!..
سهيل: شويخ...انتي شو تقولين؟؟!!..
شيخه: انا سالتك...لانه تصرفاتك صايره بارده معاي... مب انته سهيل الاولي...
سهيل: شو تغير فيني يعني.؟؟.. ليش هو زر اهوس عليه متى مابغيت احبج ومتى مابغيت لاء..!! شيخه فكري بالكلام قبل ماتقولينه لا تجرحين الناس عالفاظي...!!
شيخه: وانا احين جرحتك؟
سهيل: شو رايج انتي..!!!...
نزلت شيخه عيونها للارض وتنهدت...
شيخه: مب قصدي...بس سهيل...تصرفاتك تجرح اكثر..
سهيل: انتي تبيني رومانسي 24 ساعه....بس الواحد يتعب من الرومانسية شيخه مب دوم الواحد باله فاظي لهالسوالف...ومب شرط اني اذا في يوم ماتغزلت فيج معناته هاليوم صرت ماحبج.. الحب في القلب مب دايما يطلع...
شيخه: انزين خبرني شو اللي مظايقنك وشاغل بالك..؟!.
سهيل: اصبري عليه شوي... انا احس جبدي لايعه من كل شي...
شيخه: حتى مني انا؟!!!!!!!!!..
تنرفزت...وصرخت عليها...
سهيل: ياشيخه افهميني...افهمي الكلام اللي اقوله.... حالتي مايخصها بحد انا جذي بروحي تيني حالات ماداني اجابل فيها حد....
شيخه: انزين لا تصارخ.... شي يعورك؟
سهيل: لا...
يلست عالشبريه وانسدحت وانا اتنهد اهدي نفسي...
شيخه: مهرة تسلم عليك...
بطلت عيوني مستغربه....مهرة؟!!!.. يلست على طول عالشبريه..
سهيل: كلمتوها؟
شيخه: لا... شافها سيف...
سهيل: وين شافها؟
شيخه: فبوظبي...
سهيل: شو مودنه بوظبي ؟ __DEFINE_LIKE_SHARE__

رهيفة القلوب · 07-06-2011, 01:13 AM

شيخه: تراه سار يوم عرف انه مهرة مريضه...
صرخت عليها مره ثانيه..
سهيل: مهرة مريضه؟!!!.. شو تقولين انتي رمسي زين....
سكتت شيخه...
تلفتت شوي حواليها.... اخر شي مسكت قوطي الكلينكس اللي كان عالتواليت وفرتني به..
شيخه: كلمني عدل والا مابكلمك.... شو هذا كله تفاتن عليه اصغر عيالك انا....؟!!!!!..
ابتسمت وانا امسك قوطي الكلينكس اللي ماصابني...
سهيل: سوري...يالله قولي السالفه من اول...
شيخه: اتصل سيف بناصر وهذاك قال له انه مهرة يوم الجمعه تسبحت في البحر ودقتها المهب واصبحت يوم السبت مريضه...سيف يوم سمع هالاخبار قال لازم يروح يشوفها...سار وقعد عندهم ساعه جي ورد..
سهيل : ماوضحتي مريضه شو فيها حمى يعني؟
شيخه: هي حمى... ماندريبها اليوم بخير والا لا...
سهيل: والعثره... اول ماعرست مرضت شو هالحظ؟!..
شيخه: انا حاسه انك بترد على ناصر السبب...
سهيل: هيه برد عليه شحقه يخليها تتسبح في البحر وتبرد...
هزت شيخه راسها بابتسامه...
شيخه: اسميكم خوان متحيزين لاختكم... المشكله ماطلع اهتمامكم فيها الا يوم طلعت عنكم....مسكين ناصر هو شو دراه فيها اونه يبا يونسها تقومون تردون عليه؟
سهيل: يباله بعده كم توصية... مهرة ياهل وماتفكر زين...
شيخه: سهيل لا تدخلون بين الريال وحرمته خلوه يتفاهم وياها على راحته... لا تعطون مهرة مجال انها ترجع لكم في اقل مشكله ..خلوهم يتفاهمون ويحلون مشاكلهم بروحهم اذا فيه مشاكل يعني...
سهيل: يعني ماتبينا ندافع عن اختنا....!!
شيخه: دافعوا عنها في شي جايد مب من اقل شي تنطون فحلج الريال خلوه يتنفس....خلاص مهرة متزوجه احين ....
سهيل: همممممممممممم الله كريم.... المهم انتي خلصي سحاي وخلينا ننزل نتعشى ترا قوم حمد محد...
شيخه: ان شاء الله....
بدلت كندورتي ولبست بجامه ونزلت تحت اتعشى...
والا مهرة مريضه..؟!!...
ماعليه باجر بدق لها...وبنشوف كيف عايشه مع ناصر....
--------------------------------------------------
اليوم: الاثنين...
المكان: شقة ناصر..
الوقت: الرابعه فجرا...
--------------------------------------------------
( ناصر)....

نشيت من رقادي على صوت المنبه...سكرته وقمت... طلعت من غرفتي وانا افرك عيني...
اول ماطلعت من غرفتي صدمني الليت المنبعث من حجرة مهرة والباب بعد كان مفتوح...!!
فكرت اروح اشوفها...
لكني تراجعت عن الفكره..... بعد ماتذكرت اتهامها لي امس باني اتحين الفرص عشان المسها...!!!
دخلت الحمام تغسلت وتوظيت... لبست ثياب نظيفه استعدادا لصلاة الفجر....
بس بعده شي وقت عن الصلاة حوالي نص ساعه...
قررت اقرا قرآن لين الصلاة... تقريبا ماقريت من اسبوع ونص.... وانا من التزمت تعودت اقرا بشكل شبه يومي الحمد لله قبل صلاة الفجر....
طلعت من غرفتي بهدوء ...وانا اتلفت كل شوي لغرفة مهرة..ماعرف هيه داخلها والا برا..!! اذا برا وين بتروح..!!.. اظني انها رقدت ونسيت الليت مفتوح....
خليتها ورحت الصالة وللمكتبه على طول وين تعودت احط المصحف...
دورته...لكني ماحصلته...
دورته في السدات وكل مكان بعد ماكان له اثر...
رجعت غرفتي ادوره...
نفس النتيجه...
اعتدلت فوقفتي والتفت لغرفة مهرة...
مافي مجال يعني لازم ادخل غرفتها....
تنهدت واتجهت لها وانا امشي بهدوء...
الباب كان مفتوح اصلا..
دقيت دق خفيف جدا عالباب...بحيث اذا كانت واعيه تسمعه..واذا كانت نايمه مايزعجها الدق لانه مب قوي..
لكنها اكيد راقده لانها ماسمعته....
دخلت راسي..
والمنظر اللي شفته...ذوب قلبي..!!
خلاني ابتسم بعطف وحنان غصبن عني.....
حتى اللي قلبه صخر... بيضعف يوم بيشوف هالمنظر...
مهرة كانت شبه يالسه عالشبريه...متسانده عالمخدات وراها....
حاظنه المصحف لصدرها ونايمه...
اكيد كانت خايفه من سكنيتها مره ثانيه... اكيد خافت انها تطلع لها...وكبرياء هالطفله منعها من انها تلجا لي مثل امس...!!..
ابتسمت...
وتقربت منها... مديت ايدي بهدوء وبكل لطف مسكت المصحف وحطيته عالطاوله...
وسحبت اللحاف وغطيتها...طلعت وبندت الليت لكني خليت الباب مفتوح وليت الممر ممشغل عشان مهرة ماتخاف من الظلمه...
خذت المصحف معاي ورجعت غرفتي..فرشت السياده وصليت ركعتين ...وبعدها قعدت اقرا قرآن..بصوت مسموع..!!
كالعاده ابذل جهدي بالاندماج بآيات الله... واحاول اتفكر فمعانيهن..وقد ماقدر احاول استذكر اصول التجويد مثل ماعلمونا في المسيد يوم كنا صغار..كان ابوي يدخلنا عشان نقرا ونتعلم القرآن ثلاث مرات في الاسبوع في وقت العصر...
شوي شوي ..نسيت اللي حوالي ماعدا المصحف اللي جدامي... وحسيت بهدوء يلفني...تفاؤل....حسيت اني اقدر اتنفس بسهوله...
مش مبالغه....لكن فعلا اللي يتعود عالقرايه وبعدها يبتعد عنها يحس شي ناقصه.... كاني مريض نسيت اكل دواي....!
بعد ماخلصت قرايه...لاحظت ان الوقت قرب عالصلاة خلاص... سكرت المصحف وقمت عشان ارجعه مكانه عدال مهرة دامها اطمنت لوجوده عدالها... خلاص بيتم عدال راسها وانا بشتري لي مصحف ثاني...
لفيت السياده وقمت وبايدي المصحف...انصدمت بمهرة متسانده على باب غرفتي...لافه يديها حوالي جسمها كانها بردانه...وتتامل فيني..!!!
لاحظت هي ردة فعلي المتفاجئه...قامت انتبهت من سرحانها وتوترت هي بعد..!!
استغربت... شو الي موقفنها هني؟
من متى هي واقفه عالباب؟!!
وليش؟
وهل صوتي وعاها من نومها؟..والا لاني لحفتها قامت هي انتبهت وقامت؟!!
تميت دقيقه اطالها...وهي اطالعني...
مالاحظت أي عدوانية على ويهها....لاحظت فضول..!!
ناصر: ازعجتج بقرايتي؟!!!...
هزت مهرة راسها بالنفي... وبعدها قالت بهدوء..
مهرة: حد ينزعج من قراية القرآن..!!..
قمت من مكاني وانا ماسك المصحف....
تقربت منها خطوتين..بهدوء..وببطئ...
بالكاد هي انتبهت لحركتي...كنت احسها ما اطالعني انا...لكنها تخترقني واطالع في داخلي...!!..
ناصر: تبين..تبين تقرين؟!..
ومديت لها المصحف...
ترددت مهرة شوي وهي اطالع ايدي وعيوني...بعدها هزت راسها بالموافقه وخذت المصحف...وحظنته مره ثانيه...
ناصر: شي يعورج؟
هزت مهرة راسها بالنفي مره ثانيه وهي اطالعني بنظره غريبه...
ناصر: شفيج مهرة؟
مهرة: ماشي...
كنت بقعد اسالها بعدني عشان اشوف شو سالفتها وشوفيها بهالحاله...!!
لكن الصلاة...!
ناصر: انا بسير احين اصلي...
لاحظت توتر نظره مهرة وارتجاف شفايفها....
ناصر: تخافين؟
مهرة:......هــ....هــي...!
ابتسمت ابتسامه خفيفه...
ناصر: المصحف بحظنج وتخافين؟... دامه فايدج لاتخافين من أي شي ولا أي حد...
رفعت مهرة نظرها لي اطالعني بسكوت....
بدون شعور مني وباندفاع غريب رفعت ايدي...ومسحت على شعرها الناعم...حركه خلت مهرة تنزل عيونها وراسها...
شجعتني هالحركه اكثر...قمت بستها على راسها...
وتركتها ورحت ....
قبل ما اطلع من الشقة قعدت افكر اذا لمستي لمهرة تنقض وضوئي...لكني تذكرت انها لمسة بريئه وما اثرت فيني بالتالي ماتنقض الوضوء...
فتحت الباب ونزلت للمسيد اصلي الفجر....
----------------------------------------
اليوم: الاثنين...
المكان: شقة ناصر..
الوقت: الخامسه الا ربع فجرا..
----------------------------------------
(مهرة)...

حظنت المصحف اكثر وانا اطالع باب الشقة المسكر بعد ناصر...
خلني اكون حيادية....
قراية ناصر كانت....كانت..... مريحة للاعصاب..!!
ما اقول انه ينافس المطاوعه في قرايتهم وغيره...
لكن...مادري.... حسيته يقرا من الخاطر....!!
وهذا اللي مخلي اطرافي تتجمد ولساني ينشل...
كيف لانسان مثل هذا...انسان مثل ناصر...شفت الشيطان بويهه....! انه يقرا بهالصوره ؟!!!..
كيف يقدر ينسا كل شي وقت قرايته حتى لدرجه انه ما انتبه لوجودي وراه....
معقوله يكون مثل ماقال... اهتدى وتغير؟!!!....
لا...
يمكن تكون حيله منه...يمكن تعمد يسمعني صوته وهو يقرا....عشان احن عليه..!!!!
بس اذا كان يمثل...بيقدر يقرا بهالصوره يا ترى؟!!!...
انزين لمسته....الحنان في بوسته..!!.. معقوله تمثيل؟!!
انزين اتركوا كل هذا على جنب...
لو ماكان ناصر يقرا باندماج ومن خاطره...لو ماكانت نيته خالصه لسبحانه....هل بيطلع هالنور الغريب في ويهه..!!!!!!!...
لا مستحيل...مستحيل....

حظنت المصحف اكثر وانا اتراجع لغرفتي....
قربت اصيح من الياس...مب عارفه بشو افكر...
كل اللي تمنيته من ربي انه يساعدني ويفتح عقلي....ماريد انخدع وانغش كالعاده...ابا اكون ذكية وماحد يقدر يقص علي لا ناصر ولا امثاله.....!
ابا احكم عالناس بعقلانية ويطلع حكمي صحيح....
ماريد برائتي تستغل مره ثانيه.....
حطيت المصحف عالشبريه ودخلت اتوظى...صليت الفجر وقعدت اقرا قرآن...
قرايتي انا غير عن ناصر...انا اقرا بصوت واطي ماعرف اقرا بصوت عالي مثله....
عشان جي ..لهدوء الشقة ..سمعت صوت ناصر وهو يرجع...حسيت به وهوواقف عند بابي...وحسيت به بعد وهو يتركني ويروح....
كملت قرايتي.... وبعد ماخلصت سكرت المصحف...لفيت السياده والشيله ...شليت المصحف وطلعت من الغرفه...
بتردد واضح دخلت غرفة ناصر بس ماكان هناك...
بالتالي رحت المطبخ...وماكان هناك بعد... اكيد انه في الصالة...
رجعت قصتي الطويله ورا اذني من جهة ويهي اليمين وتركت اليسار مثل ماهي...
كان ناصر واقف عند الدريشه ويطالع تحت...
مهرة: شو اطالع..؟!
فز ناصر والتفت لي... تم نص دقيقه يطالعني واخر شي جاوب..
ناصر: حادث مستوي تحت...!
شهقت انا وتقربت منه اطالع اللي يطالعه... لز لي ناصر شوي عشان يسوي لي مكان اشوف معاه..
مهرة: حد ياه شي؟
سالته وانا اطالع تحت عند السيارات والشرطه المتجمعه...
ناصر: اثنينه مداعمين ودوهم المستشفى.. مادري شو صار فيهم...واحين يبون يحركون السيارات عن الدرب لانهن سادات الطريج....
مهرة: مساكين... آآه... هذا مصحفك...!
اطالع ناصر المصحف وابتسمت...
ناصر: خليه عندج...(وتراجع وقعد عالكرسي)....بشتري غيره...
مارفضت الاقتراح هذا ورديت احظن المصحف...يلست على كرسي ثاني...منفصل...
ناصر: ليش مارديتي ترقدين؟!..
مهرة: مافيني رقاد...وليش انته مارقدت؟
ناصر: احس اني شبعت رقاد...
مسك ناصر الروموت وشغل التلفزيوون... اطالعته بطرف عيني... ليش ناصر هادي؟!..
بالعاده يتحرش فيني....
ليش انا هادية؟..بالعاده بعد اني ارد عليه بوقاحه..!!...
تنهدت وانا اتامل في جانب ويهه الصارم......
لحيته المرتبه... شعره اللي طويل شوي من جدام بمقدار نص صبع ومن ورا قصير...طوله عادي يعني...
كل شي فيه عادي ومعتدل...
طوله معتدل...وزنه معتدل... مافيه شي زايد عن الحد.... شو اللي خلا هالانسان يفكر بانه حلو ويغتر بجماله؟!!..
يمكن حركاته هي اللي تحليه عند الناس...!!..عشان جي انا ماشفت هالشي؟..لاني ماحبه..!!واحتقره..!!

باندفاع مفاجئ..يتني رغبه باني اعرف كل شي عنه....واعرف كل ملابسات قضيتنا...
مهرة: ناصر...!
التفت لي ناصر وهو رافع حواجبه شوي...كسؤال صامت...
مهرة: انا هادية...ومستعده اسمعك...!
فهم علي ناصر... تنهد وحط الروموت عالطاوله جدامه...
بعد التامل فويهه حسيته خايف....
وبعد دقيقه رفع راسه وقال..
ناصر: شرط تسمعيني للاخر.. لا تقاطعيني....
مهرة: اوكي...
تنهد ناصر مره ثانيه...
نزل راسه وشبك صبوعه مع بعض... كل شي فيه يبيّـن عالتوتر...
من شو متوتر؟..تراني حرمته وخلاص.... ليش يخاف من ردة فعلي ...النتيجه هي نفسها لانه الفاس طاح في الراس...!!!
ناصر: انا... مهرة انا كنت...اقصد..ماكنت من قبل مثل ما انتي شفتيني.... شوفي...انا قبل ما ابدا دوامي هني في بوظبي كنت شاب طبيعي... ماقولج اني كنت سيده وماعندي حركات وغيره..لا..كنت طايش حالي حال الشباب...بس عاد مب واااايد يعني شوي...يوم ييت هني فبوظبي واستقريت... قمت اعاني من الفضاوه... قبل كنت يوميا ساير راد للعين بس ماوبلت البترول ولا الخطوط...اخر شي استقريت هني على اساس اخر الاسبوع ارد لاهلي...لكن خلال الاسبوع هذا حوالي خمس ايام شو اسوي فيهن؟؟...

نش ناصر من كرسيه وتقرب مني باندفاع ويلس عدالي...شكله مب حاس بعمره بس يبا يوصل لي كلامه باي شكل وباي طريقه...
ناصر: تعرفت بالصدفه على مجموعه شباب...شفت فيهم ظالتي..عوضوني عن ربعي المخرش في العين... بس هذيلا كانوا اكثر...ماكانوا كلهم من بوظبي...كانوا من مناطق مختلفه حالهم من حالي يعانون من الفضاوه... تيمعوا رباعه وانا منهم... الخلاصه ان هالربع سحبوني وياهم في دوامه مايعلم بها غير ربنا...كيف اقنعوني شوي شوي ادخل في جوهم..! كانوا اذكيا... يرغبوني في الشي اللي يسوونه ...يخلوني اسويه بكل ارادتي...مايغصبوني على شي... عشان في النهاية مايطيح اللوم على حد اذا صارت مشكله....
كان ناصر كل مايتقدم بالكلام اكثر كان خوفي يزيد... قلت له بانفعال وقلبي يدق بسرعه..
مهرة: مخدرات.؟!!!!!!!!!!!....
ناصر: هاه؟؟..لالالالا هب مخدرات الحمد لله....ماوصلت لهالحاله...
مهرة: عيل شو تقصد..؟!

حاس ناصر بوزه ونزل عينه كانه مستحي من اللي بيقوله...
ناصر: بنات.. حفلات مختلطه...غنا ودق اربع وعشرين ساعه...وو...
مهرة: وشووووو..؟!!..
كان الاشمئزاز واصل حده عندي....كنت اعرف ان ناصر من هالنوع...كنت اعرف....
ماكنت اتوقع شو بعد بيقول لي لين مانطق بها...
ناصر: وشرب....
سكت..
لكن مب لوقت طويل...
مهرة: شرب؟!!.
ناصر: خمر...
شهقت وانا مصدومه..قمت من كرسيه وتراجعت بعيد عنه....
مهرة: خمر...!!!!!.... ناصر كنت تشرب خمر...!!!!!...
قام ناصر معاي ومسك ايدي وانا اسحبها واتراجع بس كالعاده....ماشي فايده من مقاومتي...
ناصر: مهرة انا صح كنت اشرب...صح كنت صايع وراعي بنات واشياء حرام يعني... بس انا خلاص تبت.... تبت والله اني تبت..... وانتي قلتي مابتقاطعيني وبتسمعيني خليني اكمل لج....
مهرة: شو بتقول بعد؟؟؟...كله ولا الخمر ناصر كله ولا الخمر....
ناصر: والله انه ماطاح حلجي من شفتج يامهرة والله....سمعيني...
سكت...بعد ماحسيت بالدموع تمشي على خدي من دون ماعرف اني اذرفها.....
خمر..!!!!.
ناصر: مهرة في اليوم اللي تحرشت بج فيه كنت توني ياي من بوظبي كان يوم الاربعا اذا تذكرين..وكنت ولهان على اهلي ماشفتهم من اسبوعين...وتعبان ماسك خط ومب راقد ذيج الليله..اول ماوصلت طرشني ابويه صوبكم قلت له بعدين بسير او طرش حد ثاني بس ماطاع وتنازعت وياه....في الدرب شفت غرشة الخمر وشربت منها شوي عشان اخفف الظيجه اللي فيني.....
انا هني شعر يمبي وقف.... حسيت بالبرد....
ناصر كان سكران..!!!!!!..
ناصر: فهمتي مهرة؟!!... هذا اللي خلاني مب على طبيعتي معاج...عيبتيني اول ماشفتج...بس رده الفعل في هالحالات تكون مضاعفه ... لو كنت صاحي ماكنت سويت شي لاني مهما كان احشم بنات العرب.... وابوج ربيعه ابويه...لكن دام اني كنت سكران طبيعي مابهتم لهالامور وبتبع اللي يمليه علي الشيطان....
قلت له بارتجاف....
مهرة: ما..ماكانت....ماكانت فيك ريحه خمر.....!!!
ناصر: هيه..لاني تعطرت وايد قبل ما انزل خفت حد يشمها فيني...وانا ماكنت سكران زود بحيث اني كنت اترنح وانا امشي او اهذي....لكن راسي كان مفتررر ...وما افكر باللي اسويه...هذا اللي اقصده لج باني ماكنت على طبيعتي... عيبتيني وسويت اللي سويته...لكني انتبهت لنفسي وتركتج... طلعت من بيتكم وانا في حاله مايعلمها غير الله.... مادريت بعمري الا وانا في البر... والله ماقص عليج يامهرة اني قربت اتخبل وافقد عقلي بسبب اللي سويته لانه عمري مافكرت اسويه اصلا...رغم كثرة البنات حوالي حتى الخايسات منهن ما اتقرب من وحده الا برضاها....فمابالك ببنات العرب..!!!...

حرقتني نظره عينه اليائسه اللي تطلب مني التصديق والتعاون... نزلت عيوني عنه عشان ما اواجهه وسكت..
ماعرف بشو افكر...
صدمات صدمات صدمات....!!..
ماعرف بشو افكر...!
تركني ناصر ويلس عالكرسي يتنهد باسف وهو يتذكر ذاك اليوم....
ناصر: في البر نزلت من السياره كاره عمري وكاره حياتي..مسكت غرشة الخمر وكسرتها في الشارع ودست عليها بغيظ... وقررت ساعتها اني خلاص ابتعد عن هالدرب...استهتاري وصلني للي وصلت له وياج.... اذا تماديت اكثر شو بيصير؟!!... في درب الرجعه سويت حادث انجلبت بي السياره ...ماتعورت وايد بس ظربه فراسي...لكني حمدت ربي عالسلامه والله مايضرب بعصا... من يومها.. قطعت كل علاقاتي مع البنات...ربع السوء هذيلا ودرتهم.... ورابعت بدالهم مطاوعه...اصلحت ديني...لكني ما اصلحت ضميري...عشان جي من يومها وانتي شغلي الشاغل...صرت مهووس فيج... ادورج في كل وحده اشوفها.... وصل بي الياس اني اقوم من فراشي نص الليل هني في بوظبي وامسك خط العين بس عشان اشوفج....والفجر طلعت من البيت اترصد بيتكم...وشفتج هناك في الجامعه...وين طاح عند الدفتر...تذكرين؟!...

قام ناصر من كرسيه وتوجه للمكتبه لدرج معين فتش فيه وطلع لي دفتري الاصفر المالوف....
وعطاني اياه...
مهرة: بعدك محتفظ فيه؟!!...
ناصر: حفظت كل كلمه انكتبت فيه.... من هالدفتر عرفت بعض الاشياء عنج...عمرج واسمج...وانج تحبين الاشعار الحزينه...!... الدفتر هذا كان يهدي نفسي اللي تدورج مهرة... عرفت اني مابقدر اكلمج او اعتذر لج بسبب المجتمع والظروف... كل ماكان عقلي يخف عليه واتخبل اطلع هالدفتر عشان اهدي نفسي به.... كان عندي امل ارجعه لج فيوم من الايام....
ابتسم ناصر...
اطالعني بنظره غريبه.....وانااطالع دفتري واطالعه....
معقول كل اللي قاعد يقوله هذا....!!!..
مهرة: بس مرت سنه كامله تقريبا....
ناصر: كان عندي امل مستعد اتريا العمر كله عشان احقق حلمي...باني اعتذرلج وافهمج موقفي وتسامحيني...

مسكني ناصر من ايدي وسحبني عشان اقعد معاه عالكرسي.....الغريب اني ماقاومت..
كنت مذهوله من كل شي يصير معاي...
ناصر: مهرة.. وقسم بالله اني ندمان..مستعد اعطيج عمري كله لو بايدي والله مب كلام...انا اعنيه...مستعد اقدمه لج اذا بتسامحيني... الله كتبج لي..كتبج من نصيبي.. وانا احاول قد ماقدر اني اعوضج ...وباذل جهدي عشان اسعدج بس ابا فرصه مهرة... اذا خيبت ظنج سوي اللي تبينه...بس عطيني فرصه...

ماقدرت اتحمل اسمع ريال بكل كبريائه وعنفوانه وغروره وثقته بنفسه يترجاني بهالاسلوب....
نزلت دموعي مره ثانيه..
مهرة: انته شو تطلب مني...
ناصر: اطلب منج تنسين...
مهرة: ماقدر ناصر ماقدر...
ناصر: تقدرين... بالله عليج مهرة...اطالعينيي... شوفي ويهي..تشوفين فيه شي يشبه الويه اللي شفتيه اول مره؟!!..

تاملت ويهه....مادري بشو اجاوب....الصراحه الاختلاف واضح لكن الشخص هو نفسه....!!!
مهرة: مادري ...مادري..
ناصر: دخيلج يامهرة... عطي نفسج فرصه وعطيني فرصه عشان نعيش براحه وسعاده رباعه....
مهرة: اسامحك؟؟ اسامحك وانته سببت لي خوف من الكل...عقده من الرياييل... عدم ثقة في أي حد حتى في نفسي...كرهت نفسي وكرهت كل حد حوالي...كيف اسامحك ناصر كيف..؟!
كانت الدموع ماليه عيني وخدي....
ناصر: انا اسف مهرة....
مهرة: وين اصرفها هذي؟!!...هاااه؟؟.. شو تفيدني كلمه اسف هذي...
ناصر: مهرة...!!

اختلط في كلامه الترجي مع الاستغراب... الاستغراب من صياحي...والترجي عشان ألين واتفاهم اكثر...
غطيت انا ويهي عشان ماشوف نظره عينه وتعبير ويهه...
كنت اخاف اني اتفاهم مثل مايطلب مني...
كنت اخاف اني اعطيه الفرصه اللي يباها...
كنت اخاف اني اتعرض للخداع مره ثانيه...!
كيف اثق فيه؟!...هو من بد كل الناس كيف اثق فيه..!!!.
انفجرت بالصياح....
ليش؟....مادري..

كنت يائسه.... تعبت من النزاع النفسي اللي في داخلي....
تعبت من رغبتي بالانتقام منه...
تعبت من مقاومه رغبتي باني اترك لطيبتي العنان....
تعبت من كثر التساؤل..اذا كانت تصرفاته صادقه او تمثيل...
واذا تمثيل...شو مصلحته من التمثيل؟!
واذا صدق....شو ردة فعلي انا تجاه هالتصرفات...!
تعبت....تعبت....!

مادريت بنفسي الا وانا بحظن ناصر...اصيح واصيح....
ايده حوالي كتوفي... وايده الثانيه ماسكه راسي تضغطه على صدر ناصر....
استسلمت...لاني باختصار ...كنت مرهقة...!!
مارقدت امس بسبب خوفي من الجنيه....
والصبح اتلقى كل هالصدمات واواجه كل كوابيسي....

ناصر راعي بنات وكنت اعرف من قبل..
لكن ناصر راعي خمر وشرب وحفلات مختلطه؟
ناصر تاب بسببي..!!
ناصر صلح حياته...بالمقابل دمر حياتي انا..!!
ناصر زوجي...الملتزم دينيا...المرح...المحب...المهتم...في صوب...
وناصر اللي كان بيظيع شرفي في بيتنا من صوب ثاني....

وصلني صوته...عطوف ورقيق...
ناصر: غناتي لا تصيحين...لا تقطعين قلبي...مهرة انا اغليج وماتحمل اشوفج جي....!!

غمضت عيني واستمريت بالصياح.....!!
لين دخت... وظلمت الدنيا بعيني...

_________________

نهاية البآرت آلـ [ 47 ! __DEFINE_LIKE_SHARE__

سنفر · 07-06-2011, 06:50 AM

اهئ اهئ
حزني هالباارت ><"

وفرحني بعد ..
انتظر البااارت الياي
ع احر من الجمر __DEFINE_LIKE_SHARE__

رهيفة القلوب · 07-10-2011, 09:07 PM

آلبآرت آلـ [ 48 !
------------------------------
اليوم: الاثنين..
المكان: شقة ناصر..
الوقت: السادسة والربع صباحا…
------------------------------
(ناصر)….
كنت احس بالالم… بكره الذات…
يمكن مهرة اللي في حظني عادتني باحساسيها تجاهي..
لانها متالمه….وتكرهني…
قمت انا اتالم لالمها…واكره نفسي لاني سببت لها هالالم…
غمضت عيني وحظنتها اكثر…
كانت من فتره بسيطه هادية…. صياحها توقف…شهقاتها الخايفة من المجهول بعد توقفت…
ناصر: مهرة..!!!..
لا جواب..!
نزلت راسي اوايج لويهها….كانت مغمضه عينها..وملامح ويهها طبيعية…
رقدت؟!..معقوله..!..
والا اغمى عليها والا شي..!
كيف تقدر ترقد بهالسرعه…!
تذكرت بعدها انها مارقدت زين طول الليل… اكيد انها تعبانه…واعصابها ماتحملت كل اللي انقال…!
وكطريقه للهروب…. واللجوء للراحه المؤقته..رقدت…او غفت…او اغمى عليها..
في كلتا الحالتين بتركها ترتاح…كفايه اللي عرفته لين احين…
وراها صدمات ثانيه يايه بالطريج…
صدمه زواجي…وولدي مايد…
اللي ما اعتزم اني اقولها عنهم الا يوم تتحسن علاقتنا…ونكمل زواجنا….
عشان تكون مستعده تسامحني بشكل اكثر…
تنهدت… وتركت مهرة فحظني لفتره…
ماكنت مستعد اني اتركها…
لكن ماظن ان الوضع مريح لها…خلها ترقد وترتاح…
بهدوء ورقه…اسندت مهرة عالمخده ومددتها عالكرسي اللي كنا قاعدين عليه..
نفس الكرسي اللي رقدت عليه وهي مريضه…
تاملت ويهها الطفولي…
مديت ايدي ورجعت شعرها ورا اذنها عشان مايزعجها…
ورحت اييب لها برنوصي….وغطيتها به…
ماعرف شو اسويلها اكثر عشان اريحها…
اخر شي عرفت انه ابتعادي عنها هو اللي بيريحها….
ياويلي شو اسوي….
احين مهرة تعرف اني كنت راعي شرب وبنات وسهرات واشياء حرام…. بتسامحني ياترا؟!
هيه بدايه الصدمات دايما تضعف….مثل ماسوت يوم درت اني انا ريلها…اغمى عليها…وعقب تمت تصيح..
لكنها عقب استقوت…
واخاف الحين تسوي نفسي الشي…
اغمى عليها…بتريا صياحها بعد ماتقوم….وعقب بتراويني نيوم الظهر…!!!!..
دايما الحال بيتم جي؟!…متى برتاح ياربي متىىىى..؟!…
قمت من الكرسي وطلعت من الصاله وانا احس باليوع..
دخلت المطبخ وسويت شاي حليب…الشي الوحيد اللي كنت اعرف اسويه يوم ييت بوظبي…
مع الاستقرار في الشقه تعودت اني اطبخ احيانا….
تذكرت حياتي كيف كانت قبل ما ايي بوظبي….
كنت مستانس خالي البال…ماعندي هموم تكسر الظهر….
ماعدى هم التخلص من نوره…
بس كان عندي غرور فظيع وكنت متاكد انه محد بيروم يجبرني على شي…
وان نوره ..مب من مستواي…
صحيح هيه جميله….جميله جدا…. احلى من مهرة بعد…
بس من داخلها دمار…
والله يعين احمد عليها…
من جهة ثانيه….قضية مهرة معاي مب قضية جمال..
مهرة خلاص تغلغلت في اعمق اعماقي….
حلوه كانت او شينه….في النهايه هيه "مهرة"…!..
خلصت الشاي وحطيته في دله….
وخذت كوبين ووديتهم الصاله..
دخلت بهدوء وحطيت الشاي عالطاوله… وصبيت لي كوب…
مسكت الروموت وقصرت على صوت التلفزيون على اخر شي…
ويلست ابدل في القنوات…لاني ماعرفت وين اروح…
لكن يوم بيفتح المطعم الهندي بسير اييب "خبز براتا"… لاني عيزت من الروتي…
مر الوقت ومهرة بعدها ماقامت…وصلت الساعه تسع…!!…
قمت طلعت من البيت وهالمره قفلت الباب وراي..
رحت ووديت سيارتي المغسله ينظفونها لانه مازال فيها تراب يوم رحنا البحر….ماتفيجت اوديها قبل…
التنظيف خذ وقت شوي….
مريت السوق لاني تذكرت شي مهم... شي ممكن يزيد ثقة مهرة فيني...
لين احين هي ماقدرت تكلم خوانها ماعدا سيف يوم ياها هني...اذا عطيتها تيلفون تكلم خوانها على كيفها... وبراحتها...بتقدر لي هالشي...!
دخلت محل الموبايلات وخذت لها تيلفون نوكيا صغير مناسب لها.... وبحط لها وحده من بطاقاتي الجديمه.. لانه عندي ثلاث ارقام مختلفه ما استخدم منهن غير واحد وهو المتعارف...
وعقب مريت عالمطعم خذت "البراتا" ….
ورجعت البيت…!
---------------------------------------
اليوم: الاثنين..
المكان: شقة ناصر...
الوقت: الحادية عشره صباحا..
---------------------------------------
(مهرة)....
قمت مستغربه من المكان اللي انا فيه...وشو اللي رقدني....
اول مارفعت راسي عن المخده اللي تحتي حسيت راسي نقع...!!
يوم عورني راسي تذكرت كل اللي صار الصبح...!
ناصر وقرايته القرآن...
وكل اللي قاله بعدها...
بنات...حفلات... وخمر.!..
تناقض...!!
بعدت البرنوص عني ويلست عالكرسي اعدل شعري وارتبه...
نشيت ودخلت الحمام تغسلت...وبدلت ملابسي...لبست كندوره حمرا قطن..لكن لها موديل حلو ورقبه مرتفعه شوي....
لميت شعري ورفعته وانا احاول قد ما قدر مافكر باللي عرفته...!
عقلي مايتحمل هالمعلومات...
لاني ببساطه ماعرف شو ردة فعلي تجاه هالاشياء اللي عرفتها....!
ناصر يطلب مني فرصه....
هل من مصلحتي اني اعطيه هالفرصه؟!...
والا ارد بيت اهلي واطلب من ناصر الطلاق؟
كيف اتم زوجه لشخص كان يشرب خمر؟
ماتخيلت هالمستقبل لنفسي ابدا...
لكن... مب انا قايله اني بطفر بناصر لين مايطلقني؟..
ليش احس اني مب قادره اطفربه بعد اليوم؟...
الرجعه لاهلي في وقت بعدني ماكملت فيه اسبوع من زواجي فكره مب مناسبه..
لانهم بيتسائلون... وانا اعرف اني بستسلم وبقولهم... ساعتها شو بيصير؟ بيغصبوني عليه غصب...
لكن ان عطيت ناصر الفرصه اللي يطلبها....
هل من الممكن اني اعيش معاه حياة طبيعية؟!..
انقطعت افكاري يوم سمعت صوت انفتاح الباب....
عقدت حياتي يوم افتكرت توني ان ناصر ماكان موجود في الشقه..وين راح وخلاني...؟!
طلعت من غرفتي ووقفت عالباب...ناصر كان طالع بلا سفره..بس لابس كندوره ..نفس الكندوره اللي لابسنها الفجر.... وماسك كيستين في ايده...ومفاتيح..
اطالعني ناصر بنظره....اقل شي اقدر اقوله عنها انها "ملهوفه"...
ابتسم ناصر..وتقرب مني ببطء..
ناصر: هااه قمتي؟.. صح النوم...
مارديت....
مب عارفه شو شعوري اتجاهه وكيف لازم اتصرف بعد اللي عرفته عنه...
تقرب ناصر اكثر..شكله كان كانه مستحي مني....وهو نفسه متوتر مب عارف كيف يعاملني...
ناصر: انتي فجاه رقدتي...مادري..اغمى عليج..مادري بالضبط... بس شفت غفوتج انسب لج عشان شوي ترتاحين... شي يعورج مهرة؟!...
مهرة:.. آآه... راسي يعورني...
ناصر: انا سويت شاي...ماشربتي؟.
مهرة: ماشفته...
ناصر: في الصاله... و شريت خبز براتا حار بعد بيعيبج... وشريت لج شي ثاني بعد براويج اياه عقب ماتاكلين...
نزلت عيني بتردد وانا افكر...بصراحه يوعانه.... وذكر ناصر للخبز الحار حرك اليوع اكثر...
مد لي ناصر الكيسه اللي فيها الخبز...
ناصر: اندوج... بطلي الكيسه وحطيلنا جبن وزيتون وهالسوالف عشان نتريق..وانا ببدل ثيابي وباييج..اوكي؟
باختصار..ناصر يطلب مني اهتم بالريوق حالي حال أي زوجه.... يباني اندمج بالجو غصب..
اوكي..صارله ايام يخدمني...يخدمني بعيونه...حتى الطباخ يطبخ لي...
شو بيضرني اذا ظبطت الريوق الحين؟!.. وهو مايطلب مني اطبخ او شي...كل شي جاهز....
مهرة: اوكي..
رحت انا المطبخ...وراح ناصر غرفته...
في الصاله يلسنا على طاوله الطعام الجانبية اللي مانقعد عليها الا نادر...
تريقنا انا وهو بصمت...
فجاه تشجعت وسالته..
مهرة: وين رحت.؟!..
اطالعني ناصر بنظره كانه فرحان بسؤالي...
ناصر:.... سرت..اول شي خطفت عالمغسله..نظفت سيارتي...وعقب خطفت السوق وشريت لج شي..عقب مريت المطعم ويييت... وانتي متى نشيتي؟
مهرة: قبل ماتي بشوي... شو شريت لي...؟
ابتسم ناصر..
ناصر: شريت لج موبايل...
انصدمت.. بطلت عيني وانا اطالعه يخش ايده فمخباه مع ابتسامه فويهه... وطلع لي جهاز صغير لونه عنابي...
ناصر: تفضلي...
مسكت التيلفون بايد مرتجفه...
مهرة: حق...حق شو؟!..
ناصر:حقج..عشان تكلمين اهلج براحه...برمجت فيه ارقام خوانج..وعمي... ..وو..رقمي... بقية الارقام مال اهلج مب عندي برمجيهن روحج...
اطالعت التيلفون مستغربه..
مب مصدقه اني اقدر اكلم اهلي بحرية....ماصدقت ان ناصر يثق فييني لهالدرجه...
مهرة: ماتخاف اني اخبر اهلي؟!
اطالعني ناصر بهدوء..
ناصر: انا اثق فيج... وانتي من حقج تكلمين اهلج بحرية.... وانتي رغم تهورج احيانا الا انج عاقل وتوزنين الامور...وانتي تعرفين زين يامهرة ان حياتج احين معاي....وان شاء الله بتم جي...
مهرة: انته تاخذ الفرصه اللي طلبتها مني بالغصب...
ناصر: لا حشى... قلت لج انا مستعد اصبر...وانا اتصرف معاج حسب شعوري صوبج..هب تمثيل او تصنع... اذا بتعطيني فرصه بتكون بتقبلج انتي لي... مب فرصه عشان اعاملج انا زين... انا مابتغير..لكن اباج انتي تغيرين اللي في نفسج شوي وماتحاربيني.....
مد ناصر ايده وحطها على ايدي اللي كانت عالطاوله وضغط عليها...
ناصر: شو رايج يامهرة؟!..
تصارعت في نفسي رغبات كثيره... لكن في النهاية فاز التعقل...والفضول...
ابااعرف..اذا عطيته فرصه شو بيصير؟!..في النهاية انا عالقه عالقه معاه...
مهرة: اوكي...بس عشرط..
ابتسم ناصر...ابتسم بفرح كبير...
ناصر: اللي تبينه...
مهرة: لا تطالب بحقك علي كزوج....
مابان في ويهه أي تاثر....
ناصر: ماعندي أي مانع... المهم تتصلح الامور بينا..
مهرة: ما اوعدك بشي..يمكن في النهاية ماقدر اتقبلك...
ناصر: انتي بس لاتحطين هالفكره فبالج وبتشوفين شو بيصير مع الوقت....
ثقتة خوفتني...
لا يكون صدق بيصير هذا؟...لايكون بتقبله وبنعيش في النهاية حياة طبيعية..!!
اوففف...وانا شو اللي حارني؟ ليش حارمه نفسي من الراحه؟!..
ليته بس كان انسان ثاني غير ناصر جان عشت بشكل طبيعي...
لكن ناصر..
كيف بحترم نفسي اذا سامحت الشخص اللي حاول يعتدي علي؟!!!!!...
مهرة: على خير... لاني تعبت والله...
ناصر: سلامتج مهرة... ادري انج تعبانه واعصابج ماتتحمل اكثر..انا ابا اريحج والله... اريحج معاي مب بدوني..لانه خلاص مالي راحه وانتي بعيد عني... وصدقيني انتي مابتعيشين حياة طبيعية بعيد عني...خلاص مهرة حياتج معاي مش بدوني...
مهرة: ليش تحاول تدخل هالفكره فبالي؟!!!...
ناصر: مب اني ادخلها فبالج...بس انا مابقول شي...انتي بتسيرين عند اهلج اخر الاسبوع وشوفي بنفسج..

سكت ناصر وسكت انا بعد....
كل حد يفكر بشي....
ياترى صحيح اللي يقوله ناصر ؟...
معقوله مابقدر اعيش بدونه؟..
ليش بالله؟..انا عايشه معاه براحه عشان ماقدر اعيش بدونه..
اوفف هالانسان وايد واثق من نفسه ....
فجاه قال لي ناصر..
ناصر: مهرة.... تبينا نطلع؟
بطلت عيني..
صرت مدمنه عالحواطه...
مهرة: وين؟!..
ناصر: زهقنا بوظبي...نسير دبي؟..
عقدت حياتي انا ...
مهرة: دبي؟
ناصر: هيه... بنبات هناك شرايج؟
مهرة: نبات هناك بعد..؟
سكت ناصر يفكر شوي....
ناصر: تدرين شو.... بنسير اليوم دبي... وباجر بنطلع عنها المسا وبنروح العين... بنتم من الثلاثاء للجمعه .. شو رايج؟

فرحت...بيوديني العين؟!!!...
مهرة: والله؟!!!..
ناصر: هيه..قومي جهزي اغراضج لكم يوم عشان نتغدى هناك...
ابتسم ناصر يوم شاف الضحكه على ويهي وانا افز من مكاني واروح حجرتي بسرعه اجهز اغراضي مستانسه...
كان التيلفون بايدي بدون ماحس..
ويوم حطيت اغراضي... اطالعت التيلفون برغبه اني اتصل بحد من اهلي..
سيف وتكلمت معاه...
خلني اكلم سهيل..
مسكت التيلفون ودورت على رقم سهيل..
اليوم: الاثنين..
المكان: شاطي الجميرا..دبي..
الوقت: السادسة مساءا..
----------------------------------------
(مهرة)...

نفظت ايدي عن الرمل متظايقه وانا اطالع ناصر على مد بصري...
كنا على شاطي الجميرا... والعرب والاجانب شكثرهم هني...
وناصر حظرته يتسبح..!!!!!...

كنت انا يالسه عالتراب بدون غشوه بس تحجبت...لانه اغلب اللي هني اجانب ومحد يطالع حد اللهم نفسي...
صحيح المكان هني حلووو ويجنن....
بس صراحه؟...مب للحريم...!
عالاقل مب للحريم المسلمات الساترات....
لكن ناصر اقترح انه يروح يتسبح وانا ماحبيت اقعد في الغرفه بروحي...قلت ايي اتفرج..
اول مادخلنا دبي حطنا على شاطي الجميرا كامله.... وعقب دخلنا الفندق والغرفه ..وهناك اكتشفت انه حاجز غرفه وحده...
تنازعت وياه ساعتها لكنه قال بنتكلم بعدين في السالفه...
ونزل يتسبح ونزلت معاه..ومن ساعتها وانا مطنقره...!!!..
كيف يتجرا ويحجز غرفه وحده بسرير مزدوج؟...انا قايله له لا يطالب باي حق ولا يضغط عليه قال اوكي..!!
ليش عيل هالحركات..!!!
كنت متظايقه من الناس اللي حوالي...الكل احسهم يطالعوني مستغربين ليش يالسه اروحي....!!!
قمت ونفظت التراب عن عباتي....ورحت صوبه..
مهرة: ناصر...نااااااااااصر....
كنت اطالع ناصر بحسد وهو يتسبح في البحر...كان بعيد نوعا ما ويالله وصله صوتي...
رجع للشاطي وهو يمسح على راسه عشان يرجع شعره على ورا...اللي يقول من طوله الشعر؟!!!..
ناصر: زقرتيني؟
مهرة: هيه...بسك...
ناصر: حرام عليج...شو زهقتي؟
مهرة: هي زهقت ومتظايقه من الزحمه وهالمفاصيخ صراحه منظر ماحبيت اشوفه...!!
تلفت ناصر حواليه وابتسم بتفهم....
ناصر: فالج طيب...

في الغرفه...

مهرة: يالله متى بتتصلبهم؟
ناصر: اتصل بمنووه؟
مهرة: الرسبشن عشان تحجز غرفة ثانيه...!!
تلفت ناصر باستغراب حواليه....استغراب مصطنع...
ناصر: ليش شفيها هالغرفه؟!..
مهرة: عن لاستهبال... انته تعرف اني ماقدر ارقد معاك فغرفة وحده...
ناصر: اظني مره راقده وياي في غرفه وحده ...ياج شي؟
مهرة: بس هذيج المره رقدت انته تحت وانا فوق وهالمره بترقد عالشبريه طبعا..
ناصر: طبعا طبعا...

قهرني بروده...
مهرة: ناااااااصر...!!
ناصر: خلاص رقدي انتي على هالكرسي...
مهرة: طالع؟..ونعم الريال...بتخليني ارقد عالكرسي وانته عالشبريه متهني؟!
ناصر: عيل انا شكبري وشعرضي بترقديني على هالكرسي؟ انتي عالاقل صغيرونه بيضمج صح لكن مابترقدين مرتاحه..كيفج...
عصبت انا..
مهرة: لا تقول صغيرونه....
رفع ناصر حواجبه بسخرية...
ناصر: ضئيله....
مسكت المخده اللي كانت عالكرسي وفريته بها..لكن كالعاده ماكنت اعرف اصوب...
مهرة: اسكت...احجز غرفه ثانيه يالله...
يلس ناصر عالشبريه بعناد وهو يركب طربوشته في الكندوره...
ناصر: آسف... اجاراتهم غاليه...ونحن الا بنبات ليله...مايسوى علينا نحجز غرفتين او جناح بسبب انه حظرتج مااطيقين الرقده وياي...تحملي..مابيييج قلت لج انا ما باكلج...
مهرة: نرقد عشبريه وحده؟ وايد متفائل....!!!
كنت منحرجه ومعصبه حدي منه ....
ليش يغصبني على اشياء مابغيها...!!!..
ماقدر ارقد معاه...
ناصر: حطي بينا هالمخده الطويله اذا كان يريحج... غرفة ثانيه مابحجز... انا بسير اصلي وبرد لج عشان نحوط وعقب نتعشى...
وقف جدام المنظره يعدل سفرته وعقاله...وتعطر...
ناصر: تبين شي؟!
مهرة: اباك تدعم...
كنت مقهوره منه ومن ثقة بنفسه...مقهوره لاني اطلب منه من الصبح يغير الغرفه وهوهب طايع ولا مسولي سالفه..!!!..
ناصر: ادعم؟..اوكي...
ترك الباب ويا صوبي وعلى ويهه تعبير جامد...تقرب مني وايد..استغربت شو يبغي... جان يقوم ل**** ويدعمني...!!!!
مهرة: ايييييييه...!!!..عثره شفيك؟!
ناصر: انتي قلتيلي ادعم...دعمتج...
وابتسم ببلاهه....!
مهرة: هاها ها بموت من الضحك...سخيف تراك...
ناصر: اكون سخيف احسن من اني اكون عنيد بغباء...!!..عن اذنج...
وطلع من الغرفه وتركني...
حسيت انه يتعمد الهباله جدامي... هذي مب شخصيته..بس يحاول يتعامل معاي بطريقه يحس اني انا افكر فيها..الا وهي "الهباله"..باختصار...
اناهبلا في نظر ناصر...!!!...لاني اتصرف مثل اليهال....
اوكي... احين انا مب وافقت على الفرصه اللي يطلبها؟!..وافقت..
لكن هذا مب معناته اني اتحمل النوم معاه...ماقدر...حتى لو ماصار بينا أي تواصل...مجرد فكرته راقد عدالي تخليني .... تخليني....
اقفط...!!

اوففف ياربي شو هالحاله..!! خلنا نقضي اليوم على خير...ويوم بايي الليل يحلها الف حلال..
------------------------------------
اليوم: الاثنين..
المكان: العين مول..
الوقت: الثامنه والنصف مساءا..
------------------------------------
(سيف)...

دخلنا العين مول انا وجمال ربيعي ومبارك.... كلن كاشخ فصوب... كنا متواعدين ويا الشباب في الطابق الثاني بنحضر فلم في السينما... لكن مادري ليش لازم نكشخ يوم ندخل العين مول هذا...! مع انه مب في نيتنا مغازل بنات...
لكن الكل يكشخ هني زد نحن؟!..
جمال: وااااااااال يالزحمه عالدري....
سيف: تعالوا نركب المصعد... انامادانيه الدري هذا بعد...
توجهنا للمصعد وتريينا حريم لين ماركبن ورجع لنا المصعد بعدين خالي...ركبنا... بس كلنا فجينا حلوجنا وعيوننا يوم ركبت معانا بنت...حوالي 17 او 19 عمرا..ومعاها بنت صغيره..!!!!..
كانت البنت كشفه.... فول ميك اب ودنيا..وعباه مبطله والشيله راده عن الشعر وكل شي يخطر عالبال..
البنت: السلام عليكم..
ردينا عليها السلام ونحن مستغربين...
جمال ربيعنا اللي كان في طريق التدين نزل راسه وكفخني انا كفخه خفيفه عشان انزل راسي انا ومبارك...
المهم نفذنا....
بصراحه كانت شبهات...
شحقه راكبه ويانا حظرتها..!!.. قلت المصاعد؟..والا مستعيله وايد حظرتها..!!!..
توقعنا توقف في الطابق الاول وتفكنا من الصدعه لكنها ركبت معانا الطابق الثاني...
واللفت مال العين مول بطيئ نوعا ما....
انا بصراحه ماقاومت اني ارفع عيني مره ثانيه....وابتسمت يوم حصلت البنت اطالع مبارك...
مبارك كان صاد على يانب يطالع اللي يتزلجون تحت....
فجاه قالت البنت لمبارك...
وبصوت انعم مايكون..
البنت: اطالع صوبنا عاد...والا مب قد المقام؟!...
سمعت جمال يقول "استغفر الله" بصوت واطي...
انا مسكت ظحكتي ..ودزيت مبارك عشان يصد صوب البنت ويرد عليها.....
وفعلا مبارك صد صوبها وعقد حياته...
مبارك: شوه؟!
البنت: سلامة عيونك...
كان دلعها مقزز....
مبارك: انتي اصلا عيب عليج راكبه ويانا المصعد....وبعدين لشو اصد صوبج شو بشوف فيج من الخير؟!..
انفتح باب المصعد في هاللحظه وطلع مبارك....وطلعنا ان وجمال وراه نصاقع من الضحك....
وخلينا البنت اروحها مصدووومه....
ونحن نضحك ونضحك...ماتوقعنا هالرد الفضيع من مبارك للبنت....هذا وهو عايش فبلد اجنبي...!!!
مبارك: واااااو شي بنات جذي؟!!... ماصدق بصراحه...
جمال: بعدك ماشفت شي والله....
مبارك: هذا وانا اللي افتخر ببنات البلاد واتحلم في غربتي اني اشوفهن محتشمات... طلعن جي؟!
سيف: ها ها..لا تجمع...كل مكان يابوي فيه الزين والشين... بس بصراحه من هالاشكال كثرانه احين....
جمال: هذي شقايل اهلها مخلينها تطلع من البيت بهالشكل؟!..
سيف: دخيييلك وايد عايلات دامره من اليد لين الحفيد...ولاحد فيهم يسال عن حد... الا اللي الله هادنه مايسوي هالحركات ولا يضيع..
مبارك: انزين شو بتستفيد؟..شي شباب عندكم ياخذون هالبنات بعد مايتعرفون عليهن يعني؟
جمال: لااااااااااه.... دخيلك من هالاشكال حد يدخلهن بيته بعد ؟!..
مبارك: عيل ليش يسون جي؟!...
سيف: ياخي اعجبت فيك وبعيونك الخضر طنشتنا انا وجمال وحطت عينها عليك...
عقد مبارك حياته اكثر...
مبارك: انا اتكلم جد...ليش يسون جي؟!.. ليش يخربن على عمارهن؟!..
جمال: ياحبيبي هذيلا الناس سواء شباب او بنات..يتبعون دنياهم... مايتبعون اخرتهم...المهم طبك منها... ترا الطيبون للطيبات والخبيثون للخبيثات...لا تحاتي..
ومشينا عند ربعنا اللي كانوه فوق الخمسه....ودخلنا السينما ... بس حسيت مبارك مازال متظايق من السالفه...
---------------------------------------
اليوم: الثلاثاء..
المكان: غرفة الفندق..
الوقت: الواحده صباحا...(بعد منتصف ليل الاثنين)...
---------------------------------------
(ناصر)...

دخلت مهرة قبلي ودخلت انا بعدها وسكرت الباب وراي....
بصراحه اليوم في تطور واضح...
مهرة كانت متقبله معظم حركاتي وتصرفاتي... صحيح تتقبلهن بظيج وتتافف احيانا لكنها ماتحارب وتلاسن شرا قبل...
حتى لدرجه انها خلتني امسك ايدها ونحن نتمشى في الحديقه المائية ...
كنت مستانس بشكل عام..لكني اعرف اني بواجه مشكله قريبا بخصوص الرقاد...
عشان جي حبيت اشرد شردة مؤقته..
ناصر: حبوووووبي الحمام اول...
مهرة: لااااااااا ناصر لايديز فيرست...
ناصر: بدوي ماعندي هالايتيكيت... انااول بخلص بسرعه...
خذت اغراضي ودخلت الحمام اتسبح...وانا اتبسم...
تذكرت مهرة كيف لاعت جبدها من الوجبة اللي طلبتها في المطعم... تمت كل شوي اطلع لسانها وهي قافطه لاحد يشوفها... لايعه جبها من الخاطر... وانا ميت من الضحك عليها...
اخر شي قالت..." ناصر هب حلو..." ..ودزت صحنها بعيد....
انا مارمت اسكت من الضحك...لكني هديت نفسي وطلبت النادل عشان يبدله لها...ويوم شفنا نظره النادل على طبقهم المميز اللي ماعيب مهرة...وكيف تم يطالع مهرة بنقمه.... متنا من الضحك انا وهي...
ناصر: اخر مره ايي هالمطعم...
مهرة: محد قالك ماتحذرني من هالاكله..غربلهم الله شكله حلو بس يلوع بالجبد....!!..
ناصر: استغفري ربج هذي نعمه..
مهرة: استغفر الله....
ناصر: هههههههههههههههههههه اسميه نقمج....!!
مهرة: خله ينقم والله من اليوم لباجر شي ماعيبي ماباكله..والله..! __DEFINE_LIKE_SHARE__

مشاهدة نتائج الإستطلاع: ~»{ڜۈ رآيڱمِـ بآڵقڝـۂ ? ..
طــڕڕ .. ڱڜــــخـــۂ .. فنتــڱ ~	57	90.48%
ڕۈؤۈع‘ـــــۿ .. حڵــۈۿ .. مِـمِــــيزۿ ~	6	9.52%
آۈڱــيۿ .. مِـآڜـي حـآڵۿآ .. مِـحــآۈڵـۂ جيڎۿ ~	0	0%
المصوتون: 63. أنت لم تصوت في هذا الإستطلاع

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
ٱحبَڪ ۈٱڎرـﮯ تحبَنـﮯ فڎيتڪ يٱنظر عينـﮯ !●₪●..	رحلت عن بلادي	استراحة قصص وابداعات الاعضاء	594	04-28-2012 10:45 PM
آنّآ معآگّ ۈڷآ بڎۈنّگّ يسعڎگّ ربي	خوية الشقا	عدسة الاعضاء , كاميرا الاعضاء	11	05-19-2010 02:03 AM
آڛآڷڼيے ڷۈ פـپـِـِيے"ـٽ آڼآ غيرّڪ םـِآآهۈـِـِيے"ـِـِٽ (»● ڷڛعّـِـِۃ عّ ـڎآپ »●	مـِŏـلِوِ۶ أِשּׂِـِتِأنِدِرِ	تصاميم الاعضاء	4	05-13-2010 01:09 PM
أنّآ ۈڎّي ۈإنّت ۈڎّگّ ,, ۈآڷجۈآب يآرۈحي عنّڎگّ ..!ّ	خوية الشقا	عدسة الاعضاء , كاميرا الاعضاء	24	01-23-2010 11:11 AM