قصة هوانا

Gmorh · #1 01-14-2015, 10:00 PM

ببدأ قصتي وانا اسمع نوال الكويتية يارفيجي،قصتي مع إنسان دخل حيآتي وقلبها فوق تحت يمين شمال ما توقعت بيوم آني بحب وانا ماعرف غير حب آبوي وآمي،حب خذى كل حياتي ومن البداية بقولكم قصتي.
سجلت فانستقرام وصار عندي حساب وصرت أسوي فلو حق ربيعاتي وأهلي وكنت أدور على وحده من ربيعاتي عشان أضيفها عندي وفجأة شفت انستقرام واحد وكان برايفت مادري ليش سويتله فلو لا إرادي قلت خلني أشوف صوره فضوول والفضول يذبح،عقب دشيت مره ثانيه اجيك ولقيته مبطل وانا ما صدقت ع الله اشوف صوره من فضولي كان مسافر امريكا من الصور اللي أشوفها اقول فخاطري شكله مبتعث يدرس برع نفس باجي الناس وعقب تميت أشوف تعليقات الناس والكل يمدحه قلت هاا شنو سالفته لاعب ولا شنو!!!، جان انا اكتب كومنت ع صوره من الصور وللحينه اذكر اول تعليق كتبتله (جمالك أوفر وانا ماحب الأوفر)، وعقب كم يوم ياني رد منه وكاتبلي (شكرن) انا تميت اضحك ع العموم انا كنت ادرس فالجامعه وماكان هالشي يهمني صور انستقرام وكومنتات كنت عايشه حياتي ويا ربيعاتي اطلع وارقد وانش ولا هامني شي،وهو عايش حياته ويا ربعه فأمريكا ولا هامنه شي،عقب دشيت فيوم من الأيام الانستقرام لاني انزل صور وأشوف منو مسويلي لايكات وجي، جان اكتب كومنت ثاني وثالث وعاشر والكومنتات كلها استهبال ع صوره ولا كومنت كتبته كان فيه كلام حلو او شي،و هو كان يستغرب يقول فخاطره هذي ما اعرفها ولاشي بلاها جي تكتب كومنتات جنها تعرفني! و مرات اقعد بروحي وأقول هي اول وحده تكتب كومنتات وياليتها تمدح كلها انتقادات ! شسالفتها وهي الوحيدة من بين 100 كومنت أيلس أفكر فالكومنتات مالتها!!!!!،(هو من النوع اللي مايرد ع الكومنت)، وبعدين انا ماكنت أفكر وايد اكتب كومنت واطلع من الانستقرام ما أيلس اتريا رد او شي عندي أشياء اهم، عقب هزاع يقول فخاطرهخلني ارمسها دايركت الفضول ذبحني او يمكن وحده تعرفني خل اسئلها وليش تكتب جي)،وتميت يمكن شهر او اكثر ما ادش وعقب دشيت صدفه ولقيت رسايل وايد فالدايركت من ربيعاتي وخواتي ومنه!!!!!!!!!! قلت انا:هذا شيبي ليش مطرش دايركت!! و دار بينا حوار، هزاع: هلا، بدور:ما كتبت حرف،هزاع:شحالج، بدور: ولاحرف للحينه( اففف شهاللزقه شيبي! خل أرد أحسن)، بدور: اهلين الحمدالله خير شتبي في شي؟؟، هزاعبسم الله هذي شفيها من أولها فالفيس) انتي كمونتاتج غريبه ومميزه تلفت النظر، بدور: اووووه ههههههههه(اوه شت اوه شت ياي يسئل وانا فالفيس عطيته) هيه،هزاع: انتي شسمج؟، بدور: ازقرني قموره، هزاع: اوكيه، وتمينا نسولف سوالف عاديه لين جي نص الليل وانا أسير ارقد لانه هو توقيته غير عن توقيتنا فالبلاد،عقب هو تم ينزل صور وانا اقصف جبهته كل يوم وتمينا نرمس دايركت،ومرات يدش يكتب انا أكون راقده ولا طالعه،هزاع: هلا وينج الووو الو وينج،ومرات ادش واطوف مره ومرتين وعقب كم يوم أرد،بدور: هلا سوري ارقد من وقت، هزاع: لا عاااادي انتي مزاجية متى ما تبين ترمسين،بدور: ايه مزاجيه هههههه وعقب طلعت وهو طلع،ومادشيت مره ثانيه كنت مشغوله،(جان ايوولي ناس يبون يخطبون و وافقت وكنت وايد مشغوله ازهب حق الملجه وجي)،(هزاع كان يشوف صور الملجه والكوشه ويسوي لايك ويطلع، ماكان يرمس)،عقب الملجه بعد أسبوعين او اكثر لقيت مطرش لي كلام فالدايركت،هزاع: هلا والله شحالج ووينج، بدور: ماقدر ارمسك انا مخطوبه أسفه ،هزاع: الله يوفقج ويهنيج يارب ،بدور: عقبالك،من وقتها ما رمسنا بعض هو كان فأمريكا وانا كنت ازهب لعرسي ومشغوله وكل يوم اطلع ماكنت افضى أبد ونسيت كل شي وعرست وسافرنا شهر العسل لبنان أحلى شهر مر بحياتي وعقب ردينا لبلاد ونسيت الانستقرام وهزاع وكل شي كنت اعشق شي اسمه سيف(سيف هو ريلي) و فأول يوم فرمضان تهاوشنا انا وسيف وتميت أصيح لين سرت بيت أهلي وقبل العيد بأسبوعين رديتله،عقب عيدنا وجي و ع شهر 9 كنت موت تعبانه واتالم وأقول لريلي انا تعبانه وديني قال انتي تدلعين ما فيج شي وشربني بندول وعصبت وسرت عند أهلي لانه مايهتم فيني أبد شغله اول عقب أهله وآخر همه انا!!!!!!،ع طول سرت المستشفى وطلعت حامل من شهرين وعقب أسبوعين طحت فالمستشفى ورقدوني وقالولي سقطتي انا اهنيه انهرت تميت 3 ايام وهو ادق عليه ولا عبرني ابد ولا سئل عني أبد من هالموقف بذات فقدت الأمل منه و وايد يعذبني وأسكت بس لهنيه وبس انا تميت عند أهلي ما يصلح زوج كيف بيصلح أب!!!!!!!،انا عشت حياتي صرت ادرس واشتغل،و رديت للانستغرام شفت صور هزاع أتأمل فيها واذكر سوالفنا حسيت مرت سنين ودي ارمسه وأقوله شصار فحياتي ودنيتي شكثر تعذبت وصحت صياح ودي اشكيله ودي بس اقرأ حروفه عقب قلت فخاطري( لا بدور انتي معرسه لاتغلطين لاترمسين هزاع لا بدور وصوت ثاني يقولي ودي أتمنى بس لو اعرف أحواله) عقب رمسته ع الدايركت وكل يوم لين الفير وعقب حولنا ع الكيك يوم كامل لين الساعه سبع الصبح أتم ارمسه وهو يكون عنده الساعه تسع فالليل وكل يوم نفس الحاله سوالفه كانت تضحك وممتعه وجميله وكنت احب ارمسه وااايد كان ينسيني كل شي كان يتقرب مني وانا أتقرب اكثر كان يحاول يعرفني ويعرف اللي أفكر فيه وانا كنت افهمه وكنت فاهمه شخصيته نفس شخصيتي مزوح واستهبال وكل الوقت ضحك وعقب صار يطرشلي ع لسناب الهبل اللي يسويه فأمريكا كنت اضحك وبنفس الوقت اذكر اللي سواه سيف فيني وأكرهها مليون مره فالثانيه، وكل سوالفه أتينني كله صار يجنني وعقب كم يوم تميت أقوله عن ريلي وشنو سوى فيني وكان ينصدم كان يقول (كيف انا مب فاهم كيف ريال يسوي بحرمته جي ما عنده احساس!!!!) ومرات كنت أقوله كل شي يصير وياي مايمل أبد ويسمع ويتم يرمس فسالفه انا مرات استغرب انه مايضايج ولا يقول شي،انا حسيت انه فيه شي غريب فيه شي مميز،يتبع.... __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
Traidnt.Net : مدونة هوانا للبيع	محروم.كوم	منتدى أخبار المواقع والمنتديات العربية والأجنبية	0	10-27-2014 05:30 PM
تخيل لو تفارقنا وعشنا في هوانا أغراب00؟	‏غرور اماراتيهـ	الشعر المنقول	6	03-20-2009 11:27 AM
.: نهايــــه هوانا .: ليوسف محمد :.	روحـي فداكـ	اغاني , شلات , هبان	4	10-11-2008 12:13 AM