قرب من اذني واهمس بكلمة احبج

Ra3it M3Ani · #1 12-31-2014, 11:38 PM

قرب من إذني واهمس بكلمة احبج

السلام عليكم هالمره الثانيه الي انزل فيها رواية بس الاولى ما كملتها لانها ماكانت مرتبه وغيره المهم عندي هالرواية اتمنى تعيبكم حطيت اشياء اغلب البنات يحبنها بنزل البارت الاول الحين والثاني عقبه بربع ساعه او اقل ولا تنسون التعليقات

كانت يالسه تفكر وقطع تفكيرها صوت بنت خالتها ظبية

ظبية: سارة لا تتوترين ... اليوم ليلة عرسج اضحكي ولا تصيحين مول بس ابتسمي ولا تخلين الابتسامة تخوز عن ويهج
سارة هزت راسها بمعنى اوكيه لفت يمين ويسار ادور حد وقالت: وين امايه؟؟!
موزة ربيعتها: عند الباب تسلم عالحريم
سارة مسكت ايد اختها فاطمة: فطوم والله اني خايفة
فاطمة: من شو خايفه؟؟ خبريني
ظبية: لا والله ليش تخافين ما في شي يخوف اذا قصدج انج تمشين والكل يطالعج وتشوفين الناس تبتسم وتصيح وتاكل وانتي لا ترا عادي والله
سارة طالعتها بنظرة: مشكورة
موزة: الحين انتي تواسينها ولا تزيدينها؟ ساروه قوليلي ليش خايفة؟
سارة: خايفة انه ما يحبني انتوا كلكم تعرفون انه من خطبني لليوم لا كلمني ولا شافني احس انه مغصوب عليه اخاف ما اقدر اكسبه واعيش عيشه مب متهنيه فيها
كلهم سكتوا حسوا ان كلامها منطقي
بس تكلمت فاطمة وقالت
: انتي مب اول بنت تنخطب وتملج وتعرس وما رمست ريلها ترا عقب العرس كلهم حبوا بعض وانشالله انتي بعد بتحبينه وبيحبج
سارة تنهدت: انشالله
دخلت عايشه اخت ظبية يوم شافت سارة: ياااااحيااااااااتتتييي طالعه جميلة خاطري الوي عليج عادي؟!
سارة ابتسمت: هيه عادي
تقربت عايشه بتلوي عليها الا وتوقفها ظبية: اصبري شو تلوين عليها بعدين بتصيح وبتخرب المكياج تراها ما تقهر تعرفينها حساسه
عايشه: اووهوووو والحل يعني
ظبية : عقب ما تطلع من الصالة
عايشه: اوكيه
دخلت ام ساره : يله بنات طلعوا عقب شوي بتنزل
بدا قلب سارة يدق بقوة تحس ان قلبها بيطلع برع
كلهم طلعوا وتمت ساره وامها
ساره بنبرة خوف: ام..امايه جاسم بيدخل؟
ونزلت عينها طالعتها امها ومسكت ايدها
ام سارة: هي بيدخل بس لا تخافين من يشوفج بيعشقج ماشالله انتي تطرحين من السما ولا تخافين بنتي بتتعودين عليه وبتعيشين عادي اعرف انج تفكرين انه ما بيحبج ولا شي ثاني الي مكتوب بيستوي
وحطت ايدها عراسها وتمت تدعي وتقرا قبل لا تنزل
.
.
نعرفكم على الشخصيات الي قلناهن
.
.
ام سارة : 45 سنه جميله الي يشوفها يعاطيها اصغر من سنها عيونها شهل وطيبة والكل يحبها

ابو سارة (صح ما ذكرناه بس نقوله الحين احسن): 47 يوه طيب وكلمته تمسي عالكل له هيبه وصدقوني محد يحب يشوفه معصب يدخل الي يخصه ومايخصه فالموضوع اذا كان معصب بس طيب فنفس الوقت ويحب عياله له مباني سكنية عنده فلوس

فاطمة: 21 سنه ما عرست لانها تبا تكمل دراستها جميله عيونها شهل وكبار بيضا من الخاطر شعرها لتحت خصرها لونه بني

سارة: 18 سنه عيونها بنيه بياضها حلو شعرها لون بني من فوق غامج لين يوصل لأطرافه فاتح عطاه لون جميل عيونها لا صغار ولا كبار ولونهن بني غامج بس رموشها طوال ونظرتها جميلة فيها خاصة اذا خلت نظرتها ناعسه خصر ذبوحي وجسمها اي ريال يتمناه لا طويله ولا قصيره طيبه وبنتعرف على صفاتها بعدين

ام جاسم: 41 جميلة عيونها رصاصيه وولدها ماخذ بعض من جمالها طيبة وفيها حكمة وبتتعرفون عليها اكثر فالبارتات الي عقب

جاسم: 21 شوي طويل معضل شوي وعضلاته حلوه متناسقه ويا جسمه عيونه رصاصيه ناعسه (ياخي تخبلل ☺☺)) مغرور ويغتر بجماله ما يثق بالناس بسرعه يكره كلمة احبك وبنعرف عنه وعن طفولته فالبارتات اليايه

ابو ظبية: ريال عود بس مايبين عليه وشديد ع الكل الا بناته وغغاوي وبناته ماخذات الحلاه منه
ام ظبية: حرمه ملتزمه ووقت السوالف جنها وحده من البنات وغاويه
ظبية: 19 اكبر عن ساره بكمن شهر جميلة عيونها عسلية سمرا وسمارتها حلوه شعرها لخصرها ولونه اسود مثل سواد الليل جسمها خطير
عايشه: 17 مثل اختها تقريبا بس هي امتن عنها شعرها لتحت جتفها ولونه بني وبيضا وملامح ويها مثل اختها الخشم الصغير والفم المحدد بس عايشه فيها حبة خال على فمها صوب اليسار وظبية اليمين

موزة : 18 سنه ربيعة ساره الروح بالروح طويلة جسمها مرتب شعرها لتحت جتفها لونه اسود لون عيونها بني فاتح حياتها مرتبات لونها حلو

(ادري البعض سحب عالتعريف مثلي احيانا بس اقرا العمر واسحب عالباقي احسه ملل واصلا بتعرف على اشكالهم ومواصفاتهم فالرواية)

ظلم المكان وسمعوا جملة (اللف الصصلااااة والسلاااااام علييييك يا حبييييب اللللللله محممد) واشتغلت اغنية دخلت عليها ساره من الباب تمشي بشوي شوي والكل العيون عليها والمكان جدامها فاضي ماغير تشوف الهيال يبتسمون ويضحكون ويفرون ورد عالطريق وفجأة يت حرمة وخوزتهم عن الدرب ووقفتهم شافت الي حولها وكانت تفكر فشي واحد تبا توصل للكوشة لانها تحس انها ما تقدر تكمل من كثر ماهي متوتره ركبت الدري بمساعدة امها وخالة ريلها وتشوف حريم يقربولها يعدلون فستانها من ورا وصلت لآخر درية ومشت الحين كانت اعلى الناس وتقريبا تشوف الكل من مكانها عيونها تتحرك من حرمه لبنت لحرمه ادور حد شافت يدتها تبتسم الها وكبرت ابتسامتها يوم شافتها تمشي وهي مره تشوف يمين وتبتسم لحرمه حرمه ومره يسار وتبتسم لحرمه حرمه طاحت عينها على ثنتين الي هي اختها فاطمة وموزة ربيعتها كانن لاويات عبعض ويصيحن خفت ابتسامتها وتحس عمرها شوي وبتصيح بس شافت ظبية الي اشرتلها ان تبتسم ولا تصيح واشرتلها بمعنى ياويلج لو صحتي هني كبرت ابتسامتها على حركتها وعلى هالحال تشوف حد يصيح وحد يضحك وحد ينصحها من بعيد لين وصلت الكوشه

تكلمت وغبنتها واصله لعيونها: بتوله عليها الحيوانه عرست...وانا فرحانه عشانها بس.. ب ب بس (بدت تصيح) بس صدق بفتقدها

يت فاطمة ولوت على ظبية وهدتها عشان ما تصيح زياده
ظبية عشان توقف صياح تكلمت: انتي صحتي بعد وخربتي على اختج كانت بتصيح بس الحمدلله انا كنت مستحمله وهتددها ان صحتي بعمرج
ضحكت فاطمة: قومي نسير الحمام نشوف المكياج اذا اخترب ول لا؟ عشان نسير نسلم عليها
هزت ظبيه راسها بمعنى هيه ويوم لفن وراهن عشان يسيرن شافن صف حريم يصيحن الي هن خالاتها والي يقربلها وربعها الي ين
يت يدت ساره وهدتهن وقالتهن ما يصيحن عشان ساره ما تصيح وترتبن عشان تسيرن تسلمن عليها سمعن كلامها وكل وحده بدت تهدي عمرها
ام ساره: سارة ابتسمي لا تصيحين امايه لا تخافين لازم تفرحين انا فرحانه بعرسج الحين انتي بعد لازم تفرحين
ساره عشان امها طبعا: امايه انا فرحانه بس شوي متوتره
حرمة خال ساره (فاطمة): بس متوتره الله يهديج وانتي من دخلتي من الباب الا تنتفضين جنج شايفه يني
ضحكت ساره ضحكه خفيف مثل (هه)

عقب دقايق ين البنات سلمن عليهت وحده وحده ومنهن من تصور وياها ومنهن من تم يسولف وياها لين لين هدت وحست ان الامر عادي شوي
بس ردت تتوتر وبقوه بعد يوم سمعت حرمة تتكلم من الميكروفون وتقول
: الريال عقب شوي بيدخل الكل يتحجب
لو سمحتوا الكل ينزل من عالكوشه ما عدا ام المعرس والعروس الريال عقب شوي بيدخل وبند المايك
الكل نزل من عالكوشه وبدن كل البنات يتحجبون الا الي يقربون له طبعا خالاته وامه وعماته وما يحتاي نقول عن العيايز من يوم يومهم متسرات (الله يحفظهن)

دخل المعرس وكانت تمشي عداله خالته رفع راسه وشاف ساره من بعيد وابتسم مره يشوف امه وامها ومره هي لين قرب ومنها وشاف ملامحها وشكلها زين
جاسم (الحمدلله اثاريها طلعت جميلة) وابتسم وتمت عينه عليها لين وصل عندها حب راسها
وتكلم بصوت محد يقدر يسمعه غيرها: مبرووك عليج انا
ساره تحس ان قلبها بيطلع من مكانه من كثر ما هو يدق بقوه
وتوترت من قربها منه كانت ايده تلامس جتفها
وعقب موت طلع منها كلام: ا..الله يبارك فيك
ين الحريم الي يقربون للمعرس ويسلمون عليهم ويباركون لهم ويتصورون وياهم
.
.
دقايق وقالوا لهم يقطعون الكيكة ساره هني تحس قلبها خلاص بيطير
ساره (كيكة ..كيييكة يعني بيمسك ايدي وبنقصها بيأكلني وبأكله وبشرب والكل يطالع وفوق هذا نتصور بعد)
مسكها وبغت تموت مشاها لين وصلوا عند الكيك وعطوهم سجين شل السجين ومدها لساره عشان تمسكها ساره تمت اطالع ايده وما كانت موول اطالع عينه ما كانت تبا تحتك به عقب ثواني مسكت السجين وابتسم جاسم يوم شافها ترتجف مسك ايدها وهني حست بقشعريره اول مره ريال غريب يمسك ايدها حس بقشعريرتها عرف انها متوتره وخايفه وضغط على ايدها بمعنى لا تخافين ( قلنا فيه غرور بس في جانب طيب منه) فتحت عينها على وسعهن وفخاطرها( ضغط على ايدي ليش لا يكون انتبه يوم اقشعريت اكيد حس لانه كان ماسكني والحين جنه يواسيني ياللهي بصيح فشله)
قصوا الكيكة بعدين شلوا السجين وقصولهم قطعتين وحطوهم فصحنين وعطوا كل واحد صحن وشوجه
ساره طالعت امها وامها فهمتها وابتسمتلها واشرت لها بمعنى عادي لا تتوترين
ساره( ما عرف ااكل حد ولا احب حد يأكلني كيف اسويها ياربي ساعدني)
كانت تشوف الكيكه وتفكر وقطع عليها تفكيرها ايد جاسم الي قربت من ويها وفايده شوجه فيها كيكه هني بلعت ريجها شافت امها امها اشرتلها كلي
فتحت فمها شوي ومد جاسم ايده وخلاها تاكل قطعة الكيك بعدين شل الشوجة ووطاها فالصحن وقالها بالعافية صدت ساره تحت وتمت اطالع الكيكه كل هذا عشان ما يشوف ويها وهي تاكل ومستحيه
ابتسم (لهالدرجة تستحي
حتى من دخلت من الباب ما رفعت عينها وشافتني شكلي بستغل هالنقطة فيها وبلعب وياها شوي ) كبرت ابتسامته وانتبهت له خالته (الي دخلت وياه للمعلومه اسمها عفرا اقرب خالاته له وتعرف كل صغيره وكبيره عنه عوضته وحسسته انها اخته مب خالته لانه ماعنده خوات) وعرفت انه فكر فشي خبيث وابتسمت وقالت فخاطرها الله يعينها

قصت قطعة من الكيكة ورفعت عينها بس ما كانت تشوفه كانت تشوف فمه وبدت تقرب الشوجه له وهي ترتجف عشان ياكل تقرب وفتح فمه شوي وكلها بعدين حطت الشوجة فالصحن ومدته لوحده من العاملات وخذته حست براحه يوم خلصت سالفة الكيك رفعت عينها وشافت كوبين فيهن عصير عصينية وحده من العاملات قربت ام المعرس وشلتهن مدت وكوب لجاسم وخذه وشرب منه وشافت ساره كانت ساره اطالعها وهزت راسها يمين يسار بمعنى ما تبا فهمت ام جاسم انها مستحيه فما اصرت عليها تشرب ووطته فصينية انتبه جاسم عالكوب وعقد حياته
مد العصير لأمه وكان شارب منه شوي شلته امه ووطته عالصينيه
طالع ساره ( تعرف ان حركتها مب حلوه ترد امايه وهي ماده ايدها ) رفع عينه يوم سمع حد يزقره بالخفيف صد صوب الصوت وشاف خالته عفرا يوم انتبه لها عقدت حياتها حطت صبعها السبابه بين حوايبها وردت حياتها عاديه فهم انها تقصد لا تعقد حياتك ورد حياته عادي
يت ام جاسم وام ساره وقالولهم انهم يسيرون الحجرة الحين عشان يصورون يعني يروحون
يت عفرا من وراهم ومسكت ايد ساره اليمين وايد جاسم اليسار وشبكتهم انتبهولها ساره بدت تستحي وحاولت تبعد ايدها عن ايده بشوي شوي بس هو ابعد ايده عن ايدها ورد يمسك ايدها بس هالمره شبك صبوعه بصبوعها هني زاد مستحى ساره وماقدرت تخوز ايدها وداها جاسم للباب ودخلوا داخل وساروا الحجرة ووفالحجرة كانت تترايهم المصوره عشان تصورهم
.
.
ظبية: ههههههههه
البنات: بسم الله شوبلاج
ظبية:لا ماشي بس تخيلت ساره وهي تتصور وياه وتذكرت شكلها يوم كانت تاكل وتأكله
ضحكن البنات
مريم ( 19 سنه ربيعة ساره بنتعرف عليها بعدين)
: لا لا انتن شوفن بس (شلت شوجة من عالطاولة وبدت تمثل انها سارة وكانت ترتجف وتقرب الشوجة من فم موزه موزه كملت وياها وبدت تمثل انها ساره وهي تاكل ) هني البنات ماتوا من الضحك
عايشه: شكلي بيود عليها هالحركة بس تصبر
اروى (17 سنه بنت خال سارة بنت فاطمة ربيعة عايشه الروح بالروح) تنهدت: اووه فيوم بكون مكانها وبدخل داخل وبتغصبني المصوره اسوي حركات مثلا الصق فيه احبه ولا تخليه يحبني اااه متى بيي هاليوم متى بعرس
الكل طالعها وضحكوا عليها
عايشه وهي تضحك: انتي قليلة ادب
اروى: هيه حلاتها قلة الادب هاذي
مريم تمت تصفق فايدها جنها تمسح التراب منها: لا لا البنت ضايعه ضايعه!!
فاطمة: الا منتهيه!!
الكل ضحك عتعليقهن دقايق وبدن البنات يروحن وحده وحده لين بقت فاطمة الي كانت تتريا اختها تخلص تصوير عشان تسير الها
.
.
خلصت البارت الاول يارب يعيبكم وانشالله بنزل البارت الثاني باجر وما بنزل الثالث الا اذا لقيت تفاعل عطوني رايكم فالرواية واتقبل اي انتقاد وبس مشكورين __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
تهنئة اختي( لعيون اختي جوري احمر )	فديتني والله محد قدي	تراحيب وتهاني	1	09-21-2013 03:06 PM
صوت الهواء فجر اذني	محروم.كوم	منتدى أخبار المواقع والمنتديات العربية والأجنبية	0	12-07-2012 12:20 AM
عيد ميلادي اليوم..انصحني بكلمة..انتقدني بكلمة	محروم.كوم	منتدى أخبار المواقع والمنتديات العربية والأجنبية	0	08-16-2011 01:50 PM
احبج .. احبج .. احبج .. دخييلج خذي رقمي ..!!..	سمرة وكلي دلع	الحوار والنقاش - الرأي والرأي الآخر	42	08-20-2010 11:36 PM
الحياة تبدأ بكلمة وتنتهي بكلمة	أمير الحزن	الإسلام والشريعة	3	07-23-2010 02:56 PM