السلام عليكم ورحمة الله وبركاته
مثل مأنتو شايفين المواضيع والأستفسارات اللي حاصله في هالمنتدى فيما يخص الساكتون الغازيه
وبالأصح
هيا ليسة غازيه واكثرهم يقول تتعبى غاز من يسمع كلمة غازيه وهذا خطا
وهيا تتعبى هواء عادي مضغوط
وكثرت الأسأله عن ميزاتها وعن قوتها وعن دقتها وعن كيفية تعبيتها

بما يعني الكلام والأسأله الحاصله انا نعاني من طفره في معلومات عنها فقلت بساعد باللي اقدر عليه
وهو أني أسوي موضوع أفيد بعض الأعضاء عن اسألتها في هذا المجال وأفيدهم بما أستفدت به
ولو انه شي بسيط بس راح اسوي اللي اقدر عليه

طبعاً انا شريت ساكتون فايروخ 100 من الرميح مقاسها 5.5

وهاذي صورتها



وكانت هي الدفعه الثالثه من بنادق فايروخ 100

والحمد لله جانا معها هديه أسطوانه هواء إضافيه مقدمه من شركة الرميح

وهاذي صورتها بعد الأستلام





وكنت ناوي على أسطوانة غوص اعبي البندق فيها بس ماحصلت اسطوانه زي اللي في بالي اللي هي كربون فايبر

كل اللي حصلتها صغيره ولاجازت لي من حيث سعتها بحيث انك لو تفللها لأخر ماراح تفيدك من حيث التعبئه
هذا طبعاً الأسطوانه الحديد اللي جابوها الرمايه صغيره ولادخلت راسي
وهاذي صورتها



تعبي لك البندق 200 بار مرتين و190 بار مرتين و180 بار مرتين ويبدا العد التنازلي للأسطوانه


واذا خلص هواء الأسطوانه يبي لك تروح لبنشري في الشفاء تعبيها من عنده
يعني مشكلتها كاثره بالنسبه لي مع انها ريحه اكثر من المنفاخ

فقلت باخذ منفاخ يدوي احسه عملي اكثر من الأسطوانه حقة الغوص
وبعد الفرفره في المواقع والتتبع لأفضل نوع منفاخ يدوي وتبين لي نوع واحد
اللي هو Hill Pump

وهاذي صورته



فكان سعره في أمازون بسعر 281 دولار
يعني بالريال السعودي تقريباً 1053 ريال
من غير الشحن
فتوكلت على الله وطلبته وبقيت على المتابعه للسلعه لمى وصلت للرياض وكانت المده 13 يوم
وهاذي صوره لشركة الشحن اللي جابته لي في حين استلام البضاعه



وهذا هو معي بالسياره بعد وصوله من السفر سالم غانم ههههههه



وصلنا للبيت وفكيناها من كرتونها وتم التركيب

فقلت ابين لكم بفديو احسن من الصور لتعم الفائده اكثر
وهذا الفديو رفعته على اليوتيوب




وتبين ان المنفاخ عملي لأبعد درجه أكثر من الأسطوانه بس انه قوي شوي وهذا مايضره بالعكس
يكفي انه عملي وتنفخ أي وقت ونفخت اسطوانات البندق الثنتين
وهاذي صورها



ولله الحمد تم تفادي مشكلة الهواء بالنسبه لي


هذا اللي حبيت ابينه لكم من تجربتي مع الهواء ومشاكل عدم توفره بالنسبه لنا بالرياض


وأي سؤال أو أستفسار انا حاضر

لكم خالص تحياتي وأحترامي

أخوكم ومحبكم / محمد الروقي ( أبـو مـدمـر )