النظره الشرعيه للولد مو لأأمه .....

راما · #1 06-30-2009, 01:57 PM

السلام عليكم ورحمة الله وبركـاته

موضوع أعجبني

وحبيت اطرحه لكم هنا

وأضعه على طاولة النقاش ...

اليوم بقول لكم قصة وحدة من البنات

بس هذي القصه انا متأكده انها حاصله في كل بيت فيه بنت في سن الزواج

و اخوانا الشباب ما حسو لا فينا ولا في خواتهم

و كل ام حاسه ببناتها بس احساسهم مايغير شي بالموضوع

مابي أطول عليكم بدخل بالقصه على طول

ام عبير اتصلت عليها حرمه تخطب لولدها خالد

و تمدح فيه و تمجده كأنه أحسن ولد في العالم

وتسئل عن عبير تقول :

والله يا ام عبير يقولون بنتك عبير حلوه صدق؟؟

ام عبير ترد :الحمدالله بنتي جميله و مايعيبها شي

ام خالد : عساها طويله ؟ عساها بيضاء؟ شعرها ناعم ؟

كيف جسمها

بالله وصفيها لي

ام عبير تحاول تجامل وتمسك اعصابها

ام خالد : ها يا ام عبير متى يناسبكم نجي نشوف البنت !!

ام عبير: والله يا ام خالد عبير تفضل ان الولد يجي وبعد مانسئل عنه هو يشوفها

ام خالد : وشوووووووو من جدك اصلا البنت مالها راي الشور شور اهلها وانا لازم اشوف الي ولدي بياخذها يناسبكم باتسر؟؟

ام عبير برد لك بكرا

تنتهي المكالمه وتنادي الأم بنتها وتقولها ها وش رايك موافقه

عبير : على ايش؟

الأم :على الولد

عبير : لا شفته ولا عرفت عنه شي وشلون اوافق

الأم :خلاص بواعد اهله وشوفيهم

عبير : وش ابي بأهله باخذه هو ولا اهله

و بعدين فكينا من سالفة الأهل احنا اتفقنا اي موضوع يكون بينا وبين الولد على طول

انا ماابي اعرض نفسي على الحريم انا انسانه مو ناقه مميزه جايين يشترون و البيع ل أعلى سوم

كم مره دخلت على حرمه و حرمه يجووون ساحبين خواتهم و بناتهم وقهوه وشاهي و معجنات وحلا وكركره والفرجه بلاش

وبعدها يروحون ولا نعرف ردهم

خلاص انا مليت انا انسانه عندي كرامه و مشاعر و احاسيس مابي هذا الوضع يمه خلاص

الأم مصر على انهم يجوون وش تسوي تبي الستر لبنتها !!

عبير تستسلم زي العاده

بعد ماقالت لها امها جهزي لبسك مانبي لا بنطلون زي اول مره يمكن كان هو السبب

ولا تنوره قصيره زي ثاني مره

و شعرك لاتخلينه كيرلي هذولي يحبون الناعم

و دهني بفكس خلي لونك يفتح تراهم يحبون البياض !!!

عبير جوابها !!لاتعليق

تاخذ عبير جوالها وتكلم صاحبتها ساره

و تطلب منها لبس يناسب اصحاب المعالي لأن ملابسها ماتتوافق مع المقاييس العالميه للأم السعوديه

و يعلنون حالة استنفار في البيت لأستقبال الضيوف الموعودين

الأطفال يرسلونهم لخوالهم و صياني الحلا و الموالح تتجهز و البخور يتولع

و يجون الضيوف و تستقبلهم الأم

طبعا ام الولد و توابعها اختها بنتها بنت خالتها اللي يجي

ماهي الفرجه بلاش

بعد السوالف و القهاوي

تدخل عبير

و العيون تراقب

داخله وهي كأنها تقول شوفوني عساني عاجبتكم

عساني مطابقه للمواصفات و المقاييس !!

تطلع و يطلعون وراها

من ذلك منزل الذي احتفاء بهم وكرمهم وعرض لهم سلعه من سلعه والابن ينتظر هاه عساهم جازتلكم

(( و ((اه بس يامخفه لو بتشتري سياره انت اول من يحددها
يمر يوم يومين ثلاث اربع ولاحولك احد
محد دق ولاحد اتصل وبنت تقول خلاص ميئوس منهم
وتمر الاشهر والبحث جاري مابين بيوت خلق الله مافيه بيت ماطقوه ولافيه عائله ماشوفوا منها
والابن في انتظار

و البحث جاري و المشاعر مالها حساب عندهم

البنت تبدا توسوس وش فيني

انا شينه؟

طيب الكل يقول عني حلوه؟

ياربيه

معقوله اعنس؟

معقوله محد يبيني!!

طيب ليه ما ردو !!

ويبقى السبب مجهول

و عبير خاطرها مكسور

مين يواسيها !!

امها الي ضايق صدرها اكثر منها على كسرة خاطر بنتها ولا الخطيب المجهول !!الي يمكن حتى هو مايدري ان اهله جايين يشوفون له

طبعا محد رح يواسيها

صديقاتها مثلها ماهما سعوديات بعد و النظام ماشي عليهم

يعني لا تشكيلي واشكيلك ولا تبكيلي و ابكيلك

ولا صاحبتها اللبنانيه عشان تضحك عليها و تقولها لك شو هالتخلف

..............

يا ناس حرام عليكم

الله و رسوله ما قالو كذا

ليه أجازو النظره الشرعيه لأن الولد نظرته غير عن امه

مره حريم رايحين يشوفون وحده لولدهم و والولد هو الي موديهم

لمى شافه الأبو عند الباب سلم عليه و دخله

واعجب بأسلوبه

وقاله بنادي لك بنتي

و شافها وشافته

طلعو اهله من بيت البنت وهم يقولون

البنت ما تصلح شينه

الولد قال الا تصلح و انا شفتها و اعجبتني

و تزوجو و انسترو

ياناس احنا اسئلو عنا وبتجيكم مواصفاتنا
بعدين يجي هو وشووله تجون
انا باخذكم واالا باخذ ولدكم
ياعالم متى تحسون بهالوضع تراه جدا مزري ومدمر نفسيا وغير لائق اخلاقيا

ياناس حسووووا
ليش مانعالج هاالمشكله

لو كل بنت ترفض ان الأهل يجون و تشرط ان الولد بس الي يشوفها رح يتغير الوضع

التعارف بين الأهل يتم ان شاءالله اذا تمت موافقة البنت و الولد وشافو بعض
كل وحده لازم تفكر في غيرها اخوك اذا جاء يخطب حاولي تفتحين مخ اهلك
الي يبغاك يجي يشوفك هذا الجاد والي شاريك وشاري اخلاقك ونسبك
واذا شافك ولد كملت وصارت لمظهرك ولو ماصار شئ فخلاص القرار صدر من صاحب الشان مو من 3 الوكلاء الي يجون

وانت ياعريس الغفله ليه ما تقرر بنفسك كم وحده ووحده راحت عليك وكان ممكن تسعدك و تسعدها و تعجبك و تعجبها بس ذوق خالتك ولا امك ما كان نفس ذوقك

انت الي بتتزوج ولا اهل البيت !!

ماقول الا حسبي الله عليهم جعل الي سووه في بنات ناس يشوفونه في عيالهم يارب ياكريم

حسبي الله على كل حرمه ام او ولد ما يفكرون بأحساس البنت و ماخذين السالفه تمشي وسعة صدر وطلطله على بيوت وبنات الناس

حسبي الله ونعم الوكيل على كل وحده ما تفكر بشعور البنت الي خاطبتها

حسبي الله على كل من تسول له نفسه العبث بنفسيات و مشاعر الفتيات المسلمات __DEFINE_LIKE_SHARE__

ريـــف.. · 06-30-2009, 02:22 PM

يسلمووووووووو راموو قلبي ..

الصراحه الموضووع مرره قووي وحساس لعض البنات ..

بس الحمد لله عايلتنا الولد لازم يشووف البنت حتى لو رفض يشوفها ابو البنت يصرر
لان هذا حق ومحلل شرعا

يعطيك العافيه قلبي .. __DEFINE_LIKE_SHARE__

بنت الاوغاني · 06-30-2009, 07:19 PM

مشكورة على الموضوع الحلو

و انا بقولج ان مب كل الناس جي

تقبلي مروري __DEFINE_LIKE_SHARE__

Дјறàl Диsǎήһ · 07-10-2009, 06:51 AM

السلام عليكم ورحمة الله وبركاته

انا ضد ان الام اهي اللي تختار

اصلن منو بيعيش ويه البنت الا اهو

تلقين الام مافيه اي شي من مقومات الجمال وتطلب ملكة جمال عكس مواصفاتها تماما

وانا مايهمني رايي امه اهم شي اهو

وفيه قصص وسوالف كثيره مثل اللي ذكرتيها

و...و...و...لوتكلمت مراح اخلص

والله يعطيك العافيه

وعساك عالقوه

..*اجمل انسانه*.. __DEFINE_LIKE_SHARE__

the_small_lady · 07-10-2009, 07:05 PM

السلام عليكم ورحمة الله وبركاته

انا في هالموضوع جدا مؤيده لابعد حد (النظره الشرعيه)

لان نظرة الام غير عن نظرة الولد وعموما هالشي ان نظرة الرجل غير عن نظرة المرأه

والاذواق غير وانا سمعت ب قصه حاصله في مجتمعنا السعودي

انو في واحد ماارررااا يتشرط ويوصف وابيها كذا وابيها كذا وطلبات مدري شلون

وكل مره يخطبون له خواته يلقون انه ماتصلح له الى ان جا يوم وخطبو بنت ناس ومستوره وشافوها

مارررا عاديه وخافو ان اخوهم يشوفها ويتذمر او يفشلهم ف طلعو وكلمو اخوهم عن البنت وقالو له ماتصلح لك ابدا

قال انا ابي اشوفها بالذات هالبنت ابي اشوفها

وخافو وشافها وعجبته لابعد الحدود وقال اذا ماخذتها مابي غيرها..

(هذا اكبر دليل ان المراه نظرتها غير عن نظرة الرجل)

يسلموو

والعذر للاطاله

تقبلو مروري

بانتظار جديدك __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
هديتي للولد فايروخ 27	محروم.كوم	منتدى أخبار المواقع والمنتديات العربية والأجنبية	0	07-20-2010 01:20 AM
انتبه للولد؟؟؟؟؟؟؟؟؟؟؟؟؟	محروم.كوم	منتدى أخبار المواقع والمنتديات العربية والأجنبية	0	06-11-2010 02:10 AM
ملك الطرق الوعره Bigfoot 4X4	محروم.كوم	منتدى أخبار المواقع والمنتديات العربية والأجنبية	0	05-19-2010 11:30 PM
آآآآه ~	ڛڹېڪڒ ٱمٱڒٱٿېۃ	شعر و خواطر	0	03-19-2010 09:22 PM
ماذا بعد النظره الشرعية	سلمى	الحوار والنقاش - الرأي والرأي الآخر	7	01-10-2008 05:04 AM