لو يهون الحب قدرك ما يهون..لان عيني غيرك انته ماترى...

بْنت المعلآ · 06-30-2013, 09:35 PM

السلآم عليكم ورحمة الله وبركآته ..،

> التكملهه للقصه ..

آعتذر جداً من اللي تنزل الروىآيه .. لآني بنزل البارتات اللي لقيتهم ..

" ما لقيت الروايه كلها .. .."

.
.
.

[align=center]
!@!...!@! الجزء الثاني عشر!@!...!@!

هاذي الي استعمرت قلبي...
………………………………………………………………
.......وتنهد تنهيده ارتياح طلع منها كل الشوق والوله لأول نظره فالمول......
عليوه استغربت الريال مبهت يطالعها ويبتسم وهيه عبالها هذا طيفه...عليوه ما عرفت شو تسوي ولا من وين تطلع..ياربي ارد من وين ماييت ..ولا اكمل واسير عند الريم..اووف وعنود الدبه وينها..وين سارت عني...وليش هذا موجود هنيه ومنسدح بعد..جيه ما يدل الميلس وين..اووووف انا شو يخصني هذا بيت خالي وهوه باي صفه موجود...لاخلاص بسير فوق عند الريم ما عليي منه...
وخطفت عليوه من جدام شهاب وبعدين تمت تربع ع الدري رايحه صوب الريم.

شهاب غمض عيونه:آآآآه يا حمدان
حمدان انتزغ:هاه خير شياك...
شهاب:يا حمدان خلاص...خلاص رحت فيها..
حمدان:يا ريال زيغتني ارمس شفيك...طمني
شهاب:يا حمدان استعمرت قلبي...شفتها...شفتها...
حمدان :عنلات صداك يالهرم زيغتني ..قلت شي استوالك...منوه هاي الي شفتها...
شهاب:ااااااخ ياقلبي يعورني
حمدان :سلامت قلبك...انته كل يوم والثاني وتقولي اااخ يا حمدان ..
شهاب:لااااااااااااااا يا حمدان استوعب شوي....انته ما تذكر ذاك الغزال الهنوف إلي شفته فالمول......
حمدان:اهااااااااا صح..صح اذكرت أي وحده...انزين شو فيها
شهاب:اقولك من دقايق وانا ارمسك صخيت دخلت عليي وهيه تمشي بسرعه جنها رايحه عند حد وانا ما انتبهت لها كنت عاطنها ظهري بس سمعتها تقول (استغفر الله حشى من كثر ما افكر فيه اتخيله جدامي..)
حمدان معناتها تفكر فيني...ااااخ احس صوتها فعروقي..يتخلخلني...
حمدان : ههههههههههههههههههه الله يعينك الريال متخشع
شهاب:تعرف خاطري اسير الحين فوق...
حمدان:ليش؟؟؟
شهاب:اااه لان الغزال شرد عني فوق...
حمدان:خل عنك المصاخه قوم اطلع انا وصلت وبعدين روح استفسر عنها من عند اختك......
شهاب:هيه والله بس شو بيصبرني لين ما اتروح انته
حمدان:عنلاتك احم ربك يوم ان الشيخ حمدان ياي يلوفك
شهاب:هههههههه السموحه يله وين وصلت...
حمدان:انا الحين برى بس بنزل ختيه صوب الميلس وبرد الخيمه يله بسرعه روح ازقر اختك ..بتخيس ختيه برا يلين ما انته تشل عمرك.....
شهاب:ماعليه حمدانوووه انا براويك حسابك بعدين ..يله اجلب فيسك..
حمدان:فديت فيسي ما تروم عليه مزيووون....
شهاب:اقولك..اسمع صوت مترو دبي مالكم..وسكر فويهه
حمدان يضحك:هههههههههههه عنلااااااااتك
ميره:اوووف ساعه تقردنه ..استمليت انا محد يرمسني ..إلا اطالع الشارع...
حمدان:هههههههههههههههههه
.................................................. ....
نرجع لعليوه وشو استوالها..........
دقيت الباب
دقيت الباب
الريم :من؟؟؟
عليوه فخاطرها:والله ولهت عليج...
قامت الريم متثاقله وفتحت الباب عبالها اخوها....
واول ما فتحت ما حست الى بالإنسانه الي ستفقدتها واااايد حاضنتنها.....
الريم تمت فاجه عيونه مب مستوعبه ومن دون سابق انذار تمن دموعها سيول ع خدها ونفس الشي عليوه تمت اتصيح وكل وحده تصيح من يانب....
الريم وهيه تصيح: عليووووووووووه
عليوه:عيونها...
الريم:حارب راح...
عليوه ما عرفت شو تقولها... ربيعتها هنيه واخوها المسكين فهد هناك..
عليوه:ريماني فديتج اول شي مسحي دموعج...
الريم :خلاص عليوه ما بشوفه راح ...عليوه راح ما ودعني...راح وخلاني..دخيلج عليوه ما اعرف شو اسوي بلاه ...والله ما بتضارب وياه ...والله ما بتنازع وياه...بس قولوله يرد دخيلكم قولوله يرجع...ع الاقل يودعني ...ليش يروح بهالسرعه...دخيلك حارب رد ...الله يشلني انشالله مثل ما شلك...وزاد صياحها.

عليوه بعصبيه:الريـــــــم...شو هالرمسه ربج اختاره ليش قاعد تدعين على عمرج...واذا انتي رحتي اانا منو بيتم لي..حرام عليج الي تسوينه..
وتمت بعد هيه تصيح ...ما استحملت الي تقوله الريم.....
قامت الريم وراحت الحمام وغسلت ويهها ...هيه وعدت شهاب انها ما تصيح..
وردت ويلست حذال عليوه....
الريم تمط عليوه من خدها:يالدبه بدال ما انتي تهديني انتي تصيحين...جنه بنتبادل الادوار......
عليوه ابتسمت:انتي صيحتيني...وانا مب ناقصه...
الريم :افاا ليش؟؟
عليوه:ياليابسه ولهت عليج واااايد
الريم اطالعها بنص عين:وااااااااااااااااااااضح!!!
عليوه:حرام عليج...عيل يله قومي سويلي درب بروح بيتنا...
الريم:هههههههه يا بوج امزح...امزح..ما تقهرين..
عليوه:لا ما اقدر........
الريم تتنهد مع ابتسامه بسيطه:تصدقين....ولهت عليه (ونزلت ع خدها دمعه كلها وله لولد اخوها الغالي إلي مستحيل تلاقيه إلا في الفردوس انشاالله)
عليوه ما صدقت ع الله تسكت من الصايح وبعدها ردت ادمع
عليوه تمسح دمعه الريم :هاااه خلاص رديت حق دوري...خلاص عاد يا الريم الي يروح ما يرجع بس عليج بالدعاء والقران...
الريم ابتسمت لبنت خالها الي تحاول اطلعها من حزنها باي طريقه...
الريم :تعرفين...خلاص انشاالله مابتنزل مني ولا دمعه انا وعدت شهاب اني خلاص ما بصيح وبخلي ايماني بربي قوي....
عليوه مليون علامه استفهام ع راسها:شهاااااااب؟؟؟؟!!!! منوه هذا بعد؟؟؟؟
الريم :اوووه صح...هاذي سالفه طويله عريضه...بخبرج اياها بعدين
عليوه:لا ما يخصني الحين تخبريني...
واندق باب الحجره...
الريم تقوم:خلاص بقولج ايها عقب...قومي بشوف من عند الباب وتعالي بننزل تحت ما ضيفتج شي...
عليوه اونها زعلانه:مااااااااااليد اريد اعرف...
الريم سوتلها طاااف وفتحت الباب....
كانن الثلاثي عنود وروضه وميره....
الريم:هلا والله...
وسلمن ع بعض
ميره+عنود:حسن الله عزاج يا الريم
الريم :الدوام لله....
عنود:يالمعفنه طالعوا عيونج شو مستولهن..اضعفيتي
الريم ابتسمت
روضه:بتخلينا واقفين لين متى
الريم ماسكه الباب عنهن:هههههه السموحه.... نزلنا تحت حجرتي ما بتدخلونها معفوسه فوق حدر...
ميره:ما يخصني انا احب الحجر المعفوسه....
روضه وعنود:ههههههههههههههه
عليوه طلعت من ورا الريم :انتي بكبرج معفوسه يالمفعوصه...
ميره:اهليييييييين طالعوا الصرصور وين منخش
عليوه:عنلاتج انا صرصور...يالدبه وينج يعني نحن ما نشوفج إلا فالجامعه..ولهنا عليج......
ميره:احم ..احم ادري انكم ما تستغنون عني....
البنات:هههههههههههه
.................................................. .............
برى البيت التقوا الشباب حمدان وشهاب وبعدين يوهم منصور وسهيل ومانع...
وتعارفوا على بعض حتى تقدرون تقولون استوو اكثر من ربع وخصوصا شهاب ومانع....وكانوا الشباب يسولفون ويحسبون كم باقي عشان تخلص الاجازه ويردون للكليه وكل واحد يدعي عليها من صوب....
بس كانوا اثنين يحسبون الدقايق ويتحرقصون متى بيمر الوقت..وينشون
ههههههههه هذيلا هم شهاب ومانع...شهاب يتريا عليوه تروح عسب يروح يستفسر...ومانع بعد نفس الحاله
اذن المغرب وتفرقوا الشباب وقاموا يصلون.......
ونفس الشي البنات قامن وصلن وردن ويلسن في الصاله العوده الي في الطابق الثاني...عقولتهن ما يحبن يلسه الحريم في الميلس...بيتمن يرمسن عن المرحوم ويصيحن وبيصيحنهن وياهن.....وهن شبعن من جو الحزن كل هالمده يعني شو يسون يضاربون ربهم ...هاذي حكمه الله وهوه يختار من يشاء...
ميره:ويا حيكن والله اتولهت ع سوالفكن....بس ما جنها الشله ناقصه
ورن تلفون روضه:هههههههه بنات حلال
روضه:مرحبا والله
منى:اهلييييييييييييين المرحب باجي
روضه:تصدقين لو طارين مليووون جان احسن
منى:هااااااااه...اعترفي شو رمستي عنا....
غاليه تصارخ عدال منى:اشحالج رووووضوووووووه
روضه:ههههههه الصدعه عدالج..عنلاتها شو هاي روضوه بعد
روضه حطت سبيكر...
منى:طبيها عنج...وشحالكوا واخباركوا واخبار ريموووه
ميره تزاعق:ههههههه ايه منااايه ظهر عرج المناصير
منى:لحظــه...لحظــه..يا ان اذني وصلت دبي ولا انها خربانه
الريم:ههههههه لا اذنج مب خربانه
منى:يعني ميرووه الدبه هنيه ...وانا اشوف ليتات بيت عمي اروحها تولع
ميره:احم ..احم شكرا
عنود:اقوووول مناايه بسج من الخريط البنت بتنفجر من الخقه...تراها ما تصدق عمرها.........
منى:ماشاالله شعندهن بنات دبي...حتى عنود الساحره هنيه
عليوه:ايه منوووه حدج لا تغلطين ع بنت عمي كله ولا العنيدي
البنات:ههههههههههههه
ميره :اقووول مناتي بيعبر رصيدج قومي تعالي صوبنا
منى :اكيد بيي ما اتريا معزوم ...اقووول بنات العم قومن لاقني فالسكه..بنيكم انا وغلوي.....
ميره:عيل رفجه عليج تيبين سهيل وياج..هاتيه خاطريه امطله غزوزه....
منى: انشاالله من عيوني ...من الصبح يصيح اونه يبى يروح عند خلوووف....روضوه خلووف اخوج هنيه...
روضه:هيه ...موجود...يله بسرعه طلعن من الباب الصغير بنلاقيكن فالسكه...
منى:خلاص اوكيه...مع السلامه
روضه :الله يحفظج....
..................................
روضه :يله منوه بيروح وياي ...مب لازم الكل يروح...ولا قعدن بسير انا والخدامه....
عنود:افا والعنز تيس...انا بسير وياج
ميره:ما يخصني انا بعد بسير..
عنود:خلاص بنسير انا وروضه وميره وانتن يلسن ..اوكيه
الريم+عليوه:اوكـــيه....
واول ما نزلن البنات عليوه يلست جدام الريم ... الريم استغربت شعندها هاذي
عليوه:الحين تقوليلي السالفه الطويله العريضه ..من متى انا ماكلني الفضول..
الريم استغربت:أي سالفه؟؟؟؟؟؟؟؟؟
عليوه: الريم لا تبدين تسويلي الهمج مالج...سالفه الي اسمه شهاااااب
الريم:اهااااااااااااااااا..علني ما اخلى منه...فديته وفديت قلبه وروحه
عليوه استغربت وقالت شياها بنت خالها استخفت شو هالرمسه الماصخه من متى الريم تتفدى شباب ما تعرفهم........
الريم ضحكت على عليوه لأنها عرفتها انها فهمتها غلط....
الريم :حووووووووه لا يروح تفكيرج بعيد هذا إلي اسمه شهاااب اخويه
عليوه:تقصين عليي من متى عندج اخو اسمه شهاب...ريموووووووووووه جنج استخفيتي
الريم:برايج لا تصدقيني بعدين اروحج بتعرفين....
عليوه:تعرفين اعتقد بيتكم فيه سكن والسكن لابسينج الحين....
الريم:ههههههههههههه ليش
عليوه:تتذكرين قبل خمس ايام تقريبا يوم ما طعتي تروحين فياي المول...
الريم:هيه اتذكر..ليش
عليوه:خبرتج عن الاثنينه الي تموا يلاحقونا ومانع ما انتبه لهم...
الريم:انزين كملي
عليوه:تتذكرين يوم خبرتج عن الريال الي تم يطالع ويوم انتبهتله نزلت الغشوه..
الريم:انزين اتذكرها هالسالفه شوفيها...
عليوه:انزيـــن...تعرفين انه اليوم تراوالي منسدح فالصاله مالتكم ...متأكده امره نفسه الي في المول ما انساه واحد حليو شكله كشيخ...والله انه يعق الطير من السما...ومادري كيف اليوم اتراوالي فبيتكم ويالس يرمس فالتلفون بعد...شفتي يوم قلتلج بيتكم كله سكن وينون...اللهم سكنهم في مساكنهم.
الريم:ههههههههههههههههههههه قومي تعالي براويج اثثنا غرفتين فقسمنا
عليوه:والله ...يله
دخلت الريم ودخلت وراها عليوه........
عليوه:ماشاالله...ليش حق منوووه...
الريم:الله يسلمج ...حق اخواني...وهاذي حجره ذياب اخويه العود
عليوه:والله اني مب فاهمتنج مره تقولين اخويه شهاب ومره ذياب..
الريم مسكتها من ايدها: تعالي ....ودخلن حجره ثانيه
عليوه:الله هالحجره احلى .....وتمت عليوه توزع نظرها فارجاء الحجره
عليوه تشهق:والله انه هوه...هيه والله متأكده انه هوه
الريم: منو هوه؟؟؟
عليوه تأشرلها عالصوره المحطوطه ع الكمودينا....
الريم:هههههههه هذا هوه السكني إلي كان منسدح فالصاله....
عليوه:يعني إلي شفته مب يتراوالي حقيقه ...
عليوه غمضت عيونها
الريم:عليوه شو فيج؟؟؟
عليوه:ياويلي...يالفضيحه...
الريم:ليش؟؟؟
عليوه:تعرفين اني دخلت عليه لا احم ولا دستور ويلست ارمس عمري وانا عبالي يتراوالي وحضرتي مب متغشيه وشعري يوايج من تحت الشيله...
الريم:ههههههههههه الله يعينه اخويه اكيد انصعق من شافج

عليوه تتخنصر:ليش انشاالله شو شايف جدامه ينيه ...فديتني والله اني غرشوب (وجبلت ع المرايه تعدل قصتها)
الريم جبلت ع الشبريه:فديته اخويه يايب ملابسه من الدوبي ولا علقهن فالكبت...
وراحت تفتح الكباته عسب تعلق الملابس
عليوه:هاتي بساعدج...
ويلسن يرتبن الغرفه ويعلقن الملابس وهن داقات سوالف
.........................................
في السكه حذال الباب الصغير ...كان موقف موتره ومتساند ع البونيييييت يدوخ ويفجج راسه ع قولته ........ وطلعن البنات من الباب الصغير سايرات يلاقن منى وغاليه وكانت ريحه الدوخه ماليه جو السكه لانها ضيجه ....

ميره : امف ... ما تشمن ريحه زقاره وع وع ؟؟؟
عنود : ههههه صايره الحين الدوخه موضه ...
ميره : الله يبطنه هالهندي الي خاطف مناااا ... لوع بجبديه ...
ومنصور قاعد يسمع رمستهن لانه كان قريب ومب باين وعرفهن منوه هن ... وقال فديت جبدج يا مياري....وتعمد يحافظ على هدوءه ويشوف شو مطلعنهن الحين فالسكيك....
.....................
عنود:دومج انتي أي شي خايس يلوع بجبدج..
ميره:فديتني رقيقه...
روضه:عيل مره ريموووه هفت المدواخ مال سعيد من السياره ..بغى يتينن لأنه عباله غيبه وماخلى مكان ما دوره فيه واتروعت يكشفها وردته مكانه فالسياره...
ميره:هههههههههه عيل انا فديته اخويه حمدان امره ما يدوخ
عنود: نحن عندنا ناصر ما يدوخ الا اذا معصب من شي ..
(روضه فخاطرها :فديته والله )..
عنود:اما منصور اخويه موته شي اسمه زقاره ما يودرها امره...
روضه:الله يعينه يحرق صدره بهالسم
ميره:اخ اسميني اكره اسم منصور...ما ادري ليش...
....................
منصور يوم سمع حبيبه قلبه تقول جذاك جنه حد عطاه طراق ع ويهه بس بعده حافظ على هدوءه
..................
وتوهن منى وغاليه واخوهن الصغير سهيل طالعين من بيتهم...
ميره اتخبلت من شافت سهيل تموت فيه خصوصا ايام الدوام دايما اطرشله حلويات عند اخته منى...
ميره تصارخ لا اراديا: يا ناس يعلني افدى سهيل...شيخ الرياييل
.............................
منصور انصعق ما عرف شو يسوي بسرعه ركب موتره وشغل الليتات وحرك السياره......
ميره:عنلات صداه الخايس زين ما دهسنا...ما يستحي يشغل الليتات ويشوف ان حريم جدامه....وين يبى معفد سيارته السكيك...جيه قلن الشوارع
عنود تركز فرقم السياره:اممممممم والله هذا جنه اخوي منصور..
ميره تقفطت...
عنود:غريبه شو يسوي هنيه..
روضه:والقووووم اكيد سمع رمستنا......
ميره وجنه حد صفعها ع ويهها....لانها طول الوقت راديو ما يبند وتزاعق وتساب وتتفدى ..وامورها طيبه ودربها خضر..
ميره تصد صوب السياره وتركز فيها ...وانعادت جدامها احداث اليوم الي كانت شموه اختها عند منصور وهيه راحت تيبها من عنده....انصعقت ميره هذا يعني ان عنود اخت منصور ربيع حمدان اخوها.........يالفضيحه وانا من الصبح طايحه فيف سب جدام اخته.....
ميره:عنودي سمحيلي ع رمستي والله ما كنت اعرف انه اخوج...
عنود:هههههههههههه لا عادي ادريبج اننتي تسبين من هب ودب
ميره:ههههههههه فديت العنيدي
روضه:حووووه بسكن من هالمغازل يله قوم منى يترينا
وراحن البنات ولاقن قوم منى وردن بيت قوم روضه ويلسن البنات مع بعض وقررن يختمن القران عن حياه المرحوم واتفقن انهن يختمنه هاليمعه وكل وحده بتقرى كميه...ووزعن ع عمارهن الاجزاء عسب يختمنه فاقصر مده ممكنه....
.................................................. ......
خلاص يوم يعصب لاحد يوقف جدامه وكان يسوق السياره بسرعه جنونيه وما يعرف وين يسير ولا اصلا شو فيه غيض منها ولا قهر...هذا كان منصور ومن طلع من السكه وهوه مب في حاله ما يعرف دربه بس جذاك يسوق بسرعه عباله بيبرد الحره إلي فيه من الكلام إلي سمعه......
وفجأه رن تلفونه...
ويوم شاف الشاشه زاد قهر....
<< سهيل يتصل بك >>
منصور قبل ما يرد : يالنذل......
وما رد عليه وفر التلفون فالسيت الوراني
سهيل استهم ع ولد خالته وينه ليش ما يرد عليه ..قبل شوي كان وياه فالخيمه.
اما منصور ابتعد وااايد عن مكان العزا مع انه ما يعرف وين يسير بس المهم انه يبتعد...ما يريد يكلم او يسمع حد....معصب فوووووول
وسهيل للحين ثالث مره يدق ومنصور ما يرد...
سلطان:هاااه سهيل عسى ماشر...
سهيل انتبه:هاه ...لا والله ماشي
ناصر:سهيل شوفيك...شي صاير
سهيل ابتسم وقام عنهم:ههههههههههه لا لاتحاتون ماصار شي...
وطلع عنهم وتم يتمشى ويدق ويطرش مسجات لمنصور
سهيل:اوووف يا ربي شو فيه ليش ما يرد علي...انا متأكد منصور ما يسوي جذاك إلا اذا... (ويقاطعه)
عبدالله:خير سهيل ...منصور شوفيه؟؟؟
سهيل:ما اعرف بس ادقله ما يرد عليه....بشوف بدق حق عنود بتخبرها.....
عبدالله فهالحظه خاطره يسدح سهيل ويدوس ببطنه...كيف يقول اسم خطيبته ع لسانه لا وبعد بيتصلها يستفسر....
عبدالله فخاطره:دمارج يا عنود لو رديتي عليه...
.................................................. .......................
سرحانه في عالمها الخاص وهيه في وسط جمعت البنات وتلوم عمرها على الكلام الي قالته وتقول اكيد انها جرحت منصور
ميره في خاطرها : الحين شوه بيقول عني منصور ... صدق اني غبيه ليش انا اخترش يوم اكون ويا البنات ولا اهتم من الباقي ولا اراعي شعورهم
بس انا ليش جيه مهتمه من شعور منصور ... يمكن لانه ربيع اخويه بس واخو ربيعتيه ... ما ادري ما اريد افكر فيه جيه بس هوه الي يفرض نفسه عليه ... تعبت خلاص ... آآآآآآه تولهت على دبدوبتي الصغيره (شموه) وليش انا ما اتذكر شموه الا يوم افكر بمنصور … ههههه يمكن لانها هيه الي جمعتني ويا منصور … آآآآآه يا منصور .. ويقطع عليها افكارها صوت منى وهيه تقول
منى : ميروووووووه … وين عنود تلفونها حشرنا من كثر ما يصيح …
ميره : ما اعرف وين راحت بس يمكن راحت ويا روضه تراويها البروجكت مال الكيمياء … انزين اذا حد من الشله ردي عليها
منى : اوكيك … وتشوف الشاشه مكتوب فيها <<سهول يتصل بك>> ومنى حليلها على نياتها ع بالها ربيعتهن سهيله وهو كان سهيل ولد خاله عنود
منى ترد : فديت انا هالصوت هلا والله بحبيبه قلبي…. يالخاينه اطلعين تلفون وتعطين العنيدي رقمج وانا اخر من يعلم … وين ايام الثانويه يوم كنتي تقولين فيها منايه حبيبتي والله اني احبج واول وحده بتاخذين رقمي … خلاص انا زعلت منج
ههههههههههههههه حليله المسكين سهيل صخ وهوه يسمع منى وهيه ترمس جذاك ولا عطته فرصه يرمس …بس واضح انها راده عتلفون عنود وعبالها ربيعتهن….وتم سهيل سرحان وهوه يفكر كيف ينبهها بدون ما يحرجها..
منى:سهيله وينج؟؟؟!!!
سهيل انتبه لها بس ما عرف شوه يسوي ….
منى : سهيله عنوني شفيج ما تردين عليه ؟؟
سهيل يحاول يغير صوته عسب تتحسبه بنت : ههههه لا فديتج وياج ... الا وين عنود عنج ؟؟؟
منى مستهمه على سهيله (سهيل) : سهول حبيبتي انتي مريضه ...
سهيل حصلها فرصه عسب ما تعرفه : هيه
منى : سلامتج ما تشوفين شر قلبي ... بس الصوت صاير يروع مب صوت سهيله الشجي هههههههه
سهيل : هههه فديت انا قلبج ... ههههه عاد شوه نسوي يوم مرضنا واخترب الصوت الحلووووو هههههههههه
منى : يله عاد نباج تغنيلنا بس ويا هذا الصوت ما اظن ينفع بيشردون كل الي قاعدين ويااااااانااااااااا خخخخخخخخخخ
سهيل : ههههههههه خلاص عيل حبيبي انا بخليج لانه امي تناديني…………….
منى : الله وياج ... بااااااااباااااااااااااو
سهيل : بااااااااااباااااااااااي
منى:اقووووووول سهلوووه لحظه يت العنيدي تبينها
سهيل:خلاص فديتج عطيني اياها...
منى:اوكييييييييييك...
منى تمد لعنود:عنووود هاذي سهيله الريامي تبيج...حليلها ميهوده لو تسمعين صوتها يروع....
عنود استغربت وفخاطرها منو هاي سهيله الريامي وخذت التلفون وحطته ع اذنها.....
عنود:مرحباااااااااا
سهيل:اول شي طلعي من المكان وسيري بعيد عنهن
عنود اتفاجأت كيف منى ترد ع سهيل...ومنوه هاي سهيله الريامي...
عنود:لحظــه...
ابتعدت عنود عنهن وراحت صوب الحوش...
سهيل:هههههههههههههههههههههه ما اروم امسك عمري من الضحك............
عنود:عنلاتك انته ما تستحي فهمني ليش تضحك...ولا والله بدفنه فويهك...
سهيل:ايه يالعنز رفجه خبريني منوه إلي ردت عليه
عنود:عنز فخشمك يالهيس.....وسكرت فويهه
وتوها راده داخل........
..............:عنــــــــــــود
افترت عنود وراها تشوف مصدر الصوت انصدمت يوم شافته....
عنود باستغراب:عبـــــدالله؟؟؟!!!!؟؟!!!؟!!!

^.^
^.^
تتوقعون شو رده فعل عنود من شافت عبدالله؟؟؟؟

وعبدالله شو بيسوي اذا درى انها عادي ترمس سهيل ولد خالتها فالتلفون؟؟؟

ومنصور شو الحال عليه؟؟؟؟

وسهيل شوه بيصير حاله بعد ما كلمته منى ؟؟؟

انتظروووووووووني فالجزء الثالث عشر

[/align] __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
عندما لاترى فى الحياه غيرك ... انت وحدك	محروم.كوم	منتدى أخبار المواقع والمنتديات العربية والأجنبية	0	09-28-2009 03:30 AM
كل شي يهون عند الحريم الا هذه!!!	راعـــ الــحــب ـــي	الإستراحه العامة	28	09-19-2009 07:02 AM
كله يهون عشان خاطره	محروم.كوم	منتدى أخبار المواقع والمنتديات العربية والأجنبية	0	07-13-2009 10:30 AM
كل شي يهون عند الحريم الا هذه!!!	محروم.كوم	منتدى أخبار المواقع والمنتديات العربية والأجنبية	0	06-07-2009 02:40 AM
يهون عليك ....	أمير الحزن	شعر و خواطر	4	05-31-2008 07:51 PM